Nu ra Jesús bi zänni ꞌdɛꞌmayoho yʉ́ xädi
10
Nɛ nu ra Jesús bʉya bi zängahe dí ꞌdɛꞌmayoho gähe yʉ́ xädigähe, nɛ bi ꞌdaje rán tꞌɛ̨di ga hømhbe thi yʉ zįthu nɛ ga hoje ꞌbɛꞌa gä nín ʉ i hɛ̨mb yʉ jąꞌi.2 Nɛ nugähe ꞌdɛꞌmayoho bi zängahe, mꞌbɛtꞌo ra Simón, gueꞌa ra Pedro, nɛꞌa ra Andrés rán ꞌyohʉ a ra Pedro. Nɛ ra Jacobo nɛ a ra Xuua rán ꞌyohʉ a ra Jacobo, ngue gätho yoho yʉ́ tsꞌʉntꞌʉ ra Zebedeo ʉ. 3 Nɛ ra Felipe, nɛ ra Bartolomé, nɛ ra Tomás, nɛcä dra Mateogä ngue min hącahäigä, nɛ ra Jacobo rá tsꞌʉntꞌʉ ra Alfeo, nɛ ra Lebeo ngue gueꞌa rá thuhu ra Tadeo; 4 nɛ ra Simón tꞌɛ̨mbi ra cananista; nɛ ra Judas Iscariote, gueꞌa xí dä a ra Jesús. Nɛ guecähe ꞌdɛꞌmayoho bi huangähe ra Jesús.
Bi mbɛnꞌdʉ yʉ́ xädi da mampꞌa rám hma
5 Nɛ nuꞌbʉ mí zängahe dí ꞌdɛꞌma yohogähe bi ꞌyɛ̨nje:
―Nuya hin gui mbähä bʉ i ꞌbʉ ʉ him ma mijudíohʉ, dyʉ israelhʉ. Xínga guepʉ ra xɛqui Samaria gui mbähä. 6 Pɛ nuya gui mbähä bʉ ꞌbʉ ʉ ma mɛnguhʉ yʉ israel. Nuꞌʉ i ꞌbʉi tengu yʉ dɛꞌyo bi ꞌbɛh ra ꞌyu in nde xtán donspʉ ja ran dąte. 7 Nɛ nubʉ hapʉ gui mbähä gui ꞌyɛ̨mfʉ: “Damin umhbʉ ya ngue di manda ahʉ rá tsꞌɛdi Oją,” bi ꞌyɛ̨ngähe ra Jesús. 8 Gui hojʉ ʉ i hɛ̨mpꞌa ra tꞌaxcaꞌya, nɛ høntꞌa go man ʉ i hɛ̨mb yʉ jąꞌi, nɛ gui xoxhʉ ʉ xøn du, nɛ gui hyømhbʉ thi yʉ zįthu in ꞌyohʉ ꞌda yʉ jąꞌi. Nɛ nuꞌbʉ gui ꞌyøthʉ ʉ, hin gui ꞌyäh nin zäbihʉ, nguetho hin dá pä ahʉ a ma tsꞌɛdigä, bi ꞌyɛ̨ngähe ra Jesús.
9 Nɛ hin te ma mbɛti gui hyąxhʉ ꞌbʉ gá mbähä, bi ꞌyɛ̨ngähe. 10 Nɛ xín ni tuꞌdøzą gui tuxhʉ, nɛ høntꞌa ni he guí hehʉ nɛ høntꞌa ni thįxfani gui ꞌyʉthʉ, nɛ hinꞌyʉ ꞌbɛꞌa gui hyąxhʉ, nguetho nubʉ gui sømhbʉ i ja nin tꞌɛ̨di ngue da zimanho ahʉ ʉ.
