Ra Jesús bi hocꞌa nꞌda ran ꞌyohʉ xí tsꞌa rá jąꞌi
9
Nɛ nu ra Jesús bʉya, xø bá hu mahønꞌa ra mbosa, bá peng bʉ ꞌdanguadi ra dądehe. Bi zøm bʉ ra hnini mi ꞌbʉi. 2 Nɛ bá thunba bʉ manꞌda ra hyɛ̨nni mahønꞌa, ngue nꞌda ran ꞌyohʉ bá ꞌyox ra ꞌbeza nguetho midí tsꞌa rá jąꞌi. Nɛ ꞌbexgue mí pą a ra Jesús mí ɛ̨cꞌyɛi ʉ ngue i jasɛ rá tsꞌɛdi, janangueꞌa bi ꞌyɛ̨mpꞌa ra hyɛ̨nni:―O te guím bɛ̨ni nꞌyø, nguetho ya dá punꞌna ni tsꞌoqui, bi ꞌyɛ̨nꞌa ra Jesús.
3 Nɛ nuꞌʉ ꞌda yʉ xänbate niją bʉya, nuꞌbʉ mi ꞌyøde ꞌbɛꞌa bi man ra Jesús, ꞌbex bi bɛ̨n ʉ:
―Nuna ran ꞌyohʉ hingui ho i øtꞌ na, ha hinga høntꞌa Oją sä di punba nꞌda, mi ɛ̨nsɛ ʉ.
4 Pɛ nu ra Jesús ꞌbex bi bądi ꞌbɛꞌa mim bɛ̨nꞌʉ yʉ xänbate niją, nɛ bi ꞌyɛ̨mpꞌʉ:
―Hingui ho guím bɛ̨mhbʉ mbo ni mbʉihʉ, ngue guí ɛ̨mhbʉ hingui ho ꞌbɛꞌa dá øtꞌä, bi ꞌyɛ̨na. 5-6 Ha guím bɛ̨mhbʉ nte ní mbatho dá xicä ran ꞌyohʉ, ngue rá tsꞌoqui ya dá punbi. Ha guím bɛ̨mhbʉ manꞌda xquí pąhmbʉ i ja ma tsꞌɛdi ꞌbʉ ga xifi da ndantsꞌi, din ꞌyo. Pɛ nuya ga utꞌahʉ ngue i ja man tꞌɛ̨digä ua ja ra häi ga punba yʉ́ tsꞌoqui yʉ jąꞌi, nugä ngue dán jąꞌigä ua ja ra ximhäi, bi ꞌyɛ̨mpꞌʉ.
Nɛ xø bi ꞌyɛ̨mpꞌa ran ꞌyohʉ i tsꞌa rá jąꞌi bʉya:
―Dami ndantsꞌi, cąx ni fįdi, ní mba ni ngu, bi ꞌyɛ̨mbi.
7 ꞌBex bi ndancꞌa ran ꞌyohʉ mi tsꞌa rá jąꞌi, bi mba rá ngu. 8 Nɛ nuꞌbʉ mín nu yʉ jąꞌi ꞌbɛꞌa bi ꞌyøtꞌa ra Jesús, bin su nɛ bi ꞌyɛ̨spa Oją nangue a nꞌda ra jąꞌi bin tꞌunꞌna ran tꞌɛ̨di ngue di punba yʉ́ tsꞌoqui yʉ jąꞌi.
Ra Mateo bi dɛnꞌna ra Jesús
9 Nɛ nuꞌbʉ mi bøm bʉ ra Jesús, bi thopʉ mi hucä bʉ dí hącä ra renta, drá hyącahäigä ngue drá Mateo, nɛ bi ꞌyɛ̨ngui:
―Dami tɛngui.
Nɛ nubʉya dá ndangui nɛ dá tɛnni.
