Dam fäxhʉ nꞌda ngu nꞌdajʉ
6
Ma zʉ cu ahʉ, nuꞌbʉ ꞌbʉꞌa nꞌda ahʉ bi dąng bʉ ja ran tsꞌo, pɛ nuꞌahʉ gue guextaꞌa guím bɛ̨mhbʉ rá Hogandąhi Oją, janate tho guin zohmbʉ a, gui zɛhmbʉ da mbeng bʉ ja rá ꞌyu Oją, guim bɛ̨mhbʉ nɛꞌahʉ hinꞌyʉ ni tsꞌɛdihʉ, tsꞌʉrpʉ thoho nɛ ahʉ gui tąnjʉ ꞌbʉ da tsꞌä ahʉ. 2 Nɛ nuꞌbʉ guí comhbʉ ni dumbʉihʉ, guí øthʉ rán tꞌɛ̨di ra Cristo ꞌbʉ. 3 Pɛ nuꞌbʉ ꞌbʉꞌa nꞌda ahʉ din ꞌyɛ̨zɛhɛ, nɛ hinꞌyʉ ꞌbɛꞌa pądi, din hyäzɛhɛ ꞌbʉ. 4 Nɛ hinga gueꞌa nan johyahʉ ngue gam bɛ̨mhbʉ xʉn ho ma ꞌbɛfihʉ xinda gue miꞌda. Pɛ ga ørpamasu ma ꞌbɛfihʉ ngue ga øthʉ xʉn ho, nɛ gueꞌa dán johyahʉ a bʉya. 5 Pɛ nꞌda ngu nꞌda ahʉ jatho gui ꞌyøzɛhɛhʉ ꞌbɛꞌa go ní ꞌbɛfi di ꞌda ahʉ Oją, ngue ni ꞌbɛfizɛhɛhʉ. 6 Nu ahʉ ngue i sänꞌnahʉ ran ho maꞌdaꞌyo, ndeꞌbʉ gui fäxhʉ ni xänbatehʉ gätho ꞌbɛꞌa i honi, janangueꞌa ꞌda xtám fäxtahʉ. 7 O guím bɛ̨mhbʉ gui nuhʉ ran ho ꞌbʉ guí øthʉ ran tsꞌo, nguetho guidín hyäzɛhɛhʉ ꞌbʉ guím bɛ̨mhbʉ a, nɛ hingui sä ga häthʉ Oją. Tenguꞌbʉ ga tuhmbʉ yʉ hmudä. Nuꞌbʉ dá tuhmbʉ a xʉn ho, xʉn ho a din ja bʉya, pɛ nuꞌbʉ ga tuhmbʉ a hingui ho, hingui ho din ja bʉya. 8 Nuꞌbʉ ꞌbʉi toꞌo i øtꞌe ngue i numanhosɛ rá jąꞌizɛhɛ, xmá mba di ꞌbɛh ra temaząi ꞌbʉ. Pɛ toꞌo ꞌbʉi nangue rá pähä rá Hogandąhi Oją, nuꞌa din tꞌun ra temaząi. 9 Ndeꞌbʉ hin dan xømbʉihʉ ngue ga øthʉ ran ho, nguetho da zøn ra pa da hnurca ma ꞌbɛfihʉ ꞌbʉ hin da güentꞌ ma mbʉihʉ. 10 Janangueꞌa jantꞌa thoho ga ørpahʉ ran ho gätho ma mijąꞌihʉ a ra ora ngue da zä ga ørpahʉ. Nɛ manꞌda gam bɛ̨mhbʉ ga ørpahʉ ran ho ʉ ma cuhʉ nangue ra Cristo.Manꞌda ran zofo, nɛ ran zɛngua ran zɛgui
11 Guín nuhʉ ya yʉ tꞌohni xʉn ndoho dá oꞌtꞌäzɛhɛ. 12 Nuꞌʉ toꞌo in nde di ꞌbɛpꞌahʉ ngue gui hyɛc ni xifanihʉ, pɛ høntꞌa in nde dí numanho yʉ jąꞌi. I su xtá nu ran ʉnbi ꞌbʉ xtá ma, høntꞌa ra Cristo í hogahʉ ꞌbʉ mí du bʉ ja ra pontꞌi nangue ma tsꞌoquihʉ. 13 Nuꞌʉ toꞌo im ma ngue da thɛcꞌa ni xifanihʉ, pɛ nde høntꞌa dí yątꞌa gui tɛnhdʉ, gueꞌbʉ da zä di ꞌbɛpꞌahʉ gui hyɛc ni xifanihʉ. Nɛ hingui øtꞌe gätho yʉn tꞌɛ̨di. 14 Pɛ nugä hin dín nde dá yątꞌa dí øzɛhɛ. Pɛ høntꞌa nán johyagä a í du bʉ ja ra pontꞌi ma Hmuhʉ ra Jesucristo. Nɛ nugä tenguꞌbʉ ꞌdarbʉ dá tuꞌbe ra Cristo, tenguꞌbʉ dá tugä ua ja ra ximhäi, ngue hin dí øtꞌä yʉ́n tꞌøtꞌe a. Nɛ nu yʉ́n tꞌøtꞌe ra ximhäi, hin te rán jaui a ꞌbɛꞌa dí øtꞌä. 15 Pɛ nuꞌʉ in ꞌyohʉ ra Cristo, hin te di muui ꞌbʉ nthɛqui o hinꞌna, pɛ manꞌda di muui ngue i ja ra temaꞌdaꞌyo. 16 Nɛ dí äp Oją da hyurpa yʉ́ mbʉi, nɛ di un rán johya ʉ gätho toꞌo i ꞌyo ra ꞌyu dí xi ahʉ, nguetho gueꞌʉ majuąni yʉ́ tꞌʉhni Oją ʉ. 17 Nu yʉ pa dí mba bʉ ya, o ɛ̨mmɛ gadí ʉngahʉ ma mbʉi, nguetho i ja yʉ mbɛdi ma jąꞌi hapʉ bi tsꞌɛgui, nangue dán ꞌyɛ̨hɛgä ra Hmu Jesús. 18 Ma zʉ cu ahʉ, dami cohmbʉ rá mate ma Hmuhʉ ra Jesucristo. Nɛ høntꞌa dí xi ahʉ a ya.