ROMANOS
Ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra ngʉrpa dąhnini Roma
Ran zɛngua
1
Nugä drá Pablogä, drá ꞌyɛ̨hɛgä ra Jesucristo. Nɛ bi xic Oją ma ꞌbäigäꞌbe ra Cristo, nɛ bi huangui gam mangä rán ho maꞌdaꞌyo Oją. 2 Nɛ guetꞌa ram hma mi man Oją bʉ ja rá hoga tꞌohni bi ꞌyoꞌtꞌʉ yʉ́ pøngahyą mayaꞌbʉ. 3 Nɛ nꞌdatꞌa ram hma im ma nangue ra Jesucristo rá Tsꞌʉntꞌʉ Oją a, nɛ nangueꞌa bim ꞌbʉcua ja ra ximhäi, rám bomꞌbɛto ra David a. 4 Pɛ nuꞌbʉ mi dąmbɛ̨ni bʉ ꞌbʉ ʉ xʉn du, ja bi ꞌyu Oją xʉn ho gue rá Tsꞌʉntꞌʉ Oją a bʉya nte hɛ̨mbi nangue rá Hogandąhi in ꞌyoui. Gueꞌa ma Hmuhʉ a. 5 Nɛ rá mate zɛhɛ bi xiqui ma ꞌbäigäꞌbe ra Cristo, ga japi daꞌyɛ̨cꞌ yɛi yʉ jąꞌi gätho yʉ hnini, nɛ gueꞌa dí hnumanho ra Cristo a bʉya. 6 Janangueꞌa in ndec Oją ga mba ga fäxꞌa ni tꞌɛ̨cꞌyɛihʉ, nguetho bi zonꞌnahʉ Oją bi jaꞌahʉ yʉ́ mbɛti ahʉ ra Jesucristo. 7 Guehna dí otꞌahʉ na ya gätho ahʉ guí ꞌbʉhmbʉ bʉ ja ra dąhnini Roma, ngue bi huɛ̨cꞌahʉ Oją nɛ bi zonꞌnahʉ, nɛ bi ꞌuecꞌa ni mbʉihʉ in nde ahʉ høntꞌa guim bɛ̨mhbʉ a. Dí äp Oją ma Tahʉ nɛ ra Jesucristo ma Hmuhʉ da hyutꞌa ni mbʉihʉ nangue rá mate zɛhɛ.Ɛ̨mmɛ in nde da zøm bʉ Roma a ra Pablo
8 Mꞌbɛtꞌo thoho dí xi ahʉ ɛ̨mmɛ dadí johyagä, nguetho dí øꞌa man yʉ jąꞌi hønbʉ go hapʉ dí ꞌyo ngue guí ɛ̨cꞌyɛihʉ xʉn ho. Janangueꞌa dí xi Oją jamadi nangue gätho ahʉ. Nɛ di thocpa ra jamadi ma Ojąhʉ ra Jesucristo. 9 Nɛ i pą Oją hin dí ɛꞌtsꞌa ná yąꞌbe nangue ahʉ. Nɛ dí hąh ma mbʉi dí ørpa rá ꞌbɛfi ꞌbʉ dím man a ran ho maꞌdaꞌyo nangue rá Tsꞌʉntꞌʉ. 10 Nɛ dí äp rá mate Oją ngue hin da yaꞌa ga mbagä bʉ guí ꞌbʉhmbʉ. Nɛ hin dí pądi ꞌbɛꞌa da zä dá søm bʉ, pɛ go pą Oją, nɛ xømhma thoho da nde Oją ga mba bʉ. 11 Nguetho ɛ̨mmɛ dín nde gan nu ahʉ, ga fäx ahʉ din ja ahʉ manꞌda xʉn ngu rá tsꞌɛdi Oją, nɛ manꞌda gam ꞌbähmbʉ xʉn ho bʉya. 12 Nɛcä da zä gui fäxcahʉ, janangueꞌa da zä ꞌda xtám fäxtahʉ nangue ma tꞌɛ̨cꞌyɛihʉ dí comhbʉ. 13 Ma zi cu ahʉ dín nde gui pąhmbʉ ngue xʉn ngu yʉ nidį mí ɛ̨na xcá mba bʉ, pɛ hinga na sä. Pɛ guehma dín nde ga mbagä bʉ nɛ da hnurca ma ꞌbɛfi bʉ guí ꞌbʉhmbʉ, tengu bʉ miꞌda yʉ hnini xtá mba. 14 Nguetho i ꞌyo ma güɛnda ga xänba yʉ jąꞌi, nɛ ʉ ꞌbʉpʉ ja yʉ hnini nɛ ʉ yʉm ꞌbʉndąpo jąꞌi, nɛꞌʉ pąh ra søcuą nɛ ʉ hingui pądi, gätho ga xänbi. 15 Janangueꞌa nɛ ahʉ ɛ̨mmɛ jag ra pähä ga xänꞌnahʉ rán ho maꞌdaꞌyo ra Cristo, gätho ahʉ guí ꞌbʉhmbʉ bʉ ja ra dąhnini Roma.
