Miꞌda yʉ́ ꞌbäihʉ ra Cristo bi zimanho a ra Pablo
2
Nuꞌbʉ mi thoꞌa ꞌdɛꞌmagoho njɛya dá mbagä mahønꞌa bʉ ja ra dąhnini Jerusalén. Dá mbɛꞌbe ra Bernabé nɛ dá sixꞌbe ra Tito. 2 Nugä dá mbähmbe bʉ nguetho bi bɛ̨ngä Oją. Nɛ dán yąhe ꞌdaꞌʉ yʉ́ ngʉrpi yʉ ꞌyɛ̨cꞌyɛi. Nɛ høntꞌʉ dá xiꞌbe ꞌbɛꞌa ním hma dí xiꞌʉ hing yʉ judío, ngue gueꞌa rán ho maꞌdaꞌyo ra Cristo. Nguetho dí su di ʉꞌtꞌ yʉ́ mbʉi ꞌbɛꞌa dí øtꞌä, ngue hinga nɛꞌʉ yʉ́ tꞌɛ̨cꞌyɛi yʉ judío dí mangä hapʉ dí ꞌyo. Nɛ nuꞌbʉ hin xtá numanho, xtí tsꞌonga ma ꞌbɛfi bʉ ꞌbʉ. 3 Pɛ nte bi xicꞌbe, xím bi ma ngue jatho da thɛcuą rá xifani ra Tito tengu yʉ́ tꞌɛ̨cꞌyɛi yʉ judío. Nɛ nuna ra Tito hin ra judío na, pɛ ra griego na. 4 Pɛ mi ꞌbʉpʉ ʉ ꞌda yʉ hyäte ngue yʉn ꞌyøxte, ngue høntho in øxtho, ngue nde da bądi gueꞌbʉ dí øtꞌä yʉ́ tꞌɛ̨cꞌyɛi yʉ judío o hinꞌna. Nuꞌʉ in nde di hɛgahʉ ꞌbɛꞌa gätho bi ꞌdajʉ ra Cristo, ngue bi jajʉ ga hɛhmbʉ yʉ́n tꞌøtꞌe yʉ judío. 5 Pɛ xíngui tsꞌʉ dán hyɛhmbe ngue da hyäje ʉ yʉ hyäte, pɛ dá zacuahe a ram hma majuąni. Nguetho dín ndehe, høntꞌa majuąni rán ho maꞌdaꞌyo ra Cristo gui ꞌyɛ̨ꞌtꞌambʉihʉ a. 6 Nɛ nuꞌʉ njuąntho yʉ ngʉrpi bʉ, madagueꞌbʉ tꞌɛ̨mbi manꞌda ja yʉ́n tꞌɛ̨di xinda guecä, pɛ ꞌdaꞌangudähe, nguetho ꞌdaꞌangu yʉn ꞌyohʉthoho bʉ na nu Oją. Nɛ him bi xiqui nꞌdanꞌyo nꞌda ram hma ga xänba yʉ jąꞌi. 7 Pɛ nuꞌʉ yʉ ngʉrpi bi hyąxa njuąni ngue gueꞌa Oją bi ꞌdacä ra ꞌbɛfi ga xiꞌʉ hing yʉ judío a rán ho maꞌdaꞌyo ra Cristo, tengu thoho ra ꞌbɛfi bi un Oją ra Pedro nangue da xih ma mijudíohe. 8 Nguetho nꞌdatꞌa Oją bi ꞌdacꞌbe ra tsꞌɛdi ra Pedro, nɛ bi xifi da xiꞌʉ yʉ judío, pɛ nugä, bi xiqui ga xiꞌʉ hing yʉ judío. 9 Janangueꞌa nuꞌbʉ mi hyąxa njuąni ngue ꞌdaꞌangu nan hɛ̨tsꞌi a ra ꞌbɛfi bin ꞌdaje ʉ yʉ ngʉrpi a ra Jacobo, nɛ ra Pedro, nɛ ra Xuua, bi bɛndga ma ꞌyɛꞌbe ra Bernabé. Nuꞌa nám bønꞌa nꞌdatꞌa dí ɛ̨cꞌyɛihe, nɛ nꞌdatꞌa dím mamhbe ga mbɛꞌbe bʉ ꞌbʉꞌʉ hing yʉ judío, dam pɛꞌbe bʉ, pɛ nuꞌʉ, di thoqui da xih yʉ judío. 10 Høntꞌa bi xicꞌbe jatho ga fäxꞌbe yʉ hyoya, pɛ ngubʉ dí ɛ̨hya ga øtꞌa.Nuꞌa ra Pablo bi dąmhyą ra Pedro bʉ Antioquía
11 Pɛ nuꞌbʉ mi mba bʉ ja ra hnini Antioquía a ra Pedro, nugä dá xip rá hmi, nguetho hingui ho bi ꞌyøtꞌe. 12 Nguetho nuꞌbʉ mi zøm bʉ ꞌda ʉ ma mijudíohe bi mbɛnꞌna ra Jacobo, nɛ ꞌbex bi ꞌyɛꞌtsꞌa na sihmɛhʉ ʉ hing yʉ judío, sä bi zu da ꞌyɛ̨mpꞌʉ yʉ́ mijudíohʉ hingui ho bi ꞌyøtꞌe. 13 Nɛ nuꞌʉ miꞌda yʉ judío ngue mi ɛ̨cꞌyɛi bʉ, bi dɛnꞌna ra Pedro. Nɛꞌa ra Bernabé bi dɛnꞌndʉ ngue madí yorba yʉ́n tꞌøtꞌe. 14 Pɛ nuꞌbʉ má nugä ngue him bin thɛui ran ho maꞌdaꞌyo a bi ꞌyøtꞌʉ, dá xiꞌa ra Pedro, nɛ gätho mi ꞌbäpʉ: “Nuꞌi gra Pedro gra judío, pɛ hin gmi øtꞌ yʉ́n tꞌøtꞌe yʉ judío. Pɛ hanja gní ꞌyøtꞌ mahønꞌa yʉ́n tꞌøtꞌe yʉ judío, nɛ nꞌdanni guín sihmɛ. Pɛ tenguꞌbʉ guí uthʉ ʉ hing yʉ judío ngue da ꞌyøtꞌ yʉ́n tꞌøtꞌe yʉ judío,” dá ɛ̨mbi.
