Xuua
Ran ho maꞌdaꞌyo bi ꞌyoꞌtꞌa ra Xuua rá xädi ra Jesús, nɛ xin rá ꞌbäiui a
Nuꞌa ra Cristo tꞌɛ̨mbi ram Hma
1
Nuꞌa ra Cristo tenguꞌbʉ ram hma nguetho di jajʉ ga pąhmbʉ Oją a. Nɛ ya xmí ꞌbʉ ꞌbʉ hin te mí ja ra ximhäi, nɛ i ꞌbʉhmi Oją a, nɛ nuꞌa Oją a. 2 Nɛ gueꞌa mí ꞌbʉhmi Oją ꞌbʉ rá mbʉdi thoho. 3 Gätho bi ꞌyøtꞌe ꞌbɛꞌa i ja. Nuꞌbʉ hin xtá ꞌyøtꞌa, hin te di ja ꞌbʉ. 4 I jasɛ rá te, nɛ gueꞌa ní ja yʉ́ te ʉ yʉ jąꞌi, ngue di ꞌyomfɛ̨nip yʉ́ mbʉi ʉ. 5 Janangueꞌa nuꞌa tengu ran nɛqui di yorpʉ ja ra ꞌbɛxui. Pɛ nuꞌa ra ꞌbɛxui hin da zä di huɛ̨ꞌtꞌa ran nɛqui.6 Nu Oją bi huahna nꞌda ran ꞌyohʉ gueꞌa ra Xuua Nxixyą a. 7 Nuꞌa ra Xuua Nxixyą bi thahni da ma nangueꞌa ran nɛqui majuąni, ndepe gätho da ꞌyɛ̨cꞌyɛi ran nɛqui yʉ jąꞌi, nangueꞌa bi manꞌa ra Xuua. 8 Pɛ nuꞌa ra Xuua Nxixyą hinga gueꞌa ran nɛqui a, pɛ bi ma nangueꞌa ran nɛqui. 9 Nuꞌa ran nɛqui majuąni, bá ɛ̨cua ja ra ximhäi, ndepe gätho din ja ran nɛqui yʉ́ mbʉi yʉ jąꞌi.
10 Nuꞌa ran nɛqui majuąni bi ꞌyøtꞌ ra ximhäi, nɛ bim ꞌbʉcua, pɛ nu yʉ jąꞌi ua ja ra ximhäi him bi bądi gue gueꞌa. 11 Í zøcua dí ꞌbʉhmbe ngue ma mɛngugähe a. Pɛ xʉn ngu ʉ him bi ꞌyømanho a. 12 Pɛ gätho toꞌo bi zim bʉ mbo yʉ́ mbʉi a ra Cristo, nɛ bi ꞌyɛ̨cꞌyɛi gue yʉ́ yąnte a, gueꞌa í zä bi xąnd mahønꞌa Oją ʉ ngue bi ꞌyøtꞌe yʉ́ tꞌʉhni zɛhɛ ʉ. 13 Pɛ nuꞌbʉ bi xąnd mahønꞌa Oją nꞌda, hinguin ja tenguꞌbʉ xʉm ꞌbʉ a nꞌda ra ꞌuɛre, ngue bi ndesɛ yʉ jąꞌi nɛ nangue yʉ́ jąꞌi zɛhɛ, pɛ bim ꞌbʉi mahønꞌa nangue Oją.
14 Nɛ nuꞌa tenguꞌbʉ ram hma bin jąꞌi a, nɛ mí ꞌbʉhmbe a. Nɛ dá nuhe rá nuįxte nguetho rá ꞌdatsꞌʉntꞌʉ Oją a, hin hapʉ i sɛ a rá mate, nɛ gätho majuąni bi ma. 15 Nuꞌa ra Xuua Nxixyą bim pøngahyą nangueꞌa. Nɛ tsꞌɛdi bi ma bi ꞌyɛ̨na:
―Nuna guehna dá mangä ꞌbʉ má xi ahʉ, mꞌbɛjua ba ɛ̨hɛ, pɛ manꞌda nuįxte xinda guecä, nguetho ya xmí ꞌbʉ ꞌbʉ rá mbʉdi thoho, nɛ hinꞌna gä, mí ɛ̨ngä, bi ꞌyɛ̨nꞌa ra Xuua Nxixyą.
