EFESIOS
Nu ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ra dąhnini Éfeso
Ran zɛngua
1
Nugä drá Pablogä, nangue rá pähä Oją ma ꞌbäigäꞌbe ra Jesucristo. Nuꞌahʉ gyʉ́ ꞌyɛ̨cꞌyɛihʉ bʉ ja ra hnini Éfeso, dí otꞌahʉ na ra søcuą. Nɛ gätho gyʉ mbɛti ahʉ Oją nangue guí ɛ̨cꞌyɛihʉ ra Cristo Jesús. 2 Dí äp Oją ma Tahʉ di ꞌda ahʉ rán jąpi, nɛ rán johya da hyutꞌa ni mbʉihʉ, nɛ ma Hmuhʉ ra Jesucristo.Oją di jącuahʉ nangue dín ꞌyohʉ ra Cristo
3 Dí ɛ̨spahʉ Oją, nuꞌa rá Ta ma Hmuhʉ ra Jesucristo. Nɛ nangue a dín ꞌyohʉ ra Cristo, nuꞌa Oją bi jącuahʉ nangue gätho yʉ́n jąpi i ja bʉ mahɛ̨tsꞌi. 4 Nu Oją bi huangahʉ nangue ra Cristo nuꞌbʉ ma hinꞌyʉ ra ximhäi, nguetho in ndejʉ hin din ja ma tsꞌoquihʉ, nɛ xtán hotho ma mbʉihʉ bʉ na nu Oją. 5 Nɛ nangue rá pähä Oją ya xʉ huangahʉ, nɛ nangue ra Jesucristo bi jajʉ ngue dyʉ́ tꞌʉhnigahʉ Oją. Nɛ gueꞌa bi ꞌyøtꞌe nguetho bi huɛ̨gahʉ. 6 Janangueꞌa ząi dí ɛ̨spahʉ Oją, nguetho ɛ̨mmɛ xʉn ngu rán huɛ̨ cate bi ꞌyørcahʉ ꞌdarbʉ dí ꞌ bʉhmbʉ a rá Tsꞌʉntꞌʉ di huɛ̨qui. Nɛ gueꞌa rán jąpi bi ꞌdajʉ ꞌbʉ má däh ma mbʉihʉ a rá Tsꞌʉntꞌʉ. 7 Ngue ɛ̨mmɛ bi huɛ̨gahʉ Oją, nɛ gueꞌa í du a rá Tsꞌʉntꞌʉ bi pøjʉ, bi nde bi punga ma tsꞌoquihʉ. 8 Nɛ ɛ̨mmɛ xʉn ngu rán huɛ̨cate Oją, ngue bi jajʉ dá pąhmbʉ a rá ꞌyu, nɛ bi ꞌdajʉ rán ꞌyomfɛ̨ni xʉn ho. 9 Pɛ bi jajʉ Oją dá pąhmbʉ ꞌbɛꞌa mán tꞌągui, ngue ꞌbɛꞌa mím bɛ̨nsɛ da ꞌyøtꞌe ngue da ꞌyøtꞌa ra Cristo. 10 Nguetho da zøn ra pa di juaꞌa ꞌbɛꞌa mim bɛ̨n Oją da ꞌyøtꞌe, ngue di jap ra Cristo di manda gätho ja ua ja ra häi nɛpʉ mahɛ̨tsꞌi. 11 Nuꞌa Oją i øtꞌe ꞌbɛꞌa gätho mim bɛ̨ni da ꞌyøtꞌe, nɛ bi huangahʉ mayaꞌbʉ ngue dan ꞌyohʉ ra Cristo. Nɛ nangueꞌa dín ꞌyohʉ ra Cristo, sä ga hąmhbʉ yʉ́n jąpi di ꞌdajʉ a. 12 Gueꞌa bi zän Oją nanguejʉ, janangueꞌa da tꞌɛ̨spa Oją ꞌbʉ bi hnu a ran ho da ꞌyørcahʉ. Nɛ guecähe yʉ́ mbʉdigähe dá ɛ̨cꞌyɛihe ra Cristo, nɛ yʉ́ mbʉdigähe bi ꞌyørcahe a. 13 Nɛ ahʉ, nuꞌbʉ gmí ꞌyøhmbʉ rán ho maꞌdaꞌyo ra Cristo di pøjʉ, gue ram hma majuąni a, gá ꞌyɛ̨cꞌyɛihʉ a. Nɛ nuꞌbʉ gmí ꞌyɛ̨cꞌyɛihʉ, nɛ ahʉ gá hyąmhbʉ rá Hogandąhi Oją, ra hmɛpya ngue yʉ́ mbɛti ahʉ Oją, tengu xí ma. 14 Nu rá Hogandąhi i udi ngue majuąni ga hąmhbʉ rán tꞌunni di ꞌdajʉ Oją ꞌbʉ bi zøn ra pa da zixcahʉ bʉ mahɛ̨tsꞌi, gätho gahʉ ngue yʉ́ mbɛtigahʉ a. Gueꞌa ná ɛ̨spahʉ nuįxte thoho a.
