Pkak psi nsensu
30
NYEEK jak Moises: lepun pkak ploŋ uz psi mndera mnsi akasya pturn insensu zolo 2 Po pho pfuunka, po pka ŋnsentimetru 45 ŋnsi okañr, ŋnsentimetru 45 ŋnsi oanr, ŋnsentimetru 90 ŋnsi ohaalr. Polo na itin polo opka ze pun 1. 3 Lerun ojir duzu na mhuru owadadi, na ŋnjir uzuuz na itin 4, lempun kndaŋu mhuru pfoyo polo. 4 Lempun insawaŋ isi mhuru ze ŋnjir 2 unazun yolo zeu kndaŋu. Iliiti yoi pjekn kolo yo pzip mezu insawaŋ. 5 Lempun iliiti na mndera mnsi akasya, uler yolo na mhuru. 6 Zuun pkak zurun knoŋt khakunki zurun kleri ksi kñago khoki duzu ukau usi phuuz zun njoi phir na wi. 7 Kana onu ze nfa, oneejr Aroŋ pbamun nkandel, aptur nsensu injai ka zu kñeeli knliilki, duzu pkak. 8 Zo jaur Aroŋ ze montna antom psheun okandel, apot ka ptur nsensu, nsensu iminzyun ika pturo kana ŋyas zurun NYEEK, onzañi. 9 Nde ika zu nsensu yani pho na mnjona duzu pkak, nin un onhaloi osi onsaam onturoi, nin un onhaloi osi ŋun ŋnde na pkem duzu polo. 10 Wyas 1 zolura, Aroŋ ka pdo wojun antom pjinjinzun pkak; a ka pzu pñaak onsaam wojun usi pjour pjwa duzu itin 4 isi pkak. Oka pdolo kana olur onzañi. Uni oun un onhimni maakrin zonkont NYEEK.Uluk Usi pburburun
11 NYEEK pot jak Moises: 12 Zojaaur nde yeen bowk Israel, kana ña ze boko ka pluk NYEEK uluk usi phila lo, zofinoi lo, antom oki kbi ka khuzin ze psoof boko zojaaur boko yeene. 13 Bonjaawokunk yeen uzuuz bo ka pluk psoof onkilu osi prat, ze mi nkilu ŋmeoŋi zun ze iimna onkilu oloŋ o 20 ŋnsi jera. Psoof onkilu o un onhaaloi osi NYEEK. 14 Ña anjaawoi weene, ankai ŋlur 20 a ka phul un onhaaloi osi NYEEK. 15 Ña aniri azo phul penpen, ka ña añagani azo phail psoof onkilu, zo hulr boko un onhaaloi osi NYEEK antom pluk phila. 16 Wo pjek onsaam osi uluk phila ze kñen bowk Israel, wo pzwa zutihun usi oku uzoñnor. Uluk uminzwi o pho usi phila nde, wo pzu NYEEK lel bowk Israel
Usya usi kobre
17 NYEEK lado na Moises jaklo: 18 Lempun uz usya usi bronsi, na izim wolo isi kobre, antom pñou. Zuun ba ze psoof pkak na zun uzoñnor, uzu mnzup zolo. 19 Aroŋ na bowk bo pduka ñoo za. 20 Zo neejr boko zoku uzoñnor, bo pñoo na mnzup, antom bo ki kez. Zoñogi boko uz ze pkak pdol wojun, ptur un onhaloi osi NYEEK, 21 bo pñou iñen na izima zonkont bo ki kez. Ominzi o pho oiimna osi lo na kiiñ lo onzañi.
Mnsitidos Mhiimna
22 NYEEK pot lado na Moises jaklo: 23 Jekun ŋun ŋmpeŋi pñeel un onliili: nkilu 6 ŋnsi mira mnsi owadadi, nkilu 3 ŋnsi kanela ki kñeelki un onliili, nkilu 3 ŋnsi bun bukndwobi kalamu aromatiku, 24 nkilu 6 ŋnsi akasya ze mi kjaawi zun ze njinzi na mnsitidos mnsi olivera na kjaawi ki kndwoki him. 25 Wo plemp mnsitidos mhiimna mnkiri baña, pkoulan ŋun ŋminzŋi injaka ña o plem oarser. Opho mnsitidos mhiimna pkirn baña. 26 Na molo wo pkir oku osi uzoñnor, na ukau usi phuuz, 27 na omes na ŋun ŋhoŋi zolo, okandel na ŋun olo, pkak psi nsensu, 28 na pkak psi un onhaloi na ŋun polo uzuuz , na usya na iluzi wolo. 29 Hunkran woun pjinjiinzun ŋun ŋminzŋun antom ŋho ŋhiimna. 30 Kirun Aroŋ na bowk, uditun boko botihunarin injaka bopenen Uzi. 31 Jakun bowk Israel: Uni oun pho mnsitidos ni mnkiri ze iiñ nde onzañi. 32 Ika kirma zoleef ñiinz ani pho nmpenen Uzi, ka nde ika lemp mnloŋ mnaami na molo, mnjiinzi sa o pho kjiinzi ze boloŋ uz. 33 Ña anleempi mnsitidos injaka mndami, o ya kir ña ani pho nmpenen, apuno ze psoof bopugi lo.
Nsensu Oiimna
34 NYEEK jak Moises: Jekun ŋun ŋndaŋi ŋi kñeelŋi un onliili, Storaki, onika na galbanu; ŋun ŋnmizŋi ŋñeelŋi un onliili na nsensu owadadi, nka pho ze kjawi kloŋ. 35 Ŋoŋ woun pleempn nsensu, oarser injaka ze mi bolemp olo, onzwoi ptila, ohani pgumlor ba jiinzi. 36 Ojir oloŋ ze olo wo plonan o huglo injaka ifor antom uzu olo zurun oku uzoñnor, zun njoi phir na wi; pgur oloŋ zurun pkak phuuz ze psoof uzoñnor zun njoi phir na wi; o pho kjiinzi ze nde boloŋ. 37 Nde ika lemp nsensu oloŋ ze minzmun ndei ptihunin. Nde zuuna injaka un onhimni osi NYEEK. 38 Ñiinz anleempi oarser injaka ondai antom pkiro, apuno ze psoof bopugi lo.