Wojun 16

Onu osi wojun pjour pjwa

NYEEK lado na Moises kero bowk Aroŋ 2 kezi, kero ka bo jau zurun NYEEK. 2 NYEEK jak Moises: "Zuupun amaku Aroŋ, aki kneej ze mi ajeumi ze zun ze mpezi pjiinz ze mezu knoŋt, zurun kleri ksi kñago khoki duzu ukau usi phuuz, zonkont aki kez. Zonkont njo pbiinza ze inzun, duzu kleri ksi kñago. 3 Hunkran Aroŋ oun pneej zun ze iimna, na owai okal injaka wojun zonkont pjwa, na owk ompalalu oiinz osi wojun unturowi. 4 Aptiimo kmbis nkaañki khimunki ksi mmuuz mknjiilmi, aptiimo okata osi mmuz mntap onkai knjand, ptan olo na ktil ksi mmuuz mknjiilmi; azu ubonde usi mmuuz; yun indai yoyun yun itiimo inhimunhi. Apñou oleef lo ze mnzup antom atiimo yolo. 5 Apjek ŋmpi nkal 2 ŋnsi uzoñnor bopugi Israel injaka wojun usi pjour pjwa na ompalalu ohinz osi wojun onturowi.

6 Aroŋ opsoond owai okal ominzun injaka un onhaloi osi pjour pjwa lo, apdo wojun lo na usi bowkoliin. 7 Antom ol ajekun ŋmpi nkal 2 apsoond ŋa zurun NYEEK zoneeji oku uzoñnor. 8 Aroŋ o pdo phyeenk ze ŋmpi nkal 2; phyeenk ploŋ opho psi NYEEK; opi oloŋ o pho osi un okndwoi Asasel, one: Opi osi pjour pjwa onhoi phutno antom osol oloŋ phya olaal. 9 Opi okal osi oneejo jetunk ze olo opsoond NYEEK, Aroŋ opñog na, apdo wojun usi un onhaloi osi pjour pjwa. 10 Opi osi oneejo jetunk duzu olo antom o opi onhoi phya na pjwa, Aroŋ opsoonda na phyla zurun NYEEK antom pjwa jet duzu olo, antom ol ahilanu olo zolaal injaka opi oi phya na pjwa.

Wojun usi pjour pjwa Nyeek bopenen Uzi

11 Aroŋ opñogun owai okal oi pho un onhaloi pjour pjwa lo; apfiŋ a, apdo wojun na olo zoleef lo na bowkoliin. 12 Asa opjek kena kzui nsensu uz zurun NYEEK isum uroo usi pkak zurun NYEEK, apsumun nsensu kñene ŋyas 2 na nsensu inlonohi iknñeelhi un onliili, aphya na ya ze mezu knoŋt. 13 Apzu nsensu duzu uroo zurun NYEEK. Odu osi nsensu opler kleri ksi kñago, khoki duzu ukau Uzi usi mnjaŋzin, antom Aroŋ ki kez. 14 Apjek pñaak mpozpi psi owai okal, apgur pa na pkoñ lo duzu kleri ksi kñago, zojir pmair onu, asa o pgur pa uz ŋyas 7 zurun kleri kminzkun ksi kñago.

