Pzaŋ baña zonkont ŋnzi nkezŋi
26
Nde ika lemp ŋnzi ŋnloŋ antom pbuur na ŋolo, ka nde ika lemp ŋnsantu, nin plaak pnhiimumpi; nin plaak pnfejopi zosaak nde antom nde juuz zurun polo. Njoun NYEEK, Uzi nde. 2 Nde baapun isaaudu isi phyoŋ; nde pmolo zun nin ze iimna. Njoun NYEEK.Mnjona zojir Pte
Oiimna 7:12-24; 28:1-14
3 Ze nde yaanz zilul nin, molo ŋiimna nin, ze nde do ŋolo, 4 njo phul nde olura ze klehe olo; ozee o pbuk mbuk olo; mun opbuk mbuk molo. 5 Nde pzañ ze pol trigu ampjau zimar mhuba; nde psinz mhuba ampjau ze ilaal; nde pde ampkint phyok; nde pzoo na kliinsi zosaak nde. 6 "Njo phul nde phyoŋ zosaak; nde piinz; ña azo plinklinkun nde. Njo punun ngoŋar ŋhuzŋi zosaak; ogut ozi poto pho zosaak nde. 7 Nde pdook bobir nde; bo pjet pkez na yeje zurun nde. 8 Baña 5 ze nde opdook 100; 100 ze nde opdook baña 1000; bobir nde opjet zurun nde pkez na yeeje. 9 Njo pten nde na kñago, njo pzu nde, nde buk nde bundar maakrin; njo pnazun phuuz ni na nde. 10 Nde pde isepru isi ikit olur onzipi an nde kint nde punun yolo zuri zonkont ikit ihalu. 11 Njo pho zoku ni oiimna ze psoof nde; mbazo phutun nde. 12 Njo phyaanz ze psoof nde, njo pho Uzi nde; nde pho bopugi nin. 13 Njoun NYEEK, Uzi nde umpuni nde zosaak Ejitu antom nde ki kpot kho bojuuk bojitu; nji kit ikorent nde ze psoof; zu nde ka nde yaanz deŋ yeene.
Omindo zonkont phyeel Pte
Oiimna 28:25-68
14 Ze nde amptein, ampbaap ŋiimna ŋndaŋi uzuuz, 15 Ze nde yeel ilul nin, bir ŋiimna nin, nde ze baap ŋiimna ni, zu phuuz nin pozi ka ulur, 16 Nji uz njo pdo nde un ominzi. Njo pzu nde nde liink mnkartat, antom nde ka pmaak usoh, na pmaak poi psok kil nde; njo punun phila nde mpozmi mpozmi. Nde plaal osep nde ze klas, zonkont bobir nde opdea uzuuz. 17 Njo pkak pbido na nde boloŋ uz, bobir nde opka kpe duzu nde; boani pjeu nde bo pliho nde, nde pzi, nin ña azo pdook nde. 18 Ze ŋun ŋminŋi uzuuz zip ze nde, ka nde zañ ze pham ptein, njo pzañ ze pnornorun nde ŋyas 7 zonkont pjwa nde. 19 Njo pkitkitun pdeeŋ yeen nde na kpezun nde, njo pzu inzun inhoi duzu, yo injaka iferu, osaak nde sa o injaka bronsi. 20 Ofoz nde o psoko klas, zonkont ozee nde ozo pbuk ŋun ŋnde, ka munu mozo pbuk mun mnde.
21 Ze nde zañ ze ptunto ze phyanzar nde zojir ni, ka ndezi jeu ptein, njo pnornorun nde ŋyas 7 pempen, ze mi nde jwmi. 22 Njo philan ngoŋar ŋhuzin ze psoof nde, ŋoi pde bowk nde, ŋoi ptoom na ŋnsaam nde, pzu nde, nde tiiŋz, ambaña bozo piino zuri.