16 Nɛ gätho gahʉ dyʉ ꞌyɛ̨cꞌyɛihʉ, dá hąmhbʉ rá mate xʉn ndoho, nɛ thocua thoho di ꞌdajʉ manꞌda rá mate. 17 Nu ra Moisés bi xängahʉ yʉ́n tꞌɛ̨di Oją. Pɛ nu ra Jesucristo bi ꞌdajʉ rá mate ngue majuąni dí zingdahʉ Oją a. 18 Njoꞌo nꞌda ra jąꞌi da zä da nu Oją ngue xtám bąsɛ, hinda høntꞌa rá ꞌdatsꞌʉntꞌʉ dim pąsɛui a rá Ta, nɛ gueꞌa bi jajʉ dá pąhmbʉ a.
Ra Xuua Nxixyą bi ma toꞌo a
19 Nuꞌʉ ma ngʉrpihe dyʉ judíohe dyʉ israelhe ngue mí ꞌbʉpʉ ja ra dąhnini Jerusalén, bi mba ʉ ꞌda yʉ mbäją nɛꞌʉ ꞌda yʉ́m fätsꞌihʉ, bi zøm bʉ ꞌbʉh ra Xuua Nxixyą da ꞌyänni toꞌo a. 20 Nɛ nuꞌa bin juąnni, him bin cøni, nɛ bi ꞌyɛ̨na:
―Hinga guecä dra Cristo gue xʉ huand Oją, bi ꞌyɛ̨nꞌa.
21 Nɛ bi tꞌänni mahønꞌa:
―Toꞌo e, ha gueꞌe gra Elías.
―Hinꞌna, hinga guecä, bi ꞌyɛ̨nꞌa.
―Ha gueꞌe gra pøngahyą bi man ra Moisés gue ba ɛ̨hɛ.
Nɛ bi dąti:
―Hinꞌna, bi ꞌyɛ̨ntho.
22 Nɛ bi tꞌänni mahønꞌa:
―Toꞌo e. Xije. Nuꞌbʉ gui xije nɛ da zä ga xihmbe ʉ bá pɛngähe bʉya.
23 Nɛ bi dąꞌa ra Xuua Nxixyą bʉya:
―Nugä guecä bi man ra pøngahyą Isaías ꞌbʉ mi ma: “Dim ꞌbʉ a nꞌda dim ꞌbäpʉ maꞌueni ra hnini, nɛ tsꞌɛdi da ma di hoc yʉ́ mbʉi yʉ jąꞌi gue da ꞌyømanho ra Hmu ꞌbʉ bi zøhø,” bi ꞌyɛ̨nꞌa ra Isaías, bi ꞌyɛ̨nꞌa ra Xuua Nxixyą.
―Hanja gní ꞌyøtꞌ ran xixyą ꞌbʉ hinga gueꞌe grá Cristo, xínga gueꞌe grá Elías, xínga gueꞌe manꞌda ra pøngahyą bi man ra Moisés.
26 Nuꞌa ra Xuua bʉya bi dątꞌʉ, bi ꞌyɛ̨na:
―Nugä, ra dehe thoho ná xixyąba yʉ jąꞌi, pɛgue i ꞌbä inde nꞌda ran ꞌyohʉ ua dí ꞌbähmbʉ, ngue hin guí pąhmbʉ ꞌbɛꞌa di ꞌyɛ̨tꞌui a. 27 Nuna guehna dá mangä ngue mꞌbɛjua di dʉmpꞌ rá ꞌbɛfi, pɛ manꞌda nuįxte xinda guecä, janangueꞌa hin dí sʉcä tengu a, bi ꞌyɛ̨nꞌa ra Xuua Nxixyą.
28 Nɛ guehya gätho yʉn tꞌänni bi hmam bʉ ja ra xɛqui Betábara, nꞌdanguadi ra dąthe Jordán, guepʉ bi ꞌyøtꞌ ran xixyą ra Xuua.
