Ga fäx ma cuhʉ
5
O guí sʉꞌa nꞌda ra dącꞌyɛi, pɛ dami zofo xʉn ho, tengutho ꞌbʉ ni ta. Nɛ nuꞌʉ yʉ tsꞌʉntꞌʉ gui ꞌyøtꞌe tengutho ꞌbʉ nin ꞌyohʉhʉ. 2 Nɛ nu yʉ zi bømbe gui ꞌyøtꞌe tengutho ꞌbʉ ni mbe, nɛ nu yʉ hmute, gui ꞌyøtꞌe tengutho ꞌbʉ nin ju, nɛ hin guim bɛ̨nꞌa nꞌda ra ꞌyąsä nangueꞌʉ. 3 Nɛ nubʉ ja yʉm pɛti gui jamansuhʉ nꞌda ra bømbe ꞌbʉ xʉn du rá ndø, ngueꞌbʉ njoꞌo toꞌo di jamansu. 4 Pɛ nuꞌbʉ nꞌda ra bømbe xʉn du rá ndø, nɛ ꞌbʉh yʉ́ tꞌʉhni, o gue yʉ́ ꞌbɛto, da bądi rán tꞌɛ̨di Oją a di jamansu yʉ́ mbe, tengutho bi ꞌyørpa ꞌbʉ mín tꞌʉhni. Nɛ gueꞌa in nde Oją. 5 Nɛ nuꞌbʉ nꞌda ra zi bømbe i nyąui Oją gä ra pa nɛ ra xui, nɛ høntꞌa Oją im bɛ̨ni, nɛ nuꞌbʉ njoꞌo toꞌo di jamansu, pɛ gui fäxhʉ a bʉya. 6 Pɛ nu miꞌda yʉ xisu, xʉn du yʉ́ ndø, ngue hinguim bɛ̨n Oją, nɛ i honi da ꞌyøzɛhɛ yʉ́ pähä zɛhɛ. Madagueꞌbʉ i ꞌbʉi, pɛ tenguꞌbʉ xʉn du bʉ nam bɛ̨n Oją. Hinga gueꞌʉ da mba ma jamansu bʉ ja ram pɛti ʉ. 7 Nɛ nuya yʉm hma i ja ua, gui xänba ʉ yʉ cu, janangueꞌa njon da ꞌyɛ̨na hingui ho øtꞌʉ. 8 Nɛ nuꞌbʉ nꞌda hin di unni ꞌbɛꞌa di ꞌbɛ a rá ta o gue rá mbe, o gätho miꞌda yʉ́ mɛni, manꞌda xʉn tsꞌo rá mbʉi ꞌbʉ, xinda gueꞌbʉ hin xtá ꞌyɛ̨cꞌyɛi, nɛ bi gønꞌa ra Cristo. 9 Nuya ga xiꞌi ndaꞌʉ ní hyoya bømbe gui hyuspa yʉ́ thuhu dim pɛpʉ ja ram pɛti. Høntꞌʉ pɛꞌtsꞌa hyąte njɛya nɛ ɛ̨mmɛ bim ꞌbʉmanhoui yʉ́ ndø. 10 Nɛ i hnumanho nangue yʉ hogaꞌbɛfi i øtꞌe, nɛ bi jamansu xʉn ho yʉ́ tꞌʉhni, nɛ ząi di säyaba yʉ jąꞌi bʉ ja yʉ́ ngu, nɛ him bin ꞌyɛ̨zɛhɛ pɛ bin ꞌyɛ̨hɛ nangue yʉ́ miꞌyɛ̨cꞌyɛihʉ, nɛ bi hyurpa yʉ́ mbʉi toꞌo mi tu yʉ́ mbʉi, nɛ bin ɛ̨hya bi ꞌyøtꞌ miꞌda yʉ hogantꞌøtꞌe. Nɛ guehya yʉ hyoya bømbe gui hyuspa yʉ́ thuhu ya. 11-12 Pɛ nu miꞌda yʉ xisu xʉn du yʉ́ ndø, nuꞌbʉ hingui ngu yʉ jɛya pɛꞌtsꞌi, hin gui hyuspa yʉ́ thuhu gue gui ꞌyɛ̨mfʉ dim pɛpʉ. Nguetho tsꞌʉrpʉ thoho da bɛ̨ni din thąti, nɛ nuꞌbʉ din thąti mahønꞌa hin da ꞌyøtꞌa ra ꞌbɛfi mí ma xtá ꞌyøtꞌe. Nɛ ra tsꞌoqui a nguetho him bi jąꞌtsꞌa bi ma. 13 Nɛ nuꞌʉ, tsꞌʉrpʉ thoho din dąnhyɛ̨i yʉ́ mbʉi ꞌbʉ njoꞌo yʉ́ ndø, nɛ da hyąꞌda thoho yʉ ngu, nɛ høn nan cꞌąte di ja, im manꞌa hingui ho, nɛ sä din thįntꞌi i øtꞌe nɛ hin rá ꞌbɛfi bʉ. 14 Janangueꞌa manꞌda xʉn ho ꞌbʉ din thąti mahønꞌa, dim ꞌbʉh yʉ́ tꞌʉhni, nɛ dim pɛpʉ ja yʉ́ ngusɛ. Nɛ nuꞌbʉ din jabʉ da ꞌyøtꞌe, hin di cꞌąmanꞌʉjʉ man sʉihʉ ꞌbʉ. 15 Nguetho i ꞌbʉ i ꞌda yʉ xisu xʉn du yʉ́ ndø, nɛ ya xʉ mbengui nɛ i tɛn ra zįthu. 