Ra Jesús bi mba bʉ ja ra nyuni
5
Nɛ nu ra Jesús ꞌbʉ mi nu yʉ jąꞌi ɛ̨mmɛ xʉn ngu bi zøpʉ, nɛ bi ndex bʉ ja ra nyuni nɛ mi hupʉ. Nɛꞌʉ yʉ́ xädi bʉya bi zøm bʉ mí hudi, ꞌdarpʉ mi huhmbʉ. 2 Nɛ bi xänba ʉ.Nuꞌʉ i hąn rán jąpi Oją
3 Nɛ bi ꞌyɛ̨mpꞌʉ yʉ́ xädi ra Jesús:
―Nuꞌʉ toꞌo pąsɛ hingui ho yʉ́ mbʉi bʉ na nu Oją nɛ da hyon Oją di zɛdi, nu Oją da zimanho bʉ di manda rá tsꞌɛdi, janangueꞌa mająpi ʉ bʉya.
4 Nɛ nuꞌʉ tu yʉ́ mbʉi, Oją da hyurpa yʉ́ mbʉi, janangueꞌa mająpi ʉ.
5 Nɛ nuꞌʉ im bɛ̨ni i cosɛ häi, da hyąn a ra hogahäi bi man Oją di unni, janangueꞌa mająpi ʉ.
6 Nɛ nuꞌʉ i humbi da ꞌyøtꞌ ran ho, Oją di japi da ꞌyøtꞌe xʉn ho, janangueꞌa mająpi ʉ.
7 Nɛ nuꞌʉ di huɛ̨c yʉ́ mijąꞌihʉ, xin di huɛ̨c Oją ʉ, janangueꞌa mająpi ʉ.
8 Nɛ nuꞌʉ nꞌdatꞌa im bɛ̨ni, dim ꞌbʉhmbʉ Oją ʉ, janangueꞌa mająpi ʉ.
9 Nɛ nuꞌʉ øtꞌ ran hocpate, nu Oją da ꞌyɛ̨mbi yʉ́ tꞌʉhni ʉ, janangueꞌa mająpi ʉ.
10 Nɛ nuꞌʉ i nu ran ʉnbi nangue ran ho i øtꞌe, da yʉrpʉ di manda rá tsꞌɛdi Oją ʉ, janangueꞌa mająpi ʉ, i ɛ̨nꞌa ra Jesús.
11 Nɛ gan johyahʉ ꞌbʉ i ʉꞌtsꞌahʉ yʉ jąꞌi nɛ i thenꞌnahʉ nɛ i xi ahʉ yʉ fɛhni ꞌbʉ guí tɛngahʉ, bi ꞌyɛ̨nꞌa ra Jesús. 12 Nɛ da hyu ni mbʉihʉ, gan johyahʉ, guim bɛ̨mhbʉ ngue ꞌdatꞌa ran ʉnbi guín nuhʉ ʉ yʉ pøngahyą mam ꞌbɛtꞌo, nɛ i ja ꞌbɛꞌa din ꞌda ahʉ ngue am ꞌbɛꞌtsꞌi mahɛ̨tsꞌi, bi ꞌyɛ̨nꞌa ra Jesús.
Ra ų ua ja ra ximhäi
13 ―Nuꞌahʉ gyʉ ųhʉ hapʉ ꞌbʉh yʉ jąꞌi, nguetho nuꞌa ra ų di hoqui ꞌbɛꞌa i pa njapi, nɛ ngutho ahʉ guídí hojʉ yʉ jąꞌi, i ɛ̨n a ra Jesús. Pɛ nuꞌbʉ bi ꞌbɛh rá tsꞌɛdi ra ų, ya hinꞌyʉ ꞌbɛꞌa sä dí hoqui, janangue da mba ma bʉntꞌi thoho bʉ häi. Dami jamansuhʉ hin din ja bʉ gui ꞌyøthʉ tengu a, bi ꞌyɛ̨mpꞌʉ yʉ́ xädi ra Jesús.
