Hin dan ꞌyɛ̨hɛhʉ yʉn tꞌɛ̨di mahønꞌa
5
Nuꞌa ra Cristo bi yąnjʉ bʉ min ꞌyɛ̨hɛhʉ mamꞌbɛtꞌo, ngue ya him man dan ꞌyɛ̨hɛhʉ bʉ. Pɛ damin ząmhbʉ bʉ hapʉ bi mbäpꞌahʉ ra Cristo, nɛ ꞌyo gadín umhbʉ gan ꞌyɛ̨hɛhʉ mahønꞌa. 2 Dami ꞌyøhmbʉ ya ꞌbɛꞌa dí xi ahʉ, nugä dra Pablogä. Nuꞌbʉ gui ꞌyɛ̨na gui ꞌyøthʉ ꞌda yʉn tꞌɛ̨di ngue gui hyɛc ni xifanihʉ, nuꞌa ra Cristo hin da zä da ꞌyøtꞌahʉ nꞌda ran ho a ꞌbʉ. 3 Dín nde ga xi ahʉ mahønꞌa. Nuꞌbʉ gui dʉꞌmi gui ꞌyøthʉ yʉ́n tꞌɛ̨di ma mijudíohe, jatho gätho gui ꞌyøthʉ, nguetho hinga xøtꞌa nꞌdatho gui ꞌyøthʉ. 4 Nuꞌbʉ ꞌbʉ i ꞌda ahʉ ɛ̨na ngue ja yʉ́ tsꞌɛdi ʉ yʉn tꞌɛ̨di di hocꞌa ni mbʉihʉ ngue da zimanho ahʉ Oją, pɛ ya gá hyɛhmbʉ ra Cristo ꞌbʉ, nɛ gá ꞌuehmbʉ bʉ ja rán huɛ̨cate Oją bʉya. 5 Pɛ nu rá Hogandąhi Oją dá hąmhbʉ ꞌbʉ má pąhmbʉ majuąni ra Cristo, gueꞌa dí ꞌyɛ̨njʉ xʉn hojʉ Oją a, nɛ gueꞌa ná tømhbʉ da zinjʉ xʉn ho. 6 Nɛ nuꞌbʉ dí ꞌbʉhmbʉ ra Cristo, madagueꞌbʉ da mba nthɛqui ma xifanihʉ o hinꞌna, hin te di muui. Pɛ manꞌda hnɛhi thoho ga simhbʉ xʉn ho ma mbʉihʉ a ra Cristo, nɛ gueꞌa dí jajʉ ga øthʉ ran huɛ̨cate a. 7 Pɛ nuꞌbʉ rá mbʉdi thoho, ɛ̨mmɛ gmí ꞌyohʉ xʉn ho bʉ ja rá ꞌyu Oją. Toꞌo bi ząmpꞌahʉ ngue hin guí øthʉ ra ꞌbɛfi majuąni. 8 Him bi ząmpꞌahʉ Oją, nguetho guesɛ Oją bi zonꞌnahʉ gan ꞌyohʉ bʉ ja rá ꞌyu. 9 Nuꞌbʉ guí ꞌbʉhmbʉ nꞌda in nde di tsꞌonꞌna nin ꞌyomfɛ̨nihʉ, ꞌda xni tsꞌonꞌnatho ni mbʉihʉ ꞌbʉ, tenguthoho ꞌbʉ rá íxi ra thuhmɛ i sinni gätho ra jʉni. 10 Nugä dí hąxa njuąni ngue ma Hmuhʉ Oją di ja ahʉ ꞌdaꞌangu gam bɛ̨mhbʉ. Nɛ toꞌo i ꞌbʉpʉ ngue in nde di tsꞌonꞌna nin ꞌyomfɛ̨nihʉ, da nu rán tsꞌɛmbi Oją a, høntꞌa go toꞌo. 11 Nuꞌbʉ guextaꞌa dí xicä yʉ jąꞌi, jatho gui ꞌyøthʉ yʉ́n tꞌɛ̨di ma mijudíohe, hin din nugä ran ʉcpi ꞌbʉ. Pɛ guextaꞌa i pa ma ʉguigä nguetho dím mangä, jatho gui ꞌyɛ̨cꞌyɛihʉ a ra Cristo, ngue bi du bʉ ja ra pontꞌi nangue ma tsꞌoquihʉ. 12 Nuꞌa toꞌo in nde da hyɛcꞌa ni xifanihʉ, manꞌda xʉn ho ꞌbʉ da ꞌuetho ʉ. 13 Nguetho nu ahʉ, ma zʉ cu ahʉ, Oją bi ja ahʉ bi thøcꞌahʉ yʉn tꞌɛ̨di, nɛ bi zonꞌnahʉ in nde ahʉ gan ꞌyɛ̨hɛhʉ nꞌda ngu nꞌda ahʉ nangue ran huɛ̨cate. Nɛ hínguin nde ahʉ gui ꞌyøthʉ ni pähä zɛhɛhʉ. 