MATEO
Ran ho maꞌdaꞌyo bi ꞌyoꞌtꞌa ra Mateo
Yʉ́m bombøta ra Jesucristo
1
Guehna nꞌda ra søcuą i ja ua im ma toꞌo yʉ́ ngʉrpa bøta ra Jesucristo. Nuꞌa nꞌda ra Abraham nɛ manꞌda ra David nɛ xʉn ngu miꞌda gätho yʉ́ ngʉrpa bombøta ʉ.2 Nu ra Abraham bim ꞌbʉ a nꞌda rá tsꞌʉntꞌʉ ngue ra Isaac. Nu ra Isaac xø bim ꞌbʉh rá tsꞌʉntꞌʉ, ra Jacob a. Nɛ nu ra Jacob xø bim ꞌbʉh yʉ́ tsꞌʉntꞌʉ. Nuꞌa nꞌda ra Judá a nɛꞌʉ yʉ́n ꞌyohʉ. Nɛ gueꞌʉ bi xąndgahe ʉ dyʉ jąꞌi israelgähe, dyʉ judíohe. 3 Nɛ nu ra Judá bim ꞌbʉ i yoho yʉ́ tsꞌʉntꞌʉ. Nꞌdamꞌbʉi thoho yoho. Nuꞌa nꞌda ra Fares. Nuꞌa manꞌda ra Zara. Nɛ nuꞌa rá mbe ʉ rá thuhu ra Tamar a. Nɛ nu ra Fares bim ꞌbʉ a nꞌda rá tsꞌʉntꞌʉ ngue ra Esrom. Nɛ nu ra Esrom, xø bim ꞌbʉh rá tsꞌʉntꞌʉ, ra Aram a. 4 Nɛ nu ra Aram bim ꞌbʉ a nꞌda rá tsꞌʉntꞌʉ ngue ra Aminadab. Nɛ nu ra Aminadab, xø bim ꞌbʉ a nꞌda rá tsꞌʉntꞌʉ, ra Naason a. Nɛ nu ra Naason, xø bim ꞌbʉh rá tsꞌʉntꞌʉ, ra Salmón a. 5 Nu ra Salmón xø bim ꞌbʉh rá tsꞌʉntꞌʉ, ra Booz a. Nɛ nu ra Booz, rá mbe a ra Rahab. Nɛ nu ra Booz xø bim ꞌbʉh rá tsꞌʉntꞌʉ, ra Obed a. Nɛ nu rá mbe ra Obed, ra Rut a. Nɛ nu ra Obed xø bim ꞌbʉh rá tsꞌʉntꞌʉ, ra Isaí a. 6 Nɛ nu ra Isaí xø bim ꞌbʉh rá tsꞌʉntꞌʉ, ra David a. Nɛ nu ra David gueꞌa bin tsꞌʉtꞌabi a. Nɛ nu ra David xø bim ꞌbʉh rá tsꞌʉntꞌʉ, ra Salomón a. Nɛ nu rá mbe ra Salomón, gueꞌa xí du rá ndø rá thuhu Urías.
7 Nɛ nu ra Salomón xø bim ꞌbʉh rá tsꞌʉntꞌʉ, ra Roboam a. Nɛ nu ra Roboam xø bim ꞌbʉh rá tsꞌʉntꞌʉ, ra Abías a. Nɛ nu ra Abías xø bim ꞌbʉh rá tsꞌʉntꞌʉ, ra Asa a. 8 Nɛ nu ra Asa xø bim ꞌbʉh rá tsꞌʉntꞌʉ, ra Josafat a. Nɛ nu ra Josafat xø bim ꞌbʉh rá tsꞌʉntꞌʉ, ra Joram a. Nɛ nu ra Joram xø bim ꞌbʉh rá tsꞌʉntꞌʉ, ra Uzías a. 9 Nɛ nu ra Uzías xø bim ꞌbʉh rá tsꞌʉntꞌʉ, ra Jotam a. Nɛ nu ra Jotam xø bim ꞌbʉh rá tsꞌʉntꞌʉ, ra Acaz a. Nɛ nu ra Acaz, xø bim ꞌbʉh rá tsꞌʉntꞌʉ, ra Ezequías a. 10 Nɛ nu ra Ezequías xø bim ꞌbʉh rá tsꞌʉntꞌʉ, ra Manasés a. Nɛ nu ra Manasés, xø bim ꞌbʉh rá tsꞌʉntꞌʉ, ra Amón a. Nɛ nu ra Amón, xø bim ꞌbʉh rá tsꞌʉntꞌʉ, ra Josías a. 11 Nɛ nu ra Josías, xø bim ꞌbʉh rá tsꞌʉntꞌʉ ra Jeconías a, nɛꞌʉ yʉ́n ꞌyohʉ. Nɛ gueꞌʉ yʉ pa bi tsꞌix ʉ ma mi israelhe dyʉ judíohe bʉ ja ra häi Babilonia. Bi zix yʉ́n sʉihʉ.
