Kzopi ksi ñiinz na ñaaz
15
NYEEK pot jak Moises na Aroŋ: 2 bolado na bowk Israel, antom bo jak boko: "Ñiinz ankai pmaak pkmpumpi ze phinz lo, apho ña anzopi zonkont un okmpununk zoleef lo. 3 Ze un ominzun ze pun zoleef lo opzwa pzop. Ze minzmi un ompununk lo zoleef opzwa azop. 4 Uliit usi apiinzni bo pho uliit unzopi injaka izoori uzuuz isi azoonhi. 5 Ña andaproi uliit lo, a ka pñou yun lo, apñoo na mnzup, apduko na kzopi ampjau ze montna. 6 Ña anzoori zun ña anzopunk hili zooni apñou yun lo, a sa opñou oleef lo uz na mnzup, apduko na kzopi ampjau ze montna. 7 Ña andaproi ñiinz ankai un okmpuni zoleef lo apñou yun lo itiimo, añou oleef lo na mnzup apduko na kzopi ampjau ze montna. 8 Ze ñiinz ankaunk pmaak ze phinz lo tubjar ña anjiinzi, ña anjiinzunk opñou yun lo, pñou oleef na mnzup, apho ña anzopi ampjau ze montna. 9 Ze ñiinz aminzun ankai pmaak pkmpumpi ze phinz lo, zuu un oloŋ duzu onsaam, antom dapo duzu olo, onsaam ominzun o pho onsaam onzopi. 10 Ña andproi un oloŋ onhili o zeu lo, apho ze kzopi ampjau ze montna; ña njeki un ominzun aka pñou yun lo itiimo, pñou oleef na mnzup apho ze kzopi ampjau montna. 11 Ze ñiinz aminzun dapro ña ampñou iñen lo urun na mnzup, ña andaprounk lo aka pñou yun lo, pñou oleef lo na mnzup pho ze kzopi ampjau ze montna. 12 Uzaank usi ñiinz aminzun daproi uka pfomo; usa o usi mndera uka pñowo na mnzup.13 Zoyar un okmpununk ze phinz lo hutun pun zoleef ñiinz aminzun, aphyooŋ ŋnu 7 antom ajinjinzno. A ka pñou yun lo na oleef lo ze mnzup mi kmbulunkmi; apduko pjiinz. 14 Zonu obakrin apjek ŋwale 2 ŋnsi pgof o ŋwale 2 ŋnsi mez, aphya zurun NYEEK zoneeji oku uzoñnor, aphul nmpenen Uzi ŋa. 15 Nmpenen Uzi ka pdo na ŋa wojun, oloŋ injaka un onhaloi osi wojun zonkont pjwa, oloŋ o osi wojun unturowi. Hunkran adun pmug wojun zurun NYEEK pjinjiinzun ñiinz aminzun zonkont pmaak pnhilunk ze pun ze phinz lo.
16 Ñiinz asi undiu puni ze lo apñou oleef lo uzuuz na mnzup, apduko na kzopi ampjau ze montna. 17 Yun itiimo inkai undiu o knjand knkaki undiu uminzun, yo pñowo na mnzup, apduko pzop ampjau ze montna. 18 Ze ñiinz piinz na ñaaz ka undiu pun ze lo ya ze ñaaz, boko 2 bopñou ŋnleef boko na mnzup, bopduko ze kzopi ampju ze montna.
19 Ze ñaaz o ze ŋnu lo ŋnsi pñoo pli apduko ŋnu 7 ze kzopi lo. Ña andaproi lo aka pzop ampjau ze montna. 20 Ze iliit ampiinzni na izoori isi azooni ze ŋnu ŋminzŋu ika pduko na kzopi. 21 Ña andaproi uliit lo aka pñou yun lo itiimo, aka pñoo ze mnzup apduko na kzopi ampjau ze montna. 22 Ña andaproi pzoori psi azoonpi apduko na kzopi ampjau ze montna. 23 Ña andaproi un onhoi duzu uliit lo o ze pzoori psi azoonpi apduko na kzopi ampjau ze montna. 24 Ze ñiinz piinz na ñaaz aminzun ze azopun lo pñaak psi akñoopunk pli, apduko na kzopi ŋnu 7, uliit apiinznbi o pduko na kzopi.
25 Zoyar pñaak pun ze ñaaz anzip ŋnu ŋnsi akñooŋi pli, ze pñaak pminzpun zañ ze pun anzip ŋnu akaŋi pñoo pli, apho ña anzopi ŋnu uzuuz ŋnsi pñaak kpuni ze lo. Injaka ŋnu lo ŋnsi pñoo pli. 26 Uliit apiinzni ze ŋnu akñooŋi pli, na izoori uzuuz isi azoonhi ze ŋnu ŋminzŋun ŋho pzop, ze mi kzopi pñoo pli lo oki. 27 Ña andproi ŋolo apho ze kzopi, apñou yun lo, apñoo na mnzup apduko na kzopi ampjau ze montna. 28 Zoyar pñaak an toom pun ze lo, bo pfin ŋnu 7, antom ol ajiinzun. 29 Zonu obakrin, apjek ŋwale 2 ŋnsi pgof o ŋwale 2 ŋnsi mez, aya na ŋolo ahul nmpenen Uzi zoneeji oku uzoñnor. 30 Nmpenen Uzi opdo wojun usi un onhaloi osi pjwa. oloŋ osi un onhaloi onturoi. Hunkran aoun pmug wojun zurun NYEEK, ña aminzun zonkont kzopi lo.
31 Hunkran nde kadun pdiitun bowk Israel bo looro na kzopi boko bo ki kez zonkont bo pzopun oku ni onhoi ze psoof boko.