4
Nuya dín nde ga xi ahʉ nꞌda ra hmɛpya ꞌbɛꞌa mi ørcahe yʉ́n tꞌɛ̨di Oją ꞌbʉ him mi tįmhbe ran ꞌyomfɛ̨ni. Tenguꞌbʉ nꞌda ra tꞌʉtꞌʉhni da du rá ta, nɛ i ꞌbʉi tenguꞌbʉ nꞌda ra ꞌyɛ̨hɛ̨ bʉ ja rá ngu, madagueꞌbʉ xʉn ngu ꞌbɛꞌa bi zocpa a rá ta. 2 Jatho da mba ma manda asta gueꞌbʉ go bin te ra tꞌʉhni. 3 Nɛ gueꞌa mi øthe a ꞌbʉ hin ná pąhmbe, midí mandagahe ʉ yʉ́n tꞌɛ̨di Oją, gue bi xije ꞌbɛpʉ dán ꞌyohe ua ja ra ximhäi. 4 Pɛ nuꞌbʉ mi zøn ra pa ngue bá pɛnh Oją rá Tsꞌʉntꞌʉ, nɛ bim ꞌbʉi nangue nꞌda ra xisu ngue ma mijudíohe. Nɛ nuꞌa rá Tsꞌʉntꞌʉ Oją bi ꞌyøtꞌ yʉ́n tꞌɛ̨di Oją. 5 Janangueꞌa bi zä bi hyągahʉ gätho yʉ tsꞌoqui dín dupatehʉ nangue hin dá øthʉ yʉn tꞌɛ̨di xʉn ho, nɛ bi zä bʉ bi zinjʉ Oją ngue dyʉ tꞌʉhni gahʉ bʉya. 6 Nɛ nujʉ yʉ́ tꞌʉhnigahʉ Oją, nɛ bá pɛngahʉ a rá Hogandąhi bʉ ja ma mbʉihʉ. Nɛ nangue dí ꞌbʉhmbʉ rá Hogandąhi Oją, sä gam mamhbʉ ngue ma Tahʉ Oją. 7 Nuya guí ꞌbʉhmbʉ ngue yʉ́ tꞌʉhni ahʉ Oją, nɛ hin guí ꞌbʉhmbʉ tengu gyʉ ꞌyɛ̨hɛ̨hʉ. Nɛ nangueꞌa ꞌbɛꞌa bi ꞌyøtꞌa ra Cristo, Oją di ꞌda ahʉ ꞌbɛꞌa gätho i ja, nguetho yʉ́ tꞌʉhni ahʉ.I hądumbʉi ra Pablo nangue yʉ ꞌyɛ̨cꞌyɛi
8 Pɛ nuꞌbʉ hin gní pąhmbʉ Oją majuąni, ngue gueꞌahʉ hing yʉ judío ahʉ, gmín ꞌyɛ̨hɛ̨hʉ yʉ oją ngue him majuąni. 9 Pɛ nu ahʉ ya gá pąhmbʉ Oją, nɛꞌa Oją i pą ahʉ. Ha guím bɛ̨mhbʉ gui hyomhbʉ manꞌda ra ꞌyu mahønꞌa, ngue gan ꞌyɛ̨hɛhʉ yʉ́n tꞌɛ̨di Oją guím bɛ̨nsɛhʉ dí zinꞌahʉ Oją ʉ. Pɛ nu yʉn tꞌɛ̨di hinꞌyʉ yʉ́ tsꞌɛdi ʉ, tengutho a ra ꞌyu gá hyɛhmbʉ mamꞌbɛtꞌo, ꞌbʉ gmí thąndehʉ yʉ oją him majuąni. Pɛ nte manho da