Bi man rám hma Oją bʉ ja ra dąpo ra Xuua Nxixyą
3
1-2 Nɛ nubʉya nu ra Xuua Nxixyą bi dʉꞌmi bi xih yʉ jąꞌi nɛ bi ꞌyɛ̨na: ―Dami päh nin ꞌyomfɛ̨nihʉ nguetho ya mi tsꞌʉtho di manda ua rá tsꞌɛdi Oją, bi tꞌɛ̨mb yʉ jąꞌi.
Nɛ mí ꞌbʉpʉ ja ra dąpo bʉ ra xɛqui Judea ꞌbʉ min yąhʉ yʉ jąꞌi a ra Xuua.
3 Nɛ nu a ra Xuua gueꞌa bi man ra pøngahyą Isaías mayaꞌbʉ ngue bi ma ba ɛ̨hɛ, ꞌbʉ mi ꞌyɛ̨na:
Nꞌda ra jąꞌi din yą bʉ ja ra dąpo nɛ da ꞌyɛ̨na:
“Damin sähʉ ga simhbʉ ra Hmu mi tsꞌʉtho da zøcua,
dami hoc ni mbʉihʉ ga tømhbʉ xʉn ho,” da ꞌyɛ̨na, bi ꞌyɛ̨n a ra Isaías mayaꞌbʉ.
4 Nu yʉ́ he ra Xuua ám ꞌbe yʉ́ xingu yʉ camello, nɛ midín gʉtꞌʉ yʉ xifani, nɛ mi sa yʉ tꞌąxi nɛ mi si yʉ tꞌafi tꞌasa dąpo. 5 Nɛ nuꞌbʉ mi dʉꞌmi bi man rám hman a ra Xuua, bi mba ʉ yʉ mɛngu bʉ Jerusalén, bi zøm bʉ ꞌbʉh ra Xuua, nɛ yʉ mɛngu bʉ ra xɛqui Judea, nɛꞌʉ mi ꞌbʉpʉ hänbʉ ra dąthe Jordán, ngue nde da ꞌyøde ꞌbɛꞌa da manꞌa ra Xuua. 6 Nɛ nu ra Xuua bi xixyąba ʉ toꞌo bi ꞌyømanho ꞌbɛꞌa bi ma, nɛ bin juąnni nangue yʉ́ tsꞌoqui. Nɛ xʉn ngu bi xixyąba bʉ ja ra dąthe Jordán.
7 Nɛ xʉn ngu ma ngʉrpihe dyʉ israelhe, dyʉ judíohe, bi zøm bʉ mí ꞌbäh ra Xuua ɛ̨na din xixyą ʉ. Nuꞌʉ ꞌda yʉ fariseo ʉ, nɛ ʉ ꞌda yʉ saduceo ʉ. Nɛ nu ra Xuua bʉya bi ꞌyɛ̨mpꞌʉ:
―Nuꞌahʉ tenguꞌbʉ ni mɛnihʉ yʉ pozʉ nguetho gyʉ tontohʉ. Toꞌo bi xi ahʉ gua ɛ̨hmbʉ ua ngue gua ꞌdahmbʉ bʉ ja ran ʉnbi xʉn ʉ tho, bi ꞌyɛ̨na. 8 Ha guím bɛ̨mhbʉ da zä gan yąmhbʉ ꞌbʉ hin gui ꞌyøthʉ a rán säui ʉ toꞌo bi päh yʉ́ mbʉi, bi tꞌɛ̨mpꞌʉ ma ngʉrpihe. 9 Pɛ hin din ja ran ꞌyɛ̨tsꞌi ni mbʉihʉ ngue gui ꞌyɛ̨mhbʉ: “Nugähe yʉ́ tꞌʉhnigähe ra Abraham, ya hin gan nuhe ran ʉnbi,” hingui sä gui ꞌyɛ̨mhbʉ, nguetho nɛhya yʉ do i ꞌbongua da zä din jąꞌi ngue da ꞌyɛ̨mbi yʉ́ tꞌʉhni ra Abraham ꞌbʉ gueꞌa da nde Oją da ꞌyøtꞌe, bi ꞌyɛ̨nꞌa ra Xuua. 10 Nɛ nuꞌa ra aza ya mahoqui xʉn ho ngue da ꞌyɛx ʉ yʉ za hingui ho yʉ́n dätꞌä, nɛ da thøspʉ ja ra sibi din zø. Nɛ nuꞌahʉ tenguꞌbʉ gyʉ zahʉ ngue hingui ho yʉ́n dätꞌä, bi tꞌɛ̨mpꞌʉ yʉ fariseo nɛ yʉ saduceo.
11 Nɛ xø bi xi ʉ miꞌda:
―Nugä dí xixyą ahʉ nangue ra dehe ꞌbʉ ya gá päh ni mbʉihʉ, pɛ nuꞌa manꞌda ba ɛ̨hɛ, di hocꞌahʉ nangue rá Hogandąhi Oją tenguꞌbʉ nꞌda ra sibi. Nɛ nuꞌa, manꞌda i ja rá tsꞌɛdi xinda guecä. Hin dí sʉcä tengu a, i ɛ̨n a ra Xuua. 12 Nɛ da ꞌyøtꞌ ran juąnbi, tengutho ꞌbʉ i pa ma hoqui yʉ jʉ, ngue nꞌdanni i pa mꞌbɛꞌtsꞌi ʉ yʉ jʉ nɛ nꞌdanni da tꞌɛn ʉ yʉ́ häi. Nɛ nu ʉ yʉ́ häi da tꞌupʉ ja ra sibi njąmꞌbʉ i huɛ̨tꞌi, bi ꞌyɛ̨mb yʉ jąꞌi a ra Xuua.
Bin xixyą ra Jesús
13 Nɛ nubʉya bi nɛxpʉ ra häi Galilea ra Jesús, bi zøm bʉ ja ra dąthe Jordán guepʉ ja ra dąpo bí ꞌbʉh ra Xuua. Bi zøm bʉ ngue bi nde din xixyą a ra Jesús. 14 Pɛ nu ra Xuua him mi ndehma di xixyąbi ra Jesús, nɛ bi ꞌyɛ̨mbi:
―Pɛ nuꞌi guí ɛ̨na ga xixyą i, pɛ go man säꞌbe go gui xixyągui, bi ꞌyɛ̨nꞌa ra Xuua.
15 ―Pɛ nuya xʉn ho ꞌbʉ gui xixyągui, nguetho i jatho ga øthʉ ꞌbɛꞌa bi man Oją, bi ꞌyɛ̨nꞌa ra Jesús.
―Da nde ꞌbʉ, bi ꞌyɛ̨nꞌa ra Xuua bʉya.
16 Nɛ nuꞌbʉ mi gua a bin xixyą ra Jesús nɛ bi bøx bʉ ja ra dehe, ꞌbex bi nu ngue bi xoh mahɛ̨tsꞌi, nɛ bi nu bá cąh rá Hogandąhi Oją tengu nꞌda ra tꞌazʉ, bi zøpʉ mí ꞌbä a ra Jesús. 17 Nɛ ꞌbex bi tꞌø a nꞌda ra nde bí ꞌyɛ̨h mahɛ̨tsꞌi, bi ꞌyɛ̨na:
―Nuna guehna ma Tsꞌʉntꞌʉgä na, ngue ɛ̨mmɛ dídi huɛ̨cä nɛ dí numanho, bi ꞌyɛ̨n Oją.