Hin ga øthʉ ran ꞌyɛ̨tsꞌi ꞌbʉ dí øthʉ yʉn tꞌøtꞌe xʉn ho
6
Nɛ manꞌda bi man ra Jesús, bi ꞌyɛ̨mpꞌʉ mi ꞌbʉpʉ:―Pɛ nuꞌbʉ guí øthʉ rá ꞌbɛfi Oją, hin gui ꞌyøthʉ da ꞌyɛ̨sꞌa ni mijąꞌihʉ, nguetho hin te di ꞌda ahʉ ma Tahʉ ꞌbʉpʉ mahɛ̨tsꞌi ꞌbʉ din jabʉ gui ꞌyøthʉ, bi ꞌyɛ̨nꞌa. 2 Nɛ nuꞌbʉ guín nde gui fäxhʉ nꞌda ra hyoya, hin gui ꞌyøthʉ ngue da nu ahʉ yʉ jąꞌi, tengu øtꞌʉ di yorpa a im bɛ̨ni ꞌbʉ di unꞌna nꞌda ran tꞌunni yʉ hyoya, ngue di um bʉ ja yʉ niją o guepʉ ja yʉ ꞌyu ngue in nde da ꞌyɛ̨spa yʉ jąꞌi ꞌbɛꞌa i øtꞌe. Majuąni dí xi ahʉ, ya høntꞌa ran ꞌyɛ̨tsꞌi bi dąha ꞌbʉ ngubʉ i øtꞌe, bi ꞌyɛ̨na. 3 Pɛ nuꞌbʉ i ja a guí nde gui unhdʉ nꞌda zi hyoya, ndeꞌbʉ hin gui xihmbʉ ʉ miꞌda ꞌbɛꞌa gá ꞌyøthʉ. 4 Nɛ manꞌda xʉn ho ꞌbʉ hin njon da nu ꞌbɛꞌa guídí unhdʉ, pɛ go da nu Oją ma Tahʉ, nɛ i ja ꞌbɛꞌa din ꞌda ahʉ bʉya, bi ꞌyɛ̨nꞌa ra Jesús.
Hingui yoho guim bɛ̨mhbʉ ꞌbʉ guí yąhʉ Oją
5 Nɛ manꞌda dí xi ahʉ:
―Nuꞌbʉ guí yąhʉ Oją, o guí øthʉ tengu i øtꞌʉ di yorpa a im bɛ̨ni, bi ꞌyɛ̨nꞌa ra Jesús. Nuꞌʉ, i ꞌbäpʉ ja yʉ niją nɛpʉ ja yʉ xoꞌyu, ɛ̨na i yąhʉ Oją pɛ høntꞌa ran ꞌyɛ̨tsꞌi im bɛ̨ni. Majuąni dí xi ahʉ, høntꞌa ran ꞌyɛ̨tsꞌi bi dąha nangue ꞌbɛꞌa i øtꞌe. 6 Nɛ nuꞌbʉ guí yąhʉ Oją gui mbähä bʉ njon da nu ahʉ, pɛ Oją ma Tahʉ go i nu ahʉ nɛ di ꞌda ahʉ ꞌbɛꞌa guí äfʉ a, i ɛ̨na.
7 Pɛ hinga guextaꞌa ram hma gui mamhbʉ ngue nte ní mba tho ꞌbʉ guí yąhʉ Oją, tengu i øtꞌʉ tɛn yʉ́ oją zɛhɛ. Nɛ sä im bɛ̨ni i øꞌa Oją ꞌbɛꞌa im ma ꞌbʉ xʉn ngu i xifi. 8 Nɛ o guí øthʉ tengu i øtꞌʉ, nguetho nu Oją ma Tahʉ ya i pądi ꞌbɛꞌa gätho guí homhbʉ gueꞌbʉ hinga ná äfʉ, i ɛ̨na. 9 Pɛ guim bɛ̨mhbʉ ꞌbʉ guí yąhʉ Oją ꞌda yʉm hma tengu dí xi ahʉ ngue:
Nuya ma Ta ahe guí ꞌbʉpʉ mahɛ̨tsꞌi.
Da hnumansu ni thuhu.
10 Nɛ dín ndehe din ja ua nꞌdihi ni tsꞌɛdi ngue di manda ua.
Nɛ da tꞌøtꞌ ua ni pähä ua ja ra häi tengu tho i tꞌørpʉ mahɛ̨tsꞌi.
11 Nɛ dami ꞌdaje ran tsꞌihmɛ dí homhbe ra pa i jabʉ ya.
12 Dami punga ma tsꞌoquihe, tengu thoho bʉ na punbahe ʉ i ørcahe ran tsꞌo.
13 Nɛ o guí hɛgahe da dąje ran tsꞌo, pɛ dami yąnje nangue ran tsꞌo.
Nguetho nuꞌi gra hmutsꞌʉtꞌabi, gä di manda ua ja ra häi ni tsꞌɛdi, nɛ i ja ni tsꞌɛdi mixte njąmꞌbʉ da guadi gätho yʉ pa maząi.