ꞌyøtꞌahʉ mahønꞌa ʉ. 10 Pɛ nuya guí ɛ̨mhbʉ i ja yʉ́ tsꞌɛdi ʉ ꞌda yʉ pa, o gueꞌʉ ꞌda yʉ ząna, o gue ꞌda yʉ jɛya. 11 Nugä dra Pablogä, ɛ̨mmɛ dí su nangue ra ꞌbɛfi xtá øtꞌä bʉ guí ꞌbʉhmbʉ, nɛ ꞌbɛꞌa dá xi ahʉ, ɛ̨na gueꞌbʉ nte ní mbatho. 12 Nu ahʉ ma zʉ cu ahʉ, dín nde ahʉ gam ꞌbʉhmbʉ tengugä, nguetho dá ɛꞌtsꞌ yʉn tꞌɛ̨di mi øtꞌä, nɛ dí ꞌbʉcä tengu ahʉ ngue njąmꞌbʉ gá ꞌyøthʉ yʉn tꞌɛ̨di mamꞌbɛtꞌo. Nɛ nuꞌbʉ mám ꞌbʉhmbʉ bʉ, gán numanhojʉ, nte mán tsꞌo gá ꞌyørcahʉ. Masque nɛhya gui ꞌyømanhohʉ na. 13 Pɛ guí pąhmbʉ ngue mi ʉgä, nɛ gueꞌa dá mbagä bʉ. Nɛ nuꞌbʉ mám ꞌbʉhmbʉ bʉ, dá xi ahʉ ran ho maꞌdaꞌyo bʉya. 14 Ɛ̨mmɛ xʉn hɛ̨i ran ʉ mi jagä, pɛ njoꞌo ahʉ gá sanjʉ ngue xʉn ʉgui. Pɛ gätho ahʉ gá sinjʉ xʉn ho, tenguꞌbʉ dram ꞌbɛhni mahɛ̨tsꞌigä, o tenguꞌbʉ da guecä dra Jesucristogä. 15 Ɛ̨mmɛ mi hu ni mbʉihʉ ꞌbʉ má xi ahʉ ram hma. Nɛ nuꞌbʉ ꞌboꞌo xtán zä, xtá hyąh rá dä nɛ xtí ꞌdaqui. 16 Pɛ nuya, ha guí sʉjʉ ya nangue dí xi ahʉ majuąni. 17 Nu yʉ jąꞌi ngue i hä ahʉ, høntho in nde di ꞌuecꞌahʉ nanguecä, nguetho in nde ahʉ go gui numansuhʉ ʉ nɛ gui tɛnhdʉ ʉ. 18 Xʉn ho ngue gui tɛnhdʉ ʉ ꞌda, pɛ gui huanhdʉ toꞌo majuąni im ma xʉn ho, madagueꞌa hinga ꞌdarbʉ dí ꞌbʉhmbʉ. 19 Ma zʉ tꞌʉhni ahʉ nangue ra Cristo, ntsꞌɛdi gá ʉngahʉ, tenguꞌbʉ nꞌda ra xisu ngue hinga nam ꞌbʉh rá tꞌʉhni, ngue xø ga ja ahʉ gam ꞌbʉhmbʉ maꞌdaꞌyo mahønꞌa. Nɛ guextaꞌa ga thoqui ga nu ran ʉnbi, jagueꞌbʉ gá pąhmbʉ xʉn ho a ra Cristo. 20 Xiꞌbʉ di ꞌbʉcä bʉ, nꞌdahma sä dan yąsɛhʉ, nguetho nuua dí ꞌbʉcä hingui sä ga pądi ꞌbɛꞌa guím bɛ̨mhbʉ.
