COLOSENSES
Ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Colosas
Ran zɛngua
1
Nugä drá Pablogä, ma ꞌbäigäꞌbe ra Cristo Jesús, nangue rá pähä Oją. 2 Nɛ dí yoꞌbe ma cuhʉ ra Timoteo, dadí zɛngua ahʉ gätho yʉ ꞌyɛ̨cꞌyɛi ngue guí ꞌbʉhmbʉ bʉ ja ra hnini Colosas, dadín cuhʉ nangue nꞌdatꞌa dím bɛ̨mhbʉ ra Cristo. Nɛ dín ndehe ngue gätho ahʉ guin nuhʉ rán jąpi Oją ma Tahʉ, nɛ da hyutꞌa ni mbʉihʉ. Jamadi dí ɛ̨mfe Oją
3 Nuꞌbʉ dí yąhe Oją ngue rá Ta ma Hmuhʉ ra Jesucristo, thocua thoho dí ɛ̨mfe jamadi nangue ahʉ. 4 Nguetho ya xtá øhmbe nangue ni tꞌɛ̨cꞌyɛ̨ihʉ nangue ra Cristo Jesús, nɛ dá øhmbe ngue ja ahʉ ran huɛ̨cate nangue ni mi ꞌyɛ̨cꞌyɛ̨ihʉ. 5 Nguetho guí tømhbʉ ꞌbɛꞌa gätho yʉn ho guin nuhʉ bʉ mahɛ̨tsꞌi, nɛ guí tømhbʉ gueꞌbʉ go rá mbʉdi gmí ꞌyɛ̨cꞌyɛ̨ihʉ a ram hma majuąni. 6 Nu ran ho maꞌdaꞌyo ngue xcá ꞌyøhmbʉ, nuya din xąndi, nɛ hønbʉ go hapʉ i pa, di pärpa yʉ́ mbʉi yʉ jąꞌi, tengu tho bin ja bʉ guí ꞌbʉhmbʉ ꞌbʉ gmí ꞌyɛ̨cꞌyɛ̨ihʉ njuąntho rá mate Oją. 7 Gmí ꞌyøhmbʉ ran ho maꞌdaꞌyo gueꞌa bi xi ahʉ man ꞌyoꞌbe ra Epafras. Nugähe ɛ̨mmɛ dadí huɛ̨je na, nguetho nuna ran ꞌyohʉ nꞌda rá ꞌyɛ̨hɛ̨ ra Cristo, nɛ di zɛ ahʉ nangue rá ꞌbɛfi Oją. 8 Nɛ nuna ra Epafras bi xije ngue gadí huɛ̨gahe nangue rá Hogandąhi Oją di bɛ̨nꞌnahʉ. 9 Nɛ nuꞌbʉ ra pa dá øhmbe ngue xʉn ho ni tꞌɛ̨cꞌyɛ̨ihʉ nɛ nin huɛ̨catehʉ, thocua thoho dí äfe rá tsꞌɛdi Oją nangue ahʉ, ngue gui pąhmbʉ rá pähä Oją nɛ gui pąhmbʉ rán ꞌyomfɛ̨ni a rá Hogandąhi Oją. 10 Nɛ dí äfe rá tsꞌɛdi Oją ngue gam ꞌbʉhmbʉ tengu rán säui ʉ yʉ́ tꞌʉhni Oją, nɛ thocua thoho ząi gui ꞌyøthʉ a in numanho ra Hmu. Nɛ dí äfe Oją ngue gui ꞌyøthʉ yʉ hogantꞌøtꞌe, nɛ din te ni mbʉihʉ ngue manꞌda gui pąhmbʉ Oją. 11 Nɛ gätho nan gu rá tsꞌɛdi Oją dí äpähe nangue gätho yʉn ʉnbi guín nuhʉ, ngue hin gan xømbʉihʉ. Nɛ nangue rá tsꞌɛdi Oją di ja ahʉ ngue hin di ʉnꞌna ni mbʉihʉ, nɛ din ja ahʉ ran johya. 12 Janangue a da zä gui ꞌyɛ̨mfʉ jamadi ma Tahʉ Oją, nguetho bi hogahʉ da zä ga comhbʉ ꞌbɛꞌa gätho di un yʉ ꞌyɛ̨cꞌyɛ̨i guepʉ bí ja rán nɛqui. 13 Nɛ bi yąnjʉ Oją bʉ ja rá tsꞌɛdi ra ꞌbɛxui, nɛ bi zixgahʉ bʉ di manda rá Tsꞌʉntꞌʉ di huɛ̨qui. 14 Nɛ nuꞌa rá Tsꞌʉntꞌʉ bi gurca ma tsꞌoquihʉ, nɛ gueꞌa í zä bi pungahʉ Oją a.