Tengu ra tꞌʉdɛꞌyo ra Cristo
29 Nuꞌbʉ mi hyatsꞌi, nu ra Xuua Nxixyą bi nu ba ɛ̨pʉ ra Jesús, nɛ bi ꞌyɛ̨mpꞌʉ mí ꞌbähmbʉ bʉ:
―Dami hyanthʉ ya, tenguꞌbʉ ra tꞌʉdɛꞌyo, nguetho bi zänba Oją dim ꞌbøtsꞌe zɛhɛ, gue di hocpa yʉ́ tsꞌoqui yʉ jąꞌi ꞌbʉcua ja ra ximhäi. 30 Nunʉ guehnʉ mím mangä nʉ ꞌbʉ má ɛ̨ngä: “Ba ɛ̨ a nꞌda ran ꞌyohʉ mꞌbɛjua, nuꞌa manꞌda nuįxte xinda guecä, nguetho ya xmi ꞌbʉ ꞌbʉ rá mbʉdi thoho, nɛ hinꞌnagä.” 31 Nɛ nugä him mí pącä toꞌo a tꞌɛ̨mbi ra Cristo. Pɛ bi siqui ga xixyą ahʉ nangue ra dehe, ngue gui pąhmbʉ toꞌo a ni yąntehʉ, ma mi israel ahʉ, bi ꞌyɛ̨na.
32 Nɛ bi ma majuąni ra Xuua Nxixyą, bi ꞌyɛ̨na:
―Dá nugä rá Hogandąhi Oją bá cąh mahɛ̨tsꞌi, tengu nꞌda ra tꞌazʉ, nɛ bi gohmi ra Jesús ꞌbʉ má ørpa ran xixyą. 33 Ja dá pącä bʉya ngue gueꞌa. Nguetho nu Oją ngue bi xiqui ga øtꞌ ran xixyą nangue ra dehe, nɛ bi xiqui: “Nuꞌbʉ guin nu ma Hogandąhi da gąi nɛ da gohmi nꞌda ran ꞌyohʉ, gui pądi ngue gueꞌa di un ma Hogandąhi yʉ jąꞌi,” bi ꞌyɛ̨ngui. 34 Nɛ gueꞌa dá nugä a bʉya, janangue dím mangä: “Guehna rá Tsꞌʉntꞌʉ Oją na,” dí ɛ̨ngä, bi ꞌyɛ̨nꞌa ra Xuua Nxixyą.
Yʉ́ mbʉdi yʉ́ xädi ra Jesús
35 Xø manꞌdapa bʉya mí yoꞌbe mi ꞌbähmbe ra Xuua Nxixyą yʉ́ xädigäꞌbe a. 36 Nu ra Xuua Nxixyą bʉya bi hyandi ngue ꞌyo bʉ ra Jesús, nɛ bi ꞌyɛ̨ncꞌbe:
―Dami nuui ya ra tꞌʉdɛꞌyo ngueꞌa rám ꞌbɛhni Oją, bi ꞌyɛ̨na.
37 Nuꞌbʉ má øꞌbe a bi ma, dá tɛnꞌbe ra Jesús. 38 Nɛ nuꞌa ra Jesús bin yɛ̨ ꞌbʉ má tɛnꞌbe nɛ bi ꞌyängaꞌbe:
―ꞌBɛꞌa guí hommi, bi ꞌyɛ̨ncꞌbe.
Nɛ dá änꞌbe a:
―Rabí, nde da ma, xänbate i, hapʉ guí ꞌbʉi.
39 Nɛ bi xicꞌbe ra Jesús:
―Ga mbähä gua nuui bʉ dí ꞌbʉcä.
Dá mbähmbe bʉya nɛ dá nuꞌbe hapʉ mi ꞌbʉi. Nɛ manꞌda ora dám ꞌbʉꞌbe bʉ ꞌbʉ má sømhbe bʉ, nguetho mbɛ goho nde ꞌbʉ má sømhbe bʉ.
40 Nɛ nuꞌa manꞌda gue min ꞌyohe ꞌbʉ mi xicꞌbe ra Xuua Nxixyą ga tɛnꞌbe ra Jesús, ra Andrés a, rán ꞌyohʉ ra Simón Pedro. 41 Nuna ra Andrés ꞌbex bi mba bá xi a rán ꞌyohʉ.
―Ya dá tįmꞌbe ra Mesías, bi ꞌyɛ̨na. Nuꞌa nde da ma rá Thahni Oją a, ngue gueꞌa ra Cristo a.