10 Nɛ nubʉya ꞌdarbʉ dán sihmɛgähe ra Jesús yʉ́ xädigähe a ya. Nɛ bi zøm bʉ xʉn ngu yʉ ziyate hyącahäi nɛ yʉ tsꞌomꞌbäi, ꞌdarbʉ dá huhmbe bʉ dán sihmɛhe. 11 Nɛ nu yʉ fariseo bʉya, ngue im bɛ̨ni hønsɛ xʉn ho, ꞌbʉ mi nu ꞌbɛꞌa bi ꞌyøtꞌa ra Jesús, bi ꞌyängähe ngue yʉ́ xädigähe bʉya:
―Hanja in jabʉ ni xänbatehʉ ꞌdarbʉ i sihmɛhʉ yʉ ziyate hyącahäi nɛ yʉ tsꞌomꞌbäi, bi ꞌyɛ̨nꞌʉ.
12 Nuꞌbʉ mí ꞌyøꞌa ra Jesús ꞌbɛꞌa bi man ʉ, bi ꞌyɛ̨mpꞌʉ:
―Hingui honi toꞌo da mbäx ʉ im bɛ̨nsɛ xʉn zaqui tengu ahʉ, pɛ høntꞌʉ i pąsɛ xʉm bøca i honi toꞌo da mbäx ʉ tengu ya i nde da dɛngui, bi ꞌyɛ̨mpꞌʉ. 13 Ní mbähä bán xähmbʉ bʉ ja ni søcuąhʉ ꞌbɛꞌa nam bønꞌa rám hma Oją ngue i ɛ̨na: “Pɛ nugä manꞌda dí numanho ꞌbʉ gui ꞌyøthʉ ran huɛ̨cate xinda gue ʉ yʉ ꞌbøtsꞌe guidí ꞌdajʉ,” i ɛ̨n Oją, i ɛ̨m bʉ ja yʉ́ søcuą Oją, bi ꞌyɛ̨nꞌa ra Jesús. Nɛ nugä him bá ɛ̨cä gan zonꞌdʉ im bɛ̨nsɛ xʉn ho, pɛ bá ɛ̨cä gan zonꞌdʉ i pądi hingui ho, janangue da zä di päh yʉ́n ꞌyomfɛ̨ni, bi ꞌyɛ̨nꞌa ra Jesús, bi ꞌyɛ̨mpꞌʉ yʉ fariseo.
Ra Jesús bi ma ndaꞌa ní pa da ꞌyɛꞌtꞌ yʉ́n sihmɛ yʉ́ xädi
14 Nɛ nꞌda ra pa bʉya bi zøm bʉ ꞌbʉh ra Jesús yʉ́ xädi ra Xuua Nxixyą, nɛ bi ꞌyänni:
―Hanja dí ɛꞌtꞌähe man tsꞌihmɛ, nɛ yʉ fariseo, pɛ nu ni xädi hingui ɛꞌtꞌ yʉ́n tsꞌihmɛ ʉ, bi tꞌɛ̨mpꞌa ra Jesús.
15 Ra Jesús bi manꞌa nꞌda ran tꞌuti ꞌbʉ mi dądi, bi ꞌyɛ̨mbi:
―Pɛ nuꞌʉ i ꞌbʉpʉ ja ran thąti hin da du yʉ́ mbʉi, nguetho ꞌbʉpʉ a ran ꞌyohʉ din thąti. Pɛ da zøn ra ora da tsꞌispa a ran ꞌyohʉ, nɛ ja da ꞌyɛꞌtꞌ yʉ́n tsꞌihmɛ bʉya, bi ꞌyɛ̨nꞌa ra Jesús.
16 Pɛ nuꞌa din xä ʉ ma xädigä hin da bømanho ꞌbʉ nɛꞌa ram hma mayaꞌbʉ da dɛn ya, bi ꞌyɛ̨na. Tenguthoꞌbʉ nꞌda ra ꞌyaꞌbøꞌtꞌe ꞌbʉ dí ꞌbøꞌtꞌa ra ꞌbøꞌtꞌe maꞌdaꞌyo, hin da bømanho, nɛ nuꞌa ra ꞌbøꞌtꞌe maꞌdaꞌyo di tsꞌon a ra ꞌyaꞌbøꞌtꞌe. 17 Nɛ tengutho i øtꞌ yʉ jąꞌi ꞌbʉ da xitꞌ ra guiꞌuva maꞌdaꞌyo bʉ ja ra ꞌyambotꞌasɛ̨i, da føꞌa nɛ dim fäni. Janangue i xitꞌa ra guiꞌuva maꞌdaꞌyo bʉ ja ra mbotꞌasɛ̨i maꞌdaꞌyo, nɛ hin da føgue nɛ hin dim fäni, bi ꞌyɛ̨nꞌa ra Jesús, bi ꞌyɛ̨mpꞌʉ yʉ́ xädi ra Xuua.
