Hinga gueꞌʉ yʉn tꞌɛ̨di ín ꞌdajʉ rá Hogandąhi Oją ʉ
3
Nuꞌahʉ ma zʉ cu ahʉ, ngue guí ꞌbʉhmbʉ bʉ ra häi Galacia, hanja gnán ꞌyąmbʉihʉ, toꞌo bi hyä ahʉ ngue hin gui ꞌyøthʉ a majuąni. Nguetho rá mbʉdi gá ꞌyøhmbʉ xʉn ho ꞌbɛꞌa nam bønꞌa í duꞌa ra Jesucristo. 2 Pɛ damim bɛ̨mhbʉ ya ndaꞌa ín ꞌdajʉ rá Hogandąhi Oją a, ha gueꞌʉ yʉ́n tꞌɛ̨di Oją bi man ra Moisés, uague gueꞌbʉ má ɛ̨cꞌyɛihʉ bi du ra Cristo nangue ma tsꞌoquihʉ. 3 Nɛ ya gá dʉhmbʉ gán ꞌyohʉ rá Hogandąhi Oją nangue gá ꞌyɛ̨cꞌyɛihʉ ra Cristo. Ha guí ɛ̨na gui hyɛhmbʉ a, nɛ guí ɛ̨na gan hoczɛhɛhʉ ya. Hanja gán tontohʉ. 4 Nɛ nangue gätho yʉn ʉnbi gá nuhʉ, ha hin te tsꞌʉ nin ꞌyomfɛ̨ni bi ꞌda ahʉ yʉn ʉnbi. Ndeꞌbʉ gui pąhmbʉ tsꞌʉ ꞌbɛꞌa nam bønꞌʉ yʉn ʉnbi. 5 Pɛ gá ꞌyɛ̨cꞌyɛihʉ ꞌbɛꞌa bi ꞌyøtꞌahʉ ra Cristo, nɛ gueꞌa ín ꞌda ahʉ rá Hogandąhi Oją a, nɛ gueꞌa ní ja ahʉ gui ꞌyøthʉ yʉn tꞌøtꞌe nuįxte, nɛ hinga gueꞌa gní ꞌyøthʉ yʉ́n tꞌɛ̨di yʉ judío. 6 Nu ra Abraham bi ꞌyɛ̨cꞌyɛi a bi xi Oją da ꞌyørpe, nɛ hinꞌyʉ manꞌda ꞌbɛꞌa í tsꞌimanho a. 7 Ndeꞌbʉ gui pąhmbʉ ya ngue gätho yʉ ꞌyɛ̨cꞌyɛi i comhbʉ rán jąpi Oją bin tꞌunꞌna ra Abraham, tenguꞌbʉ njuąntho gätho yʉ́ tꞌʉhni ra Abraham. Nguetho i ɛ̨cꞌyɛi ꞌbɛꞌa bi man Oją tengu ra Abraham. 8 Nu Oją mámꞌbɛtꞌo mi pądi ngue da numanho ʉ gätho toꞌo da ꞌyɛ̨cꞌyɛi ꞌbɛꞌa bi ma, dagueꞌbʉ dyʉ́m bomꞌbɛtohʉ ra Abraham o hinꞌna. Janangueꞌa Oją bi xiꞌa ra Abraham: “Gätho yʉ nde ꞌdahma ꞌdanꞌyo gui comhbʉ ran jąpi ʉ da ꞌyɛ̨cꞌyɛigui tengu i,” bi tꞌɛ̨mpꞌa ra Abraham. 9 Janangueꞌa gätho toꞌo da hyąntho ram hma nangue ran ho da ꞌyørcahʉ Oją, nꞌdatꞌa ran jąpi ga comhbʉ ra Abraham, nguetho nꞌdatꞌa rá tꞌɛ̨cꞌyɛi dí øthʉ. 10 Nuꞌʉ gätho ngue i ɛ̨na, jatho da ꞌyøtꞌ yʉn tꞌɛ̨di bi un Oją yʉ judío, gätho da nu rán tsꞌɛmbi Oją ʉ. Nguetho i mam bʉ ja rám Hman Oją: “Nuꞌbʉ gui fɛsthohohʉ a nꞌda ran tꞌɛ̨di, säti thoho ꞌbɛꞌa miꞌda gui ꞌyøthʉ ꞌbʉ, nɛ guextaꞌa gui nuhʉ rán tsꞌɛmbi Oją.” 11 Mfądi ya ngue xínga nꞌda ra jąꞌi sä da zinꞌa Oją nangueꞌa ní ꞌyøtꞌ yʉ́n tꞌɛ̨di yʉ judío. Pɛ tengu i mam bʉ ja rám Hman Oją: “Gätho toꞌo da hyąntho ram hma nangue ran ho da tꞌørpe, nu Oją di hocpa yʉ́ tsꞌoqui, nɛ di un ra temaząi.” 