Hebreos 1

HEBREOS

Ra søcuą bi ꞌbɛnba yʉ ꞌyɛ̨cꞌyɛi, yʉ israel, ngue na yą ra hebreo ʉ

Bin ꞌyusɛ Oją nangueꞌa rá Tsꞌʉntꞌʉ

Nuꞌbʉ mayaꞌbʉ thoho ꞌdahmi tsꞌʉ bʉ í ꞌyuꞌa rán ꞌyomfɛ̨ni Oją, nɛ ꞌdahma ꞌdanꞌyo bʉ á xiꞌʉ yʉ́ pøngahyą. Nɛ gueꞌʉ bi xi a mam bombøtahʉ ʉ, gue dyʉ israelhʉ. 2 Pɛ nuya rán zɛgui yʉ pa ya, bi jajʉ ga pąhmbʉ xʉn ho Oją ya nangue rá Tsꞌʉntꞌʉ bi zøcua dí ꞌbʉhmbʉ. Nɛ guesɛ a rá Tsꞌʉntꞌʉ í ꞌyøtꞌ Oją gätho yʉ ximhäi, nɛ bi zänni dim Hmu ꞌbɛꞌa gätho i ja. 3 Nɛ ní ꞌyɛ̨pʉ bí ꞌbʉ Oją rá Tsꞌʉntꞌʉ tenguꞌbʉ rá thai ra hyadi, gueꞌa di jajʉ ga pąhmbʉ a rán ho Oją. Nɛ tengu ꞌbʉ ra sello, ꞌda angu da bøni. Nɛ di ꞌyonsɛ ꞌbɛꞌa gätho i ja a rá Tsꞌʉntꞌʉ Oją, nangue rám hma i ja rá tsꞌɛdi. Nɛ nuꞌbʉ mí juasɛ bi hoga ma tsꞌoquihʉ ua, bi mbeng bʉ mahɛ̨tsꞌi ꞌdarpʉ ní mandaui a tąte thoho i ja rá tsꞌɛdi.

Manꞌda i ja rá tsꞌɛdi rá Tsꞌʉntꞌʉ Oją xinda gueꞌʉ yʉ́m ꞌbɛhni mahɛ̨tsꞌi

4 Nu rá Tsꞌʉntꞌʉ Oją ꞌbʉ ya xí hogahʉ, bin tꞌun rá tsꞌɛdi xʉn ho xinda gueꞌʉ yʉ́m ꞌbɛhni mahɛ̨tsꞌi. Nguetho ya rá Tsꞌʉntꞌʉ zɛhɛ Oją a, i conhui rá tsꞌɛdi rá Ta xinda gueꞌʉ yʉ́m ꞌbɛhni. 5 Nguetho:

Nuꞌi ma ꞌdatsꞌʉntꞌʉ i,

dí ꞌda a ni tsꞌɛdi ya,

pɛ njąmꞌbʉ bi tꞌɛ̨mpꞌʉ yʉ́m ꞌbɛhni Oją, pɛ hinda høntꞌa rá Tsꞌʉntꞌʉ zɛhɛ. Nɛ:

Nugä dra Ta nangue ma Tsꞌʉntꞌʉ,

nɛ xínga nꞌda rám ꞌbɛhni Oją bi ꞌyɛ̨mbi. 6 Pɛ nu Oją ꞌbʉ mambá si ua ja ra ximhäi a rá Tsꞌʉntꞌʉ, nɛ bi ꞌyɛ̨na:

Nu ahʉ gyʉm ꞌbɛhnihʉ mahɛ̨tsꞌi, gätho gui thąndehʉ na ma Tsꞌʉntꞌʉ,

bi ꞌyɛ̨n Oją. Nguetho nuꞌa rá Tsꞌʉntꞌʉ go da tꞌɛ̨spa a bʉ na nu Oją. 7 Pɛ nu yʉ́m ꞌbɛhni mahɛ̨tsꞌi, i øtꞌ Oją yʉ́ ꞌyɛ̨hɛ thoho ʉ, tengu mán tꞌoꞌtꞌi:

Ɛ̨mmɛ i tih yʉ́m ꞌbɛhni ꞌbʉ i ørpa rá ꞌbɛfi tengu ꞌbʉ yʉn dąhi,

nɛ di juadi ꞌbɛꞌa gätho hingui numanho Oją tengu ꞌbʉ yʉ sibi, nangue rá tsꞌɛdi zɛhɛ Oją.

8 Pɛgue bi ꞌyɛ̨mpꞌa rá Tsꞌʉntꞌʉ Oją:

Nuꞌi gra Oją, thocpa thoho gam manda zɛhɛ maząi,

njąmꞌbʉ dim ꞌbɛh ni tsꞌɛdi, nɛ guidí manda xʉn ho.

9 Nɛ bi ꞌyɛ̨mbi:

Nuꞌi gra Oją, ɛ̨mmɛ guí numanho a ran ho, nɛ ꞌbe xingui

tsꞌʉ guí nde gui nu a ran tsꞌo.

Janangueꞌa ni Ojągui manꞌda dá ꞌdaꞌa ran johya

xinda gueꞌʉ gätho miꞌda ni cu gue ma ꞌyɛ̨cꞌyɛi,

bi ꞌyɛ̨mbi. 10 Nɛ bi ꞌyɛ̨mpꞌa rá Tsꞌʉntꞌʉ a Oją:

Nuꞌi gra Hmu, rá mbʉdi gá ꞌyøtꞌ ra ximhäi,

nɛ gá ꞌyøzɛhɛ ꞌbɛꞌa gä bí ja mahɛ̨tsꞌi,

bi ꞌyɛ̨n Oją.

11 Nɛ nuꞌa ra ximhäi dim pädi, nɛ mahɛ̨tsꞌi, pɛ nuꞌi gam ꞌbʉi maząi.

Gätho yʉ din tsꞌoni tenguꞌbʉ yʉ ꞌyahe.

12 Nɛ tenguꞌbʉ di päh ní he nꞌda,

din jabʉ ꞌbʉ gá päh ra ximhäi.

Pɛ nuꞌi njąmꞌbʉ gam pädi gätho yʉ pa,

nɛ njąmꞌbʉ da guaꞌa ni te.

13 Nɛ, dami manda ua ja ma tsꞌɛdi ui,

ja gueꞌbʉ ga ja i gui tąpꞌʉ gätho man sʉihʉ,

bi ꞌyɛ̨mpꞌa rá Tsꞌʉntꞌʉ a Oją. Pɛ njąmꞌbʉ bi xi ʉ yʉ́m ꞌbɛhni Oją tengu a. 14 Gätho yʉ́m ꞌbɛhni bí pɛnhua, tenguꞌbʉ yʉn dąhi gue hin dí nuhʉ, i øtꞌ yʉ́ ꞌyɛ̨hɛ Oją nanguejʉ toꞌo gätho ntsꞌänni da hyąn a ra te njąmꞌbʉ da guadi.