Ra Jesús bi xoxa nꞌda ra hmute xí du, nɛ bi hocꞌa nꞌda ra xisu mi hɛ̨mb ra mbäji
18 Nɛ nuꞌbʉ mí yąhʉ ʉ, ꞌbexgue bi zøm bʉ nꞌda ra ngʉrpi bʉ ja ra niją, nɛ bin dąnyahmu bʉ mí ꞌbäh ra Jesús nɛ bi ꞌyɛ̨mbi:
―Bi du nꞌda ma tꞌįxu, ꞌyørqui tsꞌʉ ra mate ga mbɛ gui cäx ni ꞌyɛ, nɛ da dąmbɛ̨ni.
19 ꞌBex bi mba a ra Jesús, bi dɛnꞌna bi du rá tꞌʉhni. Nɛ gätho dá mbäcähe dyʉ xädigähe. 20 Nɛ nuꞌbʉ má mbähmbe bʉ ꞌyu, hin da ná sømhbe bʉ ja rá ngu a ra ngʉrpi, bi zʉje nꞌda ra xisu ngue ná ꞌdɛꞌmayo njɛya min ꞌyoui ra mbäji. Bi hyän bʉ rá xʉtha ra Jesús nɛ bi därpa rá nyąni rá pahni. 21 Nguetho mí ɛ̨nsɛ ra xisu: “Go høntho ga thärpa rá pahni, ya da yąngui.” 22 Nɛ nuꞌbʉ mi därpa rá pahni ra Jesús a ra xisu, ꞌbex bi nyɛ̨ a ra Jesús, bi nu a ra xisu nɛ bi ꞌyɛ̨mbi:
―Damin johya gra xisu, ya bi yąn i nguetho gá ꞌyɛ̨cꞌyɛi i ja ma tsꞌɛdi, bi ꞌyɛ̨mbi. ꞌBexgue gueꞌa ra ora bi yąnꞌa ra xisu bʉya.
23 Nɛ bi tho a ra Jesús bʉya, dá søngähe bʉ rá ngunꞌa ra ngʉrpi, nɛ mí ꞌbʉpʉ yʉ mbɛꞌbida nɛ xʉn ngu yʉ jąꞌi mi ꞌbʉpʉ ngue mí ɛ̨na xtá ꞌyäh ra hmute xí du. 24 Nɛ bi ꞌyɛ̨nꞌa ra Jesús:
―Dami pømhbʉ thi, nguetho nuna ra hmute him bi du, nɛ i ątho, bi ꞌyɛ̨mbi.
Pɛ bin thetho ʉ yʉ jąꞌi ꞌbʉ mi ꞌyø a bi xifi, nguetho mi pą ʉ ya xí du ra hmute. 25 Nɛ nuꞌbʉ mi bønꞌʉ yʉ jąꞌi bʉya, bi thopʉ mbo mi ꞌbɛn a ra hmute ra Jesús, nɛ bi bɛndba rá ꞌyɛ ꞌbex bi ndancꞌa nꞌdihi ra hmute. 26 Nɛ gätho na ndoho ra xɛqui bʉ bi ꞌyø ʉ yʉ jąꞌi ꞌbɛꞌa bin ja.
Yoho yʉ xädä bi hocꞌa ra Jesús
27 Nɛ bi bøm bʉ rá ngu ra ngʉrpi a ra Jesús. Nɛ bi dɛnni yoho yʉ xädä, nɛ i mbaꞌtꞌ bʉ ní mba:
―Dami huɛ̨gäꞌbe, gram bomꞌbɛto i ra David, bi ꞌyɛ̨mbi.
