Bi dąmbɛ̨ni ra Jesús bʉ ja rán ꞌyägui
24
Nɛ tꞌʉxuditho ra pa ndomingo, nuꞌʉ yʉ xisu bi dux ra ꞌyɛ̨thi bi hoqui, nɛ bi mba bʉ ja ran ꞌyägui ngue ra hyądo guepʉ mi o ra Jesús. 2 Nɛ nuꞌbʉ mi zøm bʉ, bi nu, ya xí mba njʉnni a ra do mi juaxpʉ ja ra hyądo. 3 Nɛ ꞌbex bi yʉrpʉ mbo, pɛ him bi dįm bʉ rá jąꞌi ra Jesús. 4 Nɛ nuꞌbʉ mi ꞌbäpʉ nɛ din ꞌyomfɛ̨ni ꞌbɛꞌa bin ja, ꞌbex bim ꞌbähmbʉ yoho yʉ́m ꞌbɛhni Oją, mi he yʉ́ pahni di fɛxni. 5 Nɛ nuꞌʉ yʉ xisu, ɛ̨mmɛ bin su nɛ bi hyɛ̨ꞌtꞌʉ yʉn ꞌyohʉ. Nɛ bi ꞌyɛ̨mpꞌʉ:―Hanja gní hyomhbʉ ua nꞌda ran ꞌyohʉ i ꞌbʉi, guecua ja ran ꞌyägui. 6 Nuꞌa guí homhbʉ, bi ndantsꞌa, njoꞌo ua a. Ndeꞌbʉ guim bɛ̨mhbʉ a bi xi ahʉ ꞌbʉ gám ꞌbʉhmbʉ bʉ ja ra häi Galilea. 7 Ngue bi ma jatho da nu ran ʉnbi, nɛ da mba ma dä bʉ ꞌbʉh yʉ tsꞌomꞌbäi, nɛ da du bʉ ja ra pontꞌi, nɛ nuꞌbʉ ná hyu pa da dąmbɛ̨ni, bi ꞌyɛ̨nꞌahʉ, bi ꞌyɛ̨nꞌʉ yʉ́m ꞌbɛhni Oją.
8 Nɛ nuꞌʉ yʉ xisu bi bɛ̨m bʉya ꞌbɛꞌa xí manꞌa ra Jesús.
Ángeles en la Tumba
9 Nɛ bi nɛxpʉ ja ran ꞌyägui, bi mba bʉ ꞌbʉꞌʉ ꞌdɛꞌmaꞌda yʉ́ xädi ra Jesús nɛꞌʉ gätho miꞌda, nɛ bi xiꞌʉ ꞌbɛꞌa bin ja bʉ ja ran ꞌyägui. 10 Nɛ nuꞌʉ yʉ xisu, ra María Magdalena a nꞌda, nɛ ra Juana a manꞌda, nɛ ra María rá mbe ra Jacobo a manꞌda, nɛꞌʉ miꞌda min ꞌyohʉ gueꞌ ʉ bi xiꞌʉ yʉ́ xädi a ra Jesús ꞌbɛꞌa bi nu bʉ ja ran ꞌyägui. 11 Pɛ nuꞌʉ yʉ́ xädi, him bi ꞌyɛ̨cꞌyɛi ꞌbɛꞌa bi man yʉ xisu, nɛ bi ꞌyɛ̨mbi bi bɛ̨nsɛ ꞌbɛꞌa bi manꞌʉ.
12 Pɛ nuꞌa ra Pedro, bi mba nꞌdihi bʉ ja ran ꞌyägui nɛ bi nu bʉ mbo. Nɛ bi nu mi ꞌbøntho bʉ ra ꞌbøꞌtꞌe má mbantꞌi ra Jesús. Nɛ bi mbeng bʉ ja rá ngu bʉya, bi hyonya thoho ꞌbɛꞌa bin ja.
