Mi pą Oją da ꞌueꞌʉ ꞌda
4
Nu rá Hogandąhi Oją mꞌbɛtꞌo di bɛ̨ngä ngue da ꞌuepʉ ja rá ꞌyu Oją ʉ ꞌda. Ngue da ꞌyømanho ʉ yʉ́ nde ʉ yʉ hyäte xänbate bin xädi nangue yʉ́m hman yʉ zįthu. 2 Nu yʉ hyäte hingui sä bʉ da zop yʉ́ mbʉi Oją, nguetho bi tsꞌon yʉ́ mbʉi nangue yʉ fɛhni ząi im ma. 3 Ngue sä di hɛcpa yʉ jąꞌi, i xifi hin din thąti, xín da zi ꞌda yʉn tsꞌihmɛ, sä ɛ̨nꞌʉ. Pɛ bi zängahʉ Oją ga hąmhbʉ høntꞌa go ꞌbɛꞌa mán tsꞌihmɛ ꞌbʉ dí xihmbʉ jamadi Oją, gue nujʉ dyʉ ꞌyɛ̨cꞌyɛihʉ, nɛ dí pąhmbʉ ndaꞌa majuąni. 4 Nguetho gätho xʉn ho ꞌbɛꞌa bi ꞌyøtꞌ Oją, nɛ hinꞌyʉ ꞌbɛꞌa ga ɛmhbʉ, pɛ ga hąmhbʉ nɛ ga ɛ̨mfʉ jamadi Oją bʉya. 5 Nguetho mająpi ngueꞌa dí äfʉ rán jąpi Oją, nɛ nu rám hman Oją i ɛ̨mbi xʉn ho a.Rá hogambɛfi ra Jesucristo a ra Timoteo
6 Nuꞌi gra Timoteo, xʉn ho ꞌbʉ guim bɛ̨nba yʉ cu na ram hma i ja ua, janangueꞌa gam pɛfi xʉn ho nangue ra Jesucristo. Nguetho bi hąꞌa ra tsꞌɛdi ni mbʉi a ra hogamhma dí ɛ̨cꞌyɛihʉ, ngue ra hoganxädi guí tɛnni. 7 Nɛ o gui ʉrpa ra güɛnda yʉ́m hmansɛ yʉ jąꞌi säti thoho nɛ xʉn tsꞌo. Pɛ dami hyądumbʉi nangue rá ꞌbɛfi Oją. 8 Nɛ tengu ꞌbʉ ząi dadin cunh ma jąꞌihʉ, nɛ da hyą ra tsꞌɛdi, nɛ ngutho ga øthʉ nangue ma mbʉihʉ, da hyą ra tsꞌɛdi ꞌbʉ ząi ga humbahʉ nangue rá ꞌbɛfi Oją. Nɛ ɛ̨mmɛ xʉn ngu di muui ꞌbʉ ga humbahʉ, nguetho i ørcahʉ ran ho yʉ pa i jabʉ ya, nɛ gätho yʉ pa maząi. 9 Nɛ majuąni na ram hman na, janangueꞌa ndeꞌbʉ gätho ga øthʉ xʉn ho. 10 Janangueꞌa dí häthʉ yʉn ʉnbi nɛ dí humbi dadím pɛhmbʉ, guepʉ go da zä ga xihmbʉ xʉn ho rám hma Oją yʉ jąꞌi. Nɛ da zä ga däp yʉ́ mbʉi Oją bʉya, nɛ dim pøhø. Nguetho nꞌdatꞌ Oją dí tømhbʉ i ꞌbʉi, nuꞌa in nde da yąnꞌʉ gätho yʉ jąꞌi i ꞌbʉi, nɛ da yąnꞌʉ toꞌo da ꞌyɛ̨cꞌyɛi a. 11 Nuya yʉn xädi i ja ua, thocpa thoho gui hyądumbʉi ɛ̨mmɛ gui bɛ̨nbi nɛ gui xänbi gätho yʉ cu bí ꞌbʉpʉ. 12 O to guídí japi da ꞌyʉꞌtsꞌiꞌi ngue gra tsꞌʉntꞌʉ thoho. Pɛ gui ꞌyutꞌʉ yʉ cu nangue yʉn tꞌøtꞌe bi xijʉ Oją gue gui ꞌyøzɛhɛ xʉn ho, gui jamansu ꞌbɛꞌa gui ma, o ꞌbɛꞌa gui ꞌyørpʉ. Janangueꞌa gui ꞌyuti din huɛ̨qui nꞌda ngu nꞌda, nɛ di jąꞌtsꞌi, nɛ da ząmzɛhɛ yʉ́ mbʉi. 13 Pɛ gätho ꞌbʉ hin ná søngä bʉ, pɛ gui jamansu ni ꞌbɛfi ꞌbʉ guí man rám hman Oją, nɛꞌbʉ gadí un ran zofo yʉ jąꞌi, nɛꞌbʉ guí xänbi ꞌbɛꞌa nam bønꞌa nꞌdaxɛqui gui xifi. 14 Damim pɛfi xʉn ho nangue a rá tsꞌɛdi Oją bi ꞌdaꞌi, tengu bi xiꞌa ʉ ꞌda yʉ́ pøngahyą Oją. Ngue bi bɛ̨nꞌna ni mbʉi Oją ꞌbʉ mí ꞌyäp rá mfätsꞌi nangueꞌe, nɛ bi gäx yʉ́ ꞌyɛ bʉ ja ni yą. 15 Thocpa thoho gui ꞌyøtꞌa dí xiꞌi, nɛ høntꞌa gui hyądumbʉi gui ꞌyøtꞌa, nɛ nubʉya da nu i gätho yʉ jąꞌi ngue bin te xʉn ho ni mbʉi nangue rá ꞌbɛfi Oją guí øtꞌe. 16 Nɛ thocpa thoho gui hyądumbʉi gam fäsɛ nangue ni mbʉi, nɛ gui jamansu ꞌbɛꞌa gätho gui xi ʉ ꞌbʉpʉ nangue rám hman Oją. Nɛ nuꞌbʉ ngubʉ gui ꞌyøtꞌe, nɛ di jąpꞌa Oją, nɛꞌʉ gä miꞌda yʉ jąꞌi guí xänbi.