Ra Jesús bi ma hingui ho ran yąpi
7
―“Nuna bi ꞌyøtꞌ yʉ tsꞌoqui,” hin gui ꞌyɛ̨mhbʉ, nꞌdahma hinga gueꞌa dí tsꞌɛpꞌahʉ a, bi ꞌyɛ̨ngähe ra Jesús. 2 Pɛ nuꞌbʉ guídi yąfʉ ʉ miꞌda ngue guím bɛ̨mhbʉ hønsɛ ahʉ xʉn ho ahʉ, pɛ Oją hin da numanho ahʉ ꞌbʉ. Nɛ ꞌdaꞌingu da ꞌyøtꞌahʉ Oją tengu gá ꞌyørpahʉ ʉ gá yąfʉ, bi ꞌyɛ̨na. 3 Hanja bi zä gá nurpahʉ ra zi häi i o rá dä ni mijąꞌihʉ, nɛ hin go guí pąhmbʉ i o ra xɛcza ni dähʉ. In jabʉ ní nɛqui ni tsꞌoquihʉ. 4 Nɛ ha da zä gui xihmbʉ ni mijąꞌihʉ: “Mba ga hąpꞌa ra häi o ni dä,” sä gui ꞌyɛ̨mfʉ, nɛ go manꞌda xʉn ndoho ra xɛcza i o ni dähʉ. 5 Ɛ̨mmɛ guidí yorpahʉ a guí øthʉ. Pɛ ndeꞌbʉ mꞌbɛtꞌo gan hojʉ nangue yʉ tsꞌoqui guídi hosɛhʉ, janangueꞌa da zä gui hyąmpꞌahʉ ra häi o rá dä ni mijąꞌihʉ, bi ꞌyɛ̨nꞌa ra Jesús.6 O guidí unhdʉ a xʉn ho ʉ yʉ foꞌyo, ndetho da za ahʉ. O gueꞌbʉ guidí unhdʉ a di muui ʉ yʉ tsꞌʉdi, ndetho da nɛm bʉ häi, bi ꞌyɛ̨nꞌa ra Jesús.
Nuꞌbʉ ja da tꞌäpꞌa Oją di uni
7 Nɛ xø bi ꞌyɛ̨mpꞌʉ:
―Dami ꞌyäfʉ Oją ꞌbɛꞌa guí homhbʉ, nɛ nuꞌa di ꞌda ahʉ. 8 Nguetho nuꞌa toꞌo da ꞌyädi, Oją di unꞌna bi ꞌyäpi. Nɛ nuꞌa toꞌo ja a i honi, di und Oją a i honi. Nɛ nuꞌa toꞌo da hyoni da socpa nꞌda ra goxthi njutꞌi thoho, Oją da xocpa a, bi ꞌyɛ̨nꞌa ra Jesús.
9-11 Pɛ nuꞌahʉ madagueꞌbʉ gyʉ́ tsꞌomꞌbäihʉ, xínga nꞌda ahʉ guidí unhdʉ ra do ni tꞌʉhnihʉ ꞌbʉ i äꞌahʉ ra hmɛ, nɛ xíng ra cꞌɛ̨yą guidí unhdʉ ꞌbʉ i ä ahʉ ra huą, pɛ høntꞌa xʉn ho guidí unhdʉ ni tꞌʉhnihʉ. Ha maguetꞌa Oją ma Tahʉ ꞌbʉpʉ mahɛ̨tsꞌi ngue hin di ꞌda ahʉ xʉn ho ꞌbʉ ja a guí äfʉ, bi ꞌyɛ̨nꞌa ra Jesús.
12 Nɛ nuꞌbʉ guí nde da ꞌyøtꞌahʉ ran ho ni mijąꞌihʉ, ndeꞌbʉ gui ꞌyørpahʉ ran ho. Gueꞌa nam bønꞌa rán tꞌɛ̨di ra Moisés nɛ rám hma yʉ pøngahyą mayaꞌbʉ, bi ꞌyɛ̨nꞌa ra Jesús.
Nꞌda ran tꞌuti nangue ra goxthi nɛ yʉ ꞌyu
13-14 Nɛ manꞌda bi man ra Jesús, bi ꞌyɛ̨na:
―Nuꞌa ní yʉtꞌa nꞌda bʉ ja ra te maząi, tenguꞌbʉ nꞌda ra goxthi xʉn tsꞌįtꞌi, uague nꞌda ra tꞌʉꞌyu, nɛ hingui ngu yʉ jąꞌi i numanho da thopʉ. Pɛ dami hyomhbʉ gui cʉthʉ bʉ. Nguetho nuꞌa ra goxthi xʉn ndoho nɛ ra dąꞌyu ní zix a nꞌda bʉ ja ran ʉnbi maząi, nɛ xʉn ngu ʉ yʉ jąꞌi i numanho da thopʉ, bi ꞌyɛ̨nꞌa ra Jesús.