11 Nɛ nuꞌbʉ gá sømhbʉ bʉ ja yʉ́ hnini ma mi israelhʉ gui ꞌyänhdʉ hapʉ ꞌbʉ a nꞌda ran ꞌyohʉ ngue ra hocjąꞌi nɛ nuꞌa gätho yʉ jąꞌi i numansu a. Nɛ guepʉ gam ꞌbʉhmbʉ bʉ, jagueꞌbʉ gui thohmbʉ bʉ manꞌda ra hnini mahønꞌa, bi ꞌyɛ̨ngähe ra Jesús. 12 Nuꞌbʉ gá sømhbʉ bʉ ja rá ngu, gui zɛnguahʉ, gui ꞌyäfʉ rán jąpi Oją nangueꞌa. 13 Nɛ nuꞌbʉ rán säui a da ꞌyøtꞌahʉ ʉ yʉ mɛngu bʉ hapʉ gui sømhbʉ, Oją di un rán jąpi gá ꞌyäfʉ bʉya. Pɛ nuꞌbʉ hinꞌna, tengutho ꞌbʉ nte gamí ꞌyäfʉ. 14 Nɛ nubʉ hapʉ gui sømhbʉ, nuꞌbʉ hin da zimanho ahʉ nɛ hingui nde da ꞌyømanho a guí xihmbʉ, dami pømhbʉ bʉ nɛ gui huąjʉ yʉ bøhäi ni guahʉ. Nuꞌa nam bønꞌa gui sohmbʉ bʉ ʉ. 15 Nɛ majuąni dí xi ahʉ, nu yʉ mɛngu bʉ i ja nꞌda ra hnini hin da zimanho ahʉ, pɛ nuꞌbʉ bin ja ra pa ran juąnbi, manꞌda ɛ̨mmɛ xʉn ʉ tho da nu, xinda gueꞌʉ mí ꞌbʉpʉ mayaꞌbʉ bʉ ja ra hnini Sodoma nɛ ra hnini Gomorra, bi ꞌyɛ̨nje a ra Jesús.
Yʉn ʉnbi da nu yʉ́ xädi ra Jesús
16 Nɛ xø bi ꞌyɛ̨na:
―Nuya hønbʉ go hapʉ ga pɛnꞌnahʉ, ɛ̨mmɛ di ʉnꞌnahʉ ʉ ꞌbʉpʉ, tenguthoho yʉ zate di ʉnba yʉ dɛꞌyo. Damim fähmbʉ tengu yʉ cꞌɛ̨ya nɛ gui ꞌyøthʉ tengu øtꞌ yʉ tꞌazʉ, høntꞌa ran ho gui ꞌyøthʉ. 17 Nɛ gam fähmbʉ, nguetho nu yʉ jąꞌi di dä ahʉ bʉ ꞌbʉh yʉ ngʉrpi bʉ ja yʉ niją, nɛ da mbɛpꞌahʉ. 18 Nɛ da zixꞌahʉ bʉ ꞌbʉh yʉ zɛꞌmi nɛ yʉ tsꞌʉtꞌabi, nguetho guí ɛ̨cꞌyɛigahʉ, pɛ hinga ndetho da zix ahʉ bʉ. Nguetho nuꞌbʉ da zix ahʉ bʉ, da zä gui xihmbʉ yʉ zɛꞌmi nɛ yʉ tsꞌʉtꞌabi nangue ma thuhugä, nꞌdahma nɛ ʉ yʉ judío nɛ ʉ i thąnde yʉ́ oją zɛhɛ da ꞌyøde nanguecä. 19 Nɛ nuꞌbʉ da tsꞌix ahʉ bʉ ꞌbʉh yʉ tsꞌʉtꞌabi, o guí hądumbʉihʉ ꞌbɛꞌa guim mamhbʉ o gueꞌbʉ da zä gan yąhʉ uague hinꞌna, nguetho Oją di ꞌda ahʉ ran ꞌyomfɛ̨ni ꞌbɛꞌa gui mamhbʉ ꞌbʉ bi mba ma juąnꞌni ahʉ. 20 Nguetho hinga guesɛ ahʉ gan yąhʉ ꞌbʉ bi mba ma juąnꞌni ahʉ, pɛ gueꞌa rá Hogandąhi Oją ma Tahʉ din yą, bi ꞌyɛ̨ngähe ra Jesús.