Ran nɛqui ua ja ra ximhäi
14 Nɛ bi ꞌyɛ̨nꞌa ra Jesús:
―Nu ahʉ gyʉn nɛquihʉ bʉ ꞌbʉh yʉ jąꞌi, bi ꞌyɛ̨mpꞌʉ yʉ́ xädi. Dami jafʉ da hnu a ran nɛqui. Tengu nꞌda ra hnini i ja bʉ ja rá nyą ra tꞌøhø, am ꞌbatho xʉn ho ngue hinꞌyʉ ꞌbɛꞌa i juti. 15 Ngutho nꞌda ra sibi, hingui sä da mba ma cʉꞌtꞌi bʉ ja ra huada ꞌbʉ da mba ma søque, i jatho da tꞌɛ̨xpʉ mꞌbatho, janangueꞌa di yotꞌi gätho ꞌbʉpʉ. 16 Nɛ ngutho gui ꞌyøthʉ ngue tenguꞌbʉ gyʉ sibihʉ ɛ̨mmɛ di hyärpʉ i ꞌbʉh yʉ jąꞌi. Janangueꞌa da hnutꞌahʉ xʉn ho nin tꞌøtꞌehʉ, nɛ ʉ da ꞌyɛ̨spa Oją ma Tahʉ ꞌbʉpʉ mahɛ̨tsꞌi ʉ bʉya, bi ꞌyɛ̨mpꞌʉ yʉ́ xädi ra Jesús.
Ra Jesús bi ꞌyurcahʉ ꞌbɛꞌa nam bønꞌʉ yʉ́n tꞌɛ̨di ra Moisés
17 Nɛ xø bi ꞌyɛ̨nꞌa ra Jesús:
―O guím bɛ̨mhbʉ ngue ga ꞌbɛcä yʉn tꞌɛ̨di bi man ra Moisés nɛ ꞌbɛꞌa bin xänbate ʉ yʉ pøngahyą, pɛ bá ɛ̨cä ngue ga utꞌahʉ ꞌbɛꞌa majuąni nam bøn ʉ. 18 Majuąni dí xi ahʉ, gätho ꞌbɛꞌa ntꞌoꞌtꞌi bʉ, nɛ xínga nꞌda ʉ ngue hin din ja, ꞌbʉ guextaꞌa i jatho ra ximhäi nɛ mahɛ̨tsꞌi. 19 Janangueꞌa madí tsꞌʉtho maha a ram hma ngue hingui nde da ꞌyʉrpa ra güɛnda nꞌda, nɛ i xi ʉ miꞌda ngue din jabʉ da ꞌyøtꞌe, pɛ zi tsꞌʉtho rá tsꞌɛdi di nɛqui bʉ bí ja rá tsꞌɛdi Oją bʉ mahɛ̨tsꞌi ꞌbʉ. Pɛ nuꞌʉ di jąꞌtsꞌi gätho ʉ mam bʉ ja rám hma Oją, nɛ i xi ʉ miꞌda ngue din ja bʉ da ꞌyøtꞌe, nɛ manꞌda xʉn ngu rá tsꞌɛdi di nɛqui bʉ bí ja rá tsꞌɛdi Oją, bi ꞌyɛ̨nꞌa ra Jesús. 20 Nɛ gueꞌa dí xi ahʉ a, ndeꞌbʉ manꞌda xʉn ho gui ꞌyøthʉ xinda gue ma ngʉrpihʉ yʉ fariseo nɛ yʉ xänbate niją. Nguetho nuꞌbʉ hin gui ꞌyøthʉ xʉn ho, njąmꞌbʉ da zä gui cʉthʉ hapʉ di manda rá tsꞌɛdi Oją, bi ꞌyɛ̨mpꞌʉ yʉ́ xädi ra Jesús.
