MARCOS
Ran ho maꞌdaꞌyo bi ꞌyoꞌtꞌ ra Marcos
Nu ra Xuua Nxixyą bi ma mi tsꞌʉtho da zøh ra Hmu
1
Ja ua rá mbʉdi ran ho maꞌdaꞌyo nangueꞌa ra Jesucristo, rá Tsꞌʉntꞌʉ Oją. 2 Bin ja a mán tꞌoꞌtꞌi ꞌbʉ mayaꞌbʉ bʉ ja rá søcuą Oją ꞌbʉ mí ꞌyɛ̨na:Nugä ga pɛhnꞌna nꞌda mam ꞌbɛhni dim ꞌbɛtꞌo bʉ gni mba.
Nuꞌa da xih yʉ jąꞌi da døpꞌeꞌe,
bi ꞌyɛ̨mpꞌa rá Tsꞌʉntꞌʉ.
3 Nɛꞌa ra pøngahyą Isaías bi ma nguehna rám ꞌbɛhni ꞌbʉ mi ꞌyɛ̨na ngue:
Nꞌda ra jaꞌi din yą ntsꞌɛdi bʉ ja ra dąpo ngue da ꞌyɛ̨na:
“Damin sähʉ ga simhbʉ ra hmu mi tsꞌʉtho da zøcua,
Dami hoc ni mbʉihʉ ga tømhbʉ xʉn ho,” da ꞌyɛ̨n a mam ꞌbɛhni, i ɛ̨n Oją, bi ꞌyɛ̨nꞌa ra Isaías.
4 Nɛ gueꞌa ra Xuua bi ꞌyøtꞌ ran xixyą bʉ ja ra dąpo bi man Oją mayaꞌbʉ. Nu ra Xuua bi xih yʉ jąꞌi din xixyą toꞌo di päh yʉ́n ꞌyomfɛ̨ni nɛ da mba ma punbi yʉ́ tsꞌoqui bʉya. 5 Gätho yʉ jąꞌi mi ꞌbʉpʉ ra xɛqui Judea, nɛpʉ ra dąhnihni Jerusalén, bi zøm bʉ i øtꞌ ran xixyą ra Xuua. Nɛ nuꞌʉ ꞌda bi päh yʉ́n ꞌyomfɛ̨ni nɛ bi mam bʉya ngue hingui ho ꞌbɛꞌa xí ꞌyøtꞌe. Nɛ bi mba ma xixyąba bʉ ja ra dąthe Jordán ʉ bʉya.
6 Nu ra Xuua mí he nꞌda ra mbapahni án tꞌøtꞌe ngue yʉ́ xingu yʉ camello nɛ mi ja rán gʉtꞌi ra xifani. Nɛ høntꞌʉ yʉ tꞌąxi nán sihmɛ nɛ ra tꞌafi tꞌasa dąpo. 7 Nɛ bi ꞌyɛ̨na:
―Ba ɛ̨pʉ nꞌda manꞌda ja rá tsꞌɛdi xinda guecä, hin dí sʉcä tengu a. 8 Nugä xtá xixyą ahʉ nangue ra dehe thoho, pɛ nuꞌa di ꞌdaꞌahʉ rá Hogandąhi Oją, bi ꞌyɛ̨mb yʉ jąꞌi a ra Xuua.
Bi mba ma xixyąbi ra Jesús
9 Nɛ nu yʉ pa bi ꞌyøtꞌ ran xixyą ra Xuua, bi nɛxpʉ ra hnini Nazaret ra Jesús, ngue ra xɛqui Galilea. Nɛ bi zøm bʉ ra Jesús bin xixyąꞌa bʉya bʉ ja ra dąthe Jordán. Gueꞌa ra Xuua bi ꞌyøtꞌ ran xixyą. 10 Nɛ nuꞌbʉ mí bøxpʉ ja ra dehe bʉya ꞌbex bi nu bi xoh mahɛ̨tsꞌi nɛ bá cąh rá Hogandąhi Oją, tengu nꞌda ra tꞌazʉ, bi zøpʉ ꞌbäh ra Jesús. 11 Nɛ bi tꞌø a nꞌda ra nde mahɛ̨tsꞌi bi ꞌyɛ̨na:
―Ma Tsꞌʉntꞌʉ i, dadí huɛ̨cꞌi i nɛ dín numanho i, bi ꞌyɛ̨n a ra nde.