42 Nɛ nu ra Andrés bʉya, bi zixꞌa ra Simón guepʉ bí ꞌbä a ra Jesús. Nɛ nu ra Jesús ꞌbʉ min nu, bi ꞌyɛ̨mbi:
―Nuꞌi gra Simón rá tsꞌʉntꞌʉ i ra Jonás. Nuya ga xi a manꞌda ni thuhu ga hutꞌa ra Cefas, nꞌdatꞌa ra Pedro gue nde da ma, ra do.
Ra Jesús bi zonꞌna ra Felipe nɛ ra Natanael
43 Xø manꞌdapa mahønꞌa bʉya bi bɛ̨n a ra Jesús da mba bʉ ra häi Galilea. Nɛ nuꞌbʉ má mbähmbe bin tįmmi ra Felipe.
―Dami tɛngui, bi ꞌyɛ̨mpꞌa.
44 Nuna ra Felipe ra mɛngu bʉ Betsaida, nɛ ra Andrés, nɛ ra Pedro. 45 Nɛ nuꞌbʉ mi mba ra Felipe nɛ bi dįnꞌa ra Natanael, bi ꞌyɛ̨mbi:
―Ya dá tįngähe a gue mi hmam bʉ ja rá søcuą ra Moisés, nɛpʉ ja yʉ́ søcuą yʉ́ pøngahyą Oją mi hma, nɛ gueꞌa ra Jesús ra mɛngu Nazaret, rá tsꞌʉntꞌʉ ra José, bi ꞌyɛ̨nꞌa.
46 Nu ra Natanael bʉya bi ꞌyɛ̨na:
―Hague dán zä di nɛqui nꞌda ra hocjąꞌi bʉ Nazaret.
Nu ra Felipe bʉya bi ꞌyɛ̨mpꞌa:
―Ga mbɛ gua nusɛ.
47 Nɛ nuꞌbʉ min nu ra Jesús gue ba ɛ̨pʉ ra Natanael, bi ꞌyɛ̨nje bʉ mi ꞌbähmbe:
―Dami nuhʉ nʉ ran ꞌyohʉ ba ɛ̨hnʉ ya, gue rán säui njuąntho da tꞌɛ̨mbi ra israel, nguetho hingui yoho rán ꞌyomfɛ̨ni, bi ꞌyɛ̨na.
48 Bi ꞌyɛ̨nꞌa ra Natanael bʉya:
―Hanja guí pądi gue hingui yoho man ꞌyomfɛ̨nigä nɛ njąmꞌbʉ gá nugui, bi ꞌyɛ̨na.
Nu ra Jesús bi ꞌyɛ̨mpꞌa:
―Nuꞌbʉ hin ní zo a ra Felipe, dí pądi ꞌbɛꞌa gnám bɛ̨m ꞌbʉ gmi hupʉ ja ra za, bi ꞌyɛ̨mpꞌa.
49 Nu ra Natanael bʉya bi ꞌyɛ̨mpꞌa:
―Ma Hmu i, rá Tsꞌʉntꞌʉ i Oją, gueꞌe bi zänꞌna Oją gam hmutsꞌʉtꞌabi nanguecähe dyʉ israelhʉ, dyʉ judíohʉ.
50 Nuꞌa ra Jesús bi ꞌyɛ̨mpꞌa:
―Ha gueꞌa guí ꞌyɛ̨cꞌyɛigä a dá xi i, gueꞌbʉ má xi i: “Dí pądi ꞌbɛꞌa gnám bɛ̨m ꞌbʉ gmi hupʉ ja ra za.” Pɛ manꞌda nuįxte guin nu ꞌbʉ mꞌbɛjua xinda guehna dá xi i. 51 Nguetho majuąni dí xi i, guin nuhʉ da xoh mahɛ̨tsꞌi, ngue guin nuhʉ yʉ́m ꞌbɛhni Oją ba cąh mahɛ̨tsꞌi, nɛ da zøpʉ hapʉ gä dan ꞌyogä, nɛ da ndetsꞌe, gue guecä dán jąꞌigä ua ja ra ximhäi, bi ꞌyɛ̨n a ra Jesús.