Nuꞌʉ ꞌda yʉn ꞌyohʉ bi dąnde ra Jesús ꞌbʉ min ꞌuɛre
2
Nɛ nu ra Jesús bám ꞌbʉpʉ ra hnini Belén guepʉ ra häi Judea. Nɛ min tsꞌʉtꞌabi bʉ ja a ra xɛqui a ra Herodes, nɛ mí ząm bʉ ra dąhnini Jerusalén. Nɛ bi zøm bʉ Jerusalén ꞌda yʉn ꞌyohʉ ngue yʉ́ ꞌbɛfi mí hand yʉ sø. Nɛ nuꞌʉ bí nɛxpʉ mbɛ ní bøx ra hyadi ʉ. 2 Nɛ nuꞌbʉ mi zøm bʉ Jerusalén bi ꞌyänꞌdʉ ꞌbʉpʉ:―Hapʉ i ꞌbʉcua a rá hmutsꞌʉtꞌabi yʉ judío ja bim ꞌbʉi, bi ꞌyɛ̨nꞌʉ. Nguetho dán nuhe nꞌda ra sø njąmꞌbʉ dá nuhe nꞌdandį. Nɛ gueꞌa ra hmɛpya bi ꞌyurcahe ngue ya bim ꞌbʉi, nɛ bá ɛ̨hmbe ya ga thąndehe a, bi ꞌyɛ̨nꞌʉ bi nu ra sø.
3 Nɛ nu ra tsꞌʉtꞌabi Herodes, nuꞌbʉ mi sifi ꞌbɛꞌa bi manꞌʉ yʉn ꞌyohʉ bi zøm bʉ, bi hyonya thoho nangue a ram hma ngue bim ꞌbʉh manꞌda ra tsꞌʉtꞌabi. Nɛ gätho ꞌbʉpʉ Jerusalén bin su nguetho im bɛ̨ni: “Masque i ja ꞌbɛꞌa din ja ya,” ɛ̨n ʉ. 4 Nɛ nuꞌa ra tsꞌʉtꞌabi Herodes bʉya bi zonꞌdʉ yʉ hmumbäją nɛꞌʉ yʉ xänbate niją, bi ꞌyänni hapʉ im man yʉ́ søcuą yʉ pøngahyą dim ꞌbʉ a rá hmutsꞌʉtꞌabi yʉ judío, ngue ra Cristo. 5 Nɛ nuꞌʉ bi ꞌyɛ̨mbi:
―Guepʉ Belén ra häi Judea dim ꞌbʉi, nguetho gueꞌa bi man ra pøngahyą ꞌbʉ mayaꞌbʉ ꞌbʉ mi hma ngue,
6 Nu ra hnini Belén bʉ ra häi Judea,
ra tꞌʉhnini a, pɛgue din ja tengu nꞌda ra dąhnini
nguetho guepʉ dim ꞌbʉpʉ ra Hmu
di jamansu ma tꞌʉhni yʉ jąꞌi israel,
i ɛ̨n Oją, bi ꞌyɛ̨nꞌa ra pøngahyą mayaꞌbʉ, bi ꞌyɛ̨n ʉ yʉ mbäją.
7 Nuꞌbʉ mi mbencꞌʉ yʉ mbäją nɛ yʉ xänbate niją, nu ra Herodes bi zonꞌdʉ bi nu ra sø, pɛ njon mi ndepe da nu ꞌbʉ mam bá tsꞌi. Nɛ nuꞌbʉ mam bá tsꞌi bʉ ꞌbʉh ra Herodes, bi ꞌyänni:
―Ma njąmꞌbʉ bi nɛqui a ra sø, bi tꞌɛ̨mpꞌʉ.
8 Nɛ nuꞌbʉ mi xifi, nu ra Herodes bʉya bi ꞌyɛ̨mpꞌʉ bi nu ra sø:
―Ní mbähä bʉ Belén, gui hyomhbʉ hapʉ bim ꞌbʉ a ra ꞌuɛre, nɛ nuꞌbʉ gá tįmhbʉ hapʉ i ꞌbʉi, gua ɛ̨hmbʉ gui xijʉ, nɛcä ga mba ga thąnde a, bi tꞌɛ̨mpꞌʉ bi nu ra sø. Pɛ hinga gueꞌa mim bɛ̨n a.
9 Nɛ nuꞌʉ yʉn ꞌyohʉ bʉya bi mba da hyoni hapʉ bim ꞌbʉ a ra ꞌuɛre, nɛ xø bi nɛqui mahønꞌa a ra sø xpí nu bʉ yʉ́ häi. Nɛ i ꞌbɛtꞌo a. Nɛ nuꞌbʉ mi zøm bʉ Belén, bin säya a ra sø bʉ din ꞌyɛ̨ꞌtꞌui a ra ngu nubʉ mí ꞌbʉ a ra ꞌuɛre. 10 Nɛ nuꞌʉ yʉn ꞌyohʉ ꞌbʉ mí nu bin säya a ra sø, bin johya yʉ́ mbʉi bʉya. 11 Nɛ bi yʉtꞌambo, bi nu a ra ꞌuɛre nɛ ra María rá mbe. Nɛ bin dąnyahmu, bi dąnde a ra ꞌuɛre. Nɛ ꞌbexque bi xoꞌtꞌ yʉ́ ꞌbɛni bá tu, nɛ bi un yʉn tꞌunni a ra ꞌuɛre ngue ɛ̨mmɛ xʉn ngu di muui. Bi unna nꞌda ra oro, nɛ rá ndɛga ra za bi unni, nɛ nꞌda ra ꞌyɛ̨thi yʉmanꞌu. 12 Nɛ nuꞌbʉ min ą ʉ yʉn ꞌyohʉ ngue bi nu ra sø, Oją bi ꞌyutꞌa nꞌda ra tꞌį ngue nuꞌbʉ bi mbengui hin dí mba bʉ bí ꞌbʉh ra Herodes. Janangueꞌa nꞌdanni nꞌda ra ꞌyu bi hyąx ꞌbʉ mi mbeng bʉ yʉ́ häi bʉya.