14 Pɛ tenguꞌbʉ dá jąsꞌhʉ gätho yʉ́n tꞌɛ̨di Oją ꞌbʉ dan huɛ̨jʉ nꞌda ngu nꞌdajʉ tengu bʉ nan huɛ̨csɛhʉ. 15 Pɛ gan jamansuhʉ, xøhma tsꞌʉrpʉ thoho gam ꞌbɛsɛhʉ ꞌbʉ gan sʉhmbʉ nꞌda ngu nꞌda ahʉ, nɛ gan täthʉ.Gam bɛ̨mhbʉ rá Hogandąhi Oją
16 Pɛ guehna dí xi ahʉ na ya. Dami ꞌyøthʉ a di bɛ̨nꞌnahʉ rá Hogandąhi Oją, nɛ gueꞌa gní ꞌyɛsꞌhʉ gní ꞌyørpa rá pähäzɛhɛ ni jąꞌihʉ bʉya. 17 Nguetho nín ꞌyomfɛ̨nisɛ nꞌda, hinga gueꞌa im man rá Hogandąhi Oją a, nɛ nu rá Hogandąhi Oją hinga ꞌdaꞌanguui ní pähäzɛhɛ nꞌda, nɛ din sʉhmi ʉ. Nɛ nu rá Hogandąhi Oją hin di jajʉ ga øthʉ ꞌbɛꞌa in nde ma tsꞌon ꞌyomfɛ̨nihʉ. 18 Nɛ nuꞌbʉ gueꞌa rá Hogandąhi Oją dí tɛnhdʉ, di zɛrca ma mbʉihʉ, janangueꞌa hin da zä da sijʉ dá fɛstahʉ yʉ́n tꞌɛ̨di Oją. 19 Gätho mfądi ꞌbɛꞌa nín tꞌøtꞌe nꞌda ꞌbʉ øzɛhɛ ꞌbɛꞌa in nde ní jąꞌi nꞌda. Ngue i øtꞌ ran ꞌyomtꞌɛ̨ni, nɛ ran tsꞌomꞌbäi, nɛ ra tsꞌonꞌyomfɛ̨ni, 20 nɛ i thąnde yʉ za o gue yʉ hmite, nɛ i øtꞌ yʉn jąxtøni, nɛ i øtꞌ yʉn sʉi, nɛ i øtꞌ ran tsꞌɛya, nɛ in cuɛ, nɛ i øtꞌa i numanhosɛ, nɛ i øtꞌ yʉn heque, nɛ i nde nꞌdanni din ꞌyo, 21 nɛ i siyate, nɛ i hote, nɛ mihni, nɛ di munsꞌ pʉ ja yʉ ngo ngue da ꞌyøtꞌ yʉ tsꞌoqui, nɛ nꞌdanꞌyo thoho i øtꞌe. Nɛ dí xi ahʉ mahønꞌa tengu dá xi ahʉ, ngue nuꞌʉ toꞌo øtꞌ ya, hin nan säui da yʉrpʉ di manda rá tsꞌɛdi Oją. 22 Pɛ nuꞌa rá Hogandąhi Oją di jajʉ ga øthʉ ran huɛ̨cate, nɛ ran johya, nɛ ní hyu ma mbʉihʉ a, nɛ hin dan xømbʉihʉ, nɛ ga øthʉ ra yembʉi, nɛ ran hocjąꞌi, nɛ ga jąsꞌhʉ dí mamhbʉ, 23 nɛ hin ga sämanꞌʉhʉ, nɛ ga sąmzɛhɛ ma mbʉihʉ. Nɛ nuꞌbʉ ga øthʉ ya, hinꞌyʉ nꞌda ran tꞌɛ̨di da zä dí zʉjʉ ꞌbʉ. 24 Nɛ nuꞌa toꞌo in ꞌyoui a ra Cristo, tenguꞌbʉ xí guarpʉ ja ra pontꞌi a rá tsꞌonꞌyomfɛ̨ni zɛhɛ, ngue him man di manda a rá pähä zɛhɛ nɛ gätho ꞌbɛꞌa mí nde rá jąꞌi. 25 Pɛ nuꞌbʉ dí ꞌbʉhmbʉ rá Hogandąhi Oją, jatho ga jafʉ di mandagahʉ ꞌbɛꞌa gätho dí øthʉ ꞌbʉ. 26 Pɛ ndeꞌbʉ hin dan ꞌyɛ̨zɛhɛhʉ, janangueꞌa hin ga bɛ̨nbahʉ ʉ miꞌda ngue da nde da ꞌyøtꞌe tenguꞌʉ ꞌda bin ꞌyɛ̨tsꞌi.