Wojun usi piimnan bopenen Uzi
29
NYEEK jak Moises: Uni woun pdo boko antom piimnan boko, antom bo hilun ptihunarin injaka bopenen Uzi: jekun owai okal na ŋmpalalu 2 nkal ŋani pka kzeu, 2 na opoŋ ohani pka iferment, na obulu ohani pka iferment, onagi na mnsitidos, na iwalaans yani pka iferment inaghi na mnsitidos; wo plemp ya na ifor opoŋ isi trigu, 3 Zuun ŋa ze pnturu, na owai okal nu na ŋmpalalu 2 nkal. 4 Ka wo phya na Aroŋ na bowk zoneeji oku uzoñnor antom uñou boko na mnzup; 5 Antom ujek yun utiimo, utiimun Aroŋ na kmbis nkañki, na oyenknin nmpenen Uzi na kdeki ujuuns. Wo ptana ka na ktil ksi ña ankai ulipl plemp esmeralda na oyenknin nmpenen Uzi; 6 Wo pzwa ubonde ze weene na kndaŋu kiimna ksi knjiinzi duzu ubonde; 7 Jekun mnsitidos mnsi pkir antom was molo duzu ween lo. Hunkran woun pkir lo. 8 Bina bowk Aroŋ antom utiimun boko imbis inkañhi. 9 utan boko isepeŋ inkaanhi. Utan Aroŋ itil na bowk, utan boko ifiita, antom bo hilun pdo utihun usi penen Uzi injaka oiimn ozañi, antom uiimna Aroŋ na bowk.10 Ñognan owai okal zun uzoñnor, Aroŋ na bowk bo pzu iñen duzu ween owai okal ominzun. 11 Wo pfiŋa zurun NYEEK, zoneeji zun uzoñnor. 12 Antom, ujek pñaak psi owai okal na pkoñ nu wo pzu pa zitin pkak; pñaak pnduklopunk wo phas pa zozee pkak. 13 Wo pjek uz mnir uzuuz mnlermi omez na ojir onjaunk ka ler oreu, na kozkoz 2 na mnira antom utur molo ze duzu pkak. 14 Ka oyemz owai okal, na knjand olo, na ŋun omez, turun ŋa zunaam zun uzoñnor; oko injaka wojun unturowi zonkont pjwa. 15 Antom ujek ompalalu okal, Aroŋ na bowk bo pzu iñen duzu ween ompalalu. 16 Wo plaat ompalalu, antom ujek pñaak olo, ugur polo duzu pkak uzuuz . 17 Wo pfalfalun na inzink inzink, wo pñou ojir omez na ŋmpifr, upaflan yolo duzu ween olo. 18 Hunkran woun ptur ompalalu uzuuz duzu pkak; oko wojun unturowi usi NYEEK, un oñeli un onliili okndwoi aroma, un onhaloi onturoi zonkont NYEEK.
19 Antom ujek ompalalu oloŋ okal, ka Aroŋ na bowk bo pzu iñen duzu ween olo. 20 Wo plaat ompalalu, wo pjek pñaak olo, ukir polo ze ptoomi kwaz krei ksi Aroŋ na ptoomi iwaz irei isi bowk, injaka uz pkoñ pyeek psi kñen lo krei na pkoñ pyeek psi pzim lo prei; pñaak pnduklopunk ugur polo duzu pkak na kwaŋ polo. 21 Jekun pñaak phopi duzu pkak, na mnsitidos mnsi pkir ugur molo duzu Aroŋ na yun lo itiimo, duzu bowk na yun boko itiimo na lo; antom ajinjinzno, na yun lo itiimo na bowk na yun boko itiimo na lo.
22 Jekun mnira mnsi ompalalu na utant unirwi, na mnir mnlermi omez, na duzu pnsinzan, na kozkoz 2 na mnir molo, na pkab prei, zonkont o ompalalu oiimna; 23 Na poŋ uz, na pbulu pnagopi na mnsitidos na iwalaans na pnturu psi opoŋ onhani pka iferment onhoi zurun NYEEK. 24 Wo pzu ŋun ŋminz ŋi ze iñen Aroŋ na iñen bowk wo piind ŋa ze njir uzuuz wo phal ŋa injaka un onhaloi onhindoi zurun NYEEK. 25 Antom useh ŋolo ze iñen boko antom utur ŋolo duzu pkak; oko wojun usi NYEEK, osi aroma oñeli un onliili, un onhaloi onturoi zonkont NYEEK.
