1 CORINTIOS
Ná nꞌda ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Corinto
Ran zɛngua
1
Ma zi cu ahʉ guí ꞌbʉhmbʉ bʉ ra dąhnini Corinto, dí otꞌahʉ ra søcuą i jaua. Dí zɛngua ahʉ gätho gyʉ ꞌyɛ̨cꞌyɛihʉ Oją. Nɛ nugä drá Pablogä, bi huangä Oją, nɛ rá pähä zɛhɛ bi xiqui gam mangä rám hman ra Jesucristo hønbʉ go hapʉ. Nɛꞌa man ꞌyohʉhʉ ra Sóstenes dí ꞌbʉꞌbe ua, di zɛngua ahʉ. 2 Nuꞌa ra Cristo Jesús bi ꞌuecꞌa ni mbʉihʉ bʉ ja ra tsꞌoqui. Nɛ bi zonꞌnahʉ gui ꞌyørpahʉ rá ꞌbɛfi Oją. Nɛ tenguꞌbʉ ꞌdarpʉ guí ꞌbʉhmbʉ ʉ miꞌda toꞌo gätho i thąnde ma Hmuhʉ ra Jesucristo, ngue nꞌdatꞌa ra Hmu dí comhbʉ ʉ. 3 Nɛ dí äpä Oją ma Tahʉ nɛ ma Hmuhʉ ra Jesucristo ngue di ꞌda ahʉ yʉ́n jąpi, nɛꞌa rán johya gui hyąmhbʉ a.Bi dįn yʉ́n jąpi Oją nguetho i ꞌbʉhmbʉ ra Cristo
4 Bi ꞌda ahʉ yʉ́n jąpi Oją nguetho ꞌdarpʉ guí ꞌbʉhmbʉ ra Cristo Jesús. Gueꞌa ná undä ra jamadi Oją a ya. 5 Nɛ nte di ꞌbɛpʉ ja nim pɛtihʉ, nguetho ꞌdarpʉ guí ꞌbʉhmbʉ ra Cristo. Pɛ gä i ja ahʉ ran ꞌyomfɛ̨ni da zä gui pąhmbʉ xʉn ho a ya, nɛ da zä guim mamhbʉ xʉn ho rá ꞌbɛfi Oją ya. 6 Nɛ gueꞌa rám hman ra Cristo gá hyąmhbʉ, gueꞌa gní bømanhohʉ a ya. 7 Janangueꞌa i juadi xʉn ho rá tsꞌɛdi bi ꞌda ahʉ Oją nangue rá ꞌbɛfi guí øthʉ gätho gní tømhbʉ dí ꞌyɛ̨h mahønꞌa ma Hmuhʉ ra Jesucristo. 8 Nɛ di ja ahʉ Oją gan ząmhbʉ bʉ gueꞌbʉ go rán zɛgui yʉ pa, janangueꞌa nte ma tsꞌoqui da dįnꞌnahʉ ꞌbʉ bá peng ma Hmuhʉ ra Jesucristo. 9 Nguetho dí pąhmbʉ nząi di jąꞌtsꞌa im man Oją, nɛ guesɛ Oją bi zoncahʉ dam ꞌbʉhmbʉ rá Tsꞌʉntꞌʉ ma Hmuhʉ ra Jesucristo.
