2 CORINTIOS
Ná yoho ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Corinto
Ran zɛngua
1
Nugä drá Pablogä, nɛ nangue rá pähä Oją ma ꞌbäigäꞌbe a ra Jesucristo. Dín ꞌyogäꞌbe ma cuhʉ ra Timoteo. Nɛ dí pɛnꞌnahʉ bʉ ra søcuą gyʉ ꞌyɛ̨cꞌyɛihʉ ngue dim pɛti bʉ ja rán ngu Oją bʉ ja ra hnini Corinto, nɛ gätho yʉ ꞌyɛ̨cꞌyɛi i ꞌbʉpʉ ja ra xɛqui Acaya. 2 Nɛ nuꞌa Oją ma Tahʉ nɛ ra Jesucristo ma Hmuhʉ di ꞌda ahʉ rá mate a, nɛ da hyutꞌa ni mbʉihʉ.Yʉ́n ʉnbi ra Pablo
3 Jamadi Oją rá Ta ma Hmuhʉ ra Jesucristo, nguetho i ja rá yembʉi nanguejʉ. Nɛ guesɛ Oją thocua thoho i hurca ma mbʉihʉ. 4 Nuꞌa Oją i hurca ma mbʉihʉ nangue gätho yʉn ʉnbi dín nuhʉ. Janangueꞌa da zä ga hurpahʉ yʉ́ mbʉi ꞌda toꞌo in nu ran ʉnbi, tengu tho bʉ í hyurcahʉ ma mbʉihʉ Oją. 5 Nuꞌbʉ dí comhbʉ yʉ́n ʉnbi ra Cristo, nuꞌa di zɛrca ma mbʉihʉ, go din thɛui ran ʉnbi dín nuhʉ. 6 Nɛ nangue ran ʉnbi dín nugäꞌbe, gueꞌa dín te ni tꞌɛ̨cꞌyɛihʉ, nɛ di zɛtꞌa ni mbʉihʉ a. Nɛ nuꞌbʉ di zɛrca ma mbʉiꞌbe Oją, nɛ ahʉ di zɛtꞌa ni mbʉihʉ. Nguetho nuꞌbʉ guím bɛ̨mhbʉ a ran ʉnbi dín nuꞌbe, sä gui hyäthʉ nɛ hin gan xømbʉihʉ ran ʉnbi guín nuhʉ, tengu thohogäꞌbe. 7 Hin tsꞌʉ dadí ꞌyon ma mbʉiꞌbe nangue ni tꞌɛ̨cꞌyɛihʉ. Nɛ dí pąꞌbe ngue guí comhbʉ man ʉnbiꞌbe. Ngutho Oją da hyurca ma mbʉihʉ. 8 Nugäꞌbe dín nde ahʉ, ma cu ahʉ, gui pąhmbʉ ngue dán nuꞌbe ran ʉnbi bʉ ja ra häi Asia. Nɛ hinꞌyʉ ma tsꞌɛdiꞌbe ngue xcá häzɛhɛꞌbe, nguetho ɛ̨mmɛ tsꞌɛdi ran ʉnbi dá nuꞌbe, nɛ mi tsꞌʉtho xcá tuꞌbe bʉ. 9 Majuąni ɛ maguepʉ xcá tuꞌbe, pɛ gätho ʉ bin ja nꞌdamhma sä ga pąꞌbe ngue hinꞌyʉ ma tsꞌɛdi zɛhɛꞌbe, pɛ ga tømꞌbe ꞌbɛꞌa da ꞌyøtꞌ Oją, ngue manꞌda xʉn ndoho rá tsꞌɛdi ngue da xoxꞌʉ xʉn du. 10 Nuꞌa Oją bi yąngäꞌbe bʉ ja ran dąte ngue ɛ̨mmɛ ntsꞌutho, nɛ dí pąꞌbe ngue Oją da yąngäꞌbe mahønꞌa. Nɛ dí ɛ̨cꞌyɛiꞌbe nɛ dí tømꞌbe ngue thocuą thoho da yąngäꞌbe Oją. 11 Nɛ nu ahʉ sä gui zɛcꞌbe tsꞌʉ ꞌbʉ guín yąhʉ Oją nanguecäꞌbe, nɛ mꞌbɛjua bʉya da zä gätho ahʉ nꞌdatꞌa ga xihmbʉ jamadi Oją nangue ꞌbɛꞌa bi ꞌyørcaꞌbe.