12 Pɛ nu yʉ́n tꞌɛ̨di Oją, guí ɛ̨mhbʉ gui uąspahʉ rá mate Oją ʉ. Pɛ bi ꞌyɛ̨ntho ʉ: “Nuꞌbʉ ꞌbʉi toꞌo da hyätꞌi da ꞌyøtꞌe gätho yʉ́n tꞌøtꞌe yʉn tꞌɛ̨di, dí zin Oją ʉ yʉ́n tꞌɛ̨di ꞌbʉ,” bi ꞌyɛ̨nꞌʉ. 13 Nuꞌa ra Cristo bi yąnjʉ nangue ran tsꞌɛmbi mi ja xcá nuhʉ ngue hin dá jąsꞌhʉ yʉn tꞌɛ̨di. Nguetho bi nu ran tsꞌɛmbi nanguejʉ ꞌbʉ mín zʉpʉ ja ra pontꞌi. Nɛ gueꞌa nam bønꞌa mán tꞌoꞌtꞌi bʉ ja rám Hman Oją: “Da nu rán tsꞌɛmbi Oją a toꞌo din zʉpʉ ja ra za,” mi ɛ̨na. 14 Nangue ꞌbɛꞌa bi ꞌyøtꞌa ra Cristo Jesús, sä ga hąmhbʉ rá Hogandąhi Oją, nangueꞌa dá ɛ̨cꞌyɛihʉ. Nɛ nꞌdatꞌa ran jąpi bi un Oją ra Abraham ngue da comhbʉ yʉ jąꞌi hing yʉ judío, nɛ gätho miꞌda ngue da ꞌyɛ̨cꞌyɛi.Hingui sä yʉn tꞌɛ̨di di tsꞌonba ran hoqui bi ꞌyøtꞌ ra Jesucristo
15 Ma zʉ cu ahʉ, ga xi ahʉ nꞌda ra hmɛpya ya. Tenguꞌbʉ yoho yʉn ꞌyohʉ i hon yʉ testigo da ꞌyøtꞌa nꞌda ran hoqui, nɛ i huspa yʉ́ firma nɛ rá sello ra zɛꞌmi. Njoꞌo manꞌda ran ꞌyohʉ sä di pädi. 16 Nu ran hogui bi ꞌyøtꞌui Oją a ra Abraham nɛ rám bomꞌbɛto. Pɛ nu rám hman Oją him bi ma ngue gätho yʉ́m bomꞌbɛto, pɛ bi ma høntꞌa nꞌdatho, ngue gueꞌa ra Cristo. 17 Nugä ga xi ahʉ ya ꞌbɛꞌa nam bønꞌa dím mangä. Mꞌbɛtꞌo thoho xí ꞌyøtꞌui ran hogui Oją a ra Abraham, nɛ tenguꞌbʉ ya bi firmabi ngue njąmꞌbʉ dim pädi. Nɛ mꞌbɛjua bʉya bi un yʉn tꞌɛ̨di ma mijudíohe, ꞌbʉ ya xí thoqui goho ciɛnto nɛ ꞌdäte ma ꞌdɛtꞌan jɛya. Pɛ hinꞌyʉ yʉ́ tsꞌɛdi ʉ yʉn tꞌɛ̨di ngue di tsꞌonba a ran hogui bi ꞌyøtꞌui Oją ra Abraham. 18 Nɛ nuꞌbʉ da gueꞌʉ yʉn tꞌɛ̨di xtí zinjʉ Oją, pɛ hin xtá manꞌa Oją a ran hogui í hogazɛhɛhʉ Oją ꞌbʉ. Pɛ nuꞌa ran hogui bi mammi Oją a ra Abraham, di untho nangue rá mate zɛhɛ. 19 Pɛ hanja í zänꞌna Oją ʉ yʉn tꞌɛ̨di, gueꞌbʉ ya hinga gueꞌʉ ørcahʉ ran ho ʉ. Pɛ mꞌbɛjua bi man Oją yʉn tꞌɛ̨di, guepʉ da fądi gätho i ja yʉ́ tsꞌoqui yʉ jąꞌi. Pɛ nuꞌʉ yʉ́m ꞌbɛhni Oją mahɛ̨tsꞌi bi xiꞌa ra Moisés ngue di un yʉn tꞌɛ̨di yʉ jąꞌi nɛ hinga guesɛ Oją. Nɛ bi zän Oją din tꞌɛꞌtsꞌ ꞌbʉ bi zøh rám bomꞌbɛto ra Abraham ngue bi ma ba ɛ̨hɛ̨, ngue gueꞌa ra Cristo. 20 Pɛ nu Oją bin yąsɛui ra Abraham ꞌbʉ mí ꞌyøtꞌui ran hogui, njom mi ꞌbäꞌinde nꞌda ra pøngahyą, nɛ him mi ꞌbähmi nꞌda rám ꞌbɛhni mahɛ̨tsꞌi. Nɛ høntꞌa Oją bi ꞌyøtꞌui ran hogui ra Abraham.