Nɛ høntꞌa dí xiꞌahe ya.
14 Nguetho nuꞌbʉ gadí punbahʉ yʉ́ tsꞌoqui ni mijąꞌihʉ, ngutho da ꞌyøtꞌahʉ Oją ma Tahʉ ꞌbʉpʉ mahɛ̨tsꞌi, di punꞌna ni tsꞌoquihʉ. 15 Pɛ nuꞌbʉ hin gadí punbahʉ ni mijąꞌihʉ, nɛ ahʉ hin di punꞌnahʉ Oją ma Tahʉ ꞌbʉpʉ mahɛ̨tsꞌi ꞌbʉ, bi ꞌyɛ̨nꞌa ra Jesús.
Hin gui ꞌyuhmbʉ ꞌbʉ guí ɛtꞌ yʉn tsꞌihmɛ ꞌbʉ guín yąhʉ Oją
16 ―Nɛ nuꞌahʉ, nuꞌbʉ guí nde gui ꞌyɛtꞌ nin sihmɛhʉ nꞌda ora ngue guim bɛ̨mhbʉ Oją, o guí øthʉ tengu øtꞌʉ di yorpa a im bɛ̨ni. Nuꞌʉ i ut yʉ jąꞌi ꞌbɛꞌa øtꞌe, ndeꞌa dí hnumanho, pɛ høntꞌa ran ꞌyɛ̨tsꞌi bi dąha nangue ꞌbɛꞌa bi ꞌyøzɛhɛ, bi ꞌyɛ̨nꞌa ra Jesús. 17 Pɛ nu ahʉ, ꞌbʉ guí ɛtꞌ nin sihmɛhʉ ngue guím bɛ̨mhbʉ Oją, pɛ gan ꞌyomanhohʉ tenguꞌbʉ ya gán sihmɛhʉ. 18 Nꞌdahma njon da bądi ꞌbɛꞌa gá ꞌyøthʉ gue gá ꞌyɛtꞌ nin sihmɛhʉ, nɛ høntꞌa Oją ma Tahʉ i nu ahʉ ꞌbɛꞌa gá ꞌyøthʉ, nɛ i ja ꞌbɛꞌa di ꞌda ahʉ bʉya, bi ꞌyɛ̨nꞌa ra Jesús.
Gui hyomhbʉ ꞌbɛꞌa dí nɛcmanho bʉ mahɛ̨tsꞌi
19 Nɛ manꞌda bi man ra Jesús, bi ꞌyɛ̨na:
―Hin gui munsꞌhʉ ꞌbɛꞌa gdám mɛmbɛtihʉ ua ja ra ximhäi, nguetho nuua i ꞌbʉh yʉ zuꞌuɛ̨ ngue di tsꞌoni ꞌbɛꞌa gätho guí pɛsꞌhʉ, nɛ jaꞌbʉ da boxjua, nɛ jaꞌbʉ da bɛ̨ ahʉ yʉ bɛ̨. 20 Pɛgue gui hyoni gui xąnthʉ ꞌbɛꞌa dí hnumanho ahʉ bʉ mahɛ̨tsꞌi. Nguetho hin te dim ꞌbɛpʉ, hin da yʉrpʉ yʉ bɛ̨ ngue da bɛ̨ ahʉ ꞌbɛꞌa guí pɛsꞌhʉ bʉ, nɛ hin da boxjua, nɛ njoꞌo bʉ yʉ zuꞌuɛ̨ ngue di tsꞌoni. 21 Nguetho hønbʉ i ja ním pɛꞌtsꞌi nꞌda im bɛ̨n rá mbʉi nꞌda. Nuꞌbʉ guecua ja ra ximhäi i ja ꞌbɛꞌa i pɛꞌtsꞌa nꞌda, høntꞌua im bɛ̨n a nꞌda, nɛ nuꞌbʉ guepʉ mahɛ̨tsꞌi, guepʉ im bɛ̨n a nꞌda ꞌbʉ, bi ꞌyɛ̨nꞌa ra Jesús.
Ran nɛqui ní mbʉi nꞌda
22 Nɛ xø bi ꞌyɛ̨na:
―Nɛ nuꞌbʉ høntꞌa xʉn ho guím bɛ̨mhbʉ nɛ guí øthʉ, din ja ahʉ tengutho ꞌbʉ nꞌda ra jąꞌi xʉn ho rá dä, i handi xʉn ho ran nɛqui, din jabʉ ni mbʉihʉ. 23 Pɛ nuꞌbʉ hinga gueꞌa guím bɛ̨mhbʉ, sä guí ɛ̨mhbʉ i ja ahʉ ran nɛqui, pɛgue xʉm ꞌbɛxui thoho ni mbʉihʉ, tengutho ꞌbʉ nꞌda ra jąꞌi ngue hingui ho rá dä, nɛ xʉm ꞌbɛxui thoho bʉ i handi, bi ꞌyɛ̨nꞌa ra Jesús.