28 Nɛ bi zøm bʉ ja ra ngu a ra Jesús, bi dɛnꞌndʉ yʉ xädä. Nu ra Jesús bi ꞌyänni:
―Ha guí ɛ̨cꞌyɛiui i ja ma tsꞌɛdigä ngue ga xocꞌa ni däui, bi ꞌyɛ̨n a ra Jesús.
―Dí ɛ̨cꞌyɛiꞌbe ngue i ja ni tsꞌɛdi, gra Hmu, bi ꞌyɛ̨n ʉ yʉ xädä.
29 Nu ra Jesús bʉya bi därpa yʉ́ dä nɛ bi ꞌyɛ̨mbi:
―Din ja tengu a gá ꞌyɛ̨cꞌyɛiui, bi ꞌyɛ̨mbi.
30 Nɛ ꞌbex bi xo ʉ yʉ́ dä. Nɛ nu ra Jesús bʉya bi hɛcpa ʉ yʉn ꞌyohʉ, bi ꞌyɛ̨mbi:
―Njon gui xihmi ꞌbɛꞌa dá øtꞌaui.
31 Pɛ høntho bi bøm bʉ yʉ xädä, ꞌbex bi xih yʉ jąꞌi ꞌbɛꞌa bi ꞌyørpa ra Jesús.
Ra Jesús bi xocpa rá nde nꞌda ra gore
32 Nuꞌbʉ mi bøn ʉ yʉ xädä, xø bá tsꞌinba manꞌda ran ꞌyohʉ a ra Jesús. Midí goreba nꞌda ra zįthu min ꞌyoui. 33 Nu ra Jesús bʉya bi hyønba thi ra zįthu min ꞌyoui a ra gore, ꞌbex bi nyą a bʉya. Nu yʉ jąꞌi bʉya bi hyonya thoho ꞌbʉ mi nu a bin ja, nɛ bi ꞌyɛ̨na:
―Hinjąmꞌbʉ xtá nuhʉ ua ja ma häihʉ ra Israel tengu dí nuhʉ ya, bi ꞌyɛ̨n ʉ.
34 Pɛ nu ʉ yʉ fariseo sä i ɛ̨na:
―Nuna ran ꞌyohʉ i høn a thi yʉ zįthu nangue rán tꞌɛ̨di bi unꞌna rá hmu yʉ zįthu, sä i ɛ̨n ʉ.
Bi huɛ̨c yʉ jąꞌi ra Jesús
35 Nɛ nu ra Jesús nząi mi pa bʉ ja yʉ hnini nɛ min xänbate bʉ ja yʉ niją, nɛ mim mam bʉ ran ho maꞌdaꞌyo ngue ꞌbɛpʉ ní manda rá tsꞌɛdi Oją. Nɛ midí hoqui høntꞌa go man ʉ mi hɛ̨mb yʉ jąꞌi. 36 Nɛ bi huɛ̨cꞌʉ yʉ jąꞌi a ra Jesús nguetho mi ꞌbʉi tenguꞌbʉ yʉ dɛꞌyo ꞌbʉ njon midí jamansu, i ꞌyodumbʉi thoho. 37-38 Nɛ bi ꞌyɛ̨ngähe ngue yʉ́ xädigähe:
―Majuąni dí xi ahʉ, xʉn ngu yʉ jąꞌi i ꞌbʉi ngue di däp rá mbʉi Oją ꞌbʉ ꞌboꞌo da xifi nangueꞌa, pɛ hingui ngu i ꞌbʉi ngue da xifi. Ndeꞌbʉ gui ꞌyäfʉ Oją di un ra ꞌbɛfi miꞌda da mbäxꞌa rá ꞌbɛfi. Tenguꞌbʉ i ja nꞌda ra huąhi xʉ ꞌyotꞌi, nɛ hingui ngu yʉ mbɛfi, nɛ da ꞌyäpꞌa ra mɛhuąhi miꞌda yʉ mbɛfi ꞌdahma da xocꞌa nꞌdihi, bi ꞌyɛ̨nꞌa ra Jesús.