FILIPENSES
Ra søcuą bi ꞌyorba ra Pablo ʉ yʉ ꞌyɛ̨cꞌyɛ̨i bʉ ja ra dąhnini Filipos
Ran zɛngua
1
Nugä drá Pablogä dí yoꞌbe ra Timoteo drá ꞌyɛ̨hɛ̨ꞌbe ra Jesucristo. Dí oꞌtꞌäꞌbe na ra søcuą gätho ahʉ ma zʉ cu ahʉ, nɛ ʉ yʉ ngʉrbi nɛ ʉ yʉ́m fätsꞌihʉ yʉ ngʉrbi, nɛ gätho ʉ i ꞌbʉpʉ ra dąhnini Filipos ngue i tɛnꞌna ra Cristo. 2 Pɛ dí ndep Oją ma Tahʉ nɛ ma Hmuhʉ ra Jesucristo da ꞌyɛntsꞌahʉ rán jąpi nɛ da hyutꞌa ni mbʉihʉ.Nu ra Pablo i äp ra jamadi Oją nangue yʉ ꞌyɛ̨cꞌyɛ̨i
3 Jamadi, dí ɛ̨mpꞌa ma Oją, nꞌdandį ngu nꞌdandį dím bɛ̨n ahʉ, nguetho gue ahʉ mam fätsꞌi ahʉ bi ꞌdacä Oją. 4 Nɛ ząi ɛ̨mmɛ i jagä ran johya ꞌbʉ dí äpä ra jamadi Oją nangue ahʉ. 5 Nɛ dadín johyagä nguetho nꞌdatꞌa rá ꞌbɛfi ran ho maꞌdaꞌyo dí comhbʉ, gueꞌa gní zɛjʉ a, nɛ gueꞌa gá ꞌyøthʉ ꞌbʉ rá mbʉdi gá ꞌyɛcꞌyɛ̨hhʉ, nɛ asta gue yʉ pa i jabʉya. 6 Nugä dí pądi ngue Oją di thocta a ra hogaꞌbɛfi ngue bi dʉꞌmi bi ꞌyørbʉ ni mbʉihʉ, janangue a di juadi xʉn ho ꞌbʉ bi zøn ra pa ba ɛ̨h mahønꞌa ra Jesucristo. 7 Nɛ gueꞌa ná äpä ra jamadi Oją a, ngue ɛ̨mmɛ dím bɛ̨n ahʉ. Nɛ tenguꞌbʉ ꞌdaꞌangu dí sähʉ ran ʉnbi dí sägä nɛ gueꞌa ná comhbʉ rán jąpi Oją a, dá gueꞌbʉ dí ofädigä, o gueꞌbʉ dí ꞌbäpʉ ja ran juąnbate, ngue dadín yąn a rán ho maꞌdaꞌyo ra Cristo dím ma ngue majuąni a. 8 Nɛ høntꞌa Oją i pądi hangu nan gu bʉ ná huɛ̨cꞌahʉ, nɛ tengu bʉ ɛ̨mmɛ ni huɛ̨gahʉ ra Jesucristo. 9 Hanangueꞌa dí äp Oją ngue manꞌda xʉn gu din ja ahʉ ran huɛ̨cate nꞌda ngu nꞌda ahʉ, nɛ din ja ahʉ ran ꞌyomfɛ̨ni xʉn ho, nɛ guim bɛ̨mhbʉ xʉn ho nangue a ꞌbɛꞌa gätho guí øthʉ. 10 Nꞌdamhma gui huanhdʉ ꞌbɛꞌa manꞌda xʉn ho gui ꞌyøthʉ, nɛ nꞌdatꞌa guim bɛ̨mhbʉ, nɛ hin hapʉ di nɛqui ni tsꞌoquihʉ ꞌbʉ bi zøn ra pa ngue ba ɛ̨h ra Cristo. 11 Nɛ høntꞌa ra Jesucristo sä di ꞌda ahʉ ra hogambʉi, ngue xʉn gu yʉ hogaꞌbɛfi din ja ahʉ, nɛ gueꞌa dí tꞌɛ̨spa Oją a.
