Oiimna Osi Iziñr Zohilr yolo.
14
NYEEK jak Moises: 2 Uni oun oiimn osi pjinjinzun ña ajundoi pmaak iziñr. Bo phya na ya ze nmpenen Uzi. 3 Nmpenen Uzi o pun zun uzoñnor, aptena na mnjona. Ze ña aminzun o jundoo pmaak iziñr, 4 Nmpenen Uzi opjak baka bobina nkas 2 ŋhilŋi, jiinzi, ŋnsi ñai pjinjiinzno, na pun psi sedru, mmuuz mnjenkle, na pun pkndwopi isopi. 5 Nmpenen Uzi sa pot ophilan okas oloŋ uz, oi pfiŋo duzu mnzup mnhyalmi zuzaank.6 Antom apunun okas ominzun onhili, na punu sedru, mmuuz mnjenkle, na isopi, apñoyun ŋa ze pñaak psi okas onfiŋounk duzu mnzup mnhyalmi. 7 Aka pgur pñaak ŋhyas 7 duzu ña ankai pjinjinzno iziñr, antom ajako ajiinzi. Antom ahutun okas ominzun okak pgof. 8 Ña aounk pjiinjinzno aka pñou yun lo, aptih oyel lo uzuuz, añoo na mnzup; hunkran adun pjiinz. Antom a neej zun uzoñnor, aka pduko zunaam ka azo pneej zoku lo ampka ŋnu 7. 9 Zonu ojaandu aptih oyel lo uzuuz, osi weene, osi uruun, oyel nkaank na oyel oleef lo uzuuz. Apñou yun lo, pñou oleef lo na mnzup, antom ujiinz.
10 Zonu obakrin apjek ŋhwk ŋmpalalu, ŋiinz 2 na ohaz 1, ŋnsi olur 1, ŋozo pka kzeu, na ŋnlitru 6 ŋnsi ifor indeŋlhi inagohi na mnsitidos, isi un onhaloi osi un ode, pot bundar psoof olitru osi mnsitidos. 11 Nmpenen Uzi aounk pdo wojun pjinjinzno apjaŋ ñiinz aounk pjinzjinzno, zurun NYEEK, na un onhaloi osi lo zoneeji oku uzoñnor. 12 Nmpenen Uzi opjek ompalalu oloŋ ze ŋmpalalu ŋminzŋun apdo na a wojun injaka un onhaloi osi un ontuuntoi, na psoof olitru osi mnsitidos; aphiind ŋa zurun NYEEK injaka un onhaloi osi phiind zurun NYEEK. 13 Aka pfiŋ owk ompalalu zun ze iimna, zun onsaam osi un onhaloi osi pjwa na un onhaloi osi wojun unturowi aika fiŋna. Hunkran un onhaloi osi un ontuuntoi, injaka un onhaloi osi pjwa, oko osi nmpenen Uzi; oKo un onhimni maakrin. 14 Nmpenen Uzi opjek pñaak pmpozpi psi un onhaloi osi un ontuuntoi, apzupa ze pleŋleŋ khwaz krei ksi ña anhoi pjinjiinzno, duzu pkoñ phyeek psi kñen krei uz, na pkoñ phyeek psi pzim lo prei. 15 Nmpenen Uzi opjek psoof olitru osi mnsitidos uz, aphas ma zonaŋj kñen lo kmai. 16 Antom añoyun pkoñ lo prei ze mnsitidos mhomi zonaŋj kñen lo kmai; na pkoñ lo apgur mnsitidos minzmun ŋyas 7 zurun NYEEK. 17 Mnsitidos mnduklomi ze kñen nmpenen Uzi apzu ma ze plenŋleŋ khwaz krei ksi ña bojinjinz nunk, na pkoñ phyeek psi kñen krei, na pkoñ phyeek psi pzima prei, duzu pñaak psi un onhaloi osi un ontuuntoi. 18 Mnsitidos mnduklomunk ze kñene, apzu ma duzu ween ña anjinjiznounk. Hunkran, nmpenen Uzi oun pdo wojun usi pjwa ña aminzun zurun NYEEK. 19 Apdo wojun usi un onhaloi osi pjwa antom pjour ña anjinjinznounk kzopi lo. Antom nmpenen Uzi fiŋ ŋnsaam injaka un onhaloi turoo, 20 opzwo duzu pkak, na un onhaloi onturoi na un onhaloi osi un ode. Hunkran nmpenen Uzi oun pdo wojun usi pjwa psi ña aminzun, antom ajiinz. 21 "Zañagani, azi hilun pber ŋnsaam ŋminzŋu uzuuz, aphyana owk ompalalu oiinz antom o un onhaloi osi un ontuuntoi, injaka un onhaloi osi phiind, antom o wojun usi pjwa lo, na ŋnlitru 2 ŋnsi ifor indeŋlhi nag na mnsitodos mnsi un onhaloi osi un ode, na psoof olitru osi mnsitidos. 22 Na ŋwale 2 ŋnsi pgof o ŋwale 2 ŋnsi mez, ze mi ahilun mi pdat, oloŋ opho osi un onhaloi osi pjwa, oloŋ opho osi un onhaloi turoo. 23 Zonu obakrin osi pjinjinzun lo, aphya na ŋa ze nmpenen Uzi ze psoof oku uzoñnor zurun NYEEK. 