Nu ran ho maꞌdaꞌyo ní yąn ʉ toꞌo gätho da hyąn a
16 Nɛ hin dí pɛsꞌ ma sä gam mangä ran ho maꞌdaꞌyo, nguetho gueꞌa ram hma rá tsꞌɛdi Oją a dí yąn ʉ toꞌo gätho da hyąn a. Nɛ mbʉdi bi sije dyʉ israelgähe, nɛ xø bi si ʉ miꞌda bʉya. 17 Nguetho nu ran ho maꞌdaꞌyo i xijʉ ꞌbɛꞌa ní hogahʉ, gue ga hąnthohʉ rá mate, nɛ hinꞌyʉ ꞌbɛꞌa manꞌda dí zinjʉ Oją a. Tengu mán tꞌoꞌtꞌi: “Toꞌo bi ꞌyɛ̨cꞌyɛi rá mate Oją, bi hocpa yʉ́ tsꞌoqui, bin tꞌun ra ꞌdaꞌyote bʉya.”
Gätho yʉ jąꞌi in dupate yʉ tsꞌoqui
18 Nguetho nuꞌbʉ hin da yąn Oją yʉ jąꞌi i jatho di ʉnbi, nangueꞌa ꞌdanꞌyo thoho i thąnde, nɛ i øtꞌe ꞌbɛꞌa gä má tsꞌoqui. Nɛ nuꞌa majuąni nde di bɛ̨nba Oją ʉ, pɛ di hɛcpada ʉ, nguetho manꞌda in numanhosɛ yʉ́ tsꞌoqui. 19 Pɛ i pąhma ꞌbɛꞌa sä da fądi nangue Oją, nguetho guesɛ Oją di bɛ̨nbi. 20 Nɛ madagueꞌbʉ hin di nɛqui Oją, pɛ da zä da bąh yʉ jąꞌi gue maguesɛ Oją nɛ i ja rá tsꞌɛdi maząi a, nguetho in nu ꞌbɛꞌa gätho bi ꞌyøtꞌua ja ra häi. Nɛ gueꞌbʉ go rá mbʉdi ra ximhäi mi sä xtá fądi xʉn ho. Nɛ mi sä xtám bąh yʉ jąꞌi xtá numansu Oją. Janangueꞌa njon da zä da xi Oją nte in dupate. 21 Nɛ mi sähma xtám bą Oją, pɛ him mi nde xtá numansu a nɛ him bi xifi jamadi ꞌbɛꞌa gätho bin tꞌunꞌdʉ. Pɛ bi dʉꞌmi bi bɛ̨n a nꞌda ran ꞌyomfɛ̨ni nte ní mba tho. Janangueꞌa bi ꞌbɛh ra hoganꞌyomfɛ̨ni. Nɛ njąmꞌbʉ bi zä da bɛ̨ni ꞌbɛꞌa xʉn ho da ꞌyør pʉya. 22 Sä ɛ̨na pąsɛ ʉ, nɛ guepʉ í ꞌbɛpʉ ra hogan ꞌyomfɛ̨ni bʉya. 23 Nu Oją tąte xʉn ho a, gue i ꞌbʉi maząi. Pɛ nuꞌʉ bi ꞌyøzɛhɛ yʉ jąꞌi bi bøni tengu yʉ́ pøte yʉ jąꞌi dim ꞌbɛdi, nɛ yʉ doja nɛ yʉ zate nɛ yʉ pozʉ, manꞌda bi ꞌyɛ̨mbi oją ʉ. 24 Janangueꞌa