2
Nugä drá Pablogä dín nde ahʉ gui pąhmbʉ ngue dí hądumbʉi dí äpä rá tsꞌɛdi Oją nangue ahʉ gyʉ́ ꞌyɛ̨cꞌyɛ̨ihʉ. Nɛꞌʉ ngue ꞌbʉpʉ ra hnini Laodicea nɛ gätho ʉ miꞌda ngue njąmꞌbʉ mi nugui. 2 Dín nde ahʉ ngue da hyu ni mbʉihʉ, nɛ nꞌdatꞌa guim bɛ̨mhbʉ nangue i ja ahʉ nin huɛ̨catehʉ nꞌda ngu nꞌda ahʉ. Nɛ hin te di ꞌbɛdi ngue gui pąhmbʉ nangue ra Cristo, nguetho ꞌbɛꞌa gätho him mam fądi sä gui tįmhbʉ nangue ra Cristo. 3 Pɛ nangue ra Cristo sä gui tįmhbʉ ꞌbɛꞌa him mam fądi nangue rán ꞌyomfɛ̨ni ra Cristo. Nɛ høntꞌa ra Cristo sä da ꞌyut ahʉ rán ꞌyomfɛ̨ni Oją. 4 Nuna guehna dí xi ahʉ na, nguetho ꞌbʉꞌi ꞌda nde da hyä ahʉ, ɛ̨mmɛ mahotho im man ʉ, pɛ him majuąni. 5 Nugä hinga ꞌdarbʉ dí ꞌbʉhmbʉ ya, pɛ i so ma mbʉi nangue ahʉ. Nɛ ɛ̨mmɛ i hu ma mbʉi ꞌbʉ dí øde ngue hingui cuentꞌ ni mbʉihʉ, nɛ hingui tąp a ni mbʉihʉ ʉ yʉ hyäte, nangue ni tꞌɛ̨cꞌyɛihʉ nangue ra Cristo. 6 Ndeꞌbʉ thocua thoho gan ꞌyohʉ ra Cristo Jesús ra Hmu, nguetho ya gá sin a ra Cristo ngue dim Hmu bʉ ja ni mbʉihʉ, nɛ bi du nangue ahʉ. 7 Nu ra Cristo tenguꞌbʉ ra dąꞌyʉ a, nɛ nꞌdatꞌa guí comhbʉ rá te ni mbʉihʉ, nɛ gueꞌa nán te ni mbʉihʉ a. Nɛ dami zacua ni tꞌɛ̨cꞌyɛ̨ihʉ, tengu bi sänꞌnahʉ. Nɛ ząi gui ꞌyɛ̨mfʉ jamadi Oją gätho bi ꞌda ahʉ. Dí comhbʉ ra ꞌdaꞌyote ra Cristo
8 Damin jamansuhʉ ngue hin din tsꞌon ni tꞌɛ̨cꞌyɛ̨ihʉ nangue ꞌbɛꞌa im man i ꞌda yʉn ꞌyohʉ, ngue nde da hyä ahʉ. Pɛ im bɛ̨nsɛ a i xi ahʉ, nɛ him majuąni a i xi ahʉ. Gueꞌʉ yʉ́m hmansɛ yʉn ꞌyohʉ im ma miꞌda yʉ hmu hin di nɛqui di manda ua ja ra ximhäi, nɛ hin rán tꞌɛ̨di ra Cristo ʉ. 9 Pɛ nangue a ra Cristo da zä ga pąhmbʉ xʉn ho Oją. Nguetho Oją bin jąꞌi nangue rán gøcꞌyɛ̨i ra Cristo, nɛ nte di ꞌbɛdi gätho i ja a Oją nangue rá jąꞌi ra Cristo. 10 Janangue a nuꞌbʉ dín ꞌyohʉ ra Cristo, i jajʉ ꞌbɛꞌa gätho dí homhbʉ. Nɛ nuꞌa ra Hmutsꞌʉtꞌabi a, nɛ høntꞌa di manda gätho ꞌbɛꞌa i ja. 11 Nɛ nuꞌbʉ má ɛ̨cꞌyɛ̨ihʉ ra Cristo, bi thɛgahʉ gätho ma tsꞌoquihʉ gätho gahʉ, nɛ ahʉ ngue hing yʉ judío ahʉ. Nɛ gueꞌa njuąntho ran thɛqui in nu Oją a bi ꞌyøt ahʉ ra Cristo. 12 Nguetho nuꞌbʉ mán xixyąhʉ, tenguꞌbʉ ꞌdarbʉ bi tꞌägahʉ a ra Cristo, ngue dá sohmbʉ bʉ ma nyon ꞌyomfɛ̨nihʉ. Nɛ tenguꞌbʉ ꞌdarbʉ dá thąmbɛ̨nihʉ ra Cristo bʉ ja ra ꞌdaꞌyote, nguetho dí ɛ̨cꞌyɛ̨ihʉ rá tsꞌɛdi Oją bi xoxꞌa ra Cristo ꞌbʉ mi du, nangue rá tsꞌɛdi xʉn ndoho. 13 Nɛ nuꞌbʉ hin ní hoc ni mbʉihʉ, gätho ahʉ ngue hing yʉ judío ahʉ, tenguꞌbʉ gyʉ́ duhʉ nangue ni tsꞌoquihʉ, nɛ hin gmi comhbʉ ran hoqui bi man Oją mayaꞌbʉ. Pɛ nu Oją bi ja ahʉ nɛꞌahʉ dá comhbʉ ra temaꞌdaꞌyo ra Cristo, nɛ bi pungahʉ gätho ma tsꞌoquihʉ. 14 Nɛ nujʉ hin dá jąshʉ yʉ́n tꞌɛ̨di Oją, o gueꞌa ran hocjąꞌi dí pąsɛhʉ hin dá jąshʉ a, nɛ gueꞌa gä dín dupatehʉ a. Pɛ bi gurga man dupatehʉ a ra Jesús ꞌbʉ mi du bʉ ja ra pontꞌi. Nɛ gueꞌa ní hogahʉ Oją a. 15 Nɛ nangue a ꞌbɛꞌa bi ꞌyøtꞌ ra Cristo ꞌbʉ mi du bʉ ja ra pontꞌi, bi ꞌbɛrpa yʉ́ tsꞌɛdi ʉ i ɛ̨na i ja yʉ́ tsꞌɛdi ngue hin di nɛqui. Nɛ bi japi ngue bi mbɛꞌtsꞌ yʉ́ sä ꞌbʉ mi hnu ngue bi dą a ra Cristo.