24 Nmpenen Uzi opjek owk ompalalu antom o un onhaloi osi un ontuuntoi, na psoof olitru osi mnsitidos, aphiind ŋa zurun NYEEK injaka un onhaloi osi phiind. 25 Apfiŋ owk ompalalu injaka un onhaloi osi un ontuuntoi, apjek pñaak psi un onhaloi osi un ontuuntoi, apzupa ze pleŋleŋ psi kwaz krei ksi ña anjinjinznounk, na pkoñ phyeek psi kñen lo krei, na pkoñ phyeek psi pzim lo prei. 26 Nmpenen Uzi uz aka phas mnsitidos zonaŋj lo osi kñen lo kmai; 27 apñoyun pkoñ lo prei ze mnsitidos minzmun mhomi zonaŋj kñen lo kmai, apgur ma ŋyas 7 zurun NYEEK. 28 Apzu mnsitidos mnloŋ mhomunk zonaŋj ze kñen lo ze pleŋleŋ kwaz krei ksi ñai pjinjinzno, ze pkoñ uz phyeek psi kñen lo krei, na pkoñ phyeek psi pzim lo prei, duzu pñaak psi un onhaloi osi un ontuuntoi. 29 Mnsitidos mnduklomunk ze kñen nmpenen Uzi, apzu ma zween ñai pjinjinzno, pzinkna wojun usi pjour pjwa lo zurun NYEEK. 30 Antom, nmpenen Uzi aphul owale oloŋ injaka un onhaloi ze ŋwale pgof o ŋwale ŋmpozŋi ŋnsi mez ŋnsi ña aminzun zinki; 31 oloŋ injaka un onhaloi osi pjwa, oloŋ osi un onhaloi osi wojun unturowi, na un onhaloi osi un ode. Hunkran nmpenen Uzi oun pdo wojun zurun NYEEK usi pjwa psi ñai pjinjizno." 32 Uni oun oiimna osi ña ankai kziñr kikluutki, ka azi hilun pzink un onhaloi onfiroi pjinjinzun lo.
Oiimna osi iziñr ijenkle ze mez
33 NYEEK pot jak Moises na Aroŋ:
34 "Zoneejr nde zozee kanaan, njoi phul nde o osi nde, ze nji hilan Pmaaka kziñr pnlaarpi zosaak ominzun, 35 nminz mez ka phya pjak nmpenen Uzi: "Nji iin un oloŋ ze mez ni onaamzani na pmaaka psi kziñr." 36 Nmpenen Uzi opjak baka bopunun ŋun uzuuz ŋhoŋi ze mez kero azo jau ze mez pten kzopi kminzkun. Zoampho molo ŋun uzuuz ŋhoŋi ze ku ŋopjako ŋnzopi. Antom nmpenen Uzi abi ten ku na mnjona. 37 Zaiin kzopi, ze bool ka ir impozhi ifulamul o ijenkle impei pdiil ampempen bool pnkhiropi, 38 nmpenen Uzi opun ze ku kminzkun, apnaz ze plumun, antom pja ku kminzkun opdiso ŋnu 7. 39 Zonu ojaandun, nmpenen Uzi opkak pten ku kminzkun. Ze kzopi pbundar pler bool, 40 apjak baka bopunun ilaak ze bool iliso zuri usi kmbau, zun nzopzi. 41 Antom pjak baka bogoot bool psi mezu; mbool mpumunk opliso zuri usi kmbau zun nzopzi. 42 Antom bo jek ilaak iloŋ, bozu yolo zun ilaak impunoyunk antom bojek mbool mhalu bokirn ku kminzkun.
43 Zopunr ilaak, ku gotoo, kiroo, ze kzopi pot pun ze ku kminzkun, 44 nmpenen Uzi opneej pten kolo na mnjona. Ze kzopi bundar ze bool, okjako khoko kzopi ki kmbundarki; hunkran ku oun pduko na kzopi. 45 Hunkran ku odun phato; ilaak kolo, mndera kolo, injaka mbool ku kminzkun uz, bo phya na ma zuri kmbau zun nzopzi. 46 Ña neej ze ku kminzkun ka ko jako kdisoo, apjako azopi ampjau ze montna. 47 Ña ampiinzi ze kolo uz pŋoinz, o pde ze ku kminzkun, apñou yun lo itiimo.
48 Ze nmpenen Uzi pot neej ze ku kminzkun pten kolo na mnjona, ze kzopi kozi bundar kero ku o toom pkiro, o pjako ku jiinzi, zonkont kzopi toomi. 49 Ze pijinjinzun ku aka phya na nkas 2, pun psi sedru, mmuz mnjenkle na isopi. 50 Apfiŋ okas oloŋ duzu mnzup mhyalmi zusya usi mbool. 51 Antom ajek pun psi sedru, isopi, mmuz mnjekle na okas onhili, añoyun ŋolo ze pñaak okas onkezi, na mnzup mhyalmi, agur polo ze ku ŋyas 7. 52 Hunkran adun pjinjiinzun ku na pñaak okas, na mnzup mhyalmi, na okas onhili, pun sedru, isopi na mmuz mnjenkle. 53 antom ahutun okas ominzun na phila zuri kmbau, ze pgoof. Ze minzmi apzinkna wojun usi pjinjinzn ku; ol kjiinzkun."