Ndaꞌʉ yʉn ꞌyohʉ din ngʉrpi
3
Majuąni a ram hma, nuꞌbʉ in nde din ngʉrpi nꞌda, in nde nꞌda ra ꞌbɛfi xʉn ho. 2 Pɛ jatho din hocjąꞌi nꞌda ra ngʉrpi, nɛ nte da thįnba nꞌda rá tsꞌoqui. Nɛ høntꞌa nꞌda rá xisu da zi, nɛ da bądi da ząmzɛhɛ rá mbʉi nɛ din ꞌyomfɛ̨ni xʉn ho, nɛ di jamansu ꞌbɛꞌa i øtꞌe, nɛ di ho di un ran tsꞌäya bʉ ja rá ngu, nɛ da bądi din xänbate nangue rám hman Oją. 3 Nɛ njąmꞌbʉ dim mihni, xín din ndesʉi, nɛ hin da ꞌyømanꞌʉ a i sifi, nɛ xín din hecpate pɛ din hocpate, nɛ hin da nde xʉn ngu ra mbɛti. 4 Nɛ da bądi dim ꞌbɛtꞌo bʉ ja rá ngusɛ, nɛ nu yʉ́ tꞌʉhni da ꞌyøtꞌe ꞌbɛꞌa i xifi, nguetho numansu yʉ́ ta. 5 Nguetho nuꞌbʉ hingui pądi dim ꞌbɛtꞌo bʉ ja rá ngusɛ nꞌda ran ꞌyohʉ, hin da bądi di jamansu yʉ ꞌyɛ̨cꞌyɛi ꞌbʉ. 6 Nɛ hin din ngʉrpi nꞌda ra ꞌdaꞌyo ꞌyɛ̨cꞌyɛi, tsꞌʉrpʉ thoho din ꞌyɛ̨tsꞌi tengutho ra zįthu, nɛ da dɛxꞌa Oją a. 7 Nɛ nu yʉ ngʉrpi da ꞌyøtꞌe ngue da hnumansu, nɛpʉ ꞌbʉ ʉ hing yʉ ꞌyɛ̨cꞌyɛi da ꞌyøtꞌe ꞌbɛꞌa dí hnumansu, janangueꞌa njon di cꞌąmanꞌʉ, nɛ hin da dąp ra zįthu bʉya.Ndana ní jąꞌi dim fäxte
8 Ximangutꞌʉ yʉ́m fätsꞌihʉ yʉ ngʉrpi, ngutho guextaꞌa jatho din hocjąꞌi, nɛ ꞌdaꞌangu da ma, nɛ hin dim mihni, xín din siyate nangue ra mbɛti. 9 Nɛ da bądi xʉn ho ꞌbɛꞌa gätho rán thɛui a ram hma nɛ din ząm bʉ, nɛ ząi øtꞌa xi Oją ꞌbʉ in zop yʉ́ mbʉi. 10 Nɛ ndeꞌbʉ ꞌbɛ da hnu ꞌbʉ tɛnni xʉn ho, nɛ nubʉya nuꞌbʉ hin te da thįnbi, da zä da ꞌyøtꞌ ra ꞌbɛfi dim fäxte bʉya. 11 Ximangutho ꞌbʉ dim fäxte nꞌda ra xisu, i jatho da hnumansu, pɛ hin din cꞌąte, nɛ xín dim mihni, pɛ din ꞌyomfɛ̨ni xʉn ho, nɛ di jąꞌtsꞌi ꞌbɛꞌa gä øtꞌe. 12 Nɛ nu nꞌda ran ꞌyohʉ ꞌbʉ im fäxte, nꞌdatho rá xisu da zi, nɛ da bądi dim ꞌbɛtꞌo bʉ ja rá ngu, nɛ da ꞌyøtꞌʉ yʉ́ tꞌʉhni ꞌbɛꞌa da xifi. 13 Nguetho nuꞌbʉ i øtꞌe xʉn ho rá ꞌbɛfi nꞌda ram fätsꞌi, da hnumanho bʉya, nɛ manꞌda da hyutꞌ ran zambʉi nangue rá ꞌbɛfi ra Cristo.
Mixte xʉn ho a ram hma dí ɛ̨cꞌyɛihʉ
14 Guehna dí otꞌa na ya, gra Timoteo, madagueꞌbʉ dím bɛ̨ni ga mba bʉ nꞌdihi. 15 Pɛ xiꞌbʉ him ꞌbex da zä ga mba bʉ, pɛ ya dá xiꞌi ꞌbɛꞌa xʉn ho gui ꞌyøtꞌe nangue a rá ngu Oją. Ngue nu yʉ ꞌyɛ̨cꞌyɛi xa hyømba rá ngu Oją nangue yʉ́ mbʉi, ngue ꞌdatꞌa Oją i ꞌbʉi. Nɛ tenguꞌbʉ rá ngujʉ Oją guepʉ na fądi xʉn ho rám hma Oją, nɛ dín yąmhbʉ a. 16 Nɛ gueꞌa ran ho maꞌdaꞌyo dí tɛnhdʉ mixte xʉn ho a,
ngue bin ꞌyusɛ ra Cristo ua ja ra häi ꞌbʉ mín jąꞌi a,
pɛ bin ꞌyoui rá Hogandąhi Oją guepʉ í fądi hinꞌyʉ rá tsꞌoqui a,
nɛ bi nu ʉ yʉ́m ꞌbɛhni Oją mahɛ̨tsꞌi.
Nɛ bi hmangua dí ꞌbʉhmbʉ hønbʉ go hapʉ ꞌbʉh yʉ jąꞌi gue ꞌdahmaꞌdanꞌyo bʉ na yą.
Nɛ bi tꞌɛ̨cꞌyɛi ua ja ra ximhäi,
bi tsꞌix mahɛ̨tsꞌi bʉ bí ja rá tsꞌɛdi Oją mixte bʉya.