Ra Jesús bi hocꞌa nꞌda ran ꞌyohʉ mi hɛ̨mb ra tꞌaxcaꞌya
8
Nɛ nuꞌbʉ mi gua a bi man ra Jesús, nɛ bi gąpʉ ja ra nyuni bʉya, nɛ ɛ̨mmɛ xʉn ngu yʉ jąꞌi mí numanho da dɛnthoho mahønꞌa. 2 Nɛ bá ɛ̨ꞌa nꞌda ran ꞌyohʉ ngue mi hɛ̨mb ra tꞌaxcaꞌya. Bin dąnyahmu bʉ mí ꞌbäh ra Jesús, nɛ bi ꞌyɛ̨mbi:―Gra Hmu, nuꞌbʉ ni pähä, da zä gui ꞌuecꞌi tsꞌʉ ran ʉ dí hɛ̨mbi.
3 Nɛ nu ra Jesús bʉya bi uąt rá ꞌyɛ bi dädi nɛ bi ꞌyɛ̨mbi:
―I jagä ra pähä ngue ꞌbex da zä i. Dami yą́ni.
Nɛ nuꞌbʉ mí ꞌyɛ̨mbi, ꞌbexgue bi yąnꞌa ran ꞌyohʉ. 4 Nɛ nu ra Jesús bʉya bi hɛcpa a ran ꞌyohʉ njon da xifi toꞌo a bi japi bi yąni, nɛ bi ꞌyɛ̨mbi:
―Ní mba bʉ ꞌbʉh yʉ mbäją da nu i ngue ya bi yąn i, nɛ gui unꞌna nꞌda ra ꞌbøtsꞌe tengu i man yʉ́n tꞌɛ̨di ra Moisés, bi ꞌyɛ̨nꞌa ra Jesús.
Nɛ ja bi thopʉ ra hnini Capernaum bʉya.
Ra Jesús bi hocpa rá ꞌyɛ̨hɛ nꞌda ra hmudofʉi
5 Nɛ nuꞌbʉ mí zøm bʉ ra hnini Capernaum a ra Jesús, ꞌbex bá ɛ̨ a nꞌda ra hmudofʉi ra mɛngu bʉ Roma, nɛ bin cꞌatꞌui nɛ bi ꞌyäp ra mate, 6 bi ꞌyɛ̨mbi:
―Nuꞌi grá Hmu, nu nꞌda ma ꞌyɛ̨hɛ i ꞌbɛm bʉ ja ma ngu, i tsꞌa rá jąꞌi, hingui sä di ꞌyąni, ɛ̨mmɛ xʉn ꞌdoni, bi ꞌyɛ̨mbi.
7 Nɛ nu ra Jesús bi ꞌyɛ̨mpꞌa:
―Ga mba bʉ ga hoqui.
8-9 Pɛ nu ra hmudofʉi bʉya bi ꞌyɛ̨mbi:
―Hingui jatho gui mba bʉ ja ma ngu, grá Hmu, nugä hin dí sʉcä tengu e nɛ hin drá judíogä. Pɛ dí pądi ngue i ja ni tsꞌɛdi zɛhɛ, ngue nuꞌbʉ guim ma da yąni, nɛ ꞌbexgue da yąni, bi ꞌyɛ̨na. Tengu thohogä bin ꞌdacꞌi tsꞌʉ man tꞌɛ̨di, nɛ nuꞌbʉ i ja ꞌbɛꞌa dí xi ʉ ma dofʉi nɛꞌʉ ma ꞌyɛ̨hɛ, ꞌbexgue ꞌdahmantho in ja. Nɛ ngutho i, da zä guim mantho ua nɛ ꞌbexgue da yąm bʉya, bi ꞌyɛ̨nꞌa ra hmudofʉi.
10 Nuꞌbʉ mí ꞌyøh ra Jesús ꞌbɛꞌa bi man a ra hmudofʉi, bi hyonya thoho nɛ bi xi ʉ min ꞌyohʉ:
―Majuąni dí xi ahʉ, njąmꞌbʉ xtá tįngä nꞌda ma mɛnguhʉ yʉ jąꞌi israel dyʉ judíohʉ ngue xtám bądi i ja ma tsꞌɛdi xʉn ho tengu na ran ꞌyohʉ, bi ꞌyɛ̨nꞌa ra Jesús. 11 Guim bɛ̨mhbʉ a dí xi ahʉ, xʉn ngu yʉ jąꞌi ngue gätho na ndoho ra ximhäi, ngue him ma mijudíohʉ, da ꞌyɛ̨cꞌyɛigui nɛ da yʉrpʉ di manda rá tsꞌɛdi Oją, ꞌdarbʉ dim ꞌbʉhmbʉ ma ngʉrpa bombøtahʉ ra Abraham, nɛ ra Isaac nɛ ra Jacob. 12 Pɛ xʉn ngu ma mijudíohʉ ngue yʉ́n sähʉ xtán yʉrpʉ, pɛ manꞌda go da tꞌɛntpʉ ja ra ꞌbɛxui ʉ, nɛ din zom bʉ nɛ din guxpʉ yʉ́ tsꞌi, bi tꞌɛ̨mpꞌʉ yʉ jąꞌi ꞌbʉ mi ꞌyɛ̨nꞌa ra Jesús.
