Mnsitidos Mnsi Okandel
24
NYEEK jak Moises: 2 Zuun bowk Israel antom bolon mbuk bun bikndwobi oliveira, bobina mnsitidos mnjiinz, antom psehun zunu, antom okandel seh pham pmito. 3 Aroŋ kaun pbaap ŋolo zurun NYEEK, ptep zurim ampjau ze nfa, antom ŋnseh pham pmito Zojirun inoŋnt isi kmatir zoku kmatir na oku uzoñnor. Ominzi opho oiimna ze iiñ nde ikmbihi 4 Aroŋ azo phutun pbaap okandel osi mhuru mnsi owadadi, zurun NYEEK.Opoŋ zomes osi NYEEK
5 Jekun ifor ideŋlhi, ujuŋ kpoŋ 12; ŋlitru 4 ŋnsi ifor ŋho pho kana poŋ opka ŋlitru 4 ŋnsi ifor. 6 Wo pzu kpoŋ 6 kana plinza, duzu omes osi mhuru owadadi zurun NYEEK. 7 Duzu kana plinza wo pzu nsensu owadadi, yoi pho mnlelnin, yoi pseh kfah opoŋ injaka un onhaloi turo osi NYEEK. 8 Opoŋ ominzun opzwo ze plinza zurun NYEEK kana onu osi ksaaudu, zonkont bowk Israel, injaka phuuz phopi pduko onzañe. 9 Opho osi Aroŋ na bowk; bopdea ze zun ziimna, zonkont onhimni maakrin. Zonkont mnjaŋzin hankri ampjau okil okmbilunk, ojir un onhaloi ominzun onhimni maakrin osi NYEEK opho osi boko".
Omindo osi pjwa ze pladar Uzi khuzin
10 Oka ñiinzan awk ñiinz Ejitu, ambuki na ñaaz nnsi Israel, akndwoi Salomit, nmpili oko awk Dibri nnsi kiiñ Daŋ. Ñiinz aminzun agut na ñiinz nnsi Israel zun uzoñnor. \ 11 Awk ñaaz nnsi Israel aminzun alado khuzin ze ktiim NYEEK. Onkanun boya na lo zurun Moises. 12 Bodisa zun zeloŋ anjau ze ori NYEEK oi pjaaŋ un oi pdolo.
13 NYEEK jak Moises: 14 "Ña anladounk khuzin, punana ze psoof uzoñnor. Baña uzuuz bonhoki ze mez lo bo pzu iñen duzu ween ña aminzun; antom baña uzoñnor uzuuz bo ptapa na ilaak. 15 Jakun bowk Israel: Ze ña ladar Uzi lo khuzin, a pmindo zonkont pjwa lo. 16 Ña anladari ktiim NYEEK khuzin apfiŋo. Uzoñnor uzuuz bo ptapa na ilaak. At o nya o nmbukno ozee, alado khuzin ze ktiim kminzkun, apfiŋo. 17 Ña anfiŋi ña, aka pfiŋo. 18 Ña anfiŋi onsaam ña aloŋ aka pbotun oloŋo ze kfah olo. 19 Ze ña diisun asinz maakrin, ze mi adomunk hunkran aun pdolo; 20 Ukit ña kfa usa o pkito, pkil na pkil, pñiin na pñiin. Ze adiisun ña maakrin, hunkran akadun botno pko maakrin un adoli uz. 21 Ña anfiŋi onsaam apzu oloŋ zonkont olo, ze ña fiŋ ña njina aka pfiŋo. 22 Nde pka zoiimn oloŋ, ze boya injaka bobukno osaak. Nji njoun NYEEK, Uzi nde." 23 Moises jak bowk Israel bo jek ña anladounk khuzin, boya na lo ze zun uzoñnor, bo tap lo na ilaak an akint akez. Hunkran bowk Israel dodun injaka mi NYEEK jakmunk Moises.