21 Nɛ dim ꞌbʉ i ꞌda di däsɛ yʉ́n ꞌyohʉ da mba ntho. Nɛ nuꞌʉ ꞌda di däsɛ yʉ́ tsꞌʉntꞌʉ bʉ ꞌbʉh ra zɛꞌmi da tho. Nɛ dim ꞌbʉ i ꞌda yʉ tsꞌʉntꞌʉ di yąp zɛhɛ yʉ́ ta ngue da tho. Nɛ din jabʉ da tꞌørpa ʉ i ɛ̨cꞌyɛigui, bi ꞌyɛ̨nꞌa ra Jesús. 22 Nɛ gätho na ndoho ra ximhäi da tsꞌan ahʉ nangue guí tɛngahʉ, pɛ nuꞌbʉ gui hyäthʉ gueꞌbʉ go ran zɛgui, gui tąha gan yąmhbʉ bʉya, bi ꞌyɛ̨nꞌa ra Jesús. 23 Nɛ nuꞌbʉ nꞌda ra hnini di ʉcꞌahʉ, dami ꞌdahmbʉ bʉ, nɛ gui mbähä bʉ manꞌda ra hnini bʉya. Nɛ majuąni dí xi ahʉ, hin gní täthʉ gätho yʉ hnini Israel gui xihmbʉ rám hma Oją nɛ gui ꞌdahmbʉ, ꞌbʉ bá pengä.
24-25 Nɛ tengu thoho nꞌda ra xädi hin da tꞌɛ̨mbi xʉn ho ꞌbʉ him bi tꞌɛ̨mbi xʉn ho rá xänbate; nɛ hin da hnumanho nꞌda ra ꞌyɛ̨hɛ ꞌbʉ him bi hnumanho rá hmu. Nɛ din jabʉ da ꞌyøtꞌahʉ, hin da numanho ahʉ yʉ jąꞌi, tengu thohogui him bi hnumanhogui, nɛ i tꞌɛ̨ngui drá zįthu, bi ꞌyɛ̨nꞌa ra Jesús.
Ra Jesús bi ma høntꞌa Oją da tsꞌu
26 ―Janangueꞌa hin gui suhʉ ꞌbɛꞌa da ꞌyøtꞌahʉ yʉ jąꞌi, guehma gui mamhbʉ a dí xi ahʉ. Hin gui cømhbʉ a. 27 Nuꞌa dí xi ahʉ ua njonguin nu, dami mamhbʉ bʉ ꞌbʉh yʉ jąꞌi, nɛ nuꞌa dí xi ahʉ njongui øde, dami mbahmbʉ bʉ ja yʉ hnini, da tꞌøpʉ ꞌbɛꞌa gätho dá xi ahʉ ya, bi ꞌyɛ̨ngähe ra Jesús. 28 Nɛ o guí suhʉ ʉ in nde da hyo ahʉ, hinꞌyʉ yʉ́ tsꞌɛdi nɛꞌa ni mbʉihʉ di juatꞌahʉ. Manꞌda xʉn ho ꞌbʉ gui suhʉ a Oją, nɛ høntꞌa i sä di ʉnꞌna ni jąꞌihʉ nɛ ni mbʉihʉ bʉ ja ran ʉnbi maząi, bi ꞌyɛ̨ngähe ra Jesús.
29-31 Janangue ꞌyo guí hądumbʉihʉ, guim bɛ̨mhbʉ yʉ doja i ꞌbä bʉ ja yʉ täi, hingui ngu di muui, pɛ nuꞌʉ xínga nꞌda da du ꞌbʉ hin rá pähä Oją da du. Janangueꞌa guim bɛ̨mhbʉ, hinꞌyʉ ꞌbɛꞌa din ja ahʉ ꞌbʉ hin rá pähä Oją din ja. Nguetho manꞌda di mu ahʉ bʉ na nu Oją xinda gue ʉ yʉ doja, nɛ i pądi gätho nangue ahʉ. Janangueꞌa hin gan suhʉ, bi ꞌyɛ̨ngähe ra Jesús.