Ra Jesús bi ma hingui ho ra cuɛ
21 Nɛ manꞌda bi man ra Jesús, bi ꞌyɛ̨na:
―Gueꞌbʉ go mayaꞌbʉ bi sih mam bombøtahʉ ran tꞌɛ̨di ngue im ma: “O guí hącpahʉ rá te ni mijąꞌihʉ, nɛ nu toꞌo da hyącpa rá te rá mijąꞌiui, i jatho da tsꞌänba rá muui a bi ꞌyøtꞌe,” bi tꞌɛ̨mpꞌʉ. 22 Pɛ i jagä manꞌda ga xi ahʉ, ngue nuꞌbʉ ꞌboꞌo di cuɛp rá mijąꞌiui nangueꞌa bi ꞌyørpe, ngue im bɛ̨ni di coꞌtsꞌi, guehma da nu ran tsꞌɛmbi. Nɛ nuꞌa toꞌo da xih ra tsꞌore bʉ ja rá hmi rá mijąꞌiui, da tsꞌixpʉ ꞌbʉh yʉ ngʉrpi da tsꞌɛmbi. Nɛ nu toꞌo ɛ̨mmɛ then rá mijąꞌiui dí mba bʉ ja ran tsꞌɛmbi ngue ra sibi njąmꞌbʉ i huɛ̨tꞌi, bi ꞌyɛ̨nꞌa ra Jesús.
23 Janangueꞌa nuꞌbʉ guí pähä bʉ ja ra niją ngue guí ɛ̨na gui thąndehʉ Oją, pɛ nuꞌbʉ gá sømhbʉ bʉ nɛ ꞌbex gá bɛ̨mhbʉ ꞌbɛꞌa xquín xihmi ni mijąꞌihʉ, 24 gua peng thohʉ nɛ ꞌbɛ gui mba bʉ i ꞌbʉ a ni mijąꞌiui gam punbaui, ja da zä gui thąndehʉ Oją bʉya, bi ꞌyɛ̨nꞌa ra Jesús.
25 Nɛ nuꞌbʉ guí pąhmbʉ ja ꞌbɛꞌa guidín xihmbʉ nꞌda ni mijąꞌihʉ, pɛ gan hocpa zɛhɛhʉ, nɛ hin gui tømhbʉ da tsꞌix ahʉ bʉ ꞌbʉh yʉ tsꞌʉtꞌabi. Nguetho nuꞌbʉ gui sømhbʉ bʉ, 26 guehma da jo ahʉ nɛ hin da hyɛcꞌa thohohʉ ra zɛꞌmi jagueꞌbʉ gui unhdʉ ra mbɛti hangu da ꞌyä ahʉ, nɛ xínga nꞌda centavo da nde gui ꞌyɛspahʉ, bi ꞌyɛ̨n a ra Jesús.
Ra Jesús bi ꞌyɛ̨na hingui ho ran ꞌyomtꞌɛ̨ni
27 Nɛ manꞌda bi xih yʉ́ xädi ra Jesús:
―Nu manꞌda ran tꞌɛ̨di mayaꞌbʉ i ɛ̨na: “O guí øthʉ ran ꞌyomtꞌɛ̨ni.” 28 Pɛ i jagä manꞌda ga xi ahʉ, ngue nuꞌbʉ nꞌda ran ꞌyohʉ da hyantꞌa nꞌda ra xisu, nɛ im bɛ̨nꞌa nꞌda ran ꞌyomfɛ̨ni xʉn tsꞌo nangue a, madagueꞌbʉ bi bɛ̨ntho, tenguꞌbʉ ya bi ꞌyøtꞌ ran ꞌyomtꞌɛ̨ni bʉ rá mbʉi a bʉya, bi ꞌyɛ̨n a ra Jesús.
29-30 Janangue nuꞌbʉ i ja a i utꞌahʉ ra tsꞌoqui, pɛ gui sąmzɛhɛ ni mbʉihʉ madagueꞌbʉ guím bɛ̨mhbʉ ɛ̨mmɛ xʉn ʉ ꞌbʉ gui ꞌyɛshʉ. Tenguꞌbʉ xquí hyąꞌa nꞌda ni dähʉ nɛ xquí ꞌyɛmhbʉ bʉ maꞌueni nɛ xquí nꞌdadä thohohʉ, uague tenguꞌbʉ xquí hyɛcꞌa nin ꞌyɛihʉ nɛ xquí ꞌyɛmhbʉ bʉ maꞌueni nɛ xquí nꞌdaꞌyɛ thohohʉ. Pɛ manꞌda xʉn ho guin nuhʉ nangue gá ꞌbɛhmbʉ yʉ tsꞌoqui, xinda gueꞌbʉ xquí ꞌyøthʉ yʉ tsꞌoqui nɛ xquí ꞌbɛhmbʉ ran ho maząi bʉ ja ra sibi.