12 Nɛ nubʉya nu ra Jeconías bin xąnd bʉ ra häi Babilonia a, nɛꞌa rá tsꞌʉntꞌʉ ngue ra Salatiel. Nu ra Salatiel xø bim ꞌbʉh rá tsꞌʉntꞌʉ, ra Zorobabel a. 13 Nɛ nu ra Zorobabel xø bim ꞌbʉh rá tsꞌʉntꞌʉ ra Abiud a. Nɛ nu ra Abiud xø bim ꞌbʉh rá tsꞌʉntꞌʉ, ra Eliaquim a. Nɛ nu ra Eliaquim xø bim ꞌbʉh rá tsꞌʉntꞌʉ, ra Azor a. 14 Nɛ nu ra Azor xø bim ꞌbʉh rá tsꞌʉntꞌʉ, ra Sadoc a. Nɛ nu ra Sadoc xø bim ꞌbʉh rá tsꞌʉntꞌʉ, ra Aquim a. Nɛ nu ra Aquim xø bim ꞌbʉh rá tsꞌʉntꞌʉ, ra Eliud a. 15 Nɛ nu ra Eliud xø bim ꞌbʉh rá tsꞌʉntꞌʉ, ra Eleazar a. Nɛ nu ra Eleazar xø bim ꞌbʉh rá tsꞌʉntꞌʉ, ra Matán a. Nɛ nu ra Matán xø bim ꞌbʉh rá tsꞌʉntꞌʉ, ra Jacob a. 16 Nɛ nu ra Jacob xø bim ꞌbʉh rá tsꞌʉntꞌʉ, ra José a. Gueꞌa rá ndø ra María a. Nɛ gueꞌa rá mbe ra Jesús a, ngue ra Cristo a bʉya, rá thahni Oją.
17 Nɛ gueꞌʉ gätho yʉ́m bombøta ra Jesucristo ʉ. Mbʉdi tho ra Abraham, ná ꞌdɛꞌmagoho a ra David. Nɛ xø bim ꞌbʉh mi ꞌdɛꞌmagoho yʉ́m bombøta nɛ gueꞌʉ yʉ pa bi tsꞌix pʉ Babilonia. Nɛ xø bim ꞌbʉh mi ꞌdɛꞌmagoho, ná ꞌdɛꞌmagoho a ra Cristo bʉya.
Nuꞌa bin ja ꞌbʉ mim ꞌbʉh ra Jesucristo
18 Nɛ nuꞌbʉ mim ꞌbʉh ra Jesucristo, nuꞌa rá mbe ngue ra María bi ꞌyänꞌna ra José, nɛ ya in nde din thątꞌui, pɛ nuꞌbʉ hin ním ꞌbʉhmi, ya bi hnu ngue in hątꞌʉhni ra María, pɛgue bi nɛqui zɛhɛ rá tꞌʉhni nangue rá Hogandąhi Oją. 19 Nɛ nu ra José bʉya bi bɛ̨ni hanja bin hątꞌʉhni a ra María. Pɛgue ra hocjąꞌi a ra José nɛ him mi nde di yąpꞌa ra María bʉ ꞌbʉh ra zɛꞌmi pɛgue bi bɛ̨ni da hyɛtho. 20 Nɛ nu ra José, nuꞌbʉ ngubʉ mim bɛ̨ni, bi ꞌuį nꞌda ra tꞌį ꞌbʉ min ąpʉ rán ngunsɛ, bi nu rám ꞌbɛhni Oją bi ꞌyɛ̨mbi:
―Nuꞌi, hague José, rám bomꞌbɛto i ra David, xʉn ho ꞌbʉ gam ꞌbʉhmi a ra xisu, nguetho nu ra ꞌuɛre dim ꞌbʉi, dim ꞌbʉi nangue rá Hogandąhi Oją a. 21 Nɛ dim ꞌbʉ a nꞌda rá tsꞌʉntꞌʉ ra María, gui xip rá thuhu ra Jesús. Nuꞌa ra Jesús nam bøni ngue da yąni gätho yʉ́ mijudíohʉ, yʉ israel, nangue yʉ́ tsꞌoqui ʉ, bi ꞌyɛ̨mpꞌa rám ꞌbɛhni Oją a ra José ꞌbʉ min ąha.
22 Nguetho mayaꞌbʉ thoho bi zän Oją a ra María ꞌbʉ mi manꞌa ra pøngahyą ngue bi ꞌyɛ̨na:
23 Nꞌda ra hmute ngue hin jąmꞌbʉ nꞌdandį bi zo a nꞌda ran ꞌyohʉ, nɛ din hątꞌʉhni.
Nɛ nuꞌa rá tꞌʉhni dim ꞌbʉi da tꞌɛ̨mbi ra Emanuel, bi ꞌyɛ̨nꞌa ra pøngahyą mayaꞌbʉ.
Nɛ nuꞌa ra Emanuel in nde da ma: “Dí ꞌbʉhmbʉ Oją.”