16 Nɛ dí xiꞌi mahønꞌa, nuꞌbʉ ꞌbʉ a nꞌda ra cu ngue bi du rá ndø a rá mbe, jatho da mbɛpi, o gue rá nana bi du rá ndø, o gue rá mɛni, i jatho di jamansu, nɛ hinga gueꞌa ra mbɛti pa ma pɛti bʉ ja ra niją dí mba ma jamansu ʉ. Janangueꞌa dí guaꞌa ra mbɛti bʉ ja ra niją ngue høntꞌʉ njoꞌo toꞌo di jamansu da mba mꞌbɛpi bʉ. 17 Nu yʉ ngʉrpi bʉ ja ram pɛti, nuꞌʉ to di jąꞌtsꞌi xʉn ho yʉ́ ꞌbɛfi, da tꞌɛ̨spa ʉ, nɛ da mba mꞌbätsꞌi ꞌbɛꞌa di ꞌbɛdi. Nɛ nuꞌʉ to i humbi din xänbate nangue rám hman Oją, manꞌda jatsꞌɛditho da tꞌɛ̨spi. 18 Nguetho ntꞌoꞌtꞌi: “Nu yʉ uąfanindąni ꞌbʉ i uąhi hingan thuꞌtꞌi yʉ́ nde, pɛ da zä da za yʉ paxi i ja bʉ.” Nɛ manꞌda ram hma i ja: “Nuꞌa to dim pɛfi ja rán tꞌɛ̨di din juꞌtꞌi,” i ɛ̨na. 19 Nɛ hin gui ꞌyʉrpa ra güɛnda ꞌbʉ da mba ma yąpi nꞌda ra ngʉrpi tꞌɛ̨mbi bi ꞌyøtꞌ ra tsꞌoqui, hinda høntꞌbʉ di yoho hyu ʉ di yąpi gui ꞌyøh pʉya. 20 Nɛ nuꞌbʉ majuąni bi ꞌyøtꞌ ra tsꞌoqui, da mba ma hɛcpi bʉ dim pɛti ʉ miꞌda, nꞌdahma gätho din su. 21 Nɛ madagueꞌbʉ gadín amigoui o hinꞌna, pɛ ꞌdaꞌangu gui ꞌyørpe. Nɛ gueꞌa i jatsꞌɛdi dí xiꞌi gui ꞌyøtꞌa, nguetho in nu a Oją, Oją da bądi ꞌbʉ guí jąꞌtsꞌi, nɛꞌa ra Hmu, ra Jesucristo, in nu i, nɛ yʉ́ hogam ꞌbɛhni Oją mahɛ̨tsꞌi in nu i. 22 Him ꞌbex gui un ra ꞌbɛfi nꞌda ran ꞌyohʉ, ꞌbɛ gui pąhmbʉ ꞌbɛꞌa rá mbʉi. Nguetho nuꞌbʉ nꞌda gá un ra ꞌbɛfi, nɛ da ꞌyøtꞌ ra tsꞌoqui, guí conhui rá tsꞌoqui a bʉya. Janangueꞌa gan ꞌyomfɛ̨ni xʉn ho, nɛ nte gan dupate bʉya. 23 Nuya dí xiꞌi gra Timoteo, nangue ni mbʉi xʉn ʉ, nɛ jantꞌa pʉntsꞌ thoho, dami si zitsꞌʉtho ra vino, nɛ hinga høntꞌa ra dehe gui si. 24 Guim bɛ̨mhbʉ ndana ʉ yʉn ꞌyohʉ da sih ra ꞌbɛfi bʉ ja ram pɛti, ꞌbʉ i ꞌda ngue mfądi i ja yʉ́ tsꞌoqui, nɛ ꞌbʉh miꞌda ngue hinga mfądi i ja yʉ́ tsꞌoqui jagueꞌbʉ da zøn ra pa da thįnba yʉ́ tsꞌoqui. 25 Nɛ ngutho nangue ran hocjąꞌi i øtꞌa nꞌda, mfądi nangue yʉ jąꞌi. Nɛ nuꞌbʉ him ꞌbexque mfądi, pɛ mꞌbɛjua da fądi, nguetho hingui sä da ꞌyągui.