Bi mba ntsꞌä a ra Jesús nangue ra zįthu
4
Nɛ nu rá Hogandąhi Oją bʉya ꞌbex bi zixpʉ ja ra dąpo, in ndepe da mba ntsꞌä a ra Jesús nangue ra zįthu.2 Nɛ nyote pa nɛ nyote nxui bim ꞌbʉpʉ ja ra dąpo, nɛ him bin sihmɛ, nɛ ɛ̨mmɛ bin tumanthuhu maha. 3 Nɛ nubʉya, bi zøm bʉ a ra zįthu ngue da zäp rá mbʉi ra Jesús. Nɛ bi ꞌyɛ̨mbi:
―Nuꞌbʉ majuąni rá Tsꞌʉntꞌʉ i Oją, dami japi dim hmɛ yʉ do i ꞌbongua nɛ gui si, bi ꞌyɛ̨nꞌa ra zįthu.
4 Nu ra Jesús bi dąti:
―Hin ga øtꞌä a, bi ꞌyɛ̨na. Nguetho mán tꞌoꞌtꞌi bʉ ja rám hman Oją, hinga høntꞌa ra hmɛ dám ꞌbʉh yʉ jąꞌi pɛ nɛ a gätho i ma Oją, bi tꞌɛ̨mpꞌa ra zįthu.
5 Nu ra zįthu xø bi zixpʉ Jerusalén a ra Jesús, nɛ bi ꞌyɛ̨xpʉ magątsꞌi rá ꞌbetꞌe ra dąniją. 6 Nɛ bi ꞌyɛ̨mbi:
―Nuꞌbʉ majuąni gueꞌe rá Tsꞌʉntꞌʉ i Oją, damin säqui nɛ gui so nʉ häi,
Nɛ Oją ba pɛhn yʉ́m ꞌbɛhni mahɛ̨tsꞌi ngue da mbäxꞌiꞌi nɛ da bɛntꞌi i,
nɛ hin hapʉ gui ꞌuaqui nangue yʉ do,
tengutho im mam bʉ ja rám hman Oją, bi ꞌyɛ̨nꞌa ra zįthu, bi tꞌɛ̨mpꞌa ra Jesús bʉya.
7 Nu ra Jesús bi ꞌyɛ̨na:
―Hąha, gueꞌa i hmam bʉ, pɛ nɛ a i hmam bʉ, ngue “Nu Oją ma Hmuhʉ njongui sä da zä a ngue da bą ꞌbʉ majuąni da ꞌyøtꞌa im manꞌa,” bi ꞌyɛ̨nꞌa ra Jesús.
8 Nɛ xø manꞌdandį bʉya, bi zix mahønꞌa ra zįthu a ra Jesús bʉ rá nyą nꞌda ra tꞌøhø xʉn hɛ̨tsꞌi, nɛ bi ꞌyuti gätho na ndoho ra ximhäi nɛ gätho ꞌbɛꞌa xʉn ho i ja bʉ ja yʉ hnini. 9 Nɛ bi ꞌyɛ̨mbi:
―Gätho ga ꞌda a ya ꞌbɛꞌa dá utꞌi i ꞌbʉ gan dąnyahmu gui thąndegui, bi tꞌɛ̨mpꞌa ra Jesús, bi ꞌyɛ̨nꞌa ra zįthu.
10 Nɛ bi dąh mahønꞌa ra Jesús, bi ꞌyɛ̨mbi:
―Nuꞌi grá zįthu, dami ꞌdagui nanguecä, nguetho nu rám hman Oją i ɛ̨na: “Høntꞌa Oją ra Hmu ga thąndehʉ nɛ ga ørpahʉ rá ꞌbɛfi a,” bi ꞌyɛ̨nꞌa ra Jesús.
11 Nɛ nubʉya bi ꞌdaꞌa ra zįthu bʉ ꞌbʉh ra Jesús, nɛ bá ɛ̨h yʉ́m ꞌbɛhni Oją bi zøpʉ mí ꞌbʉ a ra Jesús bʉ dąpo nɛ bi ꞌuįn a.
Ra Jesús bi dʉmp rá ꞌbɛfi bʉ ra xɛqui Galilea
12 Nɛ bi bøm bʉ ja ra dąpo a ra Jesús bʉya. Nɛ nuꞌbʉ mí bøm bʉ, bi ꞌyøde ngue bi jotꞌa fädi ra Xuua nxixyą. Janangueꞌa bi mbengda bʉ ra häi Galilea. Guepʉ ra hnini Nazaret bim ꞌbʉpʉ mahønꞌa. 13 Pɛ hinga nyaꞌa bim ꞌbʉpʉ nɛ bi mba bʉ ra hnini Capernaum, nubʉ ra ndendądehe guepʉ ra xɛqui yʉ́ häi mam bombøtahe ra Zabulón nɛ mam bombøtahe ra Neftalí. 14-15 Nuꞌbʉ mi zøm bʉ a ra Jesús bin ja ꞌbɛꞌa bi ꞌyoꞌtꞌa ra pøngahyą Isaías mayaꞌbʉ ngue din ja bʉ ra häi Zabulón nɛ ra häi Neftalí, i hänbʉ ra dądehe, ꞌdanguadi ra dąthe Jordán, ngue nɛ a i tꞌɛ̨mbi Galilea, guepʉ ꞌbʉ ʉ i thąnde yʉ́ ojązɛhɛ. Nɛ bi ꞌyɛ̨nꞌa ra pøngahyą ngue:
16 Nu yʉ jąꞌi mi ꞌbʉpʉ tenguꞌbʉ i bʉpʉ ja ra ꞌbɛxui, nɛ i ja bʉ ran dąte,
pɛ nuya bi nɛqui nꞌda ran nɛqui ngue di yotꞌi,
bi ꞌyɛ̨nꞌa ra Isaías ꞌbʉ mayaꞌbʉ. Nɛ gueꞌa bin ja ꞌbʉ mi zøm bʉ ra Jesús.