13 Nɛ nubʉya bi tꞌɛ̨mpꞌa ra hmudofʉi:
―Ní mba ni ngu, ya bin ja a gám ma nguetho gá ꞌyɛ̨cꞌyɛi i ja ma tsꞌɛdi, bi ꞌyɛ̨nꞌa ra Jesús.
Nɛ ꞌbexgue bi yąn a rá ꞌyɛ̨hɛ bʉya.
Ra Jesús bi hocpa rá suto ra Pedro
14 Nɛ nuꞌbʉ mí mbencꞌa ra hmudofʉi bʉya, xø bi tho a ra Jesús, bi zøm bʉ rá ngu ra Pedro. Nɛ bi nu ꞌbɛm bʉ rá oi a rá suto ra Pedro, mi hɛ̨mb ra pa. 15 Nɛ nu ra Jesús bʉya bi bɛndba rá ꞌyɛ, nɛ ꞌbex bi bøn a ra pa mi hɛ̨mbi. Nɛ bi ndancꞌa ra xisu bʉya, bi hyonba ra hmɛ a ra Jesús nɛ ʉ mín ꞌyohʉ, nguetho ya bi yąnꞌa ra xisu bʉya.
Xʉn ngu yʉ hyɛ̨nni bi hocꞌa ra Jesús
16 Nɛ nuꞌbʉ min xui bʉya xʉn ngu yʉ jąꞌi bá tsꞌi bʉ mi ꞌbʉh ra Jesús ngue min ꞌyohʉ yʉ zįthu. Nɛ høntꞌa nꞌdare bi man ra Jesús, ꞌbexgue gätho bi hyøn a thi ʉ yʉ zįthu, nɛ bi hocꞌʉ yʉ hyɛ̨nni. 17 Gätho bin ja ꞌbɛꞌa bi man a ra pøngahyą Isaías mayaꞌbʉ ngue din ja ꞌbʉ mi ꞌyɛ̨na: “Da du zɛhɛ ꞌbɛꞌa gätho xʉn hɛ̨i dín nuhʉ, nɛ da nusɛ ꞌbɛꞌa gä man ʉ dí hɛ̨mfʉ,” bi ꞌyɛ̨nꞌa ra Isaías ꞌbʉ mayaꞌbʉ.
Yoho yʉn ꞌyohʉ ɛ̨na da dɛnꞌna ra Jesús
18 Nɛ nuꞌbʉ mín nu ra Jesús ngue ɛ̨mmɛ xʉn ngu yʉ jąꞌi mi ꞌbäpʉ, bi ꞌyɛ̨mpꞌʉ yʉ́ xädi:
―Masque xʉn ho ꞌbʉ ga thohmbʉ ꞌdanguadi ra dądehe, bi ꞌyɛ̨na.
19 Nɛ nu nꞌda ra xänbate niją bi ꞌyɛ̨mbi:
―Xänbate i, dín nde ga tɛnꞌni i hønbʉ go hapʉ gui mba, bi ꞌyɛ̨mpꞌa ra Jesús.
20 Nɛ bi dą a ra Jesús nɛ bi ꞌyɛ̨mbi:
―Pɛ nu yʉ haho i ja yʉ́ ngu nɛ yʉ doja i ja hapʉ da ꞌyoi. Pɛ nugä ngue dán jąꞌigä ua ja ra ximhäi, hinꞌyʉ ma ngungä ua, bi ꞌyɛ̨mthoho ra Jesús.
21 Nɛ xø bi ꞌyɛ̨nꞌa manꞌda ra jąꞌi min ꞌyohʉ bʉya:
―Ma Hmu, dami tøcpi tsꞌʉ, ꞌbɛ ga äcä tsꞌʉ ma ta nɛ ga tɛnꞌna bʉya, bi ꞌyɛ̨mbi.
22 Bi dąꞌa ra Jesús, bi ꞌyɛ̨mbi:
―Tɛnga maha, nuꞌʉ xʉn du da ꞌyä ʉ ꞌbʉpʉ, tenguꞌbʉ nɛ ʉ xʉn du ʉ, bi ꞌyɛ̨na.