Bin sʉh yʉ ꞌyɛ̨cꞌyɛi
10 Dí äcä ra mate nꞌdatꞌa guim bɛ̨mhbʉ, nguetho guí tɛnhdʉ a ma Hmuhʉ ra Jesucristo. Nɛ ꞌyo guidín hejʉ, pɛ jatho nꞌdatho guim bɛ̨mhbʉ nɛ nꞌdatꞌa gui ꞌyøthʉ. 11 Gueꞌa dí xi ahʉ a, ma zi cu ahʉ, nguetho bi xicä ꞌda yʉ cu ngue yʉ́ mɛnguhʉ ra Cloé, bi xiqui ꞌbɛꞌa guí øthʉ. 12 Nguetho guí ɛ̨mhbʉ ꞌda ahʉ guí tɛngahʉ, nɛ ɛ̨nꞌi ꞌda tɛn ra Apolo, nɛ ɛ̨m miꞌda tɛn ra Pedro, nɛ ɛ̨m miꞌda ngue tɛnꞌna ra Cristo. 13 Pɛ ha guím bɛ̨mhbʉ gá xɛmhbʉ ra Cristo. O xigä ha dá tugä bʉ ja ra pontꞌi nangue ahʉ. Uague guím bɛ̨mhbʉ ngue gán xixyąhʉ nangue ma thuhugä. 14 Pɛ jamadi Oją ngue njoꞌo to dá xixyą ahʉ, høntꞌa ra Crispo nɛ ra Gayo. 15 Nꞌdamhma njon da zä da ma bin xixyą nangue ma thuhugä. 16 Nɛ høntꞌʉ gätho ꞌbʉpʉ rá ngu ra Estéfano dá xixyąbi. Pɛ hin dím bɛ̨ngä ꞌbʉ ꞌboꞌo xcamá xixyąbi miꞌda, uague høntꞌʉ. 17 Nguetho hinga gueꞌa ra ꞌbɛfi bi xicä ra Cristo ga øtꞌ ran xixyą, pɛ bi xiqui gam mangä ran ho maꞌdaꞌyo. Pɛ nuꞌbʉ dím mangä a, pɛ hin dí yą tengu bʉ na yą yʉm bąmhyą, nguetho høntꞌa dí honi da bąh yʉ jąꞌi ma tsꞌoquihʉ í du ra Cristo bʉ ja ra pontꞌi. Janangueꞌa din ja ra tsꞌɛdi ram hma di hocpa yʉ́ tsꞌoqui ʉ.
Gueꞌa ra Cristo ní ꞌdajʉ ran ꞌyomfɛ̨ni Oją
18 Pɛ nuꞌa ram hma ngue ra Cristo bi du bʉ ja ra pontꞌi, ɛ̨mbi nte ní mbatho ʉ ní mba bʉ ja ran ʉnbi maząi. Pɛ nujʉ ná mbähä bʉ ja ra temaząi, dí pąhmbʉ gueꞌa ram hma ní zinjʉ Oją ngue bi du ra Cristo bʉ ja ra pontꞌi, bi hoga ma tsꞌoquihʉ. 19 Nɛ i ɛ̨m bʉ rá tꞌohni Oją:
Ga uti ngue nte ní mbatho ʉ im ma jasɛ yʉ́n ꞌyomfɛ̨ni,
nɛ ga hącpa yʉ́ tsꞌɛdi zɛhɛ yʉ jąꞌi, ga ɛm bʉ maꞌueni, bi ꞌyɛ̨n Oją.