La Tumba Está Vacía
Ra Jesús bin ꞌyohʉ bʉ ꞌyu ꞌda yʉ́ ꞌyɛ̨cꞌyɛi
13 Nɛ gueꞌa ra pa bi mba yoho yʉ ꞌyɛ̨cꞌyɛi bʉ ja ra hnini Emaús ngue hinga yatho, hyu ora tho ná ꞌyo. 14 Nɛ i mam bʉ ní mba ꞌbɛꞌa bin ja bʉ Jerusalén. 15 Nɛ gätho ná yąꞌʉ, bi zʉpʉ ꞌyu a ra Jesús nɛ bin ꞌyohʉ. 16 Nɛ nuꞌʉ bi nu a, pɛ him bi bądi toꞌo a. 17 Nɛ nuꞌa ra Jesús bi ꞌyänꞌdʉ:
―ꞌBɛꞌa guí mammi.
Nɛ nuꞌʉ yoho bim ꞌbäpʉ bʉya, nɛ ɛ̨mmɛ tu yʉ́ mbʉi.
18 Nɛ nuꞌa nꞌda í Cleofas bi dąti, bi ꞌyɛ̨na:
―Masque hønꞌa zɛhɛ hin guí pądi ꞌbɛꞌa bin ja bʉ Jerusalén yʉ pa i ja bʉya, bi ꞌyɛ̨mbi.
19 Nuꞌa ra Jesús bi ꞌyänni:
―ꞌBɛꞌa bin ja bʉ.
Nɛ bi xih pʉya ꞌbɛꞌa bin ja, bi ꞌyɛ̨mbi:
―Nu ra Jesús, ra mɛngu Nazaret, nꞌda rá pøngahyą Oją ɛ̨mmɛ mi ja rá tsꞌɛdi, bi ꞌyøtꞌ yʉn tꞌøtꞌe nuįxte nɛ bi hoc yʉn zämanꞌʉ. Nɛ bi ꞌyøtꞌ ran ho bʉ na nu Oją, nɛ nu yʉ jąꞌi bi numansu a. 20 Nɛ nuꞌʉ yʉ ngʉrpa mbäją nɛ miꞌda ma ngʉrpihʉ, bi däꞌa ra Jesús bʉ ꞌbʉh ra tsꞌʉtꞌabi ngue da tho. Nɛ bi mba ma cuati bʉ ja ra pontꞌi bʉya. 21 Nɛ nugähe, dá bɛ̨mhbe gueꞌa da yąnjʉ dyʉ́ jąꞌi israelgähʉ, nɛ xtín jasɛ ma tsꞌɛdi zɛhɛhʉ mahønꞌa. Pɛ ya ná hyu pa ya bi tho. 22,23 Pɛ nuꞌʉ ꞌda yʉ xisu ma mi ꞌyɛ̨cꞌyɛihe, mán tꞌʉxuditho bi mba bʉ ja rán ꞌyägui, guepʉ bí o ra Jesús, pɛ him bi dįm bʉ a, nɛ bá peng bʉ ja ra ngu bi xije ꞌbɛꞌa bi nu, nɛ bi manꞌʉ bi nu ꞌda yʉ́m ꞌbɛhni Oją mahɛ̨tsꞌi, bi xifi i ꞌbʉꞌa ra Jesús. Nɛ ɛ̨mmɛ dadí hyonya thohe. 24 Pɛ nuꞌʉ ꞌda man ꞌyohe, bi mba bʉ ja ran ꞌyägui nɛ ngutho bi manꞌʉ ngue hinꞌyʉ bʉ rá jąꞌi, bi ꞌyɛ̨nꞌʉ yʉ ꞌyɛ̨cꞌyɛi.
25 Pɛ nubʉya, nuꞌa ra Jesús bi xiꞌʉ min ꞌyohʉ:
―Nuꞌaui, guí ꞌyąmbʉiui nɛ xíngui tsꞌʉ guí ɛ̨hya gui ꞌyɛ̨cꞌyɛiui ꞌbɛꞌa gätho bi man yʉ́ pøngahyą Oją. 26 Nguetho gätho ʉ bi ma jatho da nu ran ʉnbi ra Cristo, gueꞌbʉ go bi gonhui rá tsꞌɛdi Oją, bi ꞌyɛ̨nꞌa ra Jesús.