Rá hmɛpya ra Agar nɛ ra Sara
21 Nu ahʉ ngue guín nde gui ꞌyøthʉ yʉ́n tꞌɛ̨di ma mijudíohe, ga xi ahʉ ya ꞌbɛꞌa nam bøn ʉ yʉn tꞌɛ̨di. 22 Ntꞌoꞌtꞌi ngue mi ꞌbʉꞌi yoho yʉ́ tsꞌʉntꞌʉ ra Abraham. Nꞌda rá tsꞌʉntꞌʉ ra ꞌyɛ̨hɛ̨ xisu, nɛ nꞌda rá tsꞌʉntꞌʉ a rá xisu zɛhɛ ngue hinga gueꞌa rá ꞌyɛ̨hɛ̨. 23 Nu rá tsꞌʉntꞌʉ ra ꞌyɛ̨hɛ xisu bim ꞌbʉi tengutho ꞌbʉ im man yʉ jąꞌi dim ꞌbʉh yʉ́ tꞌʉhni, pɛ nu rá tsꞌʉntꞌʉ a rá xisu zɛhɛ bim ꞌbʉi nangue rá tsꞌɛdi Oją nguetho ya xí manꞌa Oją ngue dim ꞌbʉi. 24 Nꞌda ra hmɛpya ngue yoho yʉ ꞌyu i hąx yʉ jąꞌi. Nu ra ꞌyɛ̨hɛ xisu ní huti ra Agar, rán tꞌuti ʉ yʉ́n tꞌɛ̨di Oją bin tꞌunꞌna Moisés bʉ ja ra tꞌøhø Sinaí. Nɛ nuꞌʉ to i tɛnꞌndʉ, tenguꞌbʉ yʉ ꞌyɛ̨hɛ ʉ. 25 Nu ra Agar i uh ra hmɛpya nangue ra tꞌøhø Sinaí nubʉ ja ra häi Arabia, nɛ ngutho ra dąhnini Jerusalén ngueꞌa i ja bʉ a ya. Nɛ nu yʉ jąꞌi i ꞌbʉpʉ, i uh ra hmɛpya tenguꞌbʉ yʉ́ ꞌyɛ̨hɛ ʉ yʉ́n tꞌøtꞌe yʉn tꞌɛ̨di ʉ. 26 Pɛ nu ra xisu ngue hing ra ꞌyɛ̨hɛ i uh ra hmɛpya nguepʉ mahɛ̨tsꞌi, ra hnini Jerusalén maꞌdaꞌyo. Nɛ njongui pa ma manda bʉ nangue yʉn tꞌɛ̨di. Nɛ nujʉ dyʉ́ mɛnguhʉ bʉ. 27 Ntꞌoꞌtꞌi bʉ ja rám hman Oją:
Gan johya gra xisu ngue hing ra ꞌyɛ̨hɛ, madagueꞌbʉ hinga nam ꞌbʉh ni tꞌʉhni.
Ntsꞌɛdi gan yą nangue nin johya, gueꞌe hin gana nu ran ʉnbi.
Nguetho dim ꞌbʉh miꞌda ni tꞌʉhni ngue yʉ́ tꞌʉhni Oją, ɛ̨mme xtán ngu, xinda gueꞌa ra ꞌyɛ̨hɛ xisu ngue i tįn yʉ́ tꞌʉhni nangue bi mansɛ tengu yʉ jąꞌi.
28 Ma zʉ cu ahʉ, nuya dí øthʉ tengu ra Isaac rá tsꞌʉntꞌʉ ra Abraham, ngue Oją bi ma dim ꞌbʉi. Nguetho yʉ́ tꞌʉhnigahʉ Oją tengu bi ma. 29 Pɛ nu manꞌda ra tsꞌʉntꞌʉ ngue bim ꞌbʉi nangue bi mansɛ tengu man yʉ jąꞌi, bi zʉꞌa ra tsꞌʉntꞌʉ ngue bim ꞌbʉi nangue rá tsꞌɛdi a rá Hogandąhi Oją, tengutho in ja ya. 30 Im mam bʉ ja rám hman Oją; “Dami ꞌyɛthʉ ra ꞌyɛ̨hɛ xisu nɛꞌa rá tꞌʉhni, nguetho hin da gonhui ꞌbɛꞌa i ja rá tsꞌʉntꞌʉ ra xisu ngue hing ra ꞌyɛ̨hɛ.” 31 Gui pąhmbʉ ya, ma zʉ cu ahʉ, ngue hin dyʉ tꞌʉhni gahʉ ra ꞌyɛ̨hɛ xisu. Pɛ tenguꞌbʉ dyʉ tꞌʉhnigahʉ ra xisu ngue hing ra ꞌyɛ̨hɛ.