Rá ꞌbɛfi bi ꞌyøzɛhɛ ra Cristo
15 Nɛ nu Oją hingui sä da nu nꞌda, pɛ nu ra Cristo ngue ꞌdaꞌangudui Oją, nɛ bin jąꞌi ua ja ra häi tengu tho ꞌbʉ dá nuhʉ Oją. Nu ra Cristo mi ꞌbʉ ꞌbʉ rá mbʉdi thoho, ꞌbʉ nte mi ja ua. 16 Nɛ nangue rá tsꞌɛdi Oją ra Cristo bi ꞌyøtꞌe ꞌbɛꞌa gätho i ja nɛ toꞌo gätho i ꞌbʉi, guecua ja ra häi, nɛpʉ mahɛ̨tsꞌi, nuꞌʉ di nɛqui nɛꞌʉ hin di nɛqui, gätho ʉ i ja yʉ́ tsꞌɛdi, nɛꞌʉ ɛ̨mbi i jasɛ yʉ́ tsꞌɛdi, pɛ nu ra Cristo bi ꞌyøtꞌe gätho ʉ ngue di manda ʉ. 17 Nɛ nuꞌa ra Cristo mi ꞌbʉi nuꞌbʉ ma hinꞌyʉ ua ra ximhäi. Nɛ nangue rá tsꞌɛdi di jamansu xʉn ho gätho ꞌbɛꞌa bi ꞌyøtꞌe, nɛ gueꞌa ní bømanho a. 18 Nu gätho yʉ ꞌyɛ̨cꞌyɛ̨i i ꞌbʉi nꞌdamꞌbʉi tho i øtꞌe tenguꞌbʉ nꞌdanjąꞌi tho, nu ra Cristo tenguꞌbʉ rá yą a. Nɛ di un ra temaząi yʉ ꞌyɛ̨cꞌyɛ̨i. Nɛ nuꞌa, rá mbʉdi ngue bi dąmbɛ̨ni a. Janangue a hinꞌyʉ manꞌda ra tsꞌɛdi nuįxte tengu rá tsꞌɛdi a. 19 Nguetho bi zän Oją høntꞌa rá Tsꞌʉntꞌʉ bi unni gätho rá tsꞌɛdi. 20 Nɛ nuꞌbʉ mí mbän rá ji ra Cristo bʉ ja ra pontꞌi, bi ꞌbɛrpa yʉ́ tsꞌɛdi ʉ gätho madín sʉhmbʉ Oją i ꞌbʉcua ja ra häi nɛpʉ mahɛ̨tsꞌi. Nɛ gueꞌa dí hocpi gätho ꞌbɛꞌa i ja, nɛ gueꞌa dí hocpa ʉ toꞌo gätho in nde. 21 Nɛ nuꞌa ra Cristo bi hogahʉ, nguetho yatho dá ꞌuehmbʉ bʉ rá ꞌyu Oją, nɛ mí øthʉ yʉn tsꞌo, nɛ gueꞌa dán sʉhmbʉ Oją a. Pɛ nuya Oją sä da numanhojʉ. 22 Nu Oją bi hogahʉ gätho ma tsꞌoquihʉ, nguetho rá jąꞌi ra Jesús bi nu ran ʉnbi nɛ ran dąte nanguejʉ. Janangueꞌa xtán hotho gahʉ ꞌbʉ bi däjʉ bʉ ꞌbʉ Oją, nɛ hin da dįnga ma tsꞌoquihʉ. 23 Pɛ nuꞌbʉ guín nde ngue din ja ahʉ bʉ, pɛ jatho thocua thoho gui ꞌyɛ̨cꞌyɛ̨ihʉ, nɛ hin gui ꞌyon nin ꞌyomfɛ̨nihʉ. Nɛ gui thoqui gui tømhbʉ ran ho maꞌdaꞌyo gá ꞌyøhmbʉ, nuꞌa bi sih yʉ jąꞌi gätho ra ximhäi. Nɛ nꞌdatꞌa ram hma dí øtꞌä ngue dím pøngahyągä, guecä drá Pablogä.
Rá ꞌbɛfi ra Pablo
24 Nɛ nugä di johya ma mbʉi ꞌbʉ dín nu ran ʉnbi nangue ahʉ. Nɛ xʉn zän Oją ga comhbʉ rán ʉnbi ra Cristo, nguetho yʉ́ mbɛti gahʉ a. Nuꞌa bi nu ran ʉnbi nangue gätho yʉ ꞌyɛ̨cꞌyɛ̨i, nɛcä dín nu ran ʉnbi tengu bi zän Oją ngue gan nugä. 25-26 Nɛ bi huancä Oją gätho yʉ ꞌyɛ̨cꞌyɛ̨i ga pɛpi, ngue ga xih ran ho maꞌdaꞌyo. Nɛ nuꞌa ran ho maꞌdaꞌyo ní gua a rám hman Oją a, ngue im ma gätho him mam fądi mamꞌbɛtꞌo. Nguetho gueꞌbʉ rá mbʉdi thoho njom mí pądi. Nɛ nuꞌbʉ mám ꞌbʉhmbʉ bʉya, nɛ ja dá pąhmbʉ bʉya. 27 Nɛ nuna ram hma him mam fądi, ngue dim ꞌbʉpʉ ra Cristo bʉ mbo ma mbʉihʉ, ngue gätho dyʉ́ ꞌyɛ̨cꞌyɛ̨ihʉ i ꞌbʉh ra ximhäi, nɛꞌʉ hing yʉ judío. Nɛ nangue dim ꞌbʉpʉ mbo ma mbʉihʉ ra Cristo, sä ga tømhbʉ a rán ho nuįxte bí ja bʉ mahɛ̨tsꞌi. Nɛ guehna ran tꞌøtꞌe nuįxte in ndejʉ Oją ga pąhmbʉ ya. 28 Janangue a nu ran ho maꞌdaꞌyo dím mamhbe nɛ dí xänbahe xʉn ho, nɛ gätho yʉ jąꞌi dí xihmbe ran ho, nangue bi ꞌdacä ran ꞌyomfɛ̨ni Oją. Nguetho dí ndepe gätho da mba ma hocpi yʉ́ mbʉi ʉ, nuꞌbʉ i pądi ꞌbɛꞌa bi ꞌyørba ra Cristo. Nɛ da zä dim ꞌbʉi xʉn ho ra Cristo bʉ mbo yʉ́ mbʉi bʉya. 29 Janangue a gätho ma mbʉi dí øtꞌä ma ꞌbɛfi, nangue ra tsꞌɛdi ngue bi ꞌdac ra Cristo dí øtꞌä.