Ndaꞌa ʉ yʉ hyäte pøngahyą
15 ―Pɛ gam fähmbʉ nangue yʉ hyäte pøngahyą. Nuꞌbʉ i søm bʉ guí ꞌbʉhmbʉ, sä øtꞌe tenguꞌbʉ yʉ dɛꞌyo ngue xʉn ho, pɛ nu yʉ́ mbʉi tenguꞌbʉ nꞌda ra zate. 16 Nɛ da zä gui pąhmbʉ yʉ hyäte pøngahyą nangue yʉ́n tꞌøtꞌe i øtꞌe, tengu thoho yʉ za da bą a nꞌda nangue yʉ́n dätꞌä i zʉpʉ. Nguetho hin din zʉpʉ ja nꞌda ra za nꞌda ran dätꞌä ꞌbʉ hinga gueꞌa rá za a. 17 Pɛ nu ra za xʉn ho i zʉh yʉ́n dätꞌä xʉn ho, nɛ ngutho ra za hingui ho i zʉh yʉ́n dätꞌä hingui ho. 18 Nguetho nuꞌa ra za xʉn ho hin da zä din zʉpʉ yʉ́n dätꞌä ngue hingui ho, nɛ ngutho a ra za hingui ho hin njąmꞌbʉ da zä din zʉpʉ yʉ́n dätꞌä xʉn ho. 19 Nɛ nu yʉ za hingui ho ʉ yʉ́n dätꞌä, da mba ntꞌɛtsꞌi nɛ da tꞌudi. 20 Janangueꞌa da zä gui pąhmbʉ ʉ yʉ hyäte pøngahyą nangue ꞌbɛꞌa da ꞌyøtꞌe, bi ꞌyɛ̨nꞌa ra Jesús.
Ndaꞌa ʉ di manda rá tsꞌɛdi Oją
21 Nɛ xø bi ꞌyɛ̨nꞌa ra Jesús:
―Nɛ sä ɛ̨na yʉ́ hmujʉ ʉ ꞌda, pɛ hin da yʉrpʉ di manda rá tsꞌɛdi Oją ʉ. Pɛ høntꞌʉ majuąni i øtꞌ rá pähä ma Ta mahɛ̨tsꞌi da yʉrpʉ ʉ. 22 Nɛ nuꞌbʉ bi zøn ra pa ran juąnbi ꞌbʉ rán zɛgui, xʉn ngu da mbarqui da ꞌyɛ̨ngui: “Ma Hmu, nugähe dá mamhbe a nim hma, nɛ nangue ni thuhu dá hømhbe thi yʉ zįthu, nɛ nangue ni thuhu xʉn ngu yʉn tꞌøtꞌe mixte dá øthe,” da ꞌyɛ̨ngui. 23 Pɛ nugä ga ɛ̨mpꞌʉ: “Njąmꞌbʉ dá pą ahʉ. Dami ꞌuehmbʉ ua ja ma hmigä, gyʉ tsꞌomꞌbäihʉ,” ga ɛ̨mbi, bi ꞌyɛ̨nꞌa ra Jesús.
Høntꞌa go toꞌo in nde da ꞌyø a dím ma, bi ꞌyɛ̨nꞌa ra Jesús
24 ―Pɛ nuꞌa toꞌo i øh ma nde nɛ i øtꞌa ma pähägä, i øtꞌe tengu bi ꞌyøtꞌa nꞌda ran ꞌyohʉ ngue mí ja rán ꞌyomfɛ̨ni nɛ bi hyø a nꞌda rá ngu bʉ ja nꞌda ra dongu xʉn juąni. 25 Nɛ bin ja nꞌda ra dąꞌye, nɛ ɛ̨mmɛ xʉn ngu yʉ dehe bi ꞌyugui, nɛ bá ɛ̨h ran dąhi xʉn ndoho mí nde xtí yøtꞌa ra ngu. Pɛ him bi yøtꞌa, nguetho nuꞌa ra ngu mí høpʉ ja ra dongu xʉn ho. 26 Pɛ nuꞌa toꞌo i øꞌa dí ma nɛ hingui ʉrpa ra güɛnda a, i øtꞌe tengu bi ꞌyøtꞌa nꞌda ran ꞌyohʉ ngue ra ꞌyąmbʉi, nɛ bi hyøh rá ngu bʉ mi ja nꞌda ra ꞌbomu. 27 Nɛ bin ja nꞌda ra dąꞌye ngue bi ꞌyuh yʉ dehe, nɛ ran dąhi xʉn ndoho, nɛ bi yøtꞌa rá ngu. Nɛ ɛ̨mmɛ ntsꞌutho bin ja bʉya, bi ꞌyɛ̨nꞌa ra Jesús.
Nu yʉ jąꞌi bi numanho rán xädi ra Jesús
28-29 Nɛ nuꞌbʉ mi gua a bi ma ra Jesús ꞌbʉ mí hyupʉ ja ra nyuni, nu yʉ jąꞌi mi huhmbʉ bʉ bi hyonya ʉ.
―Haguen ja i xänbi xʉn ho, nɛ hinga ngubʉ i xängahʉ ma xänbatehʉ bʉ ja ra niją, bi ꞌyɛ̨nꞌʉ yʉ jąꞌi.
Nguetho nuꞌbʉ mi xänba ra Jesús, bi ꞌyuti ngue mi ja rá tsꞌɛdi xʉn ho a.