Yun itiimo bopenen Uzi
28
NYEEK jak Moises: Wi urinanu hilanan pdu amaku Aroŋ, na bowk bo bi ona wi ze psoof bowk Israel bobi tihunarin injaka bopenen Uzi, one Aroŋ na bowk bonhoki Nadab, Abiu, Eleazar na Itamar. 2 Lempun yun itiimo iimnani isi Aroŋ, amaku, isi pñigo na ulujl.Yun itiimo bopenen Uzi
3 Wi urinanu zuupun boiinz bonlipuki uz antom sum Oyek osi ulipl, bo lemp yun itiimo isi Aroŋ, bo iimnan lo, adolin utihun bopenen Uzi. 4 Yun itiimo boi plemp yo pho indai: Kdeki ujuuns, na oyenknin osi nmpenen Uzi, kmbis nkañki, kpooti kmarkarki, ubonde na ktil. Bo plemp yun itiimo iimna isi Aroŋ, amaku, na isi bowk, antom bo dolin utihun bopenen Uzi. 5 Bo pjek mhuru na mmuz nfulamul, purpura, karmesin, mmuz miknjilmi.
Omant nmpenen Uzi
6 Bo plemp oyenknin na mmuz nfulamul, purpura, karmesin, na mmuz miknjilmi laho, utihun ñiinz ankai ulipl uminzbun. 7 Yopka ŋnjir 2 ŋhoŋi phir ze ŋjir 2. Hunkran yodun ptandlor. 8 Ktil khoki plempo na mnjona, plempo na mhuru, mmuz nfulamul, purpura, karmesin, na mmuz miknjilmi antom laho. 9 Wo pjek ilaak 2 isi sardonika, antom uzu itiim bowk Israel. 10 Itiim 6 ze plaak ploŋ, 6 indaayun ze plaak ploŋ ze mi bobukomi. 11 Zuun itiim bowk Jako ze ilaak 2 iminzyun, ze mi yaanka ka fejo na ilaak isi ulur. Antom uzu ilaak iminzyun ze mezu mhuru. 12 Zuun ilaak 2 zojir oyenknin, antom yo ilaak isi mnlelnin mnsi bowk Israel. Aroŋ o plap ya na itiim boko zisak 2 ze mnlelnin zurun NYEEK. 13 Lempun iñigi isi mhuru. 14 Lempun uz kfiu 2 ksi mhuru owadadi, utihun psulun ifiu; ikorent insulunhi wo pham ya ze iñigi iminzyun.
Kdeki ujuuns
15 Lempun uz kdeki ujuuns na mun mikndwomi esmeralda. Ñinz anhili plemp utihun uminzun a plemp wa: na mhuru, mmuz nfulamul, purpura, karmesin, na mmuz miknjilmi mnlahomi. 16 Ko pho kfuunka ŋyas 2, zokañr kñene na oanr kñene. 17 Naznan iñigi ilaak ze kolo, ze ŋnrenku 4 ŋnsi ilaak: Prenkun psi Sardyu, topasyu na karbunklu opho prenkun pseke. 18 Prenkun pugzan opka esmeralda, safira na diamanti. 19 Prenkun phajzan opka jasintu, psi agata na psi ametista. 20 Prenkun pwaknan po pka berilu, onis, sardonika na zaspi; yo pzuno ze mhuru na iñigi yolo. 21 Po pka ilaak 12, ze mi itiim bowk Israel omi; yo pfejo injaka ilamna, kana plaak opnazno na kitiim kolo ksi iiñ 12 isi bowk Israel. 22 Ze kdeki ujuuns wo plemp ikorent injaka itala, isi utihun imbuplorhi na mhuru mnsi owadadi. 23 Usa o plemp uz insawaŋ 2 isi mhuru isi kdeki ujuuns, usa o pzu insawaŋ 2 ze ptoomi kdeki ujuuns. 