Ra Jesús bi tsꞌix bʉ Egipto
13 Nɛ nuꞌbʉ mí mba ʉ yʉn ꞌyohʉ bʉya, nꞌda rám ꞌbɛhni Oją bi xi a ra José ꞌbʉ min ąha:
―Dami ndantsꞌi. Dami sixꞌa ra ꞌuɛre nɛ a rá mbe. Guiꞌ dahmbʉ, ni mbähä bʉ ra häi Egipto nɛ gam ꞌbʉhmbʉ bʉ ꞌda yʉ pa. Nɛ him ꞌbex gua pengüi, jagueꞌbʉ dá xiꞌaui gua pengüi. Nguetho nu ra Herodes da hyonꞌa ra ꞌuɛre, nɛ nuꞌbʉ da dįni da hyo, bi ꞌyɛ̨mpꞌa rám ꞌbɛhni Oją a ra José.
14 Nɛ ꞌbex bi ndancꞌa ra José a ra xui a. Bi zix a ra María nɛ rá tꞌʉhni, nɛ bi mba bʉ ra häi Egipto. Him bi døꞌmi ꞌbɛ da hyatsꞌi. 15 Nɛ bám ꞌbʉpʉ Egipto jagueꞌbʉ mi du ra Herodes, ja bá pencꞌʉ bʉya. Nɛ bin ja ꞌbɛꞌa bi man Oją mayaꞌbʉ, bi ꞌyɛ̨na: “Gan zohnꞌna ma tꞌʉhni bʉ Egipto,” i ɛ̨n Oją, bi ꞌyɛ̨nꞌa rá pøngahyą.
Ra tsꞌʉtꞌabi Herodes bi manda dí ho yʉ tꞌʉhni
16 Nɛ nu ra Herodes ɛ̨mmɛ bin cuɛ ngue ya bi thätꞌi, nguetho nuꞌʉ yʉn ꞌyohʉ bi nu ra sø hin í mbeng bʉ ꞌbʉ mi dįnꞌa ra tꞌʉhni. Janangueꞌa bi mbɛnꞌndʉ yʉ́ dofʉi ngue da hyo yʉ ꞌuɛre bʉ Belén nɛ yʉ hnini i hänbʉ. Nɛ gätho ʉ yʉ tꞌʉhni hinga na pɛꞌtsꞌa nyojɛya gätho bi hyo. Nguetho bi man ʉ yʉn ꞌyohʉ, ya mbɛ má nyojɛya ya bi nɛqui a ra sø. 17 Nɛ nuꞌa bin ja, mayaꞌbʉ thoho bi man a ra pøngahyą ra Jeremías ngue ngubʉ din ja ꞌbʉ mi ꞌyɛ̨na:
18 Bin ja nꞌda ran tsꞌoni bʉ ra hnini Ramá,
ntsꞌɛdi bi mbah yʉ́ xisu yʉ judío,
bin zoni nɛ him bi ꞌyø a bi xi ʉ bi hyurpa yʉ́ mbʉi,
nguetho ɛ̨mmɛ im bɛ̨nꞌʉ yʉ́ tꞌʉhni bi thopi, bi ꞌyɛ̨nꞌa ra Jeremías ꞌbʉ mayaꞌbʉ.
19 Nɛ nuꞌbʉ mi du ra Herodes bʉya bi ꞌuį manꞌda rám ꞌbɛhni Oją a ra José ꞌbʉ min xui, bʉ ra häi Egipto.
20 ―Dami ndantsꞌi. Dami six a ra tꞌʉhni nɛ a rá mbe. Dami penjʉ bʉ ra häi Israel, nguetho ya bi du ʉ mí nde xtá hyo a ra tꞌʉhni, bi tꞌɛ̨mpꞌa ra José.
21 Nɛ nu ra José bʉya bi hyąx ra ꞌyu ní mba bʉ ra häi Israel ꞌbʉ mi hyatsꞌi, nɛ bi zix a ra tꞌʉhni nɛꞌa rá mbe ra tꞌʉhni bi zitsꞌi, ɛ̨na xtán zøm bʉ ra xɛqui Judea. 22 Pɛ nuꞌbʉ mí ꞌyø a ra José ngue in tsꞌʉtꞌabi bʉ ra Arquelao, bi zu da zøm bʉ mahønꞌa, nguetho nu ra Arquelao rá tsꞌʉntꞌʉ ra Herodes a. Nɛꞌa xí ꞌuį xø bi bɛ̨m bʉya, ngueꞌa hin da mba bʉ Judea. Janangueꞌa í mba bʉ ra xɛqui Galilea bʉya. 23 Nɛ bi mba dim ꞌbʉpʉ ra hnini Nazaret. Janangueꞌa bin ja ꞌbɛꞌa xmán tꞌoꞌtꞌi bʉ ja yʉ́ søcuą yʉ́ pøngahyą Oją, gue nu ra Jesús da tꞌɛ̨mbi ra mɛngu Nazaret.