GÁLATAS
Ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra häi Galacia
Ran zɛngua
1
Nugä dra Pablogä, guecä him bi huangä yʉn ꞌyohʉ, pɛ guesɛ a ra Jesucristo, nɛꞌa rá Ta, ngue bi xoxꞌa rá Tsꞌʉntꞌʉ ꞌbʉ mi du. 2 Nugä nɛ gätho ya ma cuhʉ nangue Oją ngue i ꞌbʉcua dí pɛnꞌnahʉ ran zɛngua. Guehna ra søcuą dí otꞌahʉ, nangue gätho yʉ ꞌyɛ̨cꞌyɛi i ꞌbʉpʉ ra häi Galacia. 3 Dí äp Oją ra Ta nɛ ma Hmuhʉ ra Jesucristo di ꞌda ahʉ rán jąpi nɛ da hyutꞌa ni mbʉihʉ. 4 Nuꞌa ra Jesús bin däsɛ bi gurca ma tsꞌoquihʉ. Nɛ nangueꞌbʉ mí du a, bi zä da yąnjʉ nangue ran tsꞌo i jaua ja ra ximhäi. Nɛ guehna rá pähä ma Tahʉ Oją bi ꞌyørcahʉ. 5 Janangueꞌa dí ɛ̨spahʉ Oją nɛ i ja rá nuįxte gätho yʉ pa maząi.Hinꞌyʉ manꞌda ram hma ngue dím pø a nꞌda
6 Nugä xøgue dadí hyonya thoho hanja ꞌbexque gá hyɛhmbʉ Oją ngue bi zonꞌnahʉ xquí pąhmbʉ rá mate ra Cristo, nɛ gá hyąxhʉ nꞌdanꞌyo ra ꞌyu tꞌɛ̨mbi ní zin ahʉ Oją. 7 Pɛ hinꞌyʉ manꞌda ra ꞌyu ní zinjʉ Oją, hinda høntꞌa rán ho maꞌdaꞌyo ra Cristo. Pɛ i ꞌbʉꞌi ꞌdaꞌʉ in nde da hyä ahʉ, ngue nde di pätꞌahʉ ra ꞌyu nangue ra Cristo. 8 Pɛ ya xtá xi ahʉ ra ꞌyu ngue majuąni dí yąnjʉ Oją a. Nuꞌbʉ ꞌboꞌo da xi ahʉ nɛ ꞌdahma ꞌdanꞌyotho da xi ahʉ, da nu rán tsꞌɛmbi Oją a, madagueꞌbʉ guecä o nꞌda rám ꞌbɛhni mahɛ̨tsꞌi. 9 Ga xi ahʉ mahønꞌa tengu ya xtá xi ahʉ, nuꞌbʉ ꞌboꞌo xi ahʉ nꞌdanꞌyo nꞌda ra ꞌyu xinda gueꞌa gá hyąmhbʉ, Oją da zänba ran ʉnbi a. 10 Nuna ram hma dí xi ahʉ ntsꞌɛdi tsꞌʉ. Mfądi hin dí honi guin numanhojʉ, pɛgue dí hongä Oją da numanhogui. Pɛ nuꞌbʉ xcá honi ꞌbɛꞌa dí numanhog yʉ jąꞌi, hingui sä xcán ꞌyɛ̨hɛgä nangue ra Cristo ꞌbʉ.
Høntꞌa Oją bi bɛ̨nba ram hma im man ra Pablo
11 Ma zʉ cu ahʉ, dín nde ahʉ gui pąhmbʉ hing rám hman yʉ jąꞌi a rán ho maꞌdaꞌyo ra Cristo dá xi ahʉ. 12 Nu ran ho maꞌdaꞌyo dím mangä, xínga nꞌda ran ꞌyohʉ bi xiqui, nɛ hín dá øcä bʉ ja man xädi a, pɛ guesɛ a ra Jesucristo bi jaqui dí pądi. 13 Nu ahʉ ya gá ꞌyøhmbʉ ꞌbɛꞌa mí øtꞌä nuꞌbʉ mi tɛndä yʉ́ tꞌɛ̨cꞌyɛi ʉ ma mijudíohe, ɛ̨mmɛ madí undä ran ʉnbi ʉ yʉ́ ꞌyɛ̨cꞌyɛi ra Cristo, nɛ mim bɛ̨ngä xcá juadi gätho ʉ. 14 Nɛ mi øtꞌä xʉn ho yʉ́ tꞌɛ̨cꞌyɛi ma mɛnguhe yʉ judío, ɛ̨mmɛ mi ɛ̨hya ga jąꞌtsꞌä ʉ, nɛ xínda gueꞌʉ miꞌda ꞌda ingu yʉ jɛya mi pɛsꞌhe. Nguetho ɛ̨mmɛ min nde xcá thocä yʉ́n tꞌøtꞌe ʉ ndu mam bombøtahe mayaꞌbʉ. 15 Pɛ nuꞌbʉ hin nám ꞌbʉcä, Oją xí huangui, nɛ mꞌbɛjua bi zongui nangue rá mate. Nguetho bi ndesɛ Oją a. 16 Janangueꞌa bi jaqui dá pąꞌa rá Tsꞌʉntꞌʉ ngue gueꞌa ra Cristo, guepʉ bi zä gam man rám hma bʉ ꞌbʉh yʉ jąꞌi hing yʉ judío. Nɛ nuꞌbʉ mi zoncä Oją, xínga nꞌda ra jąꞌi bi xängui. 17 Nɛ him ꞌbex dá mbagä bʉ ja ra hnini Jerusalén ngue xcán yąꞌbe ʉ miꞌda yʉ́ ꞌbäihʉ ra Cristo ngue mꞌbɛtꞌo xinda guecä. Pɛ mꞌbɛtꞌo dá mbagä bʉ ja ra häi Arabia bʉ njongui ꞌbʉi, guepʉ dán yąsɛꞌbe Oją. Mꞌbɛjua bʉya duá pengä bʉ ra hnini Damasco. 18 Pɛ xí thoꞌan hyu jɛya ꞌbʉ má mbagä bʉ ja ra dąhnini Jerusalén, ja dá pącä ra Pedro bʉya, nɛ ꞌdɛꞌmacʉtꞌa thoho dám ꞌbʉꞌbe bʉ ra Pedro. 19 Pɛ hin dá nugä miꞌda yʉ́ ꞌbäihʉ ra Cristo, pɛ høntꞌa ra Jacobo rán ꞌyohʉ ma Hmuhʉ dá nugä bʉ. 20 Pɛ majuąni na dí otꞌahʉ, nguetho i pą Oją hin dí mangä ra fɛhni. 21 Mꞌbɛjua bʉya dá mbagä bʉ ja ra häi Siria nɛ ra häi Cilicia. 22 Nɛ nuꞌʉ yʉ ꞌyɛ̨cꞌyɛi dim pɛti bʉ ja yʉ́m pɛti bʉ ra häi Judea, him mi pąqui nguetho njąmꞌbʉ min nugui. 23 Pɛgue mi øde ngue guecä drá Pablo mi ɛ̨na xcá juah yʉ ꞌyɛ̨cꞌyɛi, pɛ nuya dím mangä rám hman Oją. 24 Janangueꞌa bi un ra jamadi Oją ngue ꞌbɛꞌa bin ja nanguecä.