Nu ra Jesús bi tsꞌäp rá mbʉi bʉ maꞌueni
12 Nɛ nubʉya nu rá Hogandąhi Oją ꞌbex bi bɛ̨nbi da mba bʉ maꞌueni a ra Jesús. 13 Nɛ nyote pa bim ꞌbʉpʉ nɛ nyote xui. Nɛ nu ra zįthu ra Satanás bi zäp rá mbʉi a ra Jesús gätho yʉ pa bim ꞌbʉpʉ, nɛ mí ꞌbʉhmbʉ bʉ yʉ zate. Pɛ bi mbäxꞌʉ yʉ́m ꞌbɛhni Oją mahɛ̨tsꞌi a ra Jesús ꞌbɛꞌa gä bi nu bʉ.
Nu ra Jesús bi dʉꞌmi bi man a rám hma bʉ ja yʉ hnini
14 Ya xí jotꞌa fädi ra Xuua Nxixyą ꞌbʉ mi bøm bʉ ra Jesús bʉ ra xɛqui Judea, bi mba bʉ Galilea. Nɛ bi mam bʉ ran ho maꞌdaꞌyo ngue ꞌbɛpʉ dí manda rá tsꞌɛdi Oją nꞌda. 15 Nɛ bi ꞌyɛ̨mb yʉ jąꞌi:
―Mi tsꞌʉtho da zøn ra pa di manda ua rá tsꞌɛdi Oją, dami päh nin ꞌyomfɛ̨nihʉ, damin unsɛhʉ di manda ahʉ Oją ꞌdahma din ja ahʉ ra te maꞌdaꞌyo. Gueꞌa bi man a ra Jesús ꞌbʉ mí ꞌyɛ̨mpꞌʉ yʉ jąꞌi.
Ra Jesús bi zohni goho yʉ mbahuą
16 Nꞌda ra pa mi ꞌyo bʉ a ra Jesús bʉ ndendądehe tꞌɛ̨mbi Galilea. Nɛ nubʉya bi nu a ra Simón nꞌyoui rán ꞌyohʉ i Andrés a, mi ɛnxitꞌą bʉ ja ra dądehe ʉ, ngue yʉ́ ꞌbɛfi yʉ mbahuą ʉ. 17 Ra Jesús bi ꞌyɛ̨mpꞌʉ:
―Ba tɛngaui ga ja aui gui xihmi yʉ jąꞌi da ꞌyɛ̨cꞌyɛigui tengu thoho bʉ gní thɛui yʉ huą ngubʉ guí øtꞌui, bi ꞌyɛ̨mpꞌʉ.
18 ꞌBex bi hyɛpʉ yʉ́ xitꞌą bʉya nɛ bi dɛnni.
19 Nɛ xø bi thogui bin ꞌyo mi tsꞌʉ nɛ bi nu a ra Jacobo nꞌyoui rán ꞌyohʉ i Xuua a, gätho ʉ yoho yʉ́ tsꞌʉntꞌʉ ra Zebedeo ʉ. Mi hubʉ ja yʉ́ mbosa ʉ, midi hoc yʉ́ xitꞌą. 20 Nɛ xø bi xifi da dɛnꞌdʉ. ꞌBex bi dɛnꞌdʉ bʉya bi zopʉ rá ta bʉ ja ra mbosa ʉ bʉya nɛ yʉ́ mbɛfi.