Nu ra Pablo i äp Oją di un ran ꞌyomfɛ̨ni xʉn ho yʉ ꞌyɛ̨cꞌyɛi
15 Nɛ nuꞌbʉ má øcä ngue guí ɛ̨cꞌyɛihʉ a ra Hmu Jesús, nɛ i ja ahʉ ran huɛ̨cate nangue ni miꞌyɛ̨cꞌyɛihʉ, dán yąꞌbe Oją, 16 nɛ ząi dí xi Oją i hu ma mbʉi ngue di huɛ̨cꞌahʉ, nɛ ząi dí äpä rám fätsꞌi nangue ahʉ. 17 Nɛ nuꞌa ra Ta nuįxte thoho, gueꞌa rá Oją ma Hmuhʉ ra Jesucristo, dí äpꞌahʉ ran ꞌyomfɛ̨ni manꞌda gui pąhmbʉ xʉn ho a. 18 Nɛ dí äpꞌa Oją ngue manꞌda da xocꞌa nin ꞌyomfɛ̨nihʉ, ngue gui pąhmbʉ a ran ho nuįxte guí tøhmbʉ, ngue gueꞌa í zonꞌnahʉ gui comhbʉ a. Nɛ gui pąhmbʉ ngue ɛ̨mmɛ nuįxte thoho di muui ꞌbɛꞌa di ꞌda ahʉ Oją gätho ʉ toꞌo yʉ́ mbɛti a. 19 Nɛ dí äp Oją gui pąhmbʉ ɛ̨mmɛ xʉn ndoho rá tsꞌɛdi rá Hogandąhi hin hapʉ nín zɛgui, ngue dim pɛpʉ mbo ma mbʉihʉ, gätho gahʉ dí ɛ̨cꞌyɛihʉ. 20 Nɛ nꞌdatꞌa rá tsꞌɛdi ngue ɛ̨mmɛ sɛ a dim pɛpʉ mbo ma mbʉihʉ, gueꞌa bá xoxꞌa ra Cristo bʉ ꞌbʉ ʉ xʉn du, nɛ bi japi ngue da hyupʉ ja rán ꞌyɛi Oją bʉ mahɛ̨tsꞌi. 21 Nɛ nuꞌa ra Cristo bin tꞌun manꞌda ra tsꞌɛdi xinda gueꞌʉ toꞌo gätho ja yʉ́ tsꞌɛdi bʉ mahɛ̨tsꞌi nɛcua ja ra häi, o gue yʉ tsꞌʉtꞌabi, o gue yʉ ngʉrbi, o gueꞌʉ miꞌda di manda. Nɛ hingui sä nꞌda da ndønba nꞌda ra thuhu da tꞌɛ̨mbi i ja manꞌda rá tsꞌɛdi gue i ꞌbʉhya o gue yʉ pa dí ꞌyɛ̨pʉ. 22 Nɛ gätho ꞌbɛꞌa i ja Oją bi japꞌa ra Cristo ngue gätho di manda. Nɛ bi japꞌa ra Cristo ngue di manda gätho yʉ ꞌyɛ̨cꞌyɛi, nguetho tengu ꞌbʉ ma yąhʉ a di mandagahʉ. 23 Nɛ nu yʉ ꞌyɛ̨cꞌyɛi i ꞌbʉi tengu ꞌbʉ rá jąꞌi ra Cristo. Nɛ dí comhbʉ ꞌbɛꞌa gätho i ja ra Cristo. Nɛ nu rá tsꞌɛdi í yuꞌa ꞌbɛꞌa gä øzɛhɛ ua ja ra häi, nɛpʉ mahɛ̨tsꞌi.