20 Nguetho bi zän Oją hin te ní mbat ʉ toꞌo ɛ̨na jasɛ yʉ́n ꞌyomfɛ̨ni, nɛꞌʉ ɛ̨mmɛ bin xäsɛ yʉ́m hmansɛ yʉ jąꞌi, nɛꞌʉ ɛ̨na pądi da dąh yʉm hma. Nguetho hingui sä da yąn a nꞌda ʉ nangue yʉ́m hman ʉ. 21 Nɛ bi bɛ̨nsɛ Oją, bi zän bʉya ngue hin dí bą Oją nꞌda ʉ yʉ́n ꞌyomfɛ̨nisɛ. Pɛ bi zänni da yąn ʉ to da hyąnꞌa rám hma nangue ra Cristo bi du, madagueꞌbʉ tꞌɛ̨mbi nte ní mbatho. 22 Nguetho nu ma mijudíohe im bɛ̨ni gueꞌʉ yʉn tꞌøtꞌe mixte da nu ꞌbʉ gueꞌa nꞌda ram hma ngue majuąni. Nɛ nuꞌʉ ꞌda ni mɛnguhʉ ngue hing yʉ judío ahʉ nząi i honsɛ nꞌda ram hma ngue i ɛ̨mb zɛhɛ majuąni. 23 Pɛ nuꞌa ram hma dím mamhbʉ ngue bi du bʉ ja ra pontꞌi ra Cristo, njonguin numanhosɛ a. Nɛꞌʉ yʉ judío i san tho ꞌbʉ i sifi, nɛꞌʉ hing yʉ judío i ɛ̨mbi nte ní mbatho ꞌbʉ i sifi. 24 Pɛ nujʉ ngue bi zoncahʉ Oją, madagueꞌbʉ dyʉ judíohʉ ogue hin dyʉ judíohʉ, pɛ nꞌdatꞌa dí pąhmbʉ i ja rá tsꞌɛdi Oją di hoga ma tsꞌoquihʉ nangueꞌa ra Cristo bi du. Janangueꞌa bi nɛqui ɛ̨mmɛ xʉn ndoho rán ꞌyomfɛ̨ni Oją. 25 Nɛ nuna ra ꞌyu bi zän Oją, pɛ manꞌda di muui na, madagueꞌbʉ tꞌɛ̨mbi hin te ní mbatho, xinda gueꞌʉ yʉ́ ꞌyusɛ bi zän zɛhɛ yʉ jąꞌi. Ngue gueꞌa í tꞌɛ̨mbi hinꞌyʉ rá tsꞌɛdi Oją a, ngue bi du ra Cristo, pɛ manꞌda xʉn ngu bʉ ní nɛqui a, xinda gueꞌʉ gätho yʉ́n tꞌøtꞌe zɛhɛ yʉ jąꞌi. 26 Ma zi cu ahʉ ngue bi zoncahʉ Oją, gam bɛ̨mhbʉ hague dín jahʉ bʉ na nujʉ ra ximhäi, ngue xʉn ngujʉ dyʉ́ ꞌyąmbʉihʉ, nɛ xʉn ngujʉ hinꞌyʉ ma tsꞌɛdihʉ, nɛ xʉn ngujʉ ngue bin hyoya ma tahʉ. 27 Pɛ bi huan Oją ʉ i tꞌɛ̨mbi yʉ ꞌyąmbʉi, nꞌdamhma da mbɛꞌtsꞌ yʉ́ sä ʉ i jasɛ yʉ́n ꞌyomfɛ̨ni. Pɛ gueꞌa í huan Oją ʉ hinꞌyʉ yʉ́ tsꞌɛdi bʉ na nu ra ximhäi, janangueꞌa da mbɛꞌtsꞌ yʉ́ sä ʉ i jasɛ yʉ́ tsꞌɛdi. 28 Nɛ bi huan Oją ʉ nte di muui bʉ na nu ra ximhäi, nɛꞌʉ toꞌo i pa ntsꞌani, pɛ manꞌda in numanho Oją ʉ, nɛ gueꞌa dí ꞌbɛrpa yʉ́ tsꞌɛdi ʉ toꞌo ɛ̨na i ja sɛ yʉ́n tꞌɛ̨di. 29 Janangueꞌa njon di jap Oją din ꞌyɛ̨zɛhɛ. 30 Nɛ bi jajʉ Oją ꞌdarpʉ dám ꞌbʉhmbʉ ra Cristo Jesús, nɛ gueꞌa ní ꞌdajʉ ran ꞌyomfɛ̨ni Oją a, nɛ nangueꞌa ra Cristo ní zimanhojʉ Oją, nɛ gueꞌa í ꞌyørcahʉ Oją ngue yʉ́ tꞌʉhni gahʉ a, nɛ gueꞌa ní yąnjʉ bʉ ja ran tsꞌo. 31 Nguetho i mam bʉ ja rá tꞌohni Oją, hinꞌyʉ ꞌbɛꞌa manꞌda ran ho da zä da manꞌa nꞌda, hinda høntꞌa ran ho bi ꞌyørpa Oją.