Ra Jesús bi hocꞌa nꞌda ran ꞌyohʉ min ꞌyoui ra zįthu
21 Nɛ nubʉya nu ra Jesús bi yʉthʉ bʉ ja ra hnini Capernaum ʉ xí tɛnni. Nu ra pa ran säya mí cʉrpʉ ja ra niją nɛ mi xänba bʉ yʉ jąꞌi. 22 Nɛ nuꞌʉ bʉya, ɛ̨mmɛ bi hyonya thoho ꞌbʉ mí ꞌyø a bi man ra Jesús, nguetho bi xänbi xʉn ho nɛ hinga ngubʉ mí man ʉ ma xänbate sɛhe ngue dyʉ israelhe, dyʉ́ judíohe. ꞌBex gue bi bądi ja rán tꞌɛ̨di ra Jesús. 23 Nɛ mi ꞌbʉpʉ nꞌda ran ꞌyohʉ nꞌyoui ra zįthu nɛ ntsꞌɛdi bi mbah pʉya, bi ꞌyɛ̨na:
24 ―ꞌBɛꞌa guí nde gui ꞌyørcahe grá Jesús, grá mɛngu Nazaret. Ha gui juaje ya. Dí pądi gueꞌe rá Thahni i Oją gue xʉn hotho, bi ꞌyɛ̨na.
25 Pɛ nu ra Jesús bi dąmhyą ra zįthu, bi ꞌyɛ̨mbi:
―Daman hɛ̨, dami pøm bʉ ja rá mbʉi na ran ꞌyohʉ, bi ꞌyɛ̨mbi.
26 Nu ra zįthu bʉya ntsꞌɛdi bi huąꞌtsꞌa ran ꞌyohʉ, ntsꞌɛdi bi mbafi, nɛ bi bøm bʉya. 27 Gätho bi hyonya thoho ʉ ꞌbʉpʉ nɛ bin ꞌyɛ̨mzɛhɛ ʉ:
―ꞌBɛꞌa nam bønꞌa dí nuhʉ ya. ꞌBɛꞌa ni ꞌdaꞌyonxädi na, nguetho i ja rán tꞌɛ̨di na i sʉh yʉ zįthu nɛ i su ʉ, bin ꞌyɛ̨mzɛhɛ ʉ.
28 Nɛ ꞌbexque ꞌdahmantho bi hmam bʉ gätho ra häi Galilea ꞌbɛꞌa bi ꞌyøtꞌa ra Jesús.
Bi hocꞌa rá suto ra Simón a ra Jesús
29 Nuꞌbʉ mi bøm bʉ ja ra niją a ra Jesús bi mbähä ra Simón, nɛ ra Andrés, nɛ ra Jacobo, nɛ ra Xuua. Bi zømhbʉ bʉ rá ngu ra Simón. 30 Nɛ nuꞌa rá suto ra Simón ꞌbɛm bʉ rá oi, i hɛ̨mb ra pa. Nɛ bi si a ra Jesús. 31 Nɛ bi nu bʉ i ꞌbɛnꞌa ra xisu bʉya, bi bɛnba rá ꞌyɛ nɛ bi xotsꞌi. ꞌBex bi bøn a ra pa, hin hapʉ xʉnꞌʉ, nɛ ꞌbex bi zä bi hoc yʉ́n sihmɛ bʉya.
Ra Jesús bi hoqui xʉn ngu yʉ hyɛ̨nni
32 Nɛ nuꞌbʉ mí yʉh ra hyadi gätho ʉ mi ʉ bá tsꞌinba a ra Jesús bʉ mi ꞌbʉi, nɛ ʉ min ꞌyohʉ ra zįthu bá tsꞌinbi. 33 Bim pɛti bʉ ja ra goxthi gätho yʉ jąꞌi ꞌbʉpʉ ja ra hnini. 34 Gätho na ngu yʉ hyɛ̨nni bi hoqui, nɛ bi hyønba thi yʉ zįthu min ꞌyohʉ ʉ ꞌda. Nɛ nu yʉ zįthu, ɛ̨mmɛ mi ndehma da ma toꞌo a ra Jesús, pɛ nu ra Jesús him bi japi din yą ʉ.