Ra Pablo bi ma hanja him bi mba nꞌdihi bʉ ja ra hnini Corinto
12 I hu ma mbʉiꞌbe nguetho di bɛ̨nga ma mbʉiꞌbe ngue xʉn ho ꞌbɛꞌa dí øtꞌbe ua ja ra ximhäi, nɛ xʉn ho ꞌbɛꞌa dí øtꞌbe nangue ahʉ. Nɛ hin nangue man ꞌyomfɛ̨nisɛꞌbe, pɛ Oją i fäxcaꞌbe ngue dí øtꞌbe ran ho. 13 Dín nde ahʉ gui pąhmbʉ xʉn ho ꞌbɛꞌa dí øtꞌbe, tengu dí otꞌahʉ ya. 14 Nɛ madagueꞌbʉ hin guí pąhmbʉ gätho ya dí xiꞌahʉ, pɛ nuꞌbʉ bi zøn ra pa ba ɛ̨h ra Hmu Jesús, gan johyahʉ nangue a ram hma dí otꞌahʉ. Nɛ ngutho gaꞌbe da hyu ma mbʉiꞌbe nangue ahʉ. 15 Majuąni min ndegä xcá mba bʉ, nɛ nuꞌbʉ xcá mba bʉ, mi sä nyondį xcá hutꞌa ni mbʉihʉ. 16 Mim bɛ̨ngä ngue xcá thocä bʉ guí ꞌbʉhmbʉ, gan nu ahʉ tsꞌʉ nuꞌbʉ má mbagä bʉ ja ra häi Macedonia, nɛ dím bɛ̨ngä ga thopʉ mahønꞌa ꞌbʉ dá pøngä ua ja ra häi Macedonia. Nɛ nuꞌbʉ dá mba bʉ, dím bɛ̨ngä ngue gui fäxcä bʉ ja ra ꞌyu Judea. 17 Pɛ hingui yoho man ꞌyomfɛ̨nigä, tengu guí ɛ̨njʉ dí øtꞌä ꞌbʉ him má thocä bʉ. Hin dí øtꞌä tengu øtꞌi ꞌda ʉ yʉn ꞌyohʉ ngue yoho im bɛ̨ni. 18 Nɛ majuąni dá bɛ̨ngä xcá mba bʉ ꞌbʉ má xi ahʉ. Nɛ i pą Oją majuąni dí xi ahʉ. 19 Nugä nɛ ra Timoteo nɛ ra Silvano ya dá xi ahe nangue ra Cristo Jesús, rá Tsꞌʉntꞌʉ Oją. Nɛ nuꞌa ra Cristo hin di pä a im bɛ̨ni, pɛ høntꞌa majuąni im man a. 20 Nɛ gueꞌa ra Cristo ní jąꞌtsꞌi ꞌbɛꞌa gätho i sän Oją da ꞌyøtꞌe, nɛ nangue bi hogahʉ ra Cristo dí pąhmbʉ di ꞌdajʉ rá mate Oją ꞌbʉ dí äfʉ, nɛ gueꞌa ná ɛ̨spahʉ Oją a. 21 Guetꞌa Oją bi ꞌdajʉ ra tsꞌɛdi ngue thocua thoho ga tɛnhdʉ ra Cristo, nɛ nꞌda ngu nꞌdajʉ bi ꞌdajʉ ra ꞌbɛfi. 22 Nɛ guetꞌa Oją bi ꞌyøtꞌe yʉ́ mbɛti gahʉ a, nɛ bi ꞌdajʉ rá Hogandąhi mbo ma mbʉihʉ, guepʉ na fądi majuąni di ꞌdajʉ ꞌbɛꞌa gätho manꞌda. 23 Majuąni a dí xi ahʉ ngue hanja hin dá thocä bʉ guí ꞌbʉhmbʉ. Nuꞌbʉ xcá søngä bʉ a ra pa dá xi ahʉ, xcá dąmhyą ahʉ tsꞌʉ ꞌbʉ, nguetho hinga nadí hojʉ ꞌbɛꞌa guí øthʉ. Nɛ ndetho ɛ̨mmɛ xcá ʉnꞌna ni mbʉihʉ ꞌbɛꞌa xcá xi ahʉ. Nɛ dí pądi majuąni a dí xi ahʉ ya, nɛ dí xi Oją di ꞌdac ran ʉnbi ꞌbʉ him majuąni a dím ma. 24 Pɛ dín nde ahʉ da hyu ni mbʉihʉ, nɛ hin da du ni mbʉihʉ ꞌbɛꞌa ga xi ahʉ. Nɛ gueꞌa dín nde ga øtꞌahʉ ꞌbʉ dá mbagä bʉ. Pɛ hinꞌyʉ manꞌda sä ga xi ahʉ gui ꞌyɛ̨cꞌyɛihʉ, nguetho i juaꞌa guí ɛ̨cꞌyɛihʉ ngue guí pąhmbʉ majuąni ra Cristo.