bi hyɛ Oją ʉ. Nɛ manꞌda bi ꞌyøzɛhɛ ꞌbɛꞌa gätho bi numanhosɛ bʉya gue ran ꞌyomtꞌɛ̨ni. Nɛ bi tsꞌonsɛ yʉ́ jąꞌi nꞌda ngu nꞌda ʉ. 25 Bi hyɛ a majuąni Oją nɛ go bi ꞌyɛ̨cꞌyɛi ʉ him majuąni Oją. Bi dąnde gätho bi ꞌyøtꞌ Oją ua ja ra ximhäi xinda gueꞌa Oją gue bi ꞌyøtꞌʉ. Pɛ høntꞌa Oją mixte xʉn ho a gätho yʉ pa maząi. Janangueꞌa høntꞌa ga ɛ̨spahʉ a. 26 Nɛ gueꞌa í hyɛ Oją ʉ. Nɛ nubʉya bi zä bi ꞌyøtꞌ ran tsꞌo, gueꞌbʉ go mí ꞌyøtꞌ manꞌda xʉn tsꞌo, nɛ yʉ xisu bi pä a bi zänba Oją xtá ꞌyøtꞌe, gue bi ꞌyąsäba yʉ́ mixisuhʉ tenguꞌbʉ ran ꞌyohʉ zɛhɛ. 27 Nɛ yʉn ꞌyohʉ bi hyɛh yʉ́n tꞌɛ̨di mi sän Oją xtín thątꞌʉ yʉ xisu ngue xtí manda, nguetho ɛ̨mmɛ in nde di ꞌyąsäba yʉ́ minꞌyohʉhʉ, nuꞌa him mi sä xtá ꞌyøtꞌe. Pɛ bi hyonsɛ ran ʉnbi gue yʉ́ jąꞌi zɛhɛ ʉ ꞌbʉ mí ꞌuegue. 28 Nɛ nuꞌbʉ him mi numanho a ran ꞌyomfɛ̨ni majuąni nangue Oją, ngutho bi hyɛ Oją ʉ, nɛ manꞌda bi bɛ̨n ʉ yʉ́ tsꞌon ꞌyomfɛ̨ni nɛ bi ꞌyøtꞌ yʉn tsꞌo him mi sä xtá ꞌyøtꞌe. 29 Nɛ ɛ̨mmɛ di yusꞌ yʉ́ mbʉi gätho yʉ tsꞌoqui, ran ꞌyomtꞌɛ̨ni, ra tsꞌomꞌbäi, ran tsꞌiyate, ra nɛxmate, ran tsꞌɛya, ran thote, ran sʉi, ran thäte, ran ʉcpate, ran cꞌąte. 30 Nɛ yʉ zänfɛhni ʉ, nɛ i san Oją, nɛ hingui su nꞌda ra jąꞌi, nɛ din ꞌyɛ̨xꞌʉ, nɛ ma maguesɛ ʉ, thocpa thoho i honsɛ miꞌda yʉ tsꞌoqui hingui pądi da ꞌyøtꞌe, nɛ i fɛstaꞌa ꞌbɛꞌa man yʉ́ ta nɛ yʉ́ mbe. 31 Nɛ hingui nde din ꞌyomfɛ̨ni ʉ, nɛ hin di jąꞌtsꞌa man ʉ, nɛ hinꞌyʉ yʉ́n huɛ̨cate, nɛ hinꞌyʉ yʉ́ yembʉi. 32 I pąhma di ʉnba Oją ʉ gätho yʉ pa maząi, gueꞌa yʉ́n sähʉ a nguetho i øtꞌ ya i hmangua. Pɛ manꞌda guextaꞌa i øtꞌe nɛ manꞌda di johya ꞌbʉ xʉn ngu ʉ ꞌdaꞌangu øthʉ ʉ.