Bi zøm bʉ ra häi Malta a ra Pablo
28
Nɛ nuꞌbʉ má søhmbe bʉ ja ra häi, bi sije ngue rá thuhu ra tꞌʉhäi Malta, i ja bʉ made ra dehe. 2 Nu yʉ mɛngu bʉ ɛ̨mmɛ bi ꞌyørcahe ran ho, nguetho bi ꞌyurcahe nꞌda ra sibi nguepʉ dán tąspihe. Bin ꞌye bʉ nɛ xʉ sɛje. 3 Nu ra Pablo bi pɛt yʉ ꞌyontꞌo, bi ꞌyʉspʉ ja ra sibi, ꞌbex bi bønꞌa nꞌda ran dąte pozʉ bʉ ja ra tꞌo, nuꞌbʉ mi zä ra sibi. Nɛ nuna ra pozʉ bi zap rá ꞌyɛ ra Pablo, nɛ bin zʉrpʉ. 4 Nuꞌbʉ mi nu yʉ mɛngu bʉ ngue i zʉrpʉ ja rá ꞌyɛ ra Pablo ra pozʉ, bi ꞌyɛ̨nꞌʉ:―Masque ra hyodu na ran ꞌyohʉ, masque him bi du bʉ ja ra dehe, pɛ nuya mꞌbɛjua da gutꞌa ꞌbɛꞌa xí ꞌyøtꞌe.
5 Pɛ nu ra Pablo bi huąc rá ꞌyɛ, nɛ bi däh ra pozʉ, nín so bʉ ja ra sibi, nɛ nte mán ʉnbi bi nu ra Pablo. 6 Nɛ nuꞌʉ ꞌbäpʉ, mi tøꞌmi nde da nu ꞌbʉ da nden bʉ bi zapi, o gue da ꞌyagui nɛ ꞌbex da du. Nɛ nuꞌbʉ ná nyaꞌa mi tøꞌmi, hin te bi ja, bi päꞌa mim bɛ̨nꞌʉ. Nɛ ɛ̨nꞌʉ: “Masque nꞌda ra oją na.”
7 Nuꞌa rá tsꞌʉtꞌabi ra tꞌʉhäi Malta, í Publio a, mí jasɛ nꞌda xɛqui rá häi jombʉ dán tąspihe. Nɛ bi xije ga mbähmbe bʉ rá ngu. Nɛ hyu pa dám ꞌbʉhmbe bʉ, nɛ ɛ̨mmɛ xʉn ho bi ꞌyørcähe. 8 Nu rá ta a ra tsꞌʉtꞌabi Publio ya xmí ʉ ꞌbʉ má sømhbe bʉ, mi ja ra pa nɛ ra mbøni. Nu ra Pablo bi mba bʉ da nu, bin yąui Oją nɛ bi gäx rá ꞌyɛ, nɛ ꞌbex bi zä bʉya. 9 Nɛ nuꞌbʉ min ja ꞌbɛꞌa bi ꞌyøtꞌa ra Pablo, gätho mi ꞌbʉpʉ ja ra häi ngue mín zämanꞌʉ bi zøm bʉ, nɛ gätho bi hoqui, bi zä bʉya. 10 Nɛ xʉn ngu yʉn tꞌunni bi ꞌdaje, nɛ nuꞌbʉ má mbäcähe, xø bi ꞌdaje gätho ꞌbɛꞌa ga homhbe bʉ ja ra barco.
