5
Ma zʉ cu ahʉ, hingui jatho ga xi ahʉ jąmꞌbʉ da zøn ʉ yʉ pa din ja ʉ an tsꞌänni din ja. 2 Nguetho nu ahʉ guí pąhmbʉ xʉn ho ngue njongui pądi, o gue ra pa o gue ra xui ba ɛ̨h ra Hmu. Tenguꞌbʉ hingui pą a nꞌda jąmꞌbʉ ba ɛ̨ꞌa nꞌda ra bɛ̨. 3 Nɛ nuꞌbʉ da man ʉ hing yʉ ꞌyɛ̨cꞌyɛi gue gätho i ꞌbʉmanho nɛ nte mán tsꞌo din ja, ꞌbex ba ɛ̨h ran tsꞌɛmbi da ꞌyøtꞌ Oją ngue hin dim pommi ʉ. Nguetho tengu nꞌda ra xisu gue bi zøn ra ora dim ꞌbʉh rá tꞌʉhni, nɛ hin hapʉ sä da mbatho. 4 Pɛ nu ahʉ ma zʉ cu ahʉ, hin di pi ahʉ ngue tenguꞌbʉ ba ɛ̨ a nꞌda ra bɛ̨, nɛ hingan tsꞌärbʉ da zøhø, nɛ di pi ʉ i hupʉ ja ra ꞌbɛxui. Pɛ guí tømhbʉ ra pa ba ɛ̨h ra Hmu. 5 Nguetho gätho gahʉ dí ꞌbʉhmbʉ bʉ ja ra ꞌbɛxui tenguꞌbʉ ra xui. 6 Ndeꞌbʉ hin dam ꞌbʉhmbʉ tenguꞌbʉ dí ąhmbʉ, tengu ʉ miꞌda, pɛ dí nuhmbʉ nɛ dan ꞌyomfɛ̨nihʉ xʉn ho. 7 Nu ra xui i ąh yʉ jąꞌi nɛ ra xui di ho di mihni. 8 Pɛ nujʉ gue dí ꞌbʉhmbʉ ja rán nɛqui Oją, ndeꞌbʉ nząi din jajʉ ran ꞌyomfɛ̨ni xʉn ho. Nɛ nujʉ jatho ga hehʉ rá tsꞌɛdi Oją nangue ma tꞌɛ̨cꞌyɛihʉ, nɛ ran huɛ̨cate, nɛ ga tømdahʉ rán ho maꞌdaꞌyo ra Cristo gue gueꞌa dí pøjʉ, janangueꞌa hin da dąjʉ ra zįthu. 9 Nguetho Oją him bi zängahʉ ga nuhʉ rán tsꞌɛmbi a. Pɛ bi zängahʉ ga hąmhbʉ a ran ho maꞌdaꞌyo ngue di pøjʉ ma Hmuhʉ ra Jesucristo. 10 Nguetho nu ra Jesucristo bi du nanguejʉ, ngue in nde ꞌdarbʉ dam ꞌbʉhmbʉ a, madagueꞌbʉ xtá tuhʉ o gue dí tehʉ nuꞌbʉ bá ɛ̨h mahønꞌa. 11 Janangueꞌa damin hyurpa ni mbʉihʉ nɛ gam fäxhʉ nꞌda ngu nꞌda ahʉ tengutho guí øthʉ ya.Nu ra Pablo di un ran zofo yʉ ꞌyɛ̨cꞌyɛi
12 Nuya ma zʉ cu ahʉ, damin numansuhʉ ʉ gätho bi huan Oją ngue yʉn ngʉrpi bʉ, ngue xänꞌnahʉ nɛ di ꞌda ahʉ ran zofo nangue Oją. 13 Dami numanhohʉ ʉ nɛ ɛ̨mmɛ gui huɛ̨jʉ nangue ra ꞌbɛfi i øtꞌe nangue ahʉ. Nɛ dami ꞌyɛsꞌhʉ a gnín junthʉ bʉ guí ꞌbʉhmbʉ. 14 Nuya ma zʉ cu ahʉ dí xi ahʉ, dami xihmbʉ ʉ i dąnhyɛ̨i ngue hingui ho ꞌbɛꞌa i øtꞌe. Nɛ dami zɛhmbʉ toꞌo i tu yʉ́ mbʉi, nɛ dami zɛhmbʉ ʉ ngue hinguin zaqui yʉ́ tꞌɛ̨cꞌyɛi. Nɛ o gadín xømbʉihʉ nangue gätho ʉ, pɛ dami fäxhʉ ʉ. 15 Nɛ gan jamansuhʉ hin gui cospahʉ ran tsꞌo ꞌbʉ i øtꞌahʉ ran tsꞌo ʉ ꞌda, pɛ gan ꞌyørpahʉ ran ho nꞌda ngu nꞌda ahʉ, nɛ gätho i ꞌbʉcua ja ra ximhäi. 16 Nɛ daman johyahʉ gätho yʉ pa. 17 Nɛ ꞌyo guí ɛsꞌhʉ gan yąhʉ Oją. 18 Nɛ Oją gui xihmbʉ jamadi ꞌbɛꞌa gätho bi ꞌyøtꞌahʉ. Nguetho gueꞌa in nde Oją a gui ꞌyøthʉ, gue ahʉ guín ꞌyohʉ ra Cristo Jesús. 19 Nɛ ꞌyo guí sɛrpahʉ rá tsꞌɛdi rá Hogandąhi Oją dim pɛpʉ mbo ni mbʉihʉ. 20 Nɛ ꞌyo guí ømanꞌʉhʉ ꞌbʉ ꞌboꞌo da ma, ngue dim pøngahyą Oją. 21 Dami bɛ̨mhbʉ gue ꞌbɛꞌa gätho xʉn ho o hinꞌna. Nuꞌbʉ xʉn ho, dami pɛsꞌhʉ. 22 Dami ꞌuehmbʉ gätho ꞌbɛꞌa mán tsꞌo. 23 Nu Oją gue bi hocꞌahʉ, nɛ di ja ahʉ gätho ni mbʉihʉ guim bɛ̨mhbʉ a. Nɛ di ja ahʉ ni mbʉihʉ nɛ ni tehʉ nte mán tsꞌo din ꞌyohʉ nuꞌbʉ bá ɛ̨h mahønꞌa ma Hmuhʉ ra Jesucristo. 24 Nu Oją gueꞌa bi zonꞌnahʉ, ngubʉ da ꞌyøtꞌahʉ. Nguetho di jąꞌtsꞌa im ma nɛ da ꞌyøtꞌe gätho na.
Ran zɛngua ran zɛgui nɛ rán jąpi Oją