6
Nuꞌʉ yʉ ꞌyɛ̨hɛ bí ꞌbʉpʉ, da numansu ʉ yʉ́ hmu to i ørpa yʉ́ ꞌbɛfi. Nɛ nuꞌbʉ din jabʉ da ꞌyøtꞌe, njon di cꞌąmanꞌʉ nangue Oją nɛ njon di cꞌąmanꞌʉ rán xädi Oją. 2 Nɛ nuꞌbʉ yʉ ꞌyɛ̨cꞌyɛi ʉ yʉ́ hmu yʉ ꞌyɛ̨hɛ, pɛ guextaꞌa da numansu ʉ yʉ́ hmu nɛ hin da zani ngueꞌbʉ mbɛ̨ni din cuhʉ ʉ. Pɛ manꞌda da bɛ̨ni da mbɛpi xʉn ho, nguetho rá miꞌyɛ̨cꞌyɛiui da mbɛpi, nɛ di huɛ̨cꞌa rá hmu. Dami xänba na ram hma, nɛ thocpa thoho gui bɛ̨nba ʉ.Xʉn ngu dí tąhmbʉ nangue rá ꞌbɛfi Oją nguetho i hurca ma mbʉihʉ
3 Pɛ i ꞌbʉꞌi ꞌda yʉ xänbate nꞌdanꞌyo ram hma in xänbate, nɛ hin din thɛui a rám hma ma Hmuhʉ ra Jesucristo ngue majuąni di zɛrca ma mbʉihʉ, nɛ hin din thɛui a ram hma ga däp ma mbʉihʉ Oją. 4 Pɛ nuꞌʉ, bi ʉꞌtꞌ yʉ́ mbʉi nangue ran ꞌyɛ̨tsꞌi, nɛ nte i pądi. Nɛ ɛ̨mmɛ honi di dunba yʉm hma guepʉ i fʉpʉ ran tsꞌɛya, ran heque, ran tsꞌante, ran tꞌʉꞌtꞌate, ꞌbɛꞌa gätho im bɛ̨n rá mbʉi. 5 Nɛ nuꞌʉ thocpa tho din sʉi nꞌda ngu nꞌda ʉ, gueꞌʉ bin tsꞌon yʉ́n ꞌyomfɛ̨ni, nɛ hingui sä da bądi ndana a majuąni. Nɛ im bɛ̨ni xʉn ngu ra mbɛti da dąha nangue rá ꞌbɛfi Oją. Pɛ o guí øhmbʉ a i man ʉ. 6 Pɛ majuąni xʉn ngu dí tąhmbʉ nangue rá ꞌbɛfi Oją, i hurca ma mbʉihʉ, nɛ dí ꞌbʉmanhohʉ nangue Oją. 7 Nguetho nte bá hąhʉ ꞌbʉ mám ꞌbʉhmbʉ ua ja ra ximhäi, nɛ nte da zä ga hąxhʉ ꞌbʉ bi zøn ra pa ga tuhʉ. 8 Pɛ hin da du ma mbʉihʉ ꞌbʉ zí tsꞌʉtho dí pɛsꞌhʉ yʉn tsꞌihmɛ nɛ yʉ he. 9 Pɛ nuꞌʉ toꞌo in nde dim mɛmbɛti, hingan tsꞌärpʉ thoho da thätꞌi da ꞌyøtꞌa ra tsꞌoqui. Nɛ tenguꞌbʉ da mba nthuꞌtꞌi rá mbʉi, nɛ manꞌda manꞌda nín xąndi ꞌbɛꞌa gätho da bɛ̨n rá mbʉi. Pɛ ndetho din ʉnbazɛhɛ, nɛ din tonto rá mbʉi ꞌbɛꞌa gätho honi, nɛ gueꞌʉ yʉ́n tꞌøtꞌe ní zo bʉ ja ram ꞌbɛdi. 10 Nguetho nuꞌbʉ ꞌbʉ a nꞌda ɛ̨mmɛ in nde ra mbɛti, gueꞌa ní mbʉdi gätho yʉ tsꞌoqui bʉ rá mbʉi a. Nɛ nuꞌa ní ho ra mbɛti ʉ ꞌda, bi ꞌuepʉ rá ꞌyu Oją, nɛ di ʉnba zɛhɛ rá mbʉi nangue ra dumbʉi.