ꞌBɛꞌa nam bøn ʉ yʉn tꞌɛ̨di
21 Pɛ nuꞌa Oją hingui yoho yʉm hma bi xijʉ. Nuꞌbʉ xcá häthʉ xcá jąsꞌhʉ yʉ́n tꞌøtꞌe ʉ yʉn tꞌɛ̨di, gueꞌʉ xtí ꞌdajʉ ra temaząi ꞌbʉ. 22 Pɛ nu rám Hman Oją i ma ngue gätho yʉ jąꞌi i ja yʉ́ tsꞌoqui. Nɛ gätho toꞌo da ꞌyɛ̨cꞌyɛi ꞌbɛꞌa bi ꞌyøtꞌa ra Jesucristo, da hyąni ꞌbɛꞌa bi man Oją ngue di unni. 23 Nuꞌbʉ hin ní zøcua häi ra Cristo, mí øthe yʉ́n tꞌɛ̨di Oją madí mandagahe xʉn ho, tenguꞌbʉ dyʉ ofädihe. Jagueꞌbʉ mi zøh ra Cristo, dá hąmhbe rá mate bi xogahe. 24 Nɛ nu yʉn tꞌɛ̨di midí mandagahe ꞌbʉ hin ná pąhmbe ra Cristo. Nɛ tengu nꞌda ra tꞌʉhni i pa ma ʉnbi ꞌbʉ hingui ho øtꞌe, pɛ gueꞌʉ dá hąmhbe rá mate ra Cristo di hogahe. 25 Nuya dá däh ma mbʉihʉ ra Cristo, nɛ him man dí homhbʉ ꞌbɛꞌa manꞌda di mandagahʉ. 26 Nguetho gätho bi ꞌyørcahʉ yʉ́ tꞌʉhnigahʉ Oją ꞌbʉ má hąmhbʉ rá mate ra Cristo. 27 Nɛ gätho dán xixyąhʉ nangue dí tɛnhdʉ ra Cristo nɛ ꞌdaꞌangu dím bɛ̨mhbʉ a. 28 Nɛ dí ꞌbʉhmbʉ ra Cristo, janangueꞌa hinga ꞌdahma ꞌdanꞌyo bʉ na nujʉ Oją, dyʉ judíohʉ, o gue dyʉ griegohʉ, o gue dyʉ ꞌyɛ̨hɛ̨hʉ o gue hin dyʉ ꞌyɛ̨hɛ̨hʉ, o gue yʉn ꞌyohʉ, o gue yʉ xisu. Pɛ gätho gahʉ tenguꞌbʉ dí ꞌbʉhmbʉ nꞌdanjąꞌitho bʉ na nu Oją. 29 Nɛ nuꞌbʉ dí ꞌbʉhmbʉ ra Cristo, tenguꞌbʉ nɛ ahʉ gätho bi xąndgahʉ ra Abraham, nɛ sä ga comhbʉ ran hogui bi ꞌyøtꞌui Oją a, nɛ sä ga hąmhbʉ rán jąpi Oją bi ma di unni.