Høntꞌa ra Cristo nám ꞌbʉ a ra Pablo
12 Ma zʉ cu ahʉ, dín nde ahʉ ngue gui pąhmbʉ, gueꞌa nán te ran ho maꞌdaꞌyo a nám ꞌbäcä ua. 13 Ngue gätho yʉ dofʉi ua ja ran gutsꞌʉtꞌabi, nɛꞌʉ gätho miꞌda yʉ jąꞌi i pądi ngue rá ꞌbɛfi ra Cristo a ná ꞌbäcä ua. 14 Nɛ dá gueꞌbʉ dí ofädigä, pɛ gueꞌa ní hyutꞌan zambʉi ma cuhʉ ngueꞌʉ xʉn gu i ꞌbʉcua, nɛ hinguin su ꞌbʉ im man rám hman Oją. 15 I ꞌbʉcua ꞌda ʉ ngue im mampꞌa rám hman Oją, i sɛya nangue rám hman Oją dí øtꞌä. Pɛ i ꞌbʉh miꞌda ngue im man rám hman Oją ngue nde da ꞌyøtꞌ ran ho. 16 Nɛ nuꞌʉ ngue ʉ i ja ran tsꞌɛya, im ma nangue ra Cristo, nguetho in nde ꞌbɛꞌa da dąsɛ ʉ. Pɛ hinga gätho rá mbʉi im ma, pɛ høntho nde ʉ ngue di yop a ma dumbʉigä ua ja ra fädi. 17 Pɛ nuꞌʉ miꞌda di huɛ̨gä, nɛ nde da mbäxgui, nɛ gueꞌa ní man rám hman ra Cristo ʉ, nguetho i pądi ꞌbɛꞌa ná ꞌbäcä ua, ngue dín yąnba a rán ho maꞌdaꞌyo ra Cristo. 18 Pɛ madague a høntꞌa go toꞌo im mampꞌa rám hman Oją, dá gueꞌbʉ nꞌdatꞌa im bɛ̨ni o hinꞌna ꞌbʉ im ma nangue a ra Cristo, nɛ guexta a ɛ̨mmɛ dadín johya. Nɛ thocuą thoho dan johyagä. 19 Nguetho dí pądi ngue ga pømanhogä ua ja ra fädi, nguetho ząi guí äfʉ rá tsꞌɛdi Oją nanguecä, nɛ ząi i fäxcä rá Hogandąhi ra Jesucristo. 20 Nugä hin dín ndegä ngue mꞌbɛjua ga pɛꞌtsꞌ ma sä nangue ꞌbɛꞌa dí øtꞌä, pɛ ɛ̨mmɛ dín nde ga hutꞌan zambʉi gam mangä xʉn ho rám hman Oją ꞌbʉ bi tsꞌɛgbä. Janangue a gätho yʉ jąꞌi da bąh rán uįxte ra Cristo nangue a dí øtꞌä, madagueꞌbʉ dí ꞌbʉcä o gueꞌbʉ da thogä. 21 Nguetho høntꞌa dí ꞌbʉi nangue ra Cristo, dín ndegä ngue din uįxte ra Cristo nangue ꞌbɛꞌa gätho dí øtꞌä, nɛ manꞌda tho ꞌbʉ dá tugä. 22 Pɛ nuꞌbʉ guexta a dadí thoqui dí ꞌbʉcua ja ra häi, sä ga tąh miꞌda yʉ jąꞌi ngue da ꞌyɛ̨cꞌyɛi a ra Hmu mahɛ̨tsꞌi. Pɛ hin dí pąsɛ nda a ga huanhni, hague dam ꞌbʉi, uague ga tu. 23 Pɛ nugä ɛ̨mmɛ xʉn hɛ̨i ga pądi nda a ngue manꞌda xʉn ho. Pɛ nuꞌbʉ da hønsɛgä, manꞌda dín nde ꞌbʉ ga tu ngue ga mba ním ꞌbʉꞌbe ra Cristo, nguetho manꞌda xʉn ho nanguecä. 24 Pɛ manꞌda xʉn ho nangue ahʉ ngue guexta a dí ꞌbʉcä ua ja ra ximhäi. 25 Janangue a dí hąxanjuąni guexta a dam ꞌbʉcä ua ngue ga fäx ahʉ ngue dín te ni tꞌɛ̨cꞌyɛihʉ. Nɛ manꞌda din ja ahʉ ran johya ꞌbʉ manꞌda gá ꞌyɛ̨cꞌyɛihʉ ra Cristo. 26 Nɛ nuꞌbʉ dí ꞌbʉcä ua ja ra häi, nɛ guín nujʉ mahønꞌa, ɛ̨mmɛ da hyu ni mbʉihʉ nangue ra Cristo, nɛ gui ꞌyɛ̨spahʉ ra Cristo bʉya. 27 Pɛ damam ꞌbʉhmbʉ ꞌbɛꞌa rán sähʉ rán ho maꞌdaꞌyo ra Cristo. Nɛ madague a ꞌdarbʉ dí ꞌbʉhmbʉ o yabʉ dí ꞌbʉcä, pɛ ga øcä ran ho gui ꞌyøthʉ bʉya, nangue ꞌdaꞌ angu guim bɛ̨mhbʉ, nɛ gui fähmbʉ ma tꞌɛ̨cꞌyɛihʉ nangue rán ho maꞌdaꞌyo ra Cristo. 28 Nɛ hin gui suhʉ toꞌo da zʉ ahʉ nangue ran ho maꞌdaꞌyo. Nɛ nangue hin gá suhʉ, da bądi ngue di ꞌbɛh yʉ́ te ʉ, nɛ da bądi ngue i ja ahʉ ra temaząi ngue bi ꞌda ahʉ Oją. 29 Nguetho hinga høntꞌa ran ho bi ꞌda ahʉ Oją ngue gui ꞌyɛ̨cꞌyɛihʉ ra Cristo, pɛ nɛꞌa manꞌda ran ho, ngue gui sähʉ yʉn ʉnbi nangue ra Cristo. 30 Nɛ ꞌdaꞌangu dí øthʉ ya, dadín ʉnbahʉ ngue dín yąmhbʉ a ran ho maꞌdaꞌyo, tengu thoho gá nuhʉ dá øtꞌä mámꞌbɛtꞌo, nɛ guí øhmbʉ ngue guextaꞌa dí øtꞌä ya.