27 Nɛ nubʉya, bi xiꞌʉ ꞌbɛꞌa gätho bi man yʉ pøngahyą ngue din ja, nɛ ꞌbɛꞌa nam bønꞌa ntꞌoꞌtꞌi bʉ. Bi dʉꞌmi bʉ rá mbʉdi rá søcuą ra Moisés nɛ bi xifi gätho ʉ miꞌda yʉ́ søcuą Oją.
28 Nɛ nuꞌbʉ mi tsꞌʉtho da zøm bʉ ní mba, nu ra Jesús bi ꞌyøtꞌe tengu ꞌbʉ da thogui. 29 Pɛ nuꞌʉ yoho min ꞌyohʉ bi ząmmi din oxhʉ bʉ, nguetho bin de. Nɛ nuꞌa ra Jesús bʉya, bi gohmbʉ bʉ ʉ.
30 Nɛ nuꞌbʉ min sihmɛhʉ, nu ra Jesús bi hyąc ra hmɛ, nɛ bi un ra jamadi Oją, bi xɛni, bi unꞌdʉ mi ꞌbʉpʉ bʉya. 31 ꞌBexgue ꞌdahmantho bi bądi toꞌo a ra Jesús tenguꞌbʉ ja bin zø yʉ́ dä. Pɛ nuꞌa ra Jesús ꞌbexque bim ꞌbɛtho bʉ, him bi nu hapʉ í mba. 32 Nɛ nuꞌʉ yoho bin yąsɛ ʉ, bi ꞌyɛ̨nꞌʉ:
―Pɛ hanja hin dá pąhmi ꞌbʉ mán cꞌathʉ bʉ ja ra ꞌyu. Ha him bin johya ma mbʉiui ꞌbʉ mí xicui ꞌbɛꞌa nam bønꞌa rám hma Oją, bin ꞌyɛ̨mzɛhɛ ʉ.
33 ꞌBex bi ndantsꞌi, bi mbeng bʉ Jerusalén, nɛ bi dįm bʉ ʉ ꞌdɛꞌmaꞌda ngue madím pɛtihʉ miꞌda yʉ jąꞌi. 34 Nɛ ɛ̨mmɛ madí johya ʉ, nɛ i ma ngue bi ndantsꞌi mahønꞌa ra Hmu nɛ bin yąui ra Pedro. 35 Pɛ nuꞌʉ bi zøhø ngue min ꞌyohʉ ra Jesús bʉ ꞌyu, bi xiꞌʉ miꞌda ꞌbɛꞌa bi ꞌyørpʉ ꞌyu. Nɛ bi xiꞌʉ ngue gueꞌa í bąꞌa ngue bi xɛn ra hmɛ ra Jesús.
Ra Jesús bin ꞌyusɛ bʉ ꞌbʉh yʉ́ xädi
36 Nɛ nuꞌbʉ gätho na yąꞌʉ yʉ xädi, ya xí ꞌbäpʉ ra Jesús ꞌbʉ mi nu. Nɛ bi zɛngua ʉ, bi ꞌyɛ̨mbi:
―Gan johyahʉ.
37 Nɛ ɛ̨mmɛ bin su, bi bɛ̨ni gue i nu nꞌda ran dąhi, ngue him majuąni. 38 Pɛ nu ra Jesús bi ꞌyɛ̨mpꞌʉ:
―Hanja ngue in jabʉ nin ꞌyomfɛ̨nihʉ, nɛ hingui sä gui ꞌyɛ̨cꞌyɛigahʉ. 39 Dami hyɛ̨tcahʉ, nɛ guin nuhʉ ma ꞌyɛ nɛ ma gua, nɛ gui nuhʉ ngue gueczɛhɛgä. Dami thäqui, janangue da zä gui pąhmbʉ ngue i ja a ma ngøcꞌyɛi. Pɛ nuꞌa nꞌda ran dąhi tengu guím bɛ̨mhbʉ, hinguin ꞌyoui rá ngøcꞌyɛi a, bi ꞌyɛ̨nꞌa ra Jesús.