Hin di yoho yʉ́ hmu nꞌda
24 Nɛ xø bi ꞌyɛ̨na:
―Nɛ hingui sä dim ꞌbʉ i yoho yʉ́ hmu nꞌda ra ꞌyɛ̨hɛ. Nguetho nuꞌbʉ yoho yʉ́ hmu i ꞌbʉ a nꞌda, nuꞌa nꞌda da numanho, nɛ nuꞌa manꞌda hin da numanho. Uague nuꞌa nꞌda da hyumbi dim pɛhmi a, pɛ nuꞌa manꞌda da zocpa thoho rá ꞌbɛfi a. Janangueꞌa hingui sä yoho yʉ́ hmu da dɛnꞌna nꞌda. Hingui sä da ꞌyɛ̨mp Oją rá Hmu ꞌbʉ i numanho ʉ yʉ mbɛti, nguetho tenguꞌbʉ rá hmu a ra mbɛti, bi ꞌyɛ̨nꞌa ra Jesús.
Oją di jamansu yʉ́ ꞌyɛ̨cꞌyɛi
25 ―Janangueꞌa dí xi ahʉ, hin go guim bɛ̨nsɛhʉ ꞌbɛꞌa gui sihʉ ngue gdám ꞌbʉhmbʉ, nɛ xín guim bɛ̨mhbʉ ꞌbɛꞌa gui hyehʉ. Pɛ guim bɛ̨mhbʉ ngue manꞌda di muui ni tehʉ xinda gue ʉ nin tsꞌihmɛhʉ, nɛ manꞌda di muui ni jąꞌihʉ xinda gue ʉ ni hehʉ, bi ꞌyɛ̨nꞌa ra Jesús. 26 Dami nuhʉ yʉ doja i ꞌyo hønbʉ go hapʉ, nɛ hinꞌyʉ yʉ́ huąhi, nɛ xín te i pɛꞌtsꞌi, pɛ dí xi ahʉ, nu Oją ma Tahʉ bí ꞌbʉpʉ mahɛ̨tsꞌi gätho i ꞌuįn ʉ. Nɛ nu ahʉ, manꞌda di mu ahʉ xinda gue ʉ yʉ doja, bi ꞌyɛ̨nꞌa ra Jesús. 27 Nɛ ha guím bɛ̨mhbʉ manꞌda nyaꞌa gam ꞌbʉhmbʉ ua ja ra ximhäi ꞌbʉ ɛ̨mmɛ guím bɛ̨ndumbʉihʉ ꞌbɛꞌa gätho guidí ꞌbɛhmbʉ.
28 Nɛ hanja ɛ̨mmɛ go guím bɛ̨nsɛhʉ nangue ni hehʉ. Xøgue tsꞌʉtho guí ɛ̨cꞌyɛihʉ, bi ꞌyɛ̨nꞌa ra Jesús. Pɛ dami nuhʉ yʉ døni i ja bʉ dąpo, nɛ nuꞌʉ hingui dim pɛfi nɛ xíngui di hoc yʉ́ he. 29 Pɛ dí xi ahʉ, manꞌda mahotho yʉ døni xínda gue a rá he ra tsꞌʉtꞌabi Salomón ngue mí he ꞌbʉ mi ja rá tsꞌɛdi, bi ꞌyɛ̨nꞌa ra Jesús. 30 Nɛ ngubʉ bi ꞌyøtꞌa Oją nangue yʉ døni, mahotho nám pa ya, nɛ nixudi da mba ntsꞌɛqui nɛ da tꞌudi. Janangueꞌa guim bɛ̨mhbʉ, manꞌda xʉn ho da ꞌyøtꞌahʉ Oją xinda gue ʉ yʉ døni, bi ꞌyɛ̨nꞌa. 31 Janangue o guí ɛ̨mhbʉ: “ꞌBɛꞌa hmaha ga sihʉ.” Uague: “ꞌBɛꞌa hmaha ga hehʉ.” 32 Nguetho nuꞌʉ i thąnde yʉ́ oją zɛhɛ, gueꞌa ząi i honꞌʉ, pɛ nuꞌahʉ i ꞌbʉpʉ ni Tahʉ bʉ mahɛ̨tsꞌi, nɛ i pądi ꞌbɛꞌa gä guidí ꞌbɛhmbʉ, bi ꞌyɛ̨nꞌa ra Jesús. 33 Janagueꞌa nu ahʉ, mꞌbɛtꞌo thoho gan umhbʉ di manda ahʉ rá tsꞌɛdi Oją, nɛ gui hyomhbʉ nꞌda ra hogambʉi nangue rá pähä Oją, nɛ nubʉya di ꞌda ahʉ ꞌbɛꞌa gätho gui hyomhbʉ. 34 O guím bɛ̨ndumbʉihʉ, o guí ɛ̨mhbʉ: “ꞌBɛꞌa da zä ga øthʉ ꞌbʉ nixudi.” Pɛgue gui tømhbʉ, ꞌbɛ nixudi ja gui pąhmbʉ bʉya ꞌbɛꞌa da zä gui ꞌyøthʉ. Nꞌda pa ngu nꞌda pa i ja ꞌbɛꞌa din ja, bi ꞌyɛ̨nꞌa ra Jesús.