Dyʉ judíohe, ní yąnje a ra Cristo
15 Nugähe ngue dám ꞌbʉhmbe dyʉ judíohe, nząi dá øthe yʉ́n tꞌɛ̨di Oją bi sije. Nɛ hin dám ꞌbʉhmbe tenguꞌʉ hing yʉ judío, ngue hingui pąh yʉ́n tꞌɛ̨di Oją ʉ. 16 Pɛ guehma dí pąhmbe hin dí hogahe ʉ yʉn tꞌɛ̨di gue Oją bi un mam bombøtahe mayaꞌbʉ, pɛ høntꞌbʉ ga hąmhbe rá mate ra Jesucristo, di hoga ma tsꞌoquihe, dyʉ judíogähe. Janangueꞌa nɛcähe ngue dá pąhmbe yʉ́n tꞌɛ̨di Oją, pɛ dá hąmhbe rá mate ra Jesucristo ngue di hogahe. Nɛ hin dí ɛ̨mhbe di hogahe ꞌbʉ dí øzɛhɛhe ʉ yʉn tꞌɛ̨di. Nguetho mán tꞌoꞌtꞌi: “Xínga nꞌda da tꞌɛ̨mbi xʉn ho nangue yʉ́n tꞌɛ̨di Oją.” 17 Nɛ nugähe dyʉ judíohe, pɛ nangue ra Cristo dí homhbe di hogahe ya. Nɛ gueꞌa ná ɛsꞌhe a dím bɛ̨mhbe di hogahe ʉ yʉ́n tꞌɛ̨di Oją. Pɛ hin dím bɛ̨mhbe ngue dyʉ ꞌyøtꞌatsꞌoquihe ꞌbʉ dí ɛsꞌhe ʉ, nguetho gätho xʉn hotho rá ꞌyu ra Cristo. 18 Pɛ nuꞌbʉ gam mangä ngue jatho ga øtꞌä mahønꞌa yʉ́n tꞌɛ̨di Oją bi un ma mijudíohe, ngue gueꞌʉ dí hogä ʉ, pɛ ga cohi dra ꞌyøtꞌatsꞌoqui ꞌbʉ, nguetho hin dí hätꞌi ga øtꞌä yʉn tꞌɛ̨di tengu in nde Oją. 19 Janangueꞌa dá ɛꞌtsꞌä ná bɛ̨ngä ní zingä Oją ʉ yʉ́n tꞌɛ̨di, nɛ dá tɛnꞌna ra Jesucristo nguepʉ da zä di ꞌdac ra ꞌdaꞌyote, nɛ da zä bʉ ga ørpa rá ꞌbɛfi Oją bʉya. 20 Nuya dám ꞌbʉcä tengutho ꞌbʉ ꞌdarpʉ xcá tuꞌbe ra Cristo bʉ ja ra pontꞌi, ngue bi ꞌbɛrca man ꞌyomfɛ̨nisɛ. Nɛ gueꞌa ra Cristo i ꞌbʉcua mbo ma mbʉi ya, di bɛ̨ngä a dím ma nɛ ꞌbɛꞌa gätho manꞌda dí øtꞌä. Pɛ gueꞌa nám ꞌbʉcä a ngue thocua tho dí hąngä rá tsꞌɛdi a rá Tsꞌʉntꞌʉ Oją, ngue bi huɛ̨gä a nɛ bi un rá te nanguecä. 21 Nɛ nugä hin te dím mangä ngue säti thoho bi duꞌa ra Cristo. Pɛ nuꞌbʉ xtí hogahʉ ʉ yʉ́n tꞌɛ̨di Oją, säti thoho bi duꞌa ra Cristo ꞌbʉ.