Ra Jesús bi ꞌyɛ̨na hin da hyɛh rá xisu nꞌda ran ꞌyohʉ
31 Nɛ manꞌda bi man ra Jesús, bi ꞌyɛ̨na:
―Nɛ a bi mam ꞌbʉ mayaꞌbʉ gue: “Nuꞌbʉ nꞌda ran ꞌyohʉ in nde da hyɛh rá xisu, i jatho da ꞌyøtꞌa nꞌda ra søcuą din xummi.” 32 Pɛ i jagä manꞌda ga xi ahʉ, ngue hingui sä da hyɛh rá xisu nꞌda ran ꞌyohʉ gueꞌbʉ hingui øtꞌ ran ꞌyomtꞌɛ̨ni a ra xisu. Nguetho nuꞌbʉ bi hyɛh rá xisu nꞌda ran ꞌyohʉ, di japi da ꞌyøtꞌ ran ꞌyomtꞌɛ̨ni a ra xisu ꞌbʉ bi hyɛgui nɛ dim ꞌbʉhmi manꞌda ranꞌ yohʉ. Nɛ ꞌbʉ nꞌda ran ꞌyohʉ dim ꞌbʉhmi nꞌda ra xisu bi thɛgui, ra ꞌyomtꞌɛ̨ni a, bi ꞌyɛ̨n a ra Jesús.
Nte ga ndønbahʉ rá thuhu, bi ꞌyɛ̨nꞌa ra Jesús
33 ―Nɛ guí pąhmbʉ ran tꞌɛ̨di mí hmam ꞌbʉ mayaꞌbʉ ngue i ɛ̨na: “Pɛ nuꞌbʉ gá ndønbahʉ rá thuhu Oją, guehma gui jąꞌtsꞌa gá mamhbʉ.” 34 Pɛ nuya i jagä manꞌda ga xi ahʉ, bi ꞌyɛ̨nꞌa ra Jesús. Hinꞌyʉ ꞌbɛꞌa i sä gui ndønbahʉ rá thuhu ꞌbʉ ja a guí xihmbʉ ni mijąꞌihʉ ngue guín ndefʉ da ꞌyɛ̨cꞌyɛi a guí xihmbʉ. Hingui sä gui ndømhbʉ Oją, pɛ ngutho hingui sä gui ndømhbʉ mahɛ̨tsꞌi, nguetho nu bʉ mahɛ̨tsꞌi bí ja bʉ rá tsꞌɛdi Oją. 35 Nɛ xíngui sä gui ndømhbʉ ra ximhäi, nguetho nɛcua i ja ua rá tsꞌɛdi Oją. Nɛ xíngui sä gui ndømhbʉ ra hnini Jerusalén, nguetho rá hnini rá Thahni Oją a. 36 Nɛ xíngui sä gui ndømhbʉ ni yąhʉ, nguetho ꞌdatꞌa Oją bi zänꞌna, nɛ xínga nꞌda ni xtąhʉ sä gui sänzɛhɛhʉ gueꞌbʉ xʉn tꞌaxi o gue xʉm pothi da gohi. 37 Pɛ nuꞌbʉ ja a guí xihmbʉ ni mijąꞌihʉ, “da zä,” ga ɛ̨mhbʉ ꞌbʉ da zä, “hin da zä,” ga ɛ̨nthohʉ ꞌbʉ hin da zä. Pɛ gätho miꞌda yʉm hma bí nɛxpʉ ja rán ꞌyomfɛ̨ni ra zįthu, bi ꞌyɛ̨nꞌa ra Jesús.
