2 TESALONICENSES
Ná yoho ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Tesalónica
Ran zɛngua
1
Nugä dra Pablo, nɛ ra Silvano nɛ ra Timoteo dí oꞌtꞌahʉ na ra søcuą gätho ahʉ gyʉ cuhʉ nangue ra Cristo guí ꞌbʉhmbʉ bʉ ra hnini Tesalónica, gue ahʉ guí ꞌbʉhmbʉ Oją ma Tahʉ nɛ ma Hmuhʉ ra Jesucristo. 2 Nuꞌa Oją ma Tahʉ, nɛ ma Hmuhʉ ra Jesucristo dí ndepe di ꞌda ahʉ rán jąpi nɛ da hyutꞌa ni mbʉihʉ.Di ʉnba ʉ yʉ tsꞌomꞌbäi ꞌbʉ bá peng ra Cristo
3 Ma zʉ cu ahʉ jatho ga xihmbe Oją jamadi nangue ahʉ. Nɛ xʉn ho ngue ngubʉ dím bɛ̨mhbe, nguetho thocua thoho manꞌda te ni tꞌɛ̨cꞌyɛihʉ, nɛ manꞌda manꞌda gnín huɛ̨ctahʉ nꞌda ngu nꞌda ahʉ. 4 Janangueꞌa manꞌda jagähe ran johya nuꞌbʉ dí xihmbe miꞌda yʉ ꞌyɛ̨cꞌyɛi ꞌbɛꞌa guí øthʉ. Nguetho hin gadín xømbʉihʉ nangue ni tꞌɛ̨cꞌyɛihʉ, madagueꞌa hangu nangu yʉn ʉnbi guín nuhʉ nɛꞌʉ ꞌbɛꞌa gätho i tꞌøtꞌahʉ ya nangue guí tɛnhdʉ ra Cristo. 5 Nangue a guí häthʉ yʉn ʉnbi, guí uhmbʉ gue jatho di ʉnba Oją ʉ to di ʉnꞌnahʉ, pɛ nu ahʉ gám pomhbʉ a. Nɛ nuꞌʉ yʉn ʉnbi guín nuhʉ ya, gueꞌa ní hocꞌa ni mbʉihʉ Oją tengu rán säui bʉ di manda Oją. 6 Nɛ xʉn ho da ꞌyøtꞌ Oją ꞌbʉ bi un ran ʉnbi ʉ to di ʉnꞌnahʉ. 7 Nɛ nu Oją di japi din säya nin ʉnbi guí nuhʉ ya, nɛ ngutho da ꞌyørcahe ꞌbʉ bá ɛ̨h mahønꞌa mahɛ̨tsꞌi ma Hmuhʉ ra Jesús, din ꞌyohʉ yʉ́m ꞌbɛhni gue i ja yʉ́ tsꞌɛdi, nɛ ban ꞌyohʉ ra sibi ntsꞌutho. 8 Nɛ nuꞌbʉ bá ɛ̨hɛ, di un ran tsꞌɛmbi gätho toꞌo hingui pą Oją, nɛ gätho toꞌo him bi ꞌyørpamasu rán ho maꞌdaꞌyo ma Hmuhʉ ra Jesucristo. 9 Nɛ nuꞌʉ toꞌo da nu ran tsꞌɛmbi xmá mba da nu ran ʉnbi ngue njąmꞌbʉ da guadi, nɛ ma ꞌueque tho bʉ ꞌbʉh ra Hmu mahɛ̨tsꞌi, nɛpʉ hapʉ ja rá tsꞌɛdi nuįxte. 10 Pɛ nuꞌʉ yʉ ꞌyɛ̨cꞌyɛi, gueꞌʉ dí hnu a rá nuįxte a ra Hmu ꞌbʉ bi zøn ra pa ba ɛ̨hɛ. Nɛ gätho yʉ ꞌyɛ̨cꞌyɛi da ꞌyɛ̨spa a, nɛ ahʉ gan ꞌyohʉ ʉ, nguetho gá ꞌyɛ̨cꞌyɛihʉ ran ho maꞌdaꞌyo dá xi ahʉ. 11 Janangue a nząi dí yąhe Oją nangue ahʉ. Nɛ dí äfe di ꞌdaꞌa ni mbʉihʉ ngue yʉ́n thɛhʉ ram ꞌbʉi bi zänꞌnahʉ. Nɛ nuꞌa Oją di ꞌda ahʉ rá tsꞌɛdi gui ꞌyøthʉ ran ho guím bɛ̨ni gui ꞌyøthʉ. Nɛ nangue ni tꞌɛ̨cꞌyɛihʉ, Oją di zɛ ahʉ gui ꞌyøthʉ rá ꞌbɛfi. 12 Nɛ nangueꞌa ꞌbɛꞌa gui ꞌyøthʉ bʉya, nuꞌa ma Hmuhʉ ra Jesucristo da tꞌɛ̨spi. Nɛ nuꞌa xin da ꞌyɛ̨sꞌahʉ, nangue rá mate zɛhɛ a Oją nɛ ma Hmuhʉ ra Jesucristo.