Bi zøm bʉ Roma ra Pablo
11 Nhyuzna dám ꞌbʉhmbe bʉ ja ra tꞌʉhäi Malta, dá huhe nꞌda ra barco bʉya. Nu ra barco mi hø bʉ gätho yʉ pa xʉ sɛ, ngue bá nɛxpʉ Alejandría. Nu rá thuhu ra barco tꞌɛ̨mbi yʉ gonꞌyohʉ Cástor nɛ Pólux. 12 Nɛ dá huhe ra barco, dá nɛxhe bʉ ra tꞌʉhäi Malta bʉya, nɛ dá sømhbe bʉ nꞌda ra hnini Siracusa, ngue ꞌdanꞌyo ra häi, nɛ hyupa dán dehe bʉ. 13 Dá nɛxhe bʉ, nɛ dá cäthe bʉ ja ndendeją asta gueꞌbʉ go má sømhbe bʉ ra hnini Regio. Nɛ manꞌda pa bʉya bin ꞌyo xʉn ho ran dąhi, nɛ ná yopa dá sømhbe bʉ ra hnini Puteoli, gue ra häi Italia, nɛ dá cącähe bʉya. 14 Nubʉ, dá tįmhbe ꞌdaꞌʉ yʉ cu nangue ra Cristo. Nuꞌʉ bi xije dan säyahe bʉ nyoto pa. Mꞌbɛjua bʉya dá hąxhe ra ꞌyu í pa bʉ ra dąhnini Roma. 15 Nɛ nuꞌʉ yʉ cu nangue ra Cristo mi ꞌbʉpʉ Roma, mi øde ba ɛ̨hmbe bʉ ꞌyu. Bá ɛ̨h pʉya, bi dąje bʉ ja ra hnini Foro de Apio, nɛ bi dąje miꞌda bʉ ra hnini Tres Tabernas. Nɛ nu ra Pablo ꞌbʉ mí nu, bi xi Oją jamadi, nɛ nu Oją bi hyurpa rá mbʉi bʉya. 16 Nɛ nuꞌbʉ má sømhbe bʉ ja ra dąhnini Roma, nu ra hmudofʉi bi dä bʉ yʉ ofädi bʉ ꞌbʉh rá hmu yʉ mbädi. Pɛ nuꞌa ra Pablo bin tꞌun ran tꞌɛ̨di dim ꞌbʉsɛ bʉ ja nꞌda ra ngu, nɛ høntꞌa nꞌda ra dofʉi da mbädi.
Bi man rám Hman Oją ra Pablo bʉ Roma
17 Nɛ nuꞌbʉ mi thoꞌan hyupa, nu ra Pablo bi zonꞌdʉ yʉ́ ngʉrpi yʉ judío ngue mí ꞌbʉpʉ. Nɛ nuꞌbʉ mim pɛti bʉ ꞌbʉꞌa ra Pablo, bi ꞌyɛ̨mbi:
―Man ꞌyohʉ ahʉ, nte man tsꞌo dá ørpä ʉ ma mijudíohʉ, xín dá fɛsta yʉ́n thąnde bi thocta ʉ ma ngʉrpa bombøtahʉ, pɛ guehma bi mba ma dägä bʉ ꞌbʉh yʉ romano bʉ Jerusalén. 18 Nɛ nuꞌbʉ mi ꞌyørcä ran juąnbi, nuꞌʉ mi nde xtá hyɛga thoho, nguetho nte dá øtꞌä ngue da thogui. 19 Pɛ nu ma mijudíohʉ him mi nde xtá hyɛga thoho, janangueꞌa dá äh ran tꞌɛ̨di di dägä ua Roma. Pɛ hinꞌyʉ ꞌbɛꞌa dím bɛ̨ni dá yąpä ʉ ma mijudíohʉ. 20 Janangueꞌa dá zohnꞌnahʉ dan nuhʉ nɛ dan yąhʉ. Nujʉ dyʉ israelhʉ, dí tømhbʉ din ja ꞌbɛꞌa bi man Oją gue din ja. Pɛ dí ɛ̨cꞌyɛi ngue ya bi dʉꞌmi bin ja ꞌbɛꞌa bi man Oją, jananjabʉ nthuꞌtꞌigä ra tꞌɛgui ja ua, bi ꞌyɛ̨nꞌa ra Pablo.