40 Nɛ nubʉya, bi ꞌyutꞌʉ yʉ́ ꞌyɛ nɛ yʉ́ gua. 41 Pɛ guextaꞌa him ꞌbexque bi ꞌyɛ̨cꞌyɛi nguetho bi hyonya thoho, nɛ xin di johya ʉ. Nu ra Jesús bʉya, bi ꞌyäpi ꞌbɛꞌa da zi. 42 ꞌBex bi unꞌna nꞌda xɛqui ra huą. 43 Bi hyąm bʉya nɛ bi za, nɛ gätho yʉ jąꞌi mi ꞌbʉpʉ bi nu. 44 Nɛ nu ra Jesús bi ꞌyɛ̨mpꞌʉ:
―Nuya bin ja ꞌbɛꞌa gätho dá xi ahʉ ꞌbʉ mám ꞌbʉhmbʉ. Ya dá xi ahʉ gue din ja a ntꞌoꞌtꞌi bʉ ja yʉ́n tꞌɛ̨di ra Moisés, nɛpʉ ja yʉ́ søcuą yʉ pøngahyą, nɛꞌa ntꞌoꞌtꞌi bʉ ja yʉ thuhu, yʉ salmo, nɛ ya bin ja, bi ꞌyɛ̨nꞌa ra Jesús.
45 Nu ra Jesús bʉya, bi xocpa yʉ́n ꞌyomfɛ̨ni ngue da zä da bąꞌʉ ꞌbɛꞌa nam bønꞌa rám Hman Oją. 46 Nɛ bi ꞌyɛ̨mpꞌʉ:
―Ntꞌoꞌtꞌi bʉ ja rám Hman Oją gue da nu ran ʉnbi ra Cristo, nɛ da tho, nɛ ná hyu pa da dąmbɛ̨ni. 47 Nɛ ntꞌoꞌtꞌi bʉ ngue dí mbʉpʉ Jerusalén da hman ran ho maꞌdaꞌyo, nɛ gätho ná ngʉni ra ximhäi, nɛ da sih yʉ jąꞌi di päh yʉ́n ꞌyomfɛ̨ni nɛ da mba ma punbi yʉ́ tsꞌoqui, ngue nangue rá thuhu ra Cristo. 48 Nu ahʉ, sä guim mamhbʉ majuąni ran ho maꞌdaꞌyo, nguetho gá nuhʉ ꞌbɛꞌa gätho bin ja. 49 Nɛ gua pɛn ꞌnahʉ rá Hogandąhi Oją bi mam ma Ta di ꞌda ahʉ. Pɛ jatho gui tømhbʉ ua Jerusalén, gueꞌbʉ go bá ɛ̨h mahɛ̨tsꞌi rá tsꞌɛdi gan ꞌyohʉ, bi ꞌyɛnꞌa ra Jesús, bi ꞌyɛ̨mꞌbʉ min yąhʉ yʉ́ xädi.
Aparece Jesús Resucitado
Bi ndex mahɛ̨tsꞌi ra Jesús
50 Nuꞌbʉ mi guaꞌa bi man ra Jesús, bi zix ʉ yʉ́ xädi bʉ ja ra ꞌyu ní mba bʉ Betania, nɛ guepʉ bi ꞌuąꞌtsꞌ yʉ́ ꞌyɛ nɛ bi jąpꞌʉ bʉya. 51 Pɛ nubʉya bi zopʉ ʉ yʉ́ xädi nɛ bi ndex mahɛ̨tsꞌi. 52 Nɛ gätho ʉ mi ꞌbäpʉ bi ꞌyɛ̨spi nɛ ɛ̨mmɛ bin johya yʉ́ mbʉi ʉ. Nɛ bi mbeng bʉ Jerusalén bʉya. 53 Nɛ gätho yʉ pa bin de bʉ ja ra dąniją, mi numansu Oją nɛ bi un ra jamadi Oją bʉ. Nɛ høntꞌa dí xiꞌa ya.
La Gran Comisión y Ascensión
Invitación para Conocer Personalmente a Jesús