26 Jekun ujuuns usi ompalalu onhiimnani osi Aroŋ, uhind olo ŋnjir uzuuz , wo phala injaka un onhaloi zurun NYEEK; Ominzi oun osinu. 27 Wo piimna ujuuns ompalalu onhaloi, indo na pnzink psi pkaba phindopi, pnpunopi zompalalu okal onhiimnani, onhoi osi Aroŋ na bowk. 28 Un ominzi opho un bo kai pdo onzañi osi bowk Israel zonkont Aroŋ na bowk, zonkont pho pnzink psi nmpenen Uzi, phaalopi, zojir bowk Israel psi wojun usi phyoŋ oun un woi phal NYEEK.
29 Yun itiimo isi Aroŋ iimnani yo phul bowk bo dukno, antom bokiro ze yolo. 30 Awk ansehi kfah Aroŋ injaka nmpenen Uzi, zo neejr lo zoku osi uzoñnor antom pdol utihun zun ze iimna, aptiimo yun iminzyun ŋnu 7.
31 Wo pjek ompalalu oiimna, ujuŋ oyemz olo zun ziimna. 32 Zoneeji zun uzoñnor, Aroŋ na bowk bo pde oyemz ompalalu ominzun, na opoŋ onhoi ze pnturu zoneeji oku uzoñnor. 33 bo pde ŋun ŋndonŋi wojun, piimna ŋolo pjinjinzun ŋolo; nya azo pde ŋa zonkont ŋiimnani. 34 Zoyemz ominzun osi oiimna na opoŋ duklo, anjau ze nfa, wo ptur ondukloi; Ozo pdeo, zonkont oiimni.
35 Hunkran woun pdol Aroŋ na bowk ze mi nji jakmunk wi; wojun usi oiimna opka ŋnu 7. 36 Kana onu wo pber owai okal osi wojun usi pjour pjwa; antom ujinjinzun pkak, wojun pjour pjwa duzu polo, ukir polo antom uiimnan polo. 37 Ŋnu 7 wo pdol wojun usi pjour pjwa duzu pkak antom uiimnan polo; ka pkak opjiinz maakrin; un ondaproi polo oka pjiinz.
Ŋun ŋhaloŋi onzañi.
38 Uni woun pdon wojun duzu pkak: ŋmpalalu 2 nkaŋi olur 1kana onu. 39 Wo pdol wojun na owk ompalalu na nfa, oloŋ na montna. 40 Na owk ompalalu 1, wo phul nlitru 2 ŋnsi ifor opoŋ, inagohi na olitru 1 osi mnsitidos mnlonomi; un onhaloi osi pkem wo phas olitru 1 osi pkem. 41 Owk ompalalu oloŋ wo pdo na a wojun zoyour onu injaka un onhaloi osi ŋun ŋnde, na un onhaloi osi pkem ze nfa, osi aroma onñeeli un onliili, un onhaloi onturoi zonkont NYEEK. 42 Uni oun pho un onhaloi onturoi oi pdolo onzañi ze iiñ nde, zoneeji oku uzoñnor, zurun NYEEK, zun njoi pjik na nde antom plado na wi zolo. 43 Zolo, njo bi ze bowk Israel, zonkont ulujl ni bo bojinjinzno, 44 njo piimna oku uzoñnor na pkak; nji sa o pjinjinzun Aroŋ na bowk uz, antom botihunarin injaka bopenen Uzi. 45 Njo pzoo ze psoof bowk Israel njo pho Uzi boko. 46 Bo pme pja nji njoun NYEEK, Uzi boko umpununbi boko zosaak Ejitu, antom pzoo ze psoof boko; nji njoun NYEEK, Uzi boko.