Bi ꞌyɛ̨nꞌa ra Jesús hin ga cosꞌhʉ ꞌbʉ ja a da tꞌørcahʉ
38 Nɛ xø bi ꞌyɛ̨nꞌa ra Jesús:
―Nuꞌahʉ gá ꞌyøhmbʉ ꞌbɛꞌa bi sih mam bombøtahʉ ngue: “Nuꞌbʉ nꞌda ra jąꞌi di tsꞌonba rá dä rá mijąꞌiui, pɛ nɛ a da mba ma tsꞌonbi rá dä. Nɛ nuꞌbʉ rá tsꞌi da ꞌyøcpe, ngutho nɛꞌa xin da tꞌøcpa rá tsꞌi.” 39 Pɛ nuya i jagä manꞌda ga xi ahʉ ya, ngue nuꞌbʉ ꞌbʉ a nꞌda in nde di ʉnꞌnahʉ, pɛ o guí sʉhmbʉ a. Nɛ nuꞌbʉ ꞌboꞌo da mbɛpꞌahʉ ꞌdanguadi ni hmihʉ, gui unhdʉ manꞌda nguadi da mbɛpꞌahʉ. 40 Nɛ nuꞌbʉ ꞌboꞌo da zix ahʉ bʉ ꞌbʉh ra zɛꞌmi ngue da gąnꞌna ni pahnihʉ, pɛ nɛ a ni cotohʉ gui unhdʉ. 41 Nɛ nuꞌbʉ i si ahʉ gui tuspahʉ rá ꞌbɛni nꞌda ra jąꞌi nꞌda ora, xʉn ho ꞌbʉ nyo ora gui tuxhʉ a rá ꞌbɛni. 42 Nɛ høntꞌa go toꞌo da ꞌyä ahʉ ꞌbɛꞌa i honi, dami unhdʉ. Nɛ nuꞌbʉ ꞌboꞌo da mipꞌahʉ ꞌbʉ ja a guí pɛsꞌhʉ, pɛ xʉn ho ꞌbʉ gui unhdʉ, bi ꞌyɛ̨nꞌa ra Jesús.
Ga huɛ̨c man sʉihʉ, bi ꞌyɛ̨nꞌa ra Jesús
43 ―Nɛ a nꞌda ram hma mayaꞌbʉ i ɛ̨na: “Dami huɛ̨c ni amigohʉ nɛ gui ʉcpa nin sʉihʉ,” mí tꞌɛ̨nꞌahʉ. 44 Pɛ i ja manꞌda ga xi ahʉ, ngue gui huɛ̨c nin sʉihʉ, gan yąmanhohʉ ʉ man yʉ tsꞌore nangue ahʉ, nɛ gui ꞌyørpahʉ ran ho toꞌo di ʉcꞌahʉ. Nɛ dami ꞌyäfʉ rá mate Oją ʉ toꞌo i numanꞌʉ ahʉ nɛ ʉ di ʉnꞌnahʉ, bi ꞌyɛ̨n a ra Jesús. 45 Nɛ nuꞌbʉ ngubʉ gui ꞌyøthʉ, ꞌdaꞌangu gá ꞌyøthʉ a ma Tahʉ ꞌbʉpʉ mahɛ̨tsꞌi ngue bá pɛnh ra ꞌye nɛ ra hyadi. Pɛ hinga hønbʉ ꞌbʉ ʉ yʉ hocjąꞌi gue i so ra ꞌye nɛ ra hyadi, pɛ nɛpʉ i ꞌbʉh yʉ tsꞌomꞌbäi, bi ꞌyɛ̨na. 46 Pɛ nuꞌbʉ høntꞌʉ toꞌo di huɛ̨cꞌahʉ guidí huɛ̨jʉ, ꞌbɛꞌa gue gá tąhmbʉ ꞌbʉ ngubʉ gá ꞌyøthʉ. Pɛ nɛ nꞌdatꞌa gá ꞌyøthʉ ʉ yʉ ziyate hyącahäi. 47 Pɛ ha guí ɛ̨mhbʉ xʉn ho guí øthʉ ꞌbʉ høntꞌʉ ni cuhʉ guidí zɛnguahʉ. Nuꞌbʉ guin jahʉ bʉ, ꞌdaꞌangu guí øthʉ ʉ i thąnde yʉ́ oją zɛhɛ. 48 Pɛ ndeꞌbʉ xʉn hotho gui ꞌyøthʉ, nguetho xʉn hotho Oją ma Tahʉ bí ꞌbʉpʉ mahɛ̨tsꞌi, bi ꞌyɛ̨mpꞌʉ yʉ́ xädi ra Jesús.