2 TIMOTEO
Ná yoho ra søcuą bi ꞌyorba ra Timoteo a ra Pablo
Ran zɛngua
1
Nugä dra Pablogä, Oją bi zänni ma ꞌbäiꞌbe a ra Jesucristo, ga xih yʉ jąꞌi a bi mam majuąni Oją, ngue di un ra temaząi ʉ to di däp yʉ́ mbʉi ra Cristo Jesús. 2 Dí pɛnꞌna ra søcuą gra Timoteo, dadí huɛ̨cꞌaꞌi tenguꞌbʉ ma tsꞌʉntꞌʉ i. Nɛ dí äp Oją ma Tahʉ di ꞌdaꞌa rá mate nɛ rán huɛ̨cate nɛ da hyutꞌa ni mbʉi, nɛ ra Cristo Jesús ma Hmuhʉ.Ra Timoteo da ma ran ho maꞌdaꞌyo nangue ra Jesucristo
3 Dí ɛ̨mbä jamadi Oją ꞌbʉ dím bɛ̨nꞌi, ra xui nɛ ra pa thocpa thoho, nguetho dí pądi guí ɛ̨cꞌyɛi xʉn ho tengugä, ngue dá øtꞌä ra ꞌbɛfi bi ꞌdacä Oją, nɛ ngutho mi øtꞌʉ mam bombøtahe ꞌbʉ mayaꞌbʉ. 4 Dím bɛ̨nꞌi gán zom ꞌbʉ mán xummi, nɛ bi däh ni guidä. Nɛ ɛ̨mmɛ dín nde ga nu i mahønꞌa, nɛ din jagä ran johya xʉn ho ꞌbʉ ga nu i. 5 Dím bɛ̨nꞌi ngue hingui yoho ni mbʉi. Pɛ guí ɛ̨cꞌyɛi xʉn ho, tengubʉ na ꞌyɛ̨cꞌyɛi ni ndømbe ra Loida nɛꞌa ni mbe ra Eunice. 6 Janangueꞌa dín ndeꞌe thocpa tho guim bɛ̨ni bi ꞌdaꞌa rá tsꞌɛdi Oją ꞌbʉ má cäx ma ꞌyɛ bʉ ni yą, nɛ dí xiꞌi gan ɛ̨hya gui ꞌyøtꞌ rá ꞌbɛfi Oją bi ꞌdaꞌi. 7 Nguetho nuꞌa rá Hogandąhi Oją bi ꞌdajʉ hin di jajʉ dan suhʉ, pɛ di jajʉ ga huthʉ ran zambʉi, nɛ dan huɛ̨jʉ nꞌda ngu nꞌdajʉ, nɛ ga sąm zɛhɛ ma mbʉihʉ. 8 Janangueꞌa o guí pɛsꞌ ni sä gui mampꞌa rám hmam ma Hmuhʉ, nɛ o guí su ngue dí ofädigä nangue Oją. Pɛ nɛꞌi dami hyätꞌi gui sɛt yʉn ʉnbi tengu thohogä, nangue rám hman Oją guí øtꞌe. Nɛ Oją da mbäxꞌiꞌi. 9 Nɛ bi yąnjʉ Oją nɛ bi mberca ma mbʉihʉ, nɛ nubʉya bi xijʉ ga ørpahʉ rá ꞌbɛfi. Pɛ hin í yąnjʉ a rá ꞌbɛfi Oją dí øthʉ, pɛ bi yąnjʉ ꞌbʉ má hąmhbʉ rá mate. Nɛ gueꞌa bi zän zɛhɛ Oją ꞌbʉ him maní ꞌyøtꞌ ra ximhäi, ngue da yąnjʉ ra Jesucristo. 10 Nuya bi nɛqui a mán tsꞌänni, ngue bi nɛqui ma yąntehʉ ra Jesucristo, nuꞌa bi dąp rá tsꞌɛdi ran dąte, nɛ bi jajʉ dán ꞌyohʉ rá ꞌyu ra te maząi. Nɛ gueꞌa i xijʉ rán ho maꞌdaꞌyo ra Cristo. 11 Nɛ gueꞌa ram hma dá mangä, nɛ bá ꞌbɛngä, nɛ gueꞌa ram hma dá xänba ʉ yʉ jąꞌi hing yʉ judío. 12 Janangueꞌa dí sägä ran ʉnbi ya. Pɛ hin dí pɛsꞌ ma sä, nguetho dí pącä a toꞌo dí ɛ̨cꞌyɛigä, dí pądi i ja rá tsꞌɛdi da mbɛsca ma tegä ngue dá däpi, ga pømanho ꞌbʉ rán zɛgui. 13 Nɛ nangue ran ho maꞌdaꞌyo dá xänꞌniꞌi, dami thoqui gui ꞌyɛ̨cꞌyɛi ra Cristo Jesús nɛ dami ꞌyøtꞌ ran huɛ̨cate bi ꞌdaꞌi. 14 Nɛ dami jamansu ran ho maꞌdaꞌyo i ꞌyo ni güɛnda, nangue rá Hogandąhi Oją i ꞌbʉpʉ mbo ma mbʉihʉ. 15 Guí pądi gätho bi ꞌueꞌʉ yʉ cu ngue yʉ mɛngu bʉ Asia, bi ꞌuegue nanguecä, nɛ ra Figelo nɛ ra Hermógenes. 16 Pɛ nuꞌʉ gätho ꞌbʉpʉ rá ngu ra Onesíforo, Oją dí jąpꞌʉ. Nguetho nu ra Onesíforo xʉn ngu yʉ nidį bi mbäxcagui, nɛ him bi mbɛsꞌ rá sä nangue yʉ cadena i thurcä. 17 Nɛ nuꞌbʉ mi zøcua Roma a, ɛ̨mmɛ bi hyongui nɛ bi dįngui. 18 Nu ra Jesucristo di jąpi xʉn ho ꞌbʉ rán zɛgui ra pa, nguetho nuꞌbʉ mám ꞌbʉpʉ Éfeso, nɛ ɛ̨mmɛ xʉn ngu ꞌbɛꞌa gätho bi ꞌyørpʉ ngue bi mbäx rá ꞌbɛfi Oją bʉ a. Nɛ manꞌda guí pądi xinda guecä.