Wojun zonkont bopugi

15 Antom afiŋ opi okal injaka un onhaloi zonkont pjour pjwa psi bopugi aphya na pñaak ze mezu knoŋt, aplemp na pa injaka ze mi alempmunk na pñaak owai okal, apgur pa duzu kleri ksi kñago, zurun kolo uz. 16 Hunkran adun pdo wojun antom pjinjinzun zun ze mpezi piimun zonkont kzopi bowk Israel, na pjwa boko uzuuz ze mi bo kitmi oiimna, apjinjinzun oku osi uzoñnor uz onhoi zun boko ze zesi uzoñnor ze psoof kzopi boko. 17 Nin ñiinz aloŋ azo pho zoku osi uzoñnor zoyar Aroŋ an neej pdo bol ze zun ze iimna, ampjau zopunr lo. Hunkran adun pdo wojun lo, usi bowkoliin, na uzoñnor uzuuz usi bowk Israel. 18 Antom ol apunun phya ze pkak phopi zurun oku osi NYEEK, apdo wojun usi lo. Apjek pñaak owai okal na pñaak psi opi okal, apzu pa ze ŋnjir uzuuz ŋhoŋi ze itin pfoyo pkak. 19 Na pkoñ lo apgur pñaak ploŋ duzu pkak ŋyas 7 antom pjinjinzun kzopi ksi bowk Israel, sa pzu pkak pminzpun piimun.

20 Zoyar Aroŋ antom pdo wojun zun ze mpezi piimun, na oku osi uzoñnor na pkak, apñogun opi okal onhili. 21 Apzu iñen lo uzuuz duzu ween opi okal onhili, azuup ŋun ŋntuuntoŋi uzuuz ŋi bowk Israel doŋi, na pjwa boko uzuuz; ween opi ominzun, pjwa bowk Israel uzuuz ze mi bo kit munk oiimna, po pzwo ze kñen ñiinz antom plemp utihun uminzun, azu kñene duzu ween opi okal antom aya na olo zolaal. 22 Hunkran opi oun pkuŋo pjwa boko uzuuz, duzu ween olo, zun ze nhyozi; ñiinz ophutun na zolaal.

23 Aroŋ opneej zoku osi uzoñnor apdut yun lo isi mmuz mntap isi ahili tiimoo kero ka neej zun ze mpezi piimun, apduk yun iminzyun zolo. 24 Apñou oleef lo na mnzup zun ze iimna, aptiimo yun lo isi ajoni ze tiimo. Antom ol apunun, apdo wojun lo unturowi na uloŋ usi bopugi, apdo wojun usi ween lo na bopugi uz. 25 Asa optur mnir uz mnsi un onhaloi osi pjour pjwa ze duzu pkak. 26 Ñiinz anhutni opi okal onhyai na pjwa, apñou yun lo, apñou oleef na mnzup; antom ol ahilnun pneej zun uzoñnor. 27 Ka owai okal na opi okal ŋho ŋun ŋhaloŋi zonkont pjour pjwa, pñaak ŋolo yai zun mpezi piimun ze pdo wojun, nka puno zun uzoñnor. Injand ŋolo oyemz ŋolo na omez uzuuz na oziip ŋolo ŋho pturo uzuuz. 28 Ña anturi ŋolo aka pñou yun lo, añou oleef na mnzup antom ol aneejun zun uzoñnor.

Onah pjour pjwa kana olura

29 Uni o pho oiimna nde onzañi; Ze pli pjaandun, ze ŋnu 10, nde pho zibuur pham pde; nde zo plemp utihun uloŋ, ŋanun utihun o usi ña ze nde o nya ze psoof nde. 30 Zonkont onu ominzun wojun opdolo pjinjinzun nde. Hunkran ndeun pduko pjiinz ze pjwa nde uzuuz zurun NYEEK. 31 O onu oiimna osi phyoŋ ze nde; nde pho zibuur pham pde. Uni o pho oiimn onzañi. 32 Nmpenen Uzi ankiroi, anhiimnani pho nyeek bopenen Uzi ze kfah ksi aliin, apdo wojun uminzun, aptiimo yun iimna isi mmuz mntap. 33 Hunkran aun pdo bol psi zun ze mpezi piimun, na oku osi uzoñnor, na pkak, asa o pdo uz bol psi nmpenen Uzi, injaka bol uzuuz psi uzoñnor bopugi. 34 Uni o pho oiimna oi pduko onzañi, pdo wojun wyas uloŋ zolura, ze pjwa uzuuz psi bowk Israel. Aroŋ lemp injaka mi NYEEK hilunk jak Moises a do.