23 "Ze ŋun ŋminzŋi uzuuz, ndezi digzan antom nsunkl nde, ka nde zañ ze ptuunto ze phyaanz na nji, 24 nji uz njo pzañ ze ptunto ze phyaanz na nde. Nji uriini njo pnornorun nde ŋyas 7 pempen zonkont pjwa nde. 25 Njo pbina keje duzu nde antom pbotun nde pko ze mi nde kitmunk phuuz ni. Zoyar nde anzoñnor zimbau nde, njo philan ze psoof nde pmaaka pknluutumpi, antom pfiŋ nde. Nde pzwo ziñen bobir nde. 26 Zoyarin ambi fal ŋun nde ŋnde, bohaz 10 bopjuŋ nde opoŋ zonfurnu oloŋ antom bojaau olo bo hul nde; nde pdea, ka ndezo phyok.
27 Ze ŋun ŋminzŋi uzuuz, ndezi tein, nde zañ ze ptuunto ze phyaanzar nde zurun ni, 28 njo phuglar nde zoreu ni uz; njo pbido na nde, njo pnornorun nde ŋyas 7 pempen zonkont pjwa nde. 29 Nde bi pde oyemz bowk nde boiinz na bompili. 30 Njo psok ikak nde ze nkuŋ, njo ptoom na ikak nde isi nsensu, njo plis iliks nde duzu iliks ŋnzi nde ŋhani pka phila; njo phutun nde. 31 Njo pzu imbau nde ihuglo ŋnlaal, njo ptoom na zun nde ze iimna; mbazo plindar kñeeli knliilki ksi ŋun nde ŋhaloŋi. 32 Njo psok osaak, ambobir nde bonhoki bi pzoo ze olo bopduko na kliinki. 33 Njo ptaaslan nde ze psoof ŋnsaak, njo psoot keje ni ze kfez nde. Osaak nde opduko pbatzaro, imbau nde opsoko uzuuz.
34 Hunkran osaak oun pduko na ŋlur mburi olo mnsi isaaudu olo, ze nkil uzuuz onhani pjaaro, nde pho zosaak bobir nde. Zokil ominzun osaak ophyooŋ, opduko na mburi isaaudu olo. 35 Nkil uzuuz nde batzari osaak, opka ŋnlur ŋnsi phyoŋ ohili ampka kero ka nde o ze olo. 36 Bondukouki ze nde na phila, njo pzu kliinki zijuuns boko zosaak bobir boko, an mntiŋzan otun oyook kfuzi opzu baka bo zi. Bo pzi injaka ña akmburi keeje, ambo jet nin ña azi dook baka. 37 Bo pjet duzu bosinz boko injaka bo pzi pbur keeje, nin ña azi dook baka. Ndezo philun pnaz zurun bobir nde. 38 Nde pkez ze psoof ŋnsaak; ŋnsaak bobir nde ophyor nde. 39 Bondukloki ze nde, ofoz boko o ptoom mpozmi mpozmi, zosaak bobir boko zonkont pjwa boko. Zonkont pjwa boliin boko uz bo phaŋ ofooza.
40 Ka bo pjeñlo ze pjwa boko na pjwa boliin boko, ze mi bo huglomunk ñankun na nji ze phyaanzar boko, bozi tein, 41 ozuun nji uz ka nji huglar boko, mbazi ona baka, nji yana baka zosaak bobir boko. Zijuuns boko intaambzhi jiñlo, ka bodigzan onor bo oni zonkont pjwa boko, 42 njo plel phuuz ni na Jako, Jaaki na Abroŋ. Nji sa o plel osaak boko. 43 Osaak o pbur baka, opka ŋlur olo ŋnsi isaaudu; zobatzar baña olo, bo pluk pjwa uzuuz psi bodopi, zonkont bobir ŋiimna ni, bo beh ilul ni. 44 Ze minzmun zoor boko zosaak bobir boko, mbazo pbir baka, ka mbazo phutun baka, ptoom na boko, pkit phuuz ni na boko, zonkont njoun NYEEK, Uzi boko. 45 Zonkont kfundar ni ze boko njo plel phuuz ni na boliin boko bojonan, boki nji pununki zosaak Ejitu zurun ikil ŋnsaak uzuuz, antom nho Uzi boko. Njoun NYEEK.
46 Ŋndaŋi ŋho ŋiimna, na ilul isi NYEEK huli ze kñen Moises ahul bowk Israel Zonkuŋ Sinai.