TITO
Ra søcuą bi ꞌyoꞌtꞌa ra Pablo bi mbɛnpa a ra Tito
Ran zɛngua
1
Nugä drá Pablogä, dí pɛnꞌna ra søcuą i ja ua grá Tito. Nugä rá ꞌyɛ̨hɛgä Oją, nɛ ma ꞌbäigäꞌbe ra Jesucristo. Ga zɛdi da ꞌyɛ̨cꞌyɛi ʉ bi huan Oją, nɛ da bą a ram hma majuąni, janangueꞌa da ꞌyøtꞌ ran hocjąꞌi nangue Oją. 2 Guehna dí øtꞌä nguetho dín ndep ʉ ga comhbʉ ra temaząi ngue bi ma majuąni Oją ꞌbʉ rá mbʉdi ra ximhäi. Nɛ nu Oją hingui sä da man ra fɛhni a. 3 Nɛ nuya bi zøn ra pa ngue bi tsꞌänni da hman ran ho maꞌdaꞌyo, nɛ bi ꞌdac man tꞌɛ̨di gam mangä, ngue guesɛ Oją ma yąntehʉ. 4 Nɛ nuꞌi Tito, tenguꞌbʉ majuąni ma tsꞌʉntꞌʉ i, ngue dá ja i gá ꞌyɛ̨cꞌyɛ̨i. Nɛ dí äp Oją ma Tahʉ di ꞌdaꞌa rán jąpi nɛ rán huɛ̨cate, nɛ da hyutꞌa ni mbʉi, nɛ ra Jesucristo ma Yąntehʉ.I pa nsifi ra Tito ꞌbɛꞌa da ꞌyørpʉ Creta
5 Janangueꞌa dá socꞌa bʉ ja ra häi Creta, ngue gui juadi hapʉ di ꞌbɛꞌa ra ꞌbɛfi. Ngue gui huanꞌndʉ yʉ ngʉrbi nꞌda ngu nꞌda yʉ hnini bʉ guí ꞌbʉi, ngue nu yʉ ngʉrbi nangue yʉ ꞌyɛ̨cꞌyɛi, tengu dá xiꞌa mamꞌbɛtꞌo. 6 Gui huanꞌndʉ toꞌo nte ma tsꞌoqui i thįnbi, nuꞌa nꞌdatho rá xisu i si, nɛ nu yʉ́ tꞌʉhni bi däp yʉ́ mbʉi Oją, nɛ hingui øtꞌa nꞌda ran tonto, xinga gue ram fɛꞌtsꞌi i øtꞌʉ yʉ́ tꞌʉhni, janangueꞌa njon di yąpi. 7 Nguetho nu yʉ ngʉrbi i ꞌyo yʉ́ güɛnda a rá ꞌbɛfi Oją. Janangueꞌa da thahni toꞌo hingui øtꞌ ran tsꞌo, nuꞌa hin din ꞌyɛ̨zɛhɛ, nɛ hin din cuɛ, nɛ xín dim mihni, xín din ndesʉi, xín din siyate ngue ra mbɛti. 8 Nɛ da thahni toꞌo di säyaba yʉ́ mijąꞌihʉ bʉ ja rá ngu, nɛ di ho ꞌbɛꞌa gätho xʉn ho. Nɛ din ꞌyomfɛ̨ni tsꞌʉ, nɛ ꞌda ni huɛ̨cthoho gätho, nɛ da numansu Oją nangue nꞌda ra hogambʉi, nɛ i sąmzɛhɛ rá mbʉi hin din tonto. 9 Nɛ din ząm bʉ ja ram hma majuąni, nangue ram hma dadín xähmbʉ, janangueꞌa da zä da xänba ʉ bí ꞌbʉpʉ, da mbätsꞌi. Nɛ nu miꞌda bí ꞌbʉpʉ, ngueꞌʉ di ʉcpa rám hman Oją, di bɛ̨nbi hapʉ di ꞌbɛꞌʉ, janangueꞌa da ꞌyɛ̨cꞌyɛi. 10 Nguetho nuꞌʉ toꞌo im ma da ꞌyøthoho yʉn tꞌøtꞌe mi xi Oją yʉ judío mayaꞌbʉ, i jatho da mba ma hɛcpi ʉ. Nguetho nte ní mbatꞌʉ yʉ́m hma ʉ, nɛ i häte ʉ, nɛ i øtꞌ yʉ́ pähä zɛhɛ. 11 Nɛ hønbʉ go hapʉ i cʉrpʉ ja yʉ ngu, i ʉꞌtꞌʉ gätho i ꞌbʉpʉ, nangue yʉ́m hmansɛ yʉ hyäte, ngue hingui sä da hma. Nɛ høntꞌa ra mbɛti in nde. 12 Nɛ i øtꞌe tengu mi manꞌa nꞌda yʉ́ mɛngu zɛhɛhʉ bʉ ra häi Creta, ngue nꞌda ra bąsøcuą, bi ma: “Ząi yʉ ndøbɛthąni ʉ ma mɛnguhe ua, nɛ tengu yʉ zate ngue xʉn tsꞌo øtꞌʉ, nɛ høntꞌa da zi i honi, nɛ ɛ̨mmɛ i dąnhyɛ̨i,” bi ꞌyɛ̨na. 13 Nɛ majuąni bi manꞌa nꞌda yʉ́ mɛnguhʉ. Janangueꞌa gui hɛcpa ʉ, nꞌdamhma da bømanho yʉ́ tꞌɛ̨cꞌyɛi ʉ i ꞌbʉpʉ. 14 Nɛ gui xifi hin da ꞌyɛ̨cꞌyɛ̨ibi yʉ́m hman sɛ ʉ yʉ judío, nɛ xín da numansup yʉ́ tꞌɛ̨cꞌyɛ̨i sɛ yʉ jąꞌi, gueꞌʉ hinguin nde da ꞌyøtꞌa majuąni. 15 Nuꞌʉ toꞌo xʉn ho yʉ́ mbʉi, høntꞌa xʉn ho im bɛ̨ni, pɛ nuꞌʉ toꞌo hin bi däp yʉ́ mbʉi Oją nɛ xʉn tsꞌo yʉ́ mbʉi, nuꞌʉ, hinꞌyʉ ꞌbɛꞌa numanho ʉ. Nguetho bin tsꞌon yʉ́n ꞌyomfɛ̨ni, nɛ him bi zä bi ꞌyøꞌa bi xi Oją ꞌbʉ mi zop yʉ́ mbʉi. 16 Nɛ nuꞌʉ yʉ jąꞌi tengu ʉ, ɛ̨na ngue i ɛ̨cꞌyɛi Oją, pɛ nꞌdanꞌyo thoho yʉ́n tꞌøtꞌe, guepʉ ní fądi hingui ɛ̨cꞌyɛi ʉ. Nɛ xʉn tsꞌo yʉ́ mbʉi nangueꞌa fɛsthoho ꞌbɛꞌa sifi, hingui sä da ꞌyøtꞌ ran ho.