Da ma toꞌo tɛn ra Jesús
32 ―Nɛ gätho toꞌo da mam bʉ ꞌbʉh yʉ jąꞌi ngue i tɛngä, nɛcä gam ma bʉ ꞌbʉh ma Ta nubʉ mahɛ̨tsꞌi nangue ʉ. 33 Pɛ nuꞌa toꞌo din cøm bʉ i ꞌbʉh yʉ jąꞌi nanguecä, nɛcä xin ga cøm bʉ bí ꞌbʉh ma Ta bʉ mahɛ̨tsꞌi, bi ꞌyɛ̨ngähe ra Jesús.
Ra Jesús bi ma da tsꞌʉ ʉ toꞌo da dɛnni
34 ―Nɛ hin guim bɛ̨mhbʉ ngue bá ɛ̨cä da zɛh yʉ sʉi, pɛ manꞌda din ja yʉ sʉi nanguecä. 35-36 Nu yʉ ꞌyɛ̨cꞌyɛi da tsꞌʉpʉ ja rá ngusɛ, nuꞌbʉ hing yʉ ꞌyɛ̨cꞌyɛi ꞌbʉpʉ. Nu yʉn ꞌyohʉ din sʉhmbʉ yʉ́ ta, nɛ nu yʉ xisu bʉya din sʉhmbʉ yʉ́ mbe nɛ ʉ yʉ́ cä, nangue ʉ hingui ɛ̨cꞌyɛigui, bi ꞌyɛ̨na.
37 Pɛ nuꞌbʉ nꞌda ra jąꞌi manꞌda im bɛ̨nꞌa rá ta nɛ rá mbe xínda guecä, hin ga ɛ̨mbi ngue rá hmugui. Nɛ nuꞌbʉ nꞌda ra jąꞌi manꞌda im bɛ̨nꞌa rá tsꞌʉntꞌʉ nɛ rá tꞌįxu xínda guecä, ngutho ʉ hin da zä ga ɛ̨mbi ngue rá hmugui, bi ꞌyɛ̨nꞌa ra Jesús. 38 Pɛ nuꞌbʉ ꞌboꞌo ɛ̨na i tɛngui nɛ hingui hätꞌ yʉn ʉnbi da tꞌørpe, nɛcä xín ga ɛ̨mbi rá hmugui. 39 Nɛ nuꞌa toꞌo da zu da thącpa rá te nanguecä, da mba ma ʉnbi bʉ ja ran dąte rá te a, pɛ nu toꞌo hin da zu da thącpa rá te nanguecä, hin da mba ma ʉnbi bʉ ja ran dąte a, bi ꞌyɛ̨ngähe ra Jesús.
Ra Jesús i man yʉn tꞌunni
40 Nɛ xø bi ꞌyɛ̨nꞌa ra Jesús:
―Nuꞌa toꞌo da zimanho ahʉ, nɛcä xin bi zimanhogui, nɛꞌa bá pɛngä xim bi zimanho a. 41 Nɛ nuꞌa toꞌo da zimanho nꞌda rá pøngahyą Oją nangue a ra ꞌbɛfi i øtꞌe, ꞌdaꞌangu ran ho din tꞌunui a ra pøngahyą. Nɛ nuꞌbʉ ꞌboꞌo da zimanho nꞌda ra hocjąꞌi nangue a ran hocjąꞌi i øtꞌe, ꞌdaꞌangu ran ho din tꞌunui a. 42 Nɛ nuꞌbʉ nꞌda ra jąꞌi i ja ꞌbɛꞌa di unꞌna nꞌda ma xädigä ngueꞌa i tɛngui, madagueꞌbʉ høntꞌi tsꞌʉ ra dehe di unni, pɛ nɛ a i ja ꞌbɛꞌa din tꞌunni ngue manꞌda xʉn ho, bi ꞌyɛ̨nꞌa ra Jesús.