Nu ra Jesús bi xänba yʉ jąꞌi bʉ ra xɛqui Galilea
35 Nɛ nuꞌbʉ mi tsꞌʉtho da hyax bʉya, bi ndantsꞌa ra Jesús bi bøm bʉ ja ra hnini, bi mba bʉ maꞌueni bin yąui Oją. 36 Nɛ nuꞌbʉ mi hyatsꞌi xʉn ho bʉya, bi mba ra Simón da hyoni, nɛꞌʉ miꞌda mi ꞌbʉhmbʉ bi mbähä da hyomhbʉ ra Jesús. 37 Pɛ nuꞌbʉ mí dįm bʉya, bi ꞌyɛ̨mbi:
―Mbähä bʉ ja ra ngu nguetho gätho yʉ jąꞌi honꞌa bʉ mahønꞌa, bi ꞌyɛ̨mbi.
38 ―Hinꞌna, pɛ manꞌda xʉn ho ꞌbʉ ga mbähä bʉ ja miꞌda yʉ hnini, nɛpʉ ga mangä bʉ mam hmam bʉ, nguetho gueꞌa bá ɛ̨cä ua a, bi ꞌyɛ̨nꞌa ra Jesús.
39 ꞌBex bi mbähä bʉya, bin ꞌyo gätho ra häi Galilea, bi man rám hman Oją bʉ ja yʉ niją nɛ bi hyønꞌa thi yʉ zįthu mín ꞌyohʉ ꞌda yʉ jąꞌi bʉ bi thogui.
Bi hocꞌa nꞌda ran ꞌyohʉ mi hɛ̨mb ra tꞌaxcaꞌya
40 Nɛ bi zøm bʉ nꞌda ran ꞌyohʉ bʉ ꞌbäh ra Jesús, i hɛ̨mb ra tꞌaxcaꞌya. Bin dąnyahmu, bi ꞌyäp ra mate, bi ꞌyɛ̨na:
―Nuꞌbʉ ni pähä da zä gui hogui tsꞌʉ, bi ꞌyɛ̨mbi.
41 Bin yeh rá mbʉi ra Jesús, bi däꞌa ra hyɛ̨nni, nɛ bi ꞌyɛ̨mb bʉya:
―I jagä ra pähä da yąnꞌa ya, bi ꞌyɛ̨mbi.
―Nuya, njon gui xifi ꞌbɛꞌa dá øtꞌeꞌe. Ni mba, bán ꞌyupʉ ꞌbʉh ra mbäją, gui un bʉ nꞌda ra ꞌbøtsꞌe i man rán tꞌɛ̨di ra Moisés da hyąxpʉ nꞌda ꞌbʉ ya bi yąn ra tꞌaxcaꞌya, nɛ da fąh bʉya ngue bi zä i, bi ꞌyɛ̨mbi.
Nɛ bi xifi da mba bʉya. 45 Pɛ nu ran ꞌyohʉ ꞌbʉ mi bøm bʉ bi mbʉdi ɛ̨mmɛ mma. Nɛ bi xih yʉ jąꞌi ꞌbɛꞌa xí tꞌørpe. Jannangueꞌa nu ra Jesús ya him bi zä da yʉrpʉ ja yʉ hnini nɛ ꞌyotho bʉ maꞌueni nguetho ɛ̨mmɛ bi muns yʉ jąꞌi ꞌbʉ i cʉrpʉ ja ra hnini. Pɛ guehma xʉn ngu yʉ jąꞌi mi zøm bʉ hapʉ mi ꞌyo ngue høn bʉ go hapʉ ní nɛtsꞌi.