21 Nuꞌʉ bi xiꞌa ra Pablo:
―Nugähe nte má søcuą bi ꞌbɛngähe ní ꞌyɛ̨pʉ Judea nangueꞌe. Xínga nꞌda man ꞌyohʉhʉ bí nɛxpʉ, bi man ran tsꞌo nangueꞌe, njoꞌo toꞌo bi yąpꞌaꞌi. 22 Pɛ dín nde gui xije tsꞌʉ ꞌbɛꞌa guím bɛ̨ni, nguetho hønbʉ bi zä i hma hingui ho ꞌbɛꞌa guí ɛ̨cꞌyɛihʉ, bi ꞌyɛ̨nꞌʉ.
23 Nɛ nuꞌʉ bim pɛti manꞌda ra pa nangueꞌa xí ma, nɛ xʉn ngu ʉ bi zøm bʉ mi ꞌbʉꞌa ra Pablo. Nu ra Pablo bʉya gätho ra pa bi xifi nangue rá ꞌbɛfi i øtꞌ Oją ua ja ra ximhäi, nɛ ꞌbɛpʉ ní manda Oją ʉ yʉ jąꞌi. Bi hyoni ꞌbɛpʉ dí ꞌyɛ̨cꞌyɛi ra Jesús, nɛ bi ꞌyuti hapʉ ntꞌoꞌtꞌi nangue ra Jesús bʉ ja rá søcuą ra Moisés, nɛ yʉ́ søcuą yʉ pøngahyą. 24 Nuꞌʉ ꞌda bi ꞌyɛ̨cꞌyɛi ꞌbʉ mí man ra Pablo, pɛ ꞌdaꞌʉ him bi ꞌyɛ̨cꞌyɛi. 25 Nɛ nuꞌbʉ him mí säꞌʉ ngue ꞌdaꞌangu da bɛ̨ni, bi mbʉdi bi mba. Pɛ nu ra Pablo manꞌda ram hma bi xiꞌʉ:
―Nuna rá Hogandąhi Oją majuąni bi ma nuꞌbʉ mim pøngahyą ra Isaías, nɛ bi xiꞌʉ ma ngʉrpa bombøtahʉ. 26 Nɛ bi tꞌɛ̨mpꞌʉ:
Ní mba bʉ ꞌbʉh ni mijudíohʉ, nɛ gui ꞌyɛ̨mbi:
“Nu ahʉ ząi guí øhmbʉ nangue ni zaguhʉ, pɛ hin guí pąhmbʉ ꞌbɛꞌa guí øhmbʉ.
Nɛ guín nuhʉ nangue ni dähʉ, pɛ hin guí pąhmbʉ ꞌbɛꞌa guín nuhʉ,”
ngubʉ bi ꞌyɛ̨mb yʉ jąꞌi.
27 Nguetho nu yʉ jąꞌi xʉm mɛ yʉ́ mbʉi,
nɛ xíngui tsꞌʉ cʉꞌtꞌ yʉ́ zagu ꞌbɛꞌa øde.
Nɛ tenguꞌbʉ di tsꞌąntꞌ yʉ́ dä,
nguetho su da nu,
su da ꞌyøde,
nguetho hingui nde di päh yʉ́ mbʉi
guepʉ da zä xcá hocpa yʉ́ mbʉi,
ɛ̨nꞌa rá Hogandąhi Oją ꞌbʉ mím pøngahyą ra Isaías, bi ꞌyɛ̨nꞌa ra Pablo.
28 Nɛ bi thoqui bi ꞌyɛ̨mbi:
―Dami pąhmbʉ ngue nuya da siꞌʉ hing yʉ judío ꞌbɛpʉ da zä dí zin Oją ʉ, nɛ gätho yʉ pa dí mba bʉ. Nɛ nuꞌʉ, manꞌda da ꞌyøꞌʉ, bi tꞌɛ̨mpꞌʉ yʉ judío.
29 Nɛ nuꞌbʉ mí guaꞌa bi ma ra Pablo, nu yʉ judío bi mba, nɛ bin junzɛhɛ ʉ ꞌbʉ mí mbaꞌʉ, nangue ꞌbɛꞌa bi manꞌa ra Pablo.