Olura Phyoŋ
25
Zonkuŋ Sinai NYEEK jak Moises: 2 Antom alado na bowk Israel, a jak boko: zoneejr nde zosaak njoi phul nde, osaak urina olo ka pbaap olur osi phyoŋ psi NYEEK. 3 Ze ŋlur 6 wop pjar ozee, ufus zeu mhuba, usinz mbuk molo mhiŋlomunk uzuuz ze ikit. 4 Zolur ojaandun, osaak opka ksaaudu ksi phyoŋ, khoki ksaaudu ksi NYEEK. Ika jaar osaak nu, ka ika fus ksaal nu ksi mhuba. 5 Ika kit onkaunk opaal, ka ika sinz mhuba ze pzep molo wani pfus. Opho olur osi phyoŋ psi osaak. 6 Zokil ominzun, ŋun osaak bukŋi uzuuz ŋho pho ode nde uzuuz, wi na bojuuk nu boiinz na bompili, na botihun nu, na boya bonzooki na wi. 7 Na ŋnsaam nu, na ngoŋar pgof ŋhoŋi zosaak nu. Ŋun osaak bukŋi uzuuz, ŋhilun pdeo. Okil pluul ikornet, onhoi olur phyoŋ, one phyoŋ.Olur osi Phyoŋ
8 Nde pfin ŋlur 7 ŋhyas 7, ŋhoŋi ŋlur 49. 9 Ze ŋnu 10 ze pli pjaandun, onhoi onu wojun usi pjwa, nde phil baña bo luul ikornet ze ŋnjir uzuuz ŋnsi osaak nde. 10 Nde pka ŋlur 50 injaka oiimna, nde pzuup phyoŋ ze baña bonzooki zosaak uzuuz . Opho ze olur phyoŋ; kana ña apkak zun lo, kana ña uz apkak zun baña lo. 11 Ŋlur 50 o pho ze nde olur phyoŋ. Ndezo plaal, ka ndezo pkit opahal onazounk. Nde ika sinz mhuba uz ze pzep molo mhanunk pfuso. 12 zonkont o olur phyoŋ, o piimnan ze nde boloŋ. Nde pde zosi ozee hulunk nde urina olo.
13 Zolur osi phyoŋ kana ña apkak mez lo. 14 Ze nde haap asinz nde ksaal, o nde ganz ze kñen lo, ika ña duko na un asinz. 15 Wo pganz zun ze kñen asinzu ze mi kfinu ŋlur phyoŋ anka ka fino, ptep zolur osi phyoŋ. Alo aphapu a ze mi ŋlur ikit ŋndukloŋi. 16 Ze ŋlur duklo sumi, wo pbundar prez; ze ŋlur duklo zamji, wo phail prez olo, zonkont un aiphapu o ŋlur ikit uhilni pka zolo. 17 Ika ña kuul asinz kñene, kalon Uzi nu, zonkont njou NYEEK, Uzi nde.
18 Nde baapun ilul ni, nde zal ŋiimna ni; hunkran ndeun pzoo na kliinsi zosaak. 19 Ozee o pbuk mbuk olo; nde pdea ampkint phyok; nde pzoo na kliinsi. 20 Nde hilun phyepro: el ndou pde zolur ojaandun, ze mi njanunk plaal, ka njazo pkit? 21 Nji njo philan mnjona ni ze nde zolur opaajun, ozee opbuk un ndei pde ze ŋlur 3. 22 Zolur obakrin nde plaal. Nde pde ikit izaf ampjau zolur oñenklin; nde pdea ampjau ze ikit ihalu. 23 Ozee ozo pduka hapo onzañi, zonkont nji kaun olo; nde, nde pho boya bonzooki ze olo. 24 Zosaak uzuuz nde kai, nde ka pdigzan kfah nminz olo antom ahilun pot pganz ozee ahili hapi.
25 Ze ña ze pzaro nu dutni, hap ojir oloŋ ze ksaal lo, awk aliin sotok ahilun pot pganz ksaal kminzkun. 26 Ze ña aminzun ampka awk aliin antom pot pganz ksaal kminkun, ka alo urir bi ziknan pganz kolo, 27 a pfin prez ŋlur ikit ptep zonu ksaal hapokunk. Onsaam ŋlur ŋndukloŋunk, apbotun na ñiinz anganzunk ksaal. Antom ksaal kak ze kñen nminz kolo. 28 Ze azi zinkna prez pnfiropi pot pluk, prez pnhapnpunk kolo ksaal o pduko ze kñen ña anganzunk kolo ampjau zolur phyoŋ. Zolur ominzun ksaal ko pbotun nminz kolo.