Ra Jesús bi säyaba ran dąhi nɛ ra tꞌøthe
23 Nɛ nuꞌbʉ mi guaꞌa man ra Jesús bʉya, ꞌbex bi hyu bʉ ja ra mbosa nɛ bi mbähä yʉ́ xädi, dí mba bʉ ꞌdanguadi ra dądehe. 24 Nɛ bi mbʉꞌa nꞌda ran dąhi tsꞌɛdi bi ꞌyɛn ra dehe, nɛ ɛ̨mmɛ di thoni yʉ tꞌøthe, bi dons i tsꞌʉ ra dehe a ra mbosa. Pɛ nu ra Jesús mí ąha, him bi ꞌyʉrpa ra güɛnda ꞌbɛꞌa midí ja ra dehe. 25 Nɛ bi ꞌyä ʉ yʉ́ xädi nɛ bi ꞌyɛ̨mbi:
―Gra Hmu, dami nuhu, guin yąnje, nguetho ya in nde ga tonthʉ mbo ra dehe, bi ꞌyɛ̨mbi.
26 Nɛ nu ra Jesús bi dądi:
―Hanja, ha ɛ̨mmɛ zi tsꞌʉtho guí ɛ̨cꞌyɛigahʉ ngue i ja ma tsꞌɛdi, nɛ guín suhʉ.
Nɛ nubʉya bi ndancꞌa ra Jesús nɛ bi xi a ran dąhi ngue din hɛ̨ nɛ ra dehe, nɛ ꞌbexgue bin hɛ̨ bʉya. 27 Nɛ nuꞌʉ yʉn ꞌyohʉ bʉya bi hyonya thoho ꞌbɛꞌa bi ꞌyøtꞌa ra Jesús.
―ꞌBɛꞌa di ꞌyɛ̨tꞌui na ran ꞌyohʉ, nguetho nɛ ran dąhi i øꞌa i xifi, nɛ ra dehe i øꞌa i xifi, bin ꞌyɛ̨mzɛhɛ ʉ.
Ra Jesús bi hocꞌi yoho yʉn ꞌyohʉ min ꞌyohʉ yʉ zįthu
28 Nɛ nubʉya bi zøm bʉ ꞌdanguadi ra dądehe bʉya, nguepʉ ra xɛqui Gadara. Nɛ ꞌbex bá ɛ̨pʉ yoho yʉn ꞌyohʉ ngue min ꞌyohʉ yʉ zįthu, nɛ mán tsꞌutho ʉ, tengutho ʉ yʉ zate. Mí ꞌbʉpʉ ja yʉn ꞌyägui ʉ, janangueꞌa nu yʉ jąꞌi i su da thopʉ hänbʉ ja ran ꞌyägui. Nɛ ꞌbex bá ɛ̨ꞌʉ yʉn ꞌyohʉ bin cꞌathʉ a ra Jesús, nɛ bi mbafi:
29 ―ꞌBɛꞌa gní ꞌyɛ̨cua gra Jesús, rá Tsꞌʉntꞌʉ i Oją. Ha cpí ꞌyɛ̨hɛ gui ʉngahe, nɛ hinga na søn ra pa gui ʉngahe, bi ꞌyɛ̨n yʉ zįthu min ꞌyohʉ ʉ yʉn ꞌyohʉ.
―Nuꞌbʉ guín nde gui hyønje thi, dami ꞌdaje ran tꞌɛ̨di ga cʉthe nʉ ꞌyo yʉ tsꞌʉdi, bi ꞌyɛ̨nꞌʉ:
32 ―Ni mbähä, dami cʉthʉ nʉ, bi ꞌyɛ̨nꞌa ra Jesús.
Nɛ nu yʉ zįthu bʉya bi bøm bʉ ja rá mbʉi ʉ yʉn ꞌyohʉ, nɛ ꞌbexgue bi yʉrpʉ ꞌbʉh yʉ tsꞌʉdi. Nɛ nu yʉ tsꞌʉdi bʉya bin tihi nɛ bi gąpʉ ja ra nguani, him bi zä bin säya, nin uɛ̨m bʉ ja ra dehe, bim ꞌbɛpʉ. 33 Nɛ nuꞌʉ mi fä ʉ yʉ tsꞌʉdi bʉya, ꞌbexgue bi mba nꞌdihi bʉ ja ra hnini, nɛ nuꞌbʉ mi zøm bʉ, bi mam bʉya ngue ꞌbɛꞌa bin ja nangue ʉ yʉn ꞌyohʉ min ꞌyohʉ yʉ zįthu, nɛ nangue ʉ yʉ tsꞌʉdi. 34 Nɛ bá ɛ̨h yʉ mɛngu bʉ ra hnini bʉya, bi zøpʉ ꞌbäh ra Jesús, nɛ ntsꞌɛdi bi ꞌyäp ra mate ngue da mbengui, nguetho him bi numanho ꞌbɛꞌa bi ꞌyøtꞌa.