FILEMÓN
Ra søcuą bi ꞌyoꞌtꞌa ra Pablo bi mbɛnpa a ra Filemón
Ra Pablo bi ꞌyorba ra søcuą ra Filemón
1
Nguä drá Pablogä dí ofädigä nangue ra Cristo Jesús. Dí otꞌäꞌbe ra søcuą ra Timoteo, nɛ ga pɛnꞌnaꞌbe ma amigoꞌaꞌbe grá Filemón, man ꞌyohʉ i nangue rá ꞌbɛfi Oją. 2 Nɛ dadí zɛnguaꞌbe yʉ ꞌyɛ̨cꞌyɛ̨i ngue ząi dim pɛti bʉ ni ngu, nɛ ma cuhʉ ra Apia. Nɛ dadí zɛngua ra Arquipo man ꞌyohʉhʉ dín yąmhbe rá ꞌbɛfi Oją. 3 Nu Oją ma Tahʉ nɛ ma Hmuhʉ ra Jesucristo di ꞌdaꞌahʉ rá mate nɛ da hyutꞌa ni mbʉihʉ.Rán huɛ̨cate nɛ rá tꞌɛ̨cꞌyɛi ra Filemón
4 Nɛ nuꞌi ma zʉ cu mahuɛ̨qui i, nuꞌi grá Filemón, dadí undä ra jamadi nangueꞌe nuꞌbʉ dí yąꞌbe Oją. 5 Nguetho dá øde ꞌbɛꞌa guí ørpʉ guí ꞌbʉhmbʉ, ɛ̨mmɛ i ja nin huɛ̨cate nangue yʉ́ tꞌʉhni Oją bʉ. Nɛ dí øde ngue i ja ni tꞌɛ̨cꞌyɛi xʉn ho nangue ra Jesús ra Hmu. 6 Nɛ dí äcä rá tsꞌɛdi Oją ngue xʉn ngu yʉ jąꞌi da ꞌyɛ̨cꞌyɛ̨i ra Jesús nangue nim hma, nɛ da hyąni ꞌbɛꞌa gätho ran ho di ꞌdajʉ ra Cristo Jesús. 7 Gueczɛhɛgä ɛ̨mmɛ dadí johya, nɛ i hu ma mbʉi nangue nin huɛ̨cate, ma zʉ cu i grá Filemón. Nguetho xʉn ngu gá hyurpa yʉ́ mbʉi yʉ́ tꞌʉhni Oją.
Bi tꞌäp ra mate ra Filemón nangue rá ꞌyɛ̨hɛ̨ ra Onésimo
8 Nuya madague a i ja man tꞌɛ̨digä nangue ra Cristo ngue xcá manda i, 9 pɛ manꞌda xʉn ho ga äꞌa nꞌda ra mate tho gui ꞌyøtꞌe nangue ran huɛ̨cate tho, ngue gui simanho mahønꞌa na ni ꞌyɛ̨hɛ̨ ra Onésimo. Nugä drá Pablogä, ya xtán dącꞌyɛ̨igä, nɛ dí ofädigä nangue rá ꞌbɛfi ra Cristo Jesús. 10 Dí äꞌa ra mate nangue ra Onésimo, nuꞌa tenguꞌbʉ ma tꞌʉhnigä nangue ra Cristo, nguetho bi ꞌyɛ̨cꞌyɛ̨i ra Cristo nangue dá xicä ua ja ra fädi. 11 Nuꞌʉ ꞌda yʉ pa xʉ thogui, hin te madí muui ni ꞌyɛ̨hɛ̨ ra Onésimo. Pɛ nuya xʉn ho da ꞌyørcaui. 12 Nuya ga pɛnꞌnahʉ ra Onésimo bʉ guí ꞌbʉi. Nɛ nuꞌbʉ bi mba a, da du ma mbʉi, nguetho ɛ̨mmɛ dím bɛ̨n a. 13 Nɛ dín ndepe xtán gocua ra Onésimo, sä xtí zɛqui tsꞌʉ, nguetho dí ofädigä, ngue dím mangä ran ho maꞌdaꞌyo, ngue tenguꞌbʉ da gueꞌa zɛhɛ xquí zɛqui. 