24 Wo pzu ikorent 2 isi mhuru ze insawaŋ 2 ze ptoomi kdeki ujuuns; 25 Ze ptoom ŋnjir 2 ŋnsi ikorent wo ptan ya ze ŋnjir 2 ŋnsi iñigi unazun yolo ze ŋnjir itani oyenknin nmpenen Uzi zurun lo. 26 Lempun uz insawaŋ 2 isi mhuru wo pzu ya ze ŋnjir 2 ze ptoomi kdeki ujuuns, zojir mezu baz lo pkoulan na oyenki nmpenen Uzi. 27 Lempun uz insawaŋ 2 isi mhuru uzu yolo ze ŋnjir 2 ze isak na oyenknin nmpenen Uzi, zeu na urun kolo, pñog zoñañi kolo, ze ktil ksi utihun usi esmeralda zoyenki nmpenen Uzi. 28 Kdeki ujuuns kolo ptandlor na insawaŋ kolo, insawaŋ oko iñigi kmbis nmpenen Uzi, insawaŋ isi oyenknin osi nmpenen Uzi oi duzu na ifiita ifulamul, antom kho duzu ktil ksi oyenknin osi nmpenen Uzi; kdeki ujuuns kozo ptaaslor na oyenknin nmpenen Uzi. 29 Hunkran, zoneeji Aroŋ zun ze iimna, aphya na itiim bowk Israel ze kdeki ujuuns ksi ndol olado zujuuns lo, zoneejr lo zun ze, iimna ze zesi mnlelnin onzañi zurun NYEEK.
Urim na Tumin na yun itiimo iloŋ isi bopenen Uzi
30 Wo pzu Urin na Tumin yun nmpenen Uzi jai khatro ze kzuz, kdeki ujuuns antom yo zujuuns Aroŋ zoneejr lo zurun NYEEK; hunkran Aroŋ oum pdo bowk Israel olado zujuuns lo onzañi zurun NYEEK. 31 Usa oplemp uz kmbisa nkañki ksi oyenknin nmpenen Uzi, lempun ka uz na kfasen kfulamul. 32 Ze psoof kolo, ko pka kzuz ksi ween oi pneejna. Kzuz kminzkun Ko potlan, antom kliins, ki kpaso 33 Wo pjek mmuz nfulamul, purpura na karmesin, umarkar molo zomugi kpooti na bun ukndwobi roman. Ze psoof roman 2 wop pzu nkina 2 ŋmpozŋi ŋnsi mhuru. 34 Hunkran koun pho zomugi kmbisa nkañki uzuuz , nkaki nkina 2, ŋnsi ŋroman 2, ŋroman oko ŋñigi kmbis nmpenen Uzi. 35 Aroŋ optiimo ka zoneejr lo zutihun, nkina ŋnminzŋun opteo zoneejr lo zutihun zurun NYEEK, zo puni lo, zonkont aki kez.
36 Lempun uz klamna ksi mhuru owadadi. Ze mi ña jaun ka pis karimbu, hunkran woun pis olado ominzi: Oiimna o osi NYEEK. 37 Tanun ka na ptala fulamul zurun ubonde. 38 Aroŋ ophagzo pzu ka ze pjuk lo, ko pho ksini NYEEK, nji hilun pdigzan un onhaloi osi bowk Israel iimnani ze nji, ŋanun bopugi ot zil ze mi boi phul un onhaloi.
39 Lempun kmbisa nkañki ksi mmuz mknjilmi, usa pot ulemp uz ubonde isi mmuz mknjilmi, ka ktil o pmarkaro ze ña anhilni pdol utihun uminzun.
40 Zojir bowk Aroŋ, lempun imbisa inkañhi, itil, na ibonde inkañhi, isi pñigo na ulujl. 41 Wo ptiimun amaku Aroŋ na bowk yun iminzyun, ukir boko na mnsitidos, ubamun boko, uditun boko antom botihunarin injaka bopenen Uzi. 42 Lempun baka nkata ŋnsi mmuz, ŋmpuŋi zotani ampjau ze isowo, oleef boko ikhino urimu. 43 Aroŋ na bowk bo ptiimo nkata zoneejr boko zutihun zoku uzoñnor, zoñogr boko zurun pkak, zutihun zun ze iimna, zoñgr boko ze kwaŋ pkak ptihun zun oiimna, antom bo ki ka pjwa antom bokez. Ominzi o pho oiimna onzañi ze Aroŋ na kiiñ lo.