I øtꞌ ra hogatuhni nangue Oją a ra Timoteo
11 Pɛ nuꞌi gra Timoteo, rá mbɛfiꞌi Oją, dami ꞌuegue nangue yʉn tsꞌo i mangua. Pɛ gui hyumbi gui tɛnꞌna ran ho, nɛ høntꞌa Oją guim bɛ̨ni da mbäxꞌiꞌi, nɛ gui huɛ̨c ni mijąꞌihʉ, nɛ hin gan xømbʉi, nɛ din ja ni yembʉi. 12 Xʉn ngu yʉ jąꞌi bi ꞌyø ꞌbʉ gmím ma xʉn ho ni tꞌɛ̨cꞌyɛi. Nɛ ngutho ya gui hyutꞌanzambʉi gui tąha, tenguꞌbʉ nꞌda ra dofʉi i hät yʉn ʉnbi ngue da dąh ran sʉi. Janangueꞌa da zä guim bɛntꞌi xʉn ho a ra te maꞌdaꞌyo, gueꞌa í zonꞌna a. 13 Nɛ guim bɛ̨ni Oją in nu i, nuꞌa di un yʉ́ te ꞌbɛꞌa gätho i ꞌbʉi. Janangueꞌa gui hyutꞌanzambʉi nɛ hin gui su nin dąte. Nɛ in nuꞌa ra Jesucristo ngue bi ma xʉn ho a majuąni ꞌbʉ mí mba ma däpi ra Poncio Pilato. 14 Janangueꞌa dí xiꞌi, jatsꞌɛditho gui jąꞌtsꞌi gätho ra ꞌbɛfi bin ꞌdaꞌi, nte gui tsꞌoni, nɛ njon da man ran tsꞌo nangueꞌa bʉya. Nɛ gueꞌa gui ꞌyøtꞌa ya, gueꞌbʉ go bi zøn ra pa di nɛqui ma Hmuhʉ ra Jesucristo. 15 Nguetho nuꞌbʉ bi zøn ra pa ntsꞌänni, Oją ba pɛnhua ra Cristo mahønꞌa. Nɛ nu Oją mixte xʉn hotho, nɛ ɛ̨mmɛ di johya, nɛ i ꞌdasɛ ngue di manda. Nɛ nuꞌa Oją ra tsꞌʉtꞌabi xinda gue gätho miꞌda yʉ tsꞌʉtꞌabi ꞌbʉi, nɛ nuꞌa ja rá tsꞌɛdi xinda gue gätho miꞌda ja yʉ́ tsꞌɛdi. 16 Nɛ høntꞌa Oją njąmꞌbʉ da du. Nɛ ɛ̨mmɛ di nɛc thoho hapʉ bí ꞌbʉi, njon da zä da hyäm bʉ, nɛ njongui sä da nu Oją. Nuꞌa ɛ̨mmɛ i tꞌɛ̨spi nɛ da ꞌyuh rá tsꞌɛdi maząi. Nɛ høntꞌa gam bɛ̨mhbʉ a ya. 17 Dami xiꞌʉ yʉ mɛmbɛti ꞌyɛ̨cꞌyɛi, ngueꞌʉ to i ja yʉ́ mbɛti ua ja ra ximhäi, dami xifi hin din ꞌyɛ̨tsꞌi, nɛ xín da bɛ̨ni di muui yʉ́ mbɛti, nuꞌʉ tsꞌʉrpʉ thoho dim ꞌbɛdi. Pɛ dami xifi høntꞌa Oją da bɛ̨ni, ngue di muui xʉn ho, nɛ da bądi bí nɛxpʉ ꞌbʉ Oją gätho xʉn ho dí pɛsꞌhʉ, ndejʉ dan johyahʉ. 18 Pɛ dami xifi da ꞌyøtꞌ ran ho, nɛ manꞌda tenguꞌbʉ gueꞌa ná mɛmbɛti ʉ bʉya. Ngue hin din ꞌyʉya pɛ da gomhbʉ yʉ jąꞌi ꞌbɛꞌa pɛꞌtsꞌi. 19 Nɛ nuꞌbʉ din jabʉ ga øthʉ, ga pɛsꞌhʉ ꞌbɛꞌa majuąni di muui, nɛ ga nuhʉ xʉn ngu rán jąpi Oją ꞌbʉ bi zøn ra pa, nɛ majuąni dam ꞌbʉmanhohʉ gätho yʉ pa maząi.
Nꞌda ran zofo ran zɛgui
20 Nuꞌi gra Timoteo, dami jamansu xʉn ho ra ꞌbɛfi nangue rám hma Oją bi ꞌdaꞌi. Nɛ dami ꞌuegue nangueꞌʉ yʉm hma ɛ̨mbi ní dįn ran ꞌyomfɛ̨ni nꞌda, pɛ hingui ho ʉ. Säti thoho, nɛ nꞌdanꞌyotho ra ꞌyu i utꞌa nꞌda. Nɛ nuꞌʉ toꞌo bi dɛnni, bi ꞌbɛh rá ꞌyu Oją. 21 Nɛ nuya Oją di ꞌda ahʉ rá mate. Nɛ høntꞌa dí xiꞌa ya.