2
Janangueꞌa dá ɛ̨nsɛgä, nuꞌbʉ dá mba bʉ mahønꞌa, hin ga ꞌda ahʉ ra dumbʉi mahønꞌa. 2 Nguetho nuꞌbʉ guím bɛ̨ndumbʉihʉ, hingui sä gui ꞌdajʉ ran johya ꞌbʉ. Nɛ hønsɛ ahʉ sä gui ꞌdajʉ ran johya, pɛ hingui sä ꞌbʉ i tu ni mbʉihʉ. 3 Janangueꞌa dá otꞌahʉ ra søcuą nguetho dín nde ngue gan ꞌyomfɛ̨nihʉ tsꞌʉ, nɛ sä gui hojʉ ꞌbɛꞌa gnám ꞌbʉhmbʉ. Nɛ nuꞌbʉ dá mbagä bʉ, ya xquí hojʉ a ꞌbɛꞌa manꞌda gnám ꞌbʉhmbʉ, nɛ sä gui ꞌdajʉ ran johya bʉya nɛ hin din jaꞌahʉ ra dumbʉi. Nguetho dí ɛ̨nsɛgä ngue nꞌdatꞌa dím bɛ̨mhbʉ, nuꞌbʉ dín johyagä nɛ ahʉ ja nin johyahʉ. 4 Nɛ ɛ̨mmɛ mi tu ma mbʉi nuꞌbʉ má otꞌahʉ ra søcuą, nɛ ɛ̨mmɛ dán zoni, nguetho hin dín nde gui ʉꞌtꞌ ni mbʉihʉ nangue ꞌbɛꞌa dá otꞌahʉ, pɛ dín nde gui pąhmbʉ ngue ɛ̨mmɛ dadí huɛ̨c ahʉ.Da mba ma punbi toꞌo bi ꞌyøtꞌ ran tsꞌo
5 Hinga hønsɛgä pɛ gätho ahʉ i ja ahʉ ra dumbʉi nangue ꞌbɛꞌa bi ꞌyøtꞌ ran ꞌyohʉ ngue bi zin rá hømbe. 6 Pɛ dí ɛ̨na xøtꞌa ya ran ʉnbi gá unhdʉ a ran ꞌyohʉ. 7 Nɛ nuya ndeꞌbʉ gui punbahʉ rá tsꞌoqui, nɛ gui hyurpahʉ rá mbʉi. Nguetho nuꞌbʉ hin gui hyurpahʉ rá mbʉi, manꞌda din ja ra dumbʉi ngue njąmꞌbʉ sä din hogui. 8 Nuya dí ä ahʉ ra mate ngue gui ꞌyuthʉ xʉn ho nin huɛ̨catehʉ a ran ꞌyohʉ. 9 Nugä dá otꞌahʉ nguetho dín nde ga pą ꞌbʉ guí øthʉ tengu dí xi ahʉ, uague hinꞌna. 10 Nuꞌbʉ guí punbahʉ nꞌda ni mijąꞌihʉ, nɛcä ga punba a. Nɛ nuꞌbʉ guí punbahʉ ꞌbɛꞌa bi ꞌyøtꞌa nꞌda, nɛ dí punbä a nangue rán tꞌɛ̨di ra Cristo. 11 Nguetho hin dín ndegä da dąjʉ ra zįthu nangue ꞌbɛꞌa dí øthʉ. Dí pąhmbʉ ꞌbɛꞌa nde da ꞌyøtꞌa ra zįthu nguetho in nde da hyäjʉ.
Him bin säya a ní bɛ̨m bʉ Corinto ra Pablo
12 Nuꞌbʉ má søngä bʉ ja ra hnini Troas, Oją ya xí xocua yʉ́ mbʉi yʉ jąꞌi bʉ. Nɛ hingui hɛ̨i dá mangä bʉ rán ho maꞌdaꞌyo ra Cristo nguetho yʉ jąꞌi min nde da ꞌyøde. 13 Pɛ hin dán johyagä, nguetho hin dá tįngä bʉ ma cuhʉ ra Tito. Ngue xtá xiqui ꞌbɛꞌa guí øthʉ bʉ. Jananjabʉ dá socä yʉ jąꞌi bʉ Troas nɛ dá mbagä bʉ ja ra häi Macedonia, ja dá tįngä bʉ a ra Tito.
Nangue ra Cristo sä ga tąfʉ ra zįthu
14 Pɛ jamadi Oją, nangue dín ꞌyohʉ ra Cristo di jajʉ ga tąfʉ ra zįthu bɛꞌa gätho dí øthʉ. Nɛ hønbʉ go hapʉ dím mamꞌbe ran ho maꞌdaꞌyo, Oją di japi da tho a, tengu tho ꞌbʉ nꞌda ra ꞌyɛ̨thi i tux ran dąhi i yʉmanho. 15 Nɛ nangue dín ꞌyohʉ ra Cristo, Oją in numanhojʉ, tengu ra ꞌyɛ̨thi i yʉmanho bʉ nam bɛ̨n Oją. Nugäꞌbe dím mamꞌbe ra Cristo Jesús bʉ ꞌbʉi gätho yʉ jąꞌi, gueꞌʉ i ja yʉ́ temaząi, nɛ ʉ di ꞌbɛh ra temaząi. 16 Nu a ram hma dím mamꞌbe, da zänba ran ʉnbi a ꞌbʉ hingui nde da hyąn a nꞌda, pɛ nu ʉ toꞌo i ɛ̨cꞌyɛi ꞌbɛꞌa dím mamꞌbe, di un ra te a. Pɛ toꞌo maha da hyätꞌi daꞌyøtꞌ na. 17 Høntꞌʉ tengu gäꞌbe ngue nꞌdatꞌa Oją dím bɛ̨mhbe, nɛ dyʉm ꞌbɛhnigäꞌbe Oją, nɛ dyʉ́ ꞌyɛ̨hɛ gäꞌbe ra Cristo, nɛ nu a Oją in nucꞌbe. Nɛ nugäꞌbe hin dí øtꞌbe tengu øtꞌʉ ꞌda xʉn ngu ngue in nde da dąsɛ nangue rá ꞌbɛfi Oją i øtꞌe.