17 Nɛ nu ra Jesús bi dʉꞌmi bi mam bʉ rám hma nɛ bi ꞌyɛ̨na:
―Dami päh nin ꞌyomfɛ̨nihʉ nangue yʉ tsꞌoqui, ngue da zä di manda ua rá tsꞌɛdi Oją bi zøcua guí ꞌbʉhmbʉ, bi ꞌyɛ̨mb yʉ jąꞌi a ra Jesús ꞌbʉ mim ꞌbʉpʉ.
Goho yʉ mbahuą bi dɛnꞌna ra Jesús
18 Nɛ nꞌda ra pa mí ꞌyo bʉ ja ra ndendądehe a ra Jesús nubʉ ra häi Galilea, nɛ bi nu yoho yʉn ꞌyohʉ din ꞌyohʉ zɛhɛ ʉ. Nuꞌa nꞌda ra Simón, gueꞌa ra Pedro a. Nɛ nu manꞌda ra Andrés. Nɛ nuꞌʉ yʉ mbahuą ʉ, nɛ mi ɛnxitꞌą bʉ ja ra dądehe. 19 Nɛ nu ra Jesús bi ꞌyɛ̨mpꞌʉ:
―Ba tɛngaui, gui xihmbʉ yʉ jąꞌi da ꞌyɛ̨cꞌyɛigui, tengu thoho bʉ gní thɛui yʉ huą guí øtꞌui, bi ꞌyɛ̨mpꞌʉ.
20 Nɛ ꞌbex bi hyɛpʉ yʉ́ xitꞌą nɛ bi dɛnꞌna ra Jesús.
21 Nɛ bi thopʉya bin ꞌyo mi tsꞌʉ a ra Jesús, nɛ bi nu mi yoho yʉn ꞌyohʉ din ꞌyohʉ zɛhɛ ʉ, nɛ nu nꞌda ra Jacobo, nɛ nu manꞌda ra Xuua, gätho yoho yʉ́ tsꞌʉntꞌʉ ra Zebedeo ʉ. Nɛ mín ꞌyohʉ a rá ta mi hu bʉ ꞌbɛn yʉ́ mbosa, mí ꞌuɛt yʉ́ xitꞌą. Nɛ xø bi xi ʉ da dɛnni mahønꞌa. 22 Nɛ ꞌbex bi zopʉ rá ta nɛꞌʉ yʉ́ mbosa, ꞌbex bi dɛnꞌna ra Jesús bʉya.
Ra Jesús bi xänbi xʉn ngu yʉ jąꞌi
23 Nɛ nu ra Jesús mí ꞌyo gätho ra häi Galilea nɛ mí xänba ʉ yʉ jąꞌi bʉ ja yʉ niją nɛ bi ma ꞌbɛpʉ dí manda ua rá tsꞌɛdi Oją. Nɛ midí hoc yʉ hyɛ̨nni ngue ꞌbɛꞌa gä ní gɛ̨hɛ mí hɛ̨mpꞌa nꞌda ngu nꞌda. 24 Nɛ gätho yʉ jąꞌi bʉ ra xɛqui Siria bi ꞌyøde ꞌbɛꞌa øt ra Jesús, nɛ bá thunba ʉ yʉ hyɛ̨nni ngue ꞌdahma ꞌdanꞌyo yʉn ʉ mí hɛ̨mbi nɛꞌʉ mín ꞌyohʉ yʉ zįthu, nɛꞌʉ ząntꞌa mi sändąte ꞌda yʉ ora, nɛꞌʉ xí tsꞌa rá jąꞌi, nɛ gätho bi hocꞌa ra Jesús. 25 Nɛ xʉn ngu yʉ jąꞌi bi dɛnꞌna ra Jesús. Mín numanho da dɛnthoho yʉ jąꞌi nangue ꞌbɛꞌa bi ꞌyøtꞌe. Nuꞌʉ ꞌda yʉ mɛngu bʉ ra xɛqui Galilea, nɛ ʉ ꞌda yʉ mɛngu bʉ ra xɛqui Decápolis, nɛꞌʉ ꞌda mí ꞌbʉpʉ Judea, nɛꞌʉ ꞌda mí ꞌbʉpʉ ꞌdanguadi ra dąthe Jordán, nɛꞌʉ ꞌda mí ꞌbʉpʉ ra hnini Jerusalén. Gätho bi zøm bʉ mi ꞌbʉ a ra Jesús.