14 Pɛ hin dín nde gam ma ngue da gocua ꞌbʉ nte guím ma, nguetho nuꞌa ran huɛ̨cate jatho da bɛ̨nsɛ nꞌda, hin da tꞌørba tsꞌɛdi nꞌda a. 15 Pɛ nuꞌa bi ꞌyøtꞌna bi ꞌdapʉ guí ꞌbʉi ꞌda yʉ pa, pɛ bi bømanho, nguetho bi hocpa rá mbʉi Oją ya. Nɛ nuya gadín cuui maząi na ya. 16 Hin gui sini nangue ni ꞌyɛ̨hɛ̨ thoho pɛ gui sini nangue ni zʉ cu nangue ra Cristo, nguetho nuna ma zʉ cuhʉ mahuɛ̨qui. Nuya manꞌda di nuui ya, nguetho hinga høntꞌa ni ꞌyɛ̨hɛ̨, pɛ ni zʉ cu nangue ra Cristo ma Hmuhʉ ya. 17 Nuꞌbʉ majuąni dadín amigoui xʉn ho, dami sin na ra Onésimo, tengu tho ꞌbʉ xquí sin zɛhɛgä ꞌbʉ xcá mbasɛgä bʉ. 18 Nuꞌbʉ ja ꞌbɛꞌa bi ꞌyøtꞌeꞌe, uague i ja ꞌbɛꞌa i tuꞌaꞌi, pɛ ꞌyo ma güɛnda ga juzɛhɛgä. 19 Nugä ga firmagä, drá Pablogä, janangue da fądi majuąni ga juꞌtꞌä a rá güɛnda na. Janangueꞌa hingui hɛ̨i gui sin ya nɛ gadín cuui. Pɛ ndeꞌbʉ guin ꞌyomfɛ̨ni tsꞌʉ, nguetho guengä dá jaꞌaꞌi gá tįn a ra temaząi ꞌbʉ gmí ꞌyɛ̨cꞌyɛ̨i ram hma dá xiꞌi. 20 Nuya ma zʉ cu, ꞌyørqui tsꞌʉ ra mate ꞌbɛꞌa dí äꞌaꞌi, nangue guín ꞌyoui ra Hmu. Nuꞌbʉ gui ꞌyut nin huɛ̨cate nangue ra Onésimo, da hyu ma mbʉi ꞌbʉ. 21 Nugä dá oꞌtꞌä a ra søcuą i ja ua ya, nguetho dí ɛ̨cꞌyɛ̨i ngue gui ꞌyøtꞌe ꞌbɛꞌa dí xiꞌaꞌi. Nɛ dím bɛ̨ni hinga høntꞌa dí xiꞌaꞌi pɛ manꞌda ran ho guim bɛ̨nsɛ ꞌbɛꞌa gui ꞌyøtꞌe. 22 Dami hoqui tsꞌʉ hapʉ sä dan säyagä bʉ, nɛ dami ꞌyäfʉ Oją nanguecä, nɛ Oją da ꞌyøtꞌe da xogagui, da zä ga mbagä bʉ, gan nuꞌahʉ bʉya.
Yʉ́n zɛngua ra Pablo, nɛ bi ma da nu ran jąpi a ra Filemón
23 Nuya dí ofädiꞌbe ra Epafras, nɛꞌa di zɛngua i. Nɛ nuꞌa i ofädi nangue bi mampꞌa rán ho maꞌdaꞌyo ra Cristo Jesús. 24 Nu ra Marcos nɛ ra Aristarco nɛ ra Demas nɛ ra Lucas, nuya ma mimbɛfihe nangue rá ꞌbɛfi Oją di zɛngua i. 25 Nɛ nuꞌa ma Hmuhʉ ra Jesucristo di ꞌdaꞌahʉ rán jąpi a, gätho ahʉ. Nɛ høntꞌa dí xi a ya.