Ga homhbʉ ga øthʉ ngue dyʉ mɛnguhʉ bʉ mahɛ̨tsꞌi.
16 Janangue a njon da zä da xijʉ ga sufʉ ꞌbɛꞌa dí sihʉ, nɛ njon da zä da xijʉ jatho ga sufʉ nꞌda ran go, gueꞌʉ yʉ tꞌʉngopa, o gueꞌʉ yʉ pa ran tsꞌäya. 17 Nɛ nuya yʉn tꞌɛ̨di ɛ̨mbi xʉn dʉxqui, bi man Oją mayaꞌbʉ ngue bi xi ʉ yʉ judío, pɛ ꞌda yʉ patho ʉ. Nɛ din tꞌɛsꞌ ꞌbʉ bá ɛ̨h ra Cristo ʉ, nguetho yʉ hmɛpya thoho nangue a ra Cristo. Pɛ nuya bi zøh ra Cristo, nɛ gueꞌa majuąni i ja rá tsꞌɛdi a. 18 Nɛ masque i si ahʉ gui ꞌbɛhmbʉ rán jąpi Oją ꞌbʉ hin gui thąndehʉ yʉ́m ꞌbɛhni Oją mahɛ̨tsꞌi. Pɛ o guí suhʉ. Gueꞌa im man ʉ ꞌda, nguetho ɛ̨mbi ran ꞌyɛ̨tsꞌi ꞌbʉ dí thąndehʉ ra Cristo, nguetho i ja rá tsꞌɛdi. Pɛ go i ɛ̨n ʉ hing ran ꞌyɛ̨tsꞌi ꞌbʉ ga thąndehʉ ʉ i coh yʉ́ tsꞌɛdi, ngue yʉ́m ꞌbɛhni Oją mahɛ̨tsꞌi. Pɛ im mansɛ, nɛ him bi ꞌyut Oją, nguetho ɛ̨mmɛ xʉn tsꞌo yʉ́n ꞌyomfɛ̨ni ʉ. 19 Pɛ nuꞌʉ hinꞌyʉ ꞌbɛꞌa yʉ́n jahʉ ra Cristo. Pɛ nujʉ dyʉ ꞌyɛ̨cꞌyɛ̨ihʉ dí ꞌbʉhmbʉ ra Cristo tenguꞌbʉ nꞌdanjąꞌi tho dí comhbʉ. Nu ra Cristo tenguꞌbʉ ra yą, nɛ di bɛ̨ngahʉ yʉn ꞌyomfɛ̨ni xʉn ho, nɛ gueꞌa nán te ma mbʉihʉ a, tengu bi zän Oją.
ꞌDarbʉ dá tuhʉ ra Cristo nɛ ꞌdarbʉ dí ꞌbʉhmbʉ a
20 Ha hin gá tuhʉ ra Cristo, nɛ guí ɛ̨na gá hyɛhmbʉ yʉ́n tꞌøtꞌe ra ximhäi. Pɛ hanja guexta a gní ꞌyøthʉ tenguꞌbʉ rá mbɛti ahʉ ra ximhäi, ngue guí ødahʉ yʉ́n tꞌɛ̨di ʉ toꞌo ɛ̨mbi di manda ua ja ra ximhäi. 21 Ngue sä i ɛ̨n ahʉ: “ꞌYo guí thähmbʉ ya, nɛ o guí sahʉ ya, nɛ o guí hąxhʉ ya.” Pɛ ndeꞌbʉ hin gan hyɛhmbʉ ngue di ꞌbɛp ahʉ ʉ yʉ́n tꞌɛ̨di ʉ. 22 Pɛ gätho ya ɛ̨njʉ ga sufʉ, pɛ an tsꞌänni gätho ga homhbʉ nɛ din thegue. 23 Nɛ ɛ̨na gueꞌbʉ gueꞌa ran ꞌyomfɛ̨ni xʉn ho a im man ya yʉn ꞌyohʉ, nguetho im man a nꞌda ran thąnde ngue hin dín ꞌyɛ̨x a nꞌda, nɛ im ma da zɛthoho ꞌbɛꞌa in nde nꞌda. Pɛ mfądi hinga gueꞌa, nguetho hinga gueꞌa ní zɛrpa ní mbʉi nꞌda ꞌbʉ im bɛ̨ni da ꞌyøtꞌ ran tsꞌo.