29 Ze ñiinz hap ku ze kmbau knkundoki na omur, apduko na kfah ksi pot pganz kolo ampkint pzinkna olur ahapunk kolo. 30 Zampot pganz kolo ze mezu olur oloŋ, ku kminkun ze mezu kmbau knkundoki ko pduko onzañi ze kñen ña aganzunk kolo, antom bowk iij kolo. Ko pkak ze kñen nminz kolo ninseke zolur phyoŋ. 31 Ka iku ze ŋntanka, yozi ka omur foyo, yopzwo injaka isaal. Nminz yolo hilun pot pganz ya, o apkakunk ya zolur osi phyoŋ. 32 Ka bolevita hilun pot pganz iku boko zimbau bohulohi. 33 Ze ña aloŋ ze bolevita hap ku ahuloki ze kmbau lo, ze azi bi ganz ka ko pkakno zolur osi phyoŋ, zonkont iku zimbau bolevita oko isi boko onzañi ze psoof bowk Israel. 34 Ksaal ze pñog kmbau bolevita kozi hilun phapo, zonkont khoko ksi boko onzañi.
Oiimna Zojir Boñagina
Oiimna 15:7-11
35 Ze asinzu ze Israel huglo pñagin, ka ofoz lo toomi, wo pdenden naa injaka Nmbi o nya, antom ahilun pzo na nde. 36 Ika sig opafu, uka pkalo Uzi nu, antom awk aliinu zoo na wi. 37 Ika naankan onsaam antom bi psig opafu, ka ika hapa un ode antom pka opafu. 38 Nji njou NYEEK, Uzi nde umpuni nde ze Ejitu, phul nde ozee kanaan, Antom nho Uzi nde.
Oiimna Zojir Bojuuk
39 Ze ña ze bosinzu ze Israel ñagani ona wi, bi hapu ween lo, ika zwa adol utihun injaka nnjuuk. 40 Apzoo na wi injaka ntihun, aptihunaru ampjau zolura osi mburi. 41 Zokil ominzun alo na bowk bo phulo mburi; apkak ze bowkoliin, ze mez boliin 42 Bopugi Israel bozi hilun phapo injaka bojuuk, zonkont bo o botihun ni nji puni ze Ejitu. 43 Ika liho duzu baka na ofooza, uka pkalo Uzi nu. 44 Bojuuk ndei pka bompili na boiinz, bo pun ze ŋnsaak ŋnfoyoŋi nde. Nde hilun pganz bojuuk ze iñen boko 45 Nde hilun pganz bowk boya uz bonzooki ze psoof nde. Ña ze bowk boko bo buki zozee nde, bo hilun pganzo antom bo o bosi nde. 46 Nde hilun pduk baka injaka piij psi bowk nde; bo pho bojuuk ze phila boko uzuuz. Ka ndezi hilun pliho duzu bowkoliin nde na ofooza.
47 Zoyar nya anzoori ze psoof nde bi zink mnira, ze ña aloŋ ze bowkoliin bi ñagani, hap ween lo ze kñen nya aminzun, o ña anhoi awk aliin nya, 48 zotomr lo phapo, ahilun pka kfah ksi phyoŋ. Ña aloŋ ze bowkoliin hilun pot pganza. 49 Aliin lo ñiinz na ña asi boliin boko zarouki, na ña bowk boliin boko zarouki hilun pganza. Zaka onsaam, ahilun pburburun ween lo uriina lo. 50 Alo na ña anganzi lo bo pfin ŋlura, ptep zolur ahapi ween lo ampjau zolur osi phyoŋ; prez ahapopi po pho injaka ŋnluraŋnsi ña ai kluk ntihun. 51 Zoduklo ŋlur ŋnsumŋi, apluk antom pburburun ween lo onsaam oloŋ osi ahapohi zonkont ŋlur ŋminzŋun. 52 Ze ŋlur duklo ŋmpozŋi antom pjau zolur osi phyoŋ, apdol onkont na lo ze ŋlur ŋndukloŋi; hunkran aun pluk phyoŋ lo. 53 Bo pzwa injaka ntihun aknlukoi kana olura; uzo phutun nminz lo aliho duzu lo na ofooza. 54 Zampbur ze minzmi, alo na bowk bo pun zolur osi phyoŋ, 55 Zonkont nji kaun bowk Israel injaka bojuuk nin; nji punun baka zosaak Ejitu. Nji njoun NYEEK, Uzi nde.