Pkak psi wojun
38
Alemp pkak uz psi mndera akasya, mnsi wojun unturowi ze pkak, pminzpun pliŋ ŋnjir uzuuz psi ŋmetru 2,2 okañr na ŋmetru 2,2 ŋnsi ohanr na ometru 1,3 osi ohalr. 2 Ze ijok olo 4 afej itin yo zun ze loŋ na pkak, ler polo na mhuru. 3 Alemp ŋun polo uzuuz na kobre: Ŋun ŋnjai ka biñ ofoou, ŋmpah olo, isya igarfu na ŋnfugader. 4 Sa pot lemp grelya ksi kobre, isi pkak, zun uroo hilni phona,hilun pjau ze psoof ohalr pkak. 5 Alemp insawaŋ 4 isi kobre isi ijok 4 isi grelya, zonkont ilaankun hilun pzip ze yolo. 6 Alemp ilaankun isi mndera akasya,antom ler yolo na kobre. 7 Azu ilaankun ze insawaŋ ze ŋnjir pkak antom plapn polo. Lempun pkak psi itaagwa pani pka un oloŋ ze mezu polo.Usya usi Kobre
8 Na iteni bohaz bokntihunki ze plumun oku uzoñnor a lemp isya isi kobre na isap yolo isi kobre.
Unaam oku
9 Ze pkuund unaam usi oku zojir duzu, alemp inoŋnt inlahi na mmuz miknjilmi; inoŋnt ka ŋmetru 44 ŋnsi okañr. 10 Isap yolo 20 na iluzi yolo na isap 20 isi kobre. Ihuuz na ŋun ŋhoŋi ze isap na ihuuz ya khakno ze yolo hil o praata; 11 Zojr duzu bolemp inoŋnt inkai ŋnsentimetru 44 ŋnsi okañr. Isap olo o 20 na iluzi olo o 20 isi kobre. Ihuuz na ŋun ze isap na ihuuz jai ka hakno ze yolo hil o isi prat. 12 Zojir unaam ze phyour onu hil ka inoŋnt inkai ŋmetru 22 ŋnsi okañr, na isap yolo na iluzi 10. Ihuuz na ŋun ŋohoŋi ze yolo isi bo aika khaknin yolo yo isi prat. 13 Zojir opuni onu o hil ka inoŋnt isi ŋmetru 22 ŋnsi okañr. 14 Ze kana ojir oneeji o hil ka ŋmetru 6,6 ŋnsi inoŋnt na isap 3 na iluzi yolo. 15 Zojir oloŋ osi oneejr zunaam, ze ŋjir 2 inoŋnt ka ŋmetru 6,6 na isap 3 na iluzi 3. 16 Inonŋt uzuuz inkundhi unaam yo mmuuz miknjilmi. 17 Iluzi isap yo isi kobre ihuuz na yun injai ka lapn yolo isi prat. Zojir duzu osi isap inlerhi na prat. Isap koulor na iloŋ na ifal isi prat. 18 Inoŋnt isi unaam plumun inlempohi na mmuz miknjilmi, purpura na karmesin, na mmuz miknjilmi mnlahomi, markarmi zojir ña anhili utihun uminzun. Ka ŋmetru 9 ŋnsi okañr; injaka inoŋnt unaam ika ka ŋmetru 2 ohalr. 19 Isap olo 4 na iluzi 4 yo isi kobre. Ihuuz olo na ojir duzu osi kana psap, na mnamzin olo o mnsi prat. 20 Iriiŋi oku uzuuz , okuundi unaam uz, yo isi kobre.
Ŋun ŋnfinoŋi plempn oku phuuz
21 Uni oun metal onlempni oku osi kmatir. Moises jak baka: antom bo fino: bolevita bonhoki zeu Itamar, Awk Aroŋ nmpenen Uzi, bopis un ondolohi. 22 Bezaleel, awk Uri, ninsi kiiñ Juda, alemp ŋun uzuuz ze mi NYEEK jakmunk Moises. 23 Aoliab atihun na ya, anhoi awk Aysamaki, ninsi kiiñ Daŋ, nyeek utihun, anjuli zutihun usi ufej, anhili pmakar na mmuz nfulamul, purpura, mnjenkle na mmuz miknjilmi.
24 Un onhaloi osi mhuru onhuloi antom ptihun zun ze iimna o nkilu 1000 ze mi kjaawi ksi zun ze iimna. 25 Prat pnsheopi ze iñen baña bosi inzoŋ bonjaawoki zujaau pho 3.430 nkilu ze mi bokjaaumunk ze pliin zun ze iimna 26 Kana ñiinz ankai ŋlur 20 phya duzu, kero ka zip zun ujaau, ahul beka osi prat, onhoi psoof onkilu ze mi ujaau pliin. Baña bonzipki bo o 603.550. 27 Osi prat ominzun o nkilu 3.400 plemp isap isi zun ze iimna; osi inoŋnt uz, nkilu 34 ze pluzi ploŋ. 28 Na nkilu 30 ŋminzŋu ŋnsi prat, Bezaleel lemp ihuuz na mnaamzin, aler ojir duzu isap. 29 Kobre osi un onhaloi osi NYEEK o nkilu 2.425. 30 Na olo bo lemp iluzi isi zun uzoñnor, na pkak psi kobre, na grelya ksi kobre, na ŋun uzuuz ŋnsi pkak. 31 Na iluzi isi kiija ze kwaŋ na iluzi unaam usi plumun, na iriiŋi isi oku na isi kiija.