Da mba ntꞌäpi rám fätsꞌi Oją nangue gätho yʉ jąꞌi
2
Nɛ i ja ua nꞌda ram hma ga xiꞌi, gra Timoteo, ngue mahyoni gui ꞌyørpʉ ja ram pɛti. Ngue nuꞌbʉ guí yąhʉ Oją, gui xihmbʉ nangue gätho yʉ jąꞌi, gui ꞌyäfʉ rá mate nangueꞌʉ, nɛ gui xihmbʉ jamadi Oją nangueꞌa ꞌbɛꞌa bi ꞌyørpa nꞌda ngu nꞌda ʉ yʉ jąꞌi. 2 Nɛꞌʉ yʉ tsꞌʉtꞌabi nɛ gätho toꞌo ja yʉ́ tsꞌɛdi, dami ꞌyäfʉ rám fätsꞌi Oją nangueꞌʉ, ngue hin din ja yʉ sʉi nɛ xíng ra dumbʉi, nɛ hin te gam bɛ̨mhbʉ, nɛ da zä bʉ ga øthʉ xʉn ho ꞌbɛꞌa bi man Oją bʉya. 3 Nɛ xʉn ho ꞌbʉ ga øthʉ a, nguetho gueꞌa numanho Oją mam pørpatehʉ a. 4 Nguetho in nde Oją da yąni gätho yʉ jąꞌi nangue rá tsꞌɛdi ra zįthu nɛ di ꞌyomfɛ̨nibi nangueꞌa majuąni. 5 Nɛ nꞌdatho Oją i ꞌbʉi. Nɛ nꞌdatho a i ꞌbäꞌinde nɛ din hocpate bʉ bí ꞌbʉ Oją, nuꞌa ra Jesucristo ngue bin jąꞌi a. 6 Nguetho bin däsɛ ngue gätho bi gurca ma tsꞌoquihʉ. Nɛ guehna ram hma bi xijʉ Oją ꞌbʉ mi zøn ra pa bi ma. 7 Nɛ guehna ram hma í thangä gam mangä na, nɛ guehna bí ꞌbɛncä na, nɛ majuąni hin dí fɛhnigä, ngue ma ꞌbɛfigä ga xänba ʉ hing yʉ judío, ga japi di däp yʉ́ mbʉi Oją, da yąni, nɛ da ꞌyɛ̨cꞌyɛi a majuąni. 8 Nɛ manꞌda dí xiꞌi, hønbʉ go hapʉ dim pɛti yʉ ꞌyɛ̨cꞌyɛi, xtán hotho yʉ́ ꞌyɛ ʉ yʉn ꞌyohʉ di ꞌuąꞌtsꞌ ꞌbʉ din yąhʉ Oją, ngue nte má cuɛ da bɛ̨ni, nɛ xíng ran ʉcpate. 9 Nɛ dí xiꞌi ꞌbɛꞌa gui xih yʉ xisu, ngue hin din hoc zɛhɛ nangue ran ꞌyɛ̨tsꞌi, uague di hoc yʉ́ yą, uague ra oro o yʉ thebe o ꞌbɛꞌa xʉm hmadi da japi. Pɛ din hoc zɛhɛ nangue yʉ́ he rán säui nꞌda ra hogambʉi nɛ ra hoganꞌyomfɛ̨ni. 10 Nɛ da bądi da ꞌyøtꞌ ra hogambʉi, nɛ gueꞌa ran hoqui rán säui nꞌda ra xisu i numansu Oją. 11 Nɛ nubʉ ja nim pɛtihʉ, da ndesɛ yʉ xisu da sänbi, nɛ hin go din xänbate, nɛ gätho da ꞌyøde. 12 Nɛ dí xiꞌi hin dim ꞌbɛtꞌo yʉ xisu ngue da xänba yʉn ꞌyohʉ, pɛ din hɛ̨tho. 13 Nguetho mꞌbɛtꞌo bi ꞌyøtꞌ Oją a ra Adán, nɛ mꞌbɛjua a ra Eva, janangueꞌa hingui sä dim ꞌbɛtꞌo nꞌda ra xisu. 14 Nguetho nu ra xisu bi numanho ꞌbʉ mí xih ra zįthu da ꞌyøtꞌ ra tsꞌoqui, pɛ nu ra Adán him mín nde xtá ꞌyøtꞌe. 15 Janangueꞌa din ʉnba ꞌbʉ xʉm ꞌbʉh yʉ́ tꞌʉhni ʉ yʉ xisu, pɛ da mbäx Oją ʉ ꞌbʉ thocpa thoho i ɛ̨cꞌyɛi, nɛꞌbʉ din ja yʉ́n huɛ̨cate, nɛꞌbʉ din ꞌyomfɛ̨ni xʉn ho, nꞌdatꞌa Oją da bɛ̨ni.