Hin ga øthʉ rá pähä ra ximhäi
4
Ha hin guí pąhmbʉ hapʉ di nɛqui ʉ yʉn sʉi guí øthʉ, nɛ yʉn heque. Ha hinga gueꞌʉ di ho ni mbʉi zɛhɛhʉ a gnín sʉhmbʉ. 2 Nuꞌa hin ní zä gui tįmhbʉ a guín ndehʉ, gueꞌa gnín hote thohohʉ a. Nɛ gueꞌa ran tsꞌɛya a gnín sʉhmbʉ ꞌnɛ gnín tunhdʉ, nguetho hingui sä gui tąhmbʉ a guín ndehʉ nangue ni pähä zɛhɛhʉ. Pɛ hin guí tįmhbʉ ngue hin guí äfʉ Oją. 3 Pɛ madagueꞌbʉ guí äfʉ Oją a guín ndesɛhʉ, pɛ hin di ꞌdaꞌahʉ, nguetho hingui ho guím bɛ̨mhbʉ, guín nde gui xąnd ni pähä zɛhɛhʉ. 4 Sä guí ɛ̨mhbʉ høntꞌa Oją guím bɛ̨mhbʉ, nɛ ya guí tɛn thohohʉ ra ximhäi. Ha hin guí pąhmbʉ gadín sʉhmbʉ Oją ꞌbʉ guín numanhothʉ ra ximhäi. 5 Uague guí ɛ̨mhbʉ säti thoho bi man rá tꞌohni Oją ngue bi ꞌyɛ̨na: “Pɛ ɛ̨mmɛ dín ndepe da bɛ̨ngui, janangueꞌa dá un ma Hogandąhi di huɛ̨cꞌʉ, nɛ di jamansup yʉ́ mbʉi,” bi ꞌyɛ̨n Oją. 6 Pɛ di zɛtꞌa ni mbʉihʉ Oją, nꞌdamhma da zä høntꞌa guim bɛ̨mhbʉ a. Janangueꞌa ɛ̨n Oją, di un rá mate nꞌda ꞌbʉ hin din ꞌyɛ̨zɛhɛ, pɛ da zʉ a nꞌda ꞌbʉ din ꞌyɛ̨zɛhɛ, i ɛ̨n rá tꞌohni Oją. 7 Damin unsɛhʉ ya ngue di manda ahʉ Oją, nɛ dami sʉhmbʉ ra zįthu, da ꞌdagui nangueꞌahʉ. 8 Ząi damim bɛ̨mhbʉ ngue ꞌdarbʉ guí ꞌbʉhmbʉ Oją, nɛ ząi da hyutꞌa ni mbʉihʉ bʉya. Dami ꞌyɛshʉ yʉ tsꞌoqui guí øthʉ, nɛ hingui yoho da bɛ̨n ni mbʉihʉ. 9 Pɛ i jatho da du ma mbʉihʉ nguetho dyʉ́ tsꞌomꞌbäi hʉ. Nɛ dan zomhbʉ, hingui sä dan thethohʉ. Nu ma thedehʉ dim pommi ra tsꞌoni, nɛ nu man johyahʉ dim pommi ra dumbʉi. 10 Nɛ ga øthʉ ngue hinꞌyʉ ma tsꞌɛdi zɛhɛhʉ bʉ ja rá hmi Oją. Ga äfʉ ra punbi, janangueꞌa di pungahʉ nɛ di jajʉ dan johyahʉ bʉya.Hin dan cꞌąmanꞌʉhʉ
11 Ma zi cu ahʉ, o gadín cꞌąmanꞌʉhʉ, nguetho nuꞌbʉ gadín cꞌąmanꞌʉhʉ, masque guím bɛ̨mhbʉ hingui ho rán tꞌɛ̨di Oją i ɛ̨na dan huɛ̨jʉ. Nɛ nuꞌbʉ hin dí øthʉ rán tꞌɛ̨di Oją, ɛ̨na gueꞌbʉ jasɛ man tꞌɛ̨dihʉ ꞌbʉ. 12 Pɛ høntꞌa nꞌda sä di ꞌdajʉ yʉn tꞌɛ̨di, nguetho Oją a, nɛ høntꞌa sä da yąnꞌa nꞌda nɛ i sä di juaꞌa nꞌda. Pɛ ha dím bɛ̨mhbʉ dyʉ ojąhʉ ngue sä ga ɛ̨mhbʉ ja yʉ́ tsꞌoqui ʉ ꞌda.
Hin dí hand bʉ ní ꞌyɛ̨h man zaquihʉ
13 Mbähä dan ꞌyomfɛ̨nihʉ tsꞌʉ ya, nguetho dí ɛ̨nthohʉ: “Nuya ogue nixudi ga mbähä nꞌdanni, dam ꞌbʉhmbʉ nꞌda jɛya bʉ, nɛ dam pɛhmbʉ, ga tąhmbʉ,” dadín ꞌyɛ̨mfʉ. 14 Pɛ hingui sä gam mamhbʉ tengu a, nguetho ya hin dí pąhmbʉ ꞌbɛꞌa ga øthʉ, nɛ hin dí hand bʉ ní ꞌyɛ̨h man zaquihʉ. Tengu tho nꞌda ra güi, guín nu, jabʉ, nɛ xø gán nu, hinꞌyʉ bʉ. Njarbʉ nꞌda ra jąꞌi. 15 Pɛ ndeꞌbʉ ga ɛ̨mhbʉ: “Nuꞌbʉ da nde Oją, dam ꞌbʉhmbʉ tsꞌʉ, nɛ din ja ꞌbɛꞌa da zä ga øthʉ bʉya.” Guehna gam mamhbʉ na ya. 16 Pɛ dán ꞌyɛ̨zɛhɛhʉ ꞌbʉ hin dá äfʉ Oją ꞌbɛꞌa da zä ga øthʉ. Pɛ ra tsꞌoqui a. 17 Nuꞌbʉ dí pąhmbʉ a ran ho, nɛ hin